Post: #1
Title: سمونا خاينين وقالوا دي معركة مافيها حياد .. الحقيقه المره
Author: مصطفى نور
Date: 05-12-2023, 01:10 PM
Parent: #0
01:10 PM May, 12 2023 سودانيز اون لاين
مصطفى نور-امريكا نيوجرسي
مكتبتى
رابط مختصر
نحن قاعدين في أمانة الله قاموا الكيزان والجيش عملوا مليشيا تحارب معاهم في دارفور
سلحوا المليشيا دي و لبسوها كاكي .. ونحن قاعدين
دربوها و ادوها عربات .. ونحن قاعدين
جابوها الخرطوم عشان تحمي الرئيس من الشعب .. و نحن قاعدين
انقلبت على الرئيس واتحالفت مع الرئيس الجديد .. ونحن قاعدين
قام الرئيس الجديد اداها امتيازات و سن ليها قوانين و شرعن وجودها .. و نحن قاعدين
دخلوا الاعتصام قتلوا و اغتصبوا و حرقوا على مرئى و مسمع و ضحك و قهقهة الجيش
و بمشاركة الجيش قمعوا كل الاحتجاجات اللي جات بعد فض الاعتصام
فيقوم الجيش يمسكهم مواقع حساسة واستراتيجية في كل انحاء العاصمة .. ونحن قاعدين
و نفس الجيش يديهم حصص من شركات وطنية و ينتدب عندهم ضباط و عساكر .. ونحن قاعدين
و على مرئى و مسمع من الجيش تكبر امبراطوريتهم و اعداد جيشوهم وعتادها و نحن قاعدين
نقول العسكر للثكنات و الجنجويد ينحل .. يدخلونا السجون و يعتقلونا عشان القانون منع يتقال عن الجنجويد انهم جنجويد
نقول العسكر للثكنات يقولوا نحن هنا عشان ما تبقوا زي سوريا و اليمن
نقول سلموها للمدنيين يقولوا نحن خايفين عقد الامن ينفرط و مابنسلمها
يعملوا انقلاب عسكري على كل الاتفاقات و يدخلوا المدنيين المعتقلات و يقتلوا المحتجين
قال شنو !!! الجيش عمل تصحيح عشان البلاد ماتدخل في حرب اهلية و ينفرط عقد الامن ( تاني ) .. و نحن قاعدين
و اثنااااء ما نحن قاعدين لابينا لا علينا .. الجنرالين يختلفوا .. و يدوروا الحرب
و نحن قاعديييين ..
تتكسر بيوت المدنيين بطيارات الجيش .. و تتنهب ممتلكاتهم باسلحة المليشيا
تدخل البلد في حرب اهلية و ينفرط عقد الامن
البيوت تسكنها الاشباح و عساكر المليشيا
نتشرد ونبقى لاجئين و نتحول من شعب عزيز لي ملطشة الدول المجاورة
نموت في المستشفيات و الشوارع و الجوامع بطيران و دبابات الجيش
تتقفل الطرق و المستشفيات و الصيدليات و تحتلاها المليشيا العملها الجيش و جابها لينا الجيش
و شرعن لوجودها الجيش و ختاها في نص المدنيين نففففس الجيش ..
و اثناء مانحن لسه قاعدين .. سمونا خاينين عشان قلنا لا للحرب ..
سمونا خاينين وقالوا دي معركة مافيها حياد ..
معركة دخلناها و نحن قاعدين
يبدوا انه مشكلتنا اننا قاعدين
لسه قاعدين ؟! ياخاينين يا عفنين …..!
( محمد حسن بوشي ود كوثر)
#لازم_تقيف
#لا_للحرب
|
|