Post: #1
Title: رحله العوده الى الجحيم..منقول من الفيس صفحة Ayman Almosbah
Author: عماد الدرديرى
Date: 05-17-2023, 01:06 AM
01:06 AM May, 16 2023 سودانيز اون لاين
عماد الدرديرى-
مكتبتى
رابط مختصر
رحله العوده الى الجحيم..
رجعنا امبارح انا وعمتي عشان نجيب اغراض شخصيه ومستندات مهمه من بحري وام درمان..
اتحركنا بالمواصلات ٨ صباحا من شندي بالغرب، ووصلنا امدرمان بعد معاناه شديده وكميه من الارتكازات، لحدي كبري الحلفايا الجيش مسيطر، كبري الحلفايا مليان عربات ومدرعات محروقه وشغال مسار واحد، من تقطع الكبري بتخش منطقه الدعم السريع، جانا جارنا بي حافله شريحه ووصلنا لحدي البيت وقبل نتحرك كنا منسقين معاهو ومتاكدين تماما انو الحركه ماشه والوضع نسبيا امن..
مهما اقول ما بقدر اوصف حجم الدمار الحصل لي مدينه بحري واحساس البؤس والفراغ الفي المدينه.. حاجه كدا زي افلام نهايه العالم او الzombie outbreak..
كميه من الخلق شايلين شنط ونازحين.. المحلات يا اما مقفوله او مكسوره ومنهوبه وابوابها فاتحه للنص.. العمارات محروقه ومليانه رصاص او مكسره من القدائف.. الشوارع لحد كبير خاليه.. العربات محرقه ومجدعه ومضروبه او منهوبه.. ارتال عسكريه من الميليشيات قدام البيوت وتحت الشجر وفي اي لحظه زول بأشر ليك تقيف يجي يحقق معاك.. انقطاع تام للكهرباء والمياه.. حراميه ولصوص شايلين شوالات وبقلعو اي شي عندو قيمه.. الناس الما طلعو من الخرطوم مفرشين فرشات في الشوارع وراقدين..
الحمدلله لقطنا حاجاتنا ومرقنا بالسلامه بعد معاناه شديده ومجازفات وتوتر ما طبيعي خصوصا انو كنا بنسمع صوت الطيران ورصاص متقطع والعربيه كانت لمبتها مولعه لكن قررنا نمرق بيها.. كنت فاتح الشبابيك وماشي براااحه ومركز لو زول قال اي حاجه بقيف طوالي.. لحدي وصلت كبري الحلفايا ومنها الى الاراضي المحرره. والحمدلله العربيه وصلتنا لحدي الجزيره اسلانج لقيت بنزين سوق اسود كبيت وصلنا لحدي شندي بعد المغرب..
العاوز اقولو لاي شخص عاوز يرجع، ماااا ترجع.. انا حقيقه رجعت عشان ارفق عمتي واجيب لابتوب الشغل ومستنداتي الشخصيه وشهاداتي..وديل في تقديري الشخصي كان ضياعهم والبيروقراطيه و التلتله الحألقاها من حكومه السجم عشان اطلعهم اهون منها يعذبوك الجنجويد 😅.
و لكن لو في ضروره شديده ترجعك، تتاكد من زول ثقه الوضع كيف، وتحدد مسارك حيكون عامل كيف وحتمشي بي شنو، تتحرك بالمواصلات او مع ناس ما تمشي براك، والنساء الكبار لو معاك بسهلو عليك كتير ويتعاونو معاك في الارتكازات.. كل الارتكازات دعم على جيش اتعاملو بصوره كويسه لانو معاي مره كبيره..
وتحاول تمشي بالزلط محل العربات متحركه عشان ما يجازفوك.. ما تلاوي او تركب راس او تحاول تحنك اوتناقش وتسلم على اي ارتكاز وتهدن من بعيييد، والشبابيك فاتحه كلها والمشي برااااحه وتكون منتبه شديد ممكن يأشر ليك زول ساي من تحت اي شجره ما الا ارتكاز
الاهم من دا كلو لو انت في الخرطوم خليك جاهز وشيل حاجاتك المهمه لو بقيت مارق، اطلع طلوع مودع، ما تغلط غلطتنا وتخلي حاجه ترجعك وتقول كلها كم يوم واحي.. الموضوع دا ما حينتهي قريب ابني حساباتك على الاساس دا.. وفي احتمال ما ينتهي وما ترجع زاتو..
ربنا يرفع البلاء ويخفف عنا جميعا وينتقم من كل من كان سببا في هذا الشقاء..
|
Post: #2
Title: Re: رحله العوده الى الجحيم..منقول من الفيس صفح
Author: Nasr
Date: 05-17-2023, 01:23 AM
Parent: #1
مقطع
| Quote: مهما اقول ما بقدر اوصف حجم الدمار الحصل لي مدينه بحري واحساس البؤس والفراغ الفي المدينه.. حاجه كدا زي افلام نهايه العالم او الzombie outbreak.. |
بحري الجميلة
بلد الناس الحلويين وطيبين
ما تستاهل
الحرب لازم تقيف
ندفن الموتي وننهض لبناء الوطن
لا للحرب
نعم للسلام
|
Post: #3
Title: Re: رحله العوده الى الجحيم..منقول من الفيس صفح
Author: Salma Hamza
Date: 05-17-2023, 04:03 AM
Parent: #1
لا حول ولا قوة الا بالله العلي العظيم.
حليل السودان ...
|
|