الحياة في مصر

07:59 AM June, 07 2023

سودانيز اون لاين
مصطفى نور-امريكا نيوجرسي
مكتبتى
رابط مختصر

الحياة في مصر
انا مصطفي نور
باعتباري مقيم في مصر في اكتوبر خمسه سنوات مضت عاوزأوضح بعض المعلومات عسي ولعل تكون مفيدة للأسر في الوضع الراهن خاصة بعد ما أصبحت ملاذ امن للسودانيين نسبة لأوضاع البلد مؤخرا .. وكل الشكر لجكومه وشعب مصر التى فتحت لنا ابوابها وكانت للكثير مكان وواحه امن وامان
مصر ما بلد اغتراب ولا بلد هجرة و لكنها بلد بتعيش فيها بقروشك واظن المعلومة دي واضحة تماما للجميع ..
لذلك مهما كانت قروشك اللي جبتها معاك كتيرة لو ما ادرتها صح حتنتهي في لمح البصر ..
لابد من ترتيب الوضع المالي بدقة عشان الأسر تقدر تستقر فترة لحين هدوء الاحوال في السودان .. طبعا معروف انه في ناس كتار عندهم شقق في القاهرة وناس كتار عندهم اهل خارج مصر حيكفلوهم ..
لكن برضو ناس كتار جدا ما عندهم .، وناس كتار مع وجود شققهم الا انه فقدو مصادر دخلهم في السودان مع توقف العمل سواء كانت وظائف او أعمال حرة ..
حتي لو الحرب وقفت اليوم ، الأعمال حتحتاج شوية وقت عشان ترجع تشتغل .. فلابد من التدبير المالي حتي تنجلي الازمة ..
فحنقول كلام عام وكل زول يشيل منو المفيد
السكن: حاول بقدر الاماكن ان تسكن فى المدنالتى تبعد من القاهره شويه مثال مدينه بدر - العاشر من رمضان - اكتوبر - العبور
وهناك فرق كبير جدا فى الاسعار بتاعت الايجار قد يكون الفرق الاف الجنيهات
مفاى حاجه تخليك مرتبط بمكان معين لان فى كل مصر الخدمات متوفره وبكثره وكل ما طلعت بره القاهره كل ما كان كل ارخص الخضار الفواكه الايجار الدكاتره اى شى فيه فرق كبير
مثال الاسبوع الفات كنت فى مدينه بدر وجدت اخ اعرفه من مصر وهو رجل صديق محترم عندو 11 شقه مفروشه كل شقه ثلاث غرف وحمامين عايز فى كل العماره 40 الف جنيه يعنى الشقه يكن الايجار مفروش فى
حدود 3400 جنيه فى حين فى الفيصل الان الاجار مفروش ثلاث غرف وحمامين اقل شى الان بحوالى 10 الف جنيه شوفوا الفرق
وهناك الهدوء والهواء العليل وكل الخدمات والله متوفره
السكن المفروش حيستهلك قروشك تماما ،
افضل خيار هو الإيجار قانون جديد، يعني شقة فاضية والناس تفرشها بالبسيط وعلي مراحل ..
والناس ما تخجل لانو ده وضع طاريء ..
(تلاجة صغيرة + بوتاجاز ترابيزة + مراتب + شوية عدة للمطبخ .. )
الحاجات دي كده ممكن تقعد بيها سنة كاملة في امان ..
الاستهلاك المتوقع:
الإيجار: شهر ايجار وشهرين تأمين + سمسار = 15 الف كحد أقصي ( حسب المنطقة )
المشتروات: 15 الف
المجموع: 30 الف = الف دولار
انت كده حليت اكبر بند صرف حيواجهك واستقريت وتاني شهريا حتدفع مبلغ 4 الف مثلا ايجار بدل ما تدفع 10 او 15 الف في ايجار مفروش.
الارقام دي ممكن طبعا تكون أقل كتييييير جدا وفقا لي ال lifestyle وال budget والمنطقة السكنية لكن عامة النسبة محفوظة انه الإيجار الفاضي 30% من المفروش ..
الإنترنت:
طبعا اكيد حيكون في استهلاك متصل للانترنت اقله للمتابعة مع الاهل ، والاستخدامات المختلفة المعروفة ..
وكمان لاحقا ممكن عبره تلقي شغل اونلاين ،،
وهو هنا اهم من الغسالة والمكيف والسرير والعفش ..
إياك وانترنت الموبايل حياكل قروشك بأسرع مما تتصور
لذلك افضل حاجة تدخل انترنت ارضي WE واللي هو بي خط التلفون ، استهلاكه بسيط ولو عندك مكالمات خليها بيه عبر الواتسب والايمو وغيرهم ..
الاستهلاك المتوقع: 250 جنيه في الشهر
العلاج:
اتجول في المنطقة حولك واسأل من العيادات الملحقة بالمساجد ، العيادات دي ممتازة جدا وقروشها بسيطة وبتحل حاجات كتيرة زي علاج الأسنان ، العيون ، الفحوصات الدورية للضغط والسكري وغيرها ..
المعيشة:
مهما كان وضعكم ابعدوا من الدليفري والمطاعم وركزو علي شراء مواد اساسية للطبخ في البيت ، وفتشو حولكم عن أسواق خضار شعبية حتلاقوه بي اسعار رخيصة جدا ومعاه الفواكه كمان .،
التنقل:
الأفضل التنقل يكون بالمترو ، وتفادي التكاسي والاوبر تقليلا للتكلفة .،
التعليم:
حاليا دي فترة اجازة فالناس تركز علي الاستقرار والهدوء ولاحقا لمن العام الدراسي يقرب يبدأ في خيارات متعددة نتكلم فيها في وقتها ولو فرنا الإنترنت ممكن نضحي وندرس سنة اونلاين او ممكن تعليم منزلي.
الترفيه للاطفال وكبار السن:
الأطفال ما حيفهمو الوضع ده وعاوزين يعيشو بصورة طبيعية لذلك فتشو حولكم عن الحدائق العامة واماكن الالعاب عشان تودوهم يلعبو ويغيرو جو ..
وطلعو كبار السن يشمو هوا و يغيرو من حبسة الشقق ..
في حدائق دخولها بي 10 جنيه بس وغيرها كتير مجاني..
الناس تساعد أرباب الأسر بضبط الصرف لاقصي حد مهما كانت القروش متوفرة ، وربنا يرفع البلاء ويصلح حال البلد عاجلا غير ا عندما بعود الناس الي الوطن بعد انتهاء الحرب يجب قبل بناء البلاد والمنازل يجب اعاده بناء اخلاق الناس لان الحرب قد فضحت الاخلاق ومعادن الناس والرجال وكانت كل الشعارات والقيم والمثل خداع وكذب وزيف وظهرت معادن الرجال وعرفنا اننا شعب تجار حروب ونسي الناس كل القيم الانسانية والدينيه واصبحنا مجرد لصوص والله العظيم شي مخزي وشي مولم ان ناكل لحوم البشر وناكل اموال الناس بالباطل
ى انسان عايز اى مساعده فى مصر ارجو الكتابه الى فى الواتسهب
00201503446691
مع تحياتى
اخوكم
مصطفى نور

\ تحياتي أخي الحبيب مصطفي
متعك ربي بالعافية ولك منا كل الامتنان حاهد معنا في تيسير أمور أهلنا أخي

/B]

حبيبنا مطصفى نور .. بصراحة انت نور المنبر
كلام مفيد جداً .. وانت زول مروة
عاجز عن الشكر
نقلت مداخلتك لقروباتنا
سوف تجد الدعوات الصالحة ان شاء ا لله

شكرا كثير يا جميل

علي عبدالوهاب عثمان
اخى تحياتى
طمنونا عليكم
كيف الاهل
نحن بخير
وفى الخدمه

زهير ابو الزهراء
اخوى الغالى الدفعه
تحياتى
اتمنى من الله ان تكون انت والاهل بخير

تحياتي الحبيب مصطفى
أهلنا في العاصمة معظمهم رجعوا البلد
حاضنات الاهل والاقارب .. سبحان الله كل البيوت المهجورة
اصبحت عامرة بالأهل والاحباب .. بيوت الاباء والاجداد
رب ضارة نافعة ..
البعض الى القاهرة (علاج وجامعات )
تحياتي يا جميل
شكرا كثير

بوست هادف تحياتي لك نور
كتر الله من امثالك وبارك الله فيك ...

الطيب عباس
اخى الغالى بارك الله فيك وطمنونا عليكم وعلى كل الاهل داخل السودان وانا فى الخدمه والله لكل الاهل القادمين الى مصر