هل انت مع تسليح الشعب السودانى للدفاع عن الوطن ونفسه ام ضد الفكره

12:43 PM May, 13 2023

سودانيز اون لاين
مصطفى نور-امريكا نيوجرسي
مكتبتى
رابط مختصر

تحياتى
اخى الفاضل واختى الفاضله هل انت مع تسليح الشعب السودانى للدفاع عن الوطن ونفسه ام ضد الفكره
فى كل مره البرهان ومن معه يتخذوا القرار فى الوقت الغلط
حاربوا ان كانوا هم او الموتمر الوطنى حاربوا حميدتى بعد ان تمكن وصاراقوى من الجيش
وحدس ماحدس
الان الجيش مزنوق زنقه شديده ومن شهود عيان صلوا امس من السودان الى مصر
قالوا وبالحرف الواحد انو الدعم السريع منتشر فى كل مكان وان طالت فتره الحرب سوف يندحر هولاء الاوباش
والشى الثانى احتلال الاحياء والمستشفييات واخراج الناس من البيوت والنهب والسرقه التى صارت فى كل لحظه وكل مكان
مع الغياب التام لشرطه السجم من كانوا قتله للثوار فقط وصاروا الان مثل الفئران فى الجحور تبا عليهم
اتمنى ان يكون الان وبسرعه القرار سوف يكون كلامى بعد ايام وربما اسابيع ويكون قد قد تاخر جدا بان يعطى السلاح لكل من يريد حمايه اهله واسرته والخرطوم
احتمال الكلام بتاعى يلقى عدد من الاجابات التى ممكن تضحك على كلامى ده وتقوول انو البلد سوف تدخل فى ورطه وجرب اهليه
ولكن هناك على الاقل 300 الف من الشباب الذى تدرب ايام المخلوع فى معسكرات وكلهم بعرفوا ضرب السلاح
والجيش عايز مسانده لدحر هولاء الاوباوش وبسرعه لان الموضوع اخذ زمن ومجريات الحرب التى نسمع عنها غير الحاصل على الارض
ياريت يكون فى زول عاقل وينصح البرهان وغيره من قاده الجيش بان ويتم تسليج الشعب السودانى من يقدر على حمل السلاح

ودي واضحة جداً بحسب الشهادات الكثيفة جداً لسكان الخرطوم

وهذه هي المرة الثانية..

يتعامل الجنجويد مع سكان الخرطوم معاملة الغازي المحتل

ضرب وركل وقتل ونهب وسلب

المرة الاولى كانت بعد فض مجزرة الاعتصام المروعة

ومع ذلك كانت ولا زالت بعض القوى السياسية في قحت تواصل المراهنة على هذه المليشيا المجرمة من أجل مستقبل سياسي لبعض الناشطين والناشطات في هذه الأحزاب

انا ضد تسليح الشعب ...
بل يجب مصادرة أي سلاح في يد اي مواطن بعد أن تزول هذه الغمة وبعد قطع راس الحية حميدتي
وتصفية الجنجويد ...وبعد ذلك يجب تسريح جميع اعضاء الحركات المسلحة وفي مقدمتهم جبريل ومناوي
ونزع أسلحتهم ....
ولا يجب أن يمتلك أي مواطن اي نوع من انواع السلاح سوى القوات النظامية والشرطة ...
والا فإنها صوملة السودان ..مع ان الصومال الآن أصبحت دولة مستقرة ...

ضد تسليح الشعب ، وضد فكرة صناعة الأسلحة من أساسها ـ لأن لذلك سود العواقب في حياة الشعوب ، ولنا الآن في كثير من دول الغرب ـ أدلة وشواهد .

Quote: والجيش عايز مسانده لدحر هولاء الاوباوش وبسرعه لان الموضوع اخذ زمن ومجريات الحرب التى نسمع عنها غير الحاصل على الارض

ليس وحدهم الأوباش الجيش الكيزاني اسوأ منهم وأكثر (اوبشاشاً) علي وزن اكثر همجية
ثم أم لكل مرحلة تكتيكها فهذه المرحلة ضبط الخطاب فيها افضل من الاوصاف الغير لائقة
انتو مفتكرين الحروبات الاهلية دي بذرتها شنو.؟ بذرتها خطاب الكراهية وتعالي عرق علي عرق مزاحاً او جد
وما اكثر الكلمات العنصرية البغيضة التي طغت في الاعلام الشعبي والرسمي هذه الايام
لنتفق بأن ليس بيننا اوباشاُ او اجانب فكلنا واحد وشعب واحد
والدعم السريع قيل انه خرج من رحم القوات المسلحة فلماذا القوات المسلحة ولدت ورعت الاوباش حتي تعدوا مرحلة الفطام
لنتفق بأنه هنالك فتنة قطاعات المؤسسة العسكرية والتي لا فرق بينها وبين مؤسسة الصحة والتعليم والرياضة سوي السلاح
واتمني ان لا تتمدد هذه الفتنة لتشمل مكونات الشعوب السودانية
فلنختلف بشرف ولنتفق بحب ولنقاتل كما الرجال بدون اثارة اي نعرات عنصرية او تلميحات بغيضة

يا عبد القادر
ان نعتهم او وصفهم بالاوباش ليس فيه اي نعرة عنصرية أو قبلية
لان هذا الوصف ينطبق فقط على تصرفاتهم وأعمالهم الوحشية التي
يرتكبونها ضد المدنيين العزل الأبرياء ونهب ممتلكاتهم في وضح النهار
وتحت تهديد السلاح ...
ونحن نعرف ان من بين هذه المليشيات يوجد أفراد من كل القبائل السودانية
من الشمال والشرق والوسط والغرب...ولكن للاسف غالبيتهم من دول الجوار
واظن انهم هم من يرتكبون الفظائع ضد المدنيين ..
ولقد حكيت في إحدى البوستات ان ابن خالتي بدأ يؤيد الجنجويد لانه كان هارب
من الخرطوم إلى الحصاحيصا وقال انه قابل مجموعة من الجنجويد في شارع الستين
وفي شارع مدني وأنهم عاملوهم معاملة طيبة وكريمة وبدأ يشكر لي فيهم وفي
حميدتي ..وقلت ليه انت محظوظ لأنك قابلت سودانيين ولكن إذا قابلوك الأجانب
من أفريقيا الوسطى والنيجر وناس بوكو حرام من نيجيريا كنت حتكون في خبر
كان ....
اذا فإن وصفهم بالاوباش ليس لانهم ينتمون لقبيلة ولكن لتصرفاتهم الوحشية ضد المدنيين العزل الأبرياء ...

بعدين يا عبد القادر انا عاوزة اقول ليك كلام: ""
اذا انا كنت مستشارة لي حميدتي كنت حاقول ليه :
يا حميدتي الناس بقت تكرهك وتكره جنودك لانهم بيعاملوا سكان الأحياء
بفظاظة غير مبررة وبينهبوا ممتلكاتهم وقاطعين منهم الكهرباء والموية
وانت عشان تكسب الجماهير لجانبك طلع اوامر صارمة الجنود وقول ليهم
ما في زول تاني يعامل أي مدني معاملة بطالة بل اسعوا لمساعدتهم وانقلوا
الجرحى للمستشفيات بعرباتكم بدل ما تحتلوا المستشفيات ..
وطلع بيان للشعب واعتذر عما بدر من بعض الأفراد من فظاظة في التعامل
ونهب ممتلكاتكم وأكد ليهم ان دي تصرفات فردية وانك حتعاقب اي واحد
يرتكب الجريمة دي.....وبالطريقة دي حتكسب ود وعطف سكان الأحياء ......
..طبعا اذا حميدتي طبق نصيحتى دي كان حيكسب ود وحب وعطف سكان
الأحياء السكنية المدنيين ..لكن للاسف الشديد فإن تصرفات مليشيات الجنجويد
ونهبهم للمدنيين الأبرياء وقتلهم دون سبب هو ما أدى إلى كراهية الشعب لحميدتي
ولمليشياته ووصفهم باقبح الاوصاف ...لانهم ببساطة احالوا حياتهم إلى جهنم ...