نحن فى السودان

08:24 PM May, 25 2023

سودانيز اون لاين
Amira Hussien-Sudan
مكتبتى
رابط مختصر

ما كنا متخيلين يجينا يوم او ايام زى الايام دى ….…..كلما يحدث غريب علينا وما بيشبهنا ……اخر شى كان بيخوفنا كان جهاز امن البشير وقصصه المرعبة …….حتى لما جونا المرتزقة زمن نميرى كانو بالنسبة لى ديل اولاد ناس …..بعد ما انتصرت قوات نميرى كان قائد المرتزقة هايم بالليل فى شوارع الملازمين اغلب الناس عرباته داخل البيوت اختى الكبيرة عندها عربية صغيرة واقفة قدام باب البيت …بعد منتصف الليل سمعنا خبط على الباب ونحن بنات و والدتنا فقط كلنا صحينا على الطرق المفزوع وليس المفزع ، امى بدت تنادى منو منو ….رد عليها بالله ياجماعة ممكن تدوني مفتاح العربية دى وبكرة اختها ليكم فى اى مكان امى قالت لى انت منو وكيف يعنى المهم نقاش طويل اخر شى قال ليها يا ناس انتو ما سودانية انا فلان وداير بس العربية اتخارج بيها من امدرمان امى قالت لى كر على ومالك سويت فى روحك كدى ،وحاولت مع اختى المستحيل لكن اختى رفضت تدى مفتاح عربيتا البتحبها…….المهم مشى لى جيرانا وبرضو بنفس الادب طلب عربية وادوها ليها وفعلا لقوها بعد ايام فى غرب امدرمان بى مفتاحا !

سبحان الله يا اميرة شوفي الفرق الكبير بين اولاد الناس ديلاك ووحوش مليشيات
الجنجويد البينهبوا عربات الناس بقوة السلاح ومش العربات بس ولكن يقتحموا البيوت
ويسرقوا كل شئ وبعد ما يسرقوا يحطموا كل شئ جوه البيت ...نزعة الشر متأصلة فيهم
قاتلهم الله ولعنة الله عليهم في الدنيا والاخرة

يا امتثال حقد دفين جواهم ….زى البيخلصوا فى تار الناس مالا ومالا البرهان تعملوا فيهم قتل وتشريد وسلب وبشتنة….نعلة الله عليهم الف مرة

يا أميرة العزيزة ~
هذا حديث الروح للروحِ
*وإن رحلنا بعيد نطرى خلانا

حكت وقتها أيضا صديقة من أمبدة
عند حضور ناس خليل إبراهيم لأمدرمان ، قالت سمعوا أصوات حديث
خارج المنزل ، طلعوا لقوا مجموعة منهم مشغولة بأحوالها
جابوا ليهم الموية وشاى الصباح من غير ما يطلبوا منهم .

هدى الحبيبة
الأرواح جنودٌ مُجنَّدةٌ، فما تعارف منها ائتلف، وما تناكر منها اختلف
ما قادرين حتى نتذكر ولا نفكر فى شى الا البلد
المشكلة انا جاهزة كانو يقولو لى بكره ارجعى …يارب
ده السودان البنعرفوا يا هدى وديل ناسوا البصونوا الارض ويستروا العرض

سرقة البيوت هينة المشكلة سرقة وطن كامل وسرقة مستقبل اجيال كاملة
الوضع الراهن بكل مافيه هو نتاج الاخ ان المسلمين
ينتهي بانتهائهم شنقا او رجما كما الشيطان الرجيم
..
اللوم كل اللوم يقع علي نظام الاخوان المسلمين الذي تمثله اللجنة الامنية
هم من اوصلوا السودان لهذا الوضع الكارثي
ماسرقه نظام الاخوان من اموال الشعب السوداني يفوق اكثر من 7 مليار دولار
وهذه السرقات اخطر من سرقة البيوت والعربات
لم يكنفوا بسرقة خزينة الدولة بل سرقوا ارادة شعب كامل وفرطوا في سيادة السودان ووحدة اراضيه
حتي قسموه لدولتين وايضا تنازلوا طواعية عن مدن بسكانها لمصر التي قتلت ابناء حلايب وسجنت بعضهم وعذبت اخرين
..
الاخوان دائما حلولهم كارثية يقودهم التهور وعدم تقديرهم للامور وغياب الحكمة
حصيلة الموت بدارفور حتي قبل قليل اكثر من 700 قتيل
من سرقنا ومن قتلنا ومن شردنا هم الاخوان بعدم تقديرهم للمسؤولية
والاخوان معروف عنهم الخيابة والدناءة والخسة والغدر ولا ننسي ايام المظاهرات كانوا يندسون بين الثوار للتخريب حتي يرموا
الثوار باتهامات التخريب والدمار
انهم اهل خسة ودناءة ولاضمير لهم ولا مصداقية وغير مؤتمنين
انا لا ابرئي الدعم السريع ولكن السوابق تشهد بأن الاخوان علي استعداد لفعل كل شيء من اجل
صبغ خصومهم بمظهر المجرم الحقير ولا يوجد احقر من الكوز ومن يدافع عنه باطلا او يغض الطرف عن جرمه
لن ننسي تمثيلية سرقة ونهب صيدلية ايام بداية الثورة واتهام الثوار
ايضا لا ننسي ادخالهم لكمية من المخدرات لمحيط القيادة العامة ايام الاعتصام ثم لا ولن ننسي الفيلم الذي اعده اعلام الاخوان باسم خفافيش الظلام لوصم ثوار ديسمبر بالمدمنين والمنحرفين اخلاقيا ولا ننسي حديث الحزولي الذي قال انهم اعدوا ملفات اتهام
لقوي الحرية والتغيير بتجارة المخدرات
السوابق كثيرة جدا لاجرام الاخوان لذا لا استبعد قيامهم بالسرقات والنهب باسم الدعم السريع

كلو وارد يا عبدالقادر …..وهم الدعامة منو العملهم غير الكيزان ….وسرقة الوطن وموارده اهم من سرقة الافراد قطع شك …….والاصعب تغيير طباع الناس واخلاقهم مما يجعلهم يفعلون كل قبيح واجرامى