اطالب بسحب ميزة الجنسية المزدوجة وعلى السوداني أن يختار ما بين الجنة والنار

ألان وكما قلت في اول مرة بالتحاقي بهذا المنبر
ان اكثر من جنى على السودان
هم من ابنائه المزدجو الجنسية
لهذا على حكومة السودان القادمة
ان تعيد قانون الجنسية لوضعه القديم
فلكل من يرغب بالتجنس بجنسية اخرى عليه التنازل عن جنسيته الاصل
وهي السودانية
لهذا على كل سوداني ذكر او انثى متجنس بجنسية بلد آخر
ان يختار احدهما

وان شاء قشة ما تعتر ليهم
وهلا هلا على الجد والجد هلا هلا عليه

وهل يتقيد قانون الجنسية بمزاجك يا كنزي او بمزاج فردي لكائن من كان ..!
الوجع في ياتو حتة بالضبط ؟
اما كفي حكومتك السابقة جعلت الملايين مشردين في فيافي الارض يبحثون ع ن لقمتمهم بالحلال
بعد ان ضاقت عليهم داخل الدنيا بما رحبت في السودان
الا يكفيكم كل هذا الالم الذي اصبح ندبة علي روح كل مهاجر
لن تشعر بالم هؤلاء يا كنزي فانت في رغد من العيش علي ما يبدو ويدك في الماء وربما لك امتيازات تاتيك علي شكل مظاريف
فان جاء امتياز لهؤلاء المهاجرون المساكين كي يرفدوا اهلهم بما يعينهم علي الحياة في السودان تحسدهم علي هذا الامتياز
امنت بالله

Quote: ان اكثر من جنى على السودان هم من ابنائه المزدجو الجنسية

يعني لم يجني علي السودان حكوماته القاصرة
ولا الكيانات الهلامية التي امتهنت السياسة ارتزاقاً
ولا جيشه الذي دائما ما يجهض الديمقراطية
ولا قصر نظر من يقودون زمام الامور فيه
ولا الحرب الابادية التي يشعلها الجيش في اطرافه
مزدوجو الجنسية يا كنزي هم ضحايا الحروبات العبثية التي تشعلونها باسم الدين
وباسم الاله وبكل المسميات الاستهبالية
هم ضحايا مثلهم مثل النازحون في المعسكرات وهم ضحايا جهل وتخلف حكوماتهم
نجوا من الرصاصة بعد ان غادروا هذه الارض مكرهين ويحلمون بحال غير ذلك الذي عاشوه
لابنائهم واهلهم ووطنهم لهم حلم برؤوية طن حر ديمقراطي يتسع لجميع ابنائه ويساوي بينهم
لماذا تجردهم حتي من احلامهم بعد ان جردتهم من هويتهم
سبحان الله

الكنزي هل يحمل أي من أبناؤك جنسية أخرى غير السودانية

هل البشير وعلي عثمان وعقدهم الفريد
يحملون جنسيات مزدوجة؟!!
هل حميدتي والبرهان يحملان جنسيات اجنبية!!!؟؟؟
تحياتي

قنا متسخ الدواخل، وهاهو يتبرع بالدليل، الكيزاني!

منتصر وتسنيم
اولا اشكر لكما القدوم
ويا الف مرحب بحوار بناء هادئ
دون توترات
برد عليكم بس خلوني اكمل مع عبدالقادر دا
اجيكم
انا عارف القصة ضربت ناس في ممكن

اها يا قدورة
شن بتقول واراك تقول:

Quote: اما كفي حكومتك السابقة جعلت الملايين مشردين في فيافي الارض يبحثون ع ن لقمتمهم بالحلال بعد ان ضاقت عليهم داخل الدنيا بما رحبت في السودان

وردي عليك يقول:
والله الكنزي من الله خلقو ما عندو حكومة غير الله ربا ومحمدا رسولا
ولم ابايع غير محمد احدا
اما ان تلصقني بالحكومة او تلصق الحكومة بي فهذا تقديرك
فلا حرج عليك فيه
فكل اناء يما فيه ينضح
وانت تنضح بقول الباطل ان جعلت حكومة الانقاذ هي حكومتي
وجايك صادي

الاخ عبدالقادر
السلام عليكم ورحمة الله تعالى وبركاته
واسأل الله ان يعم السلام بلادي وكل الكرة الارضية
اما بعد:
فانت تقول:

Quote: وهل يتقيد قانون الجنسية بمزاجك يا كنزي او بمزاج فردي لكائن من كان ..! الوجع في ياتو حتة بالضبط ؟ اما كفي حكومتك السابقة جعلت الملايين مشردين في فيافي الارض يبحثون ع ن لقمتمهم بالحلال بعد ان ضاقت عليهم داخل الدنيا بما رحبت في السودان الا يكفيكم كل هذا الالم الذي اصبح ندبة علي روح كل مهاجر لن تشعر بالم هؤلاء يا كنزي فانت في رغد من العيش علي ما يبدو ويدك في الماء وربما لك امتيازات تاتيك علي شكل مظاريف فان جاء امتياز لهؤلاء المهاجرون المساكين كي يرفدوا اهلهم بما يعينهم علي الحياة في السودان تحسدهم علي هذا الامتياز امنت بالله

ونأتي للرد على مداخلتك اعلاه واحدة واحدة وفيها تقول:

Quote: هل يتقيد قانون الجنسية بمزاجك يا كنزي او بمزاج فردي لكائن من كان ..

يا اخي لو ما عارف نعرفك
انا علي محمد يس علي الكنزي
مواطن سوداني بالميلاد
اقطن الشوال ولاية النيل الابيض حيث ولدت ودرست مراحلي الاولية من الدراسة
وبهذه الصفة وحدها يحق لي ان اقترح اي اقتراح وليس بالضرورة يقبل ام يرفض
مش قلتو
حرية سلام وعدالة
اذن ليس المسألة خاضعة للمزاح الشخصي لي بل هو حق الهي ودستوري ان ارى ما ارى دون تخويف او تهديد من احد
هل عقلت حديثي اخ عبدالقادر
واواصل في الرد عليك

تاملو النفاق، فوق للحسد، والغيرة!
كيزاني، أو يسوي ماعندي حكومة!!
الترابي ممكن يقول زي كلامك، مادام نظامو وداهو كوبر!
إذا ده حاصل، هل ده دليل انو الترابي ماكوز؟

مهتري، الدواخل!

نعم ذات من شرد الملايين، "وفغن" للكتاب والسنة، للفوذ بالغلمان، رجع يحاكم في الضحايا، أو مش جناتو!

ده كلو أو هو مرقا لي اوربا، أو لما ظروفو اجبرتو علي العودة، شغل غيرة، اوحسد، عشان يتفشا، الان كايس يعاقب المرقو من سودان فسقة هذا الزواحفي، المامرو بي ظروفو الحاقد!
مهتري الدواخل!

نرجع لتكملة الرد على قدورة
فقد خزلني النت
يعمل ولا يعمل
الكهربا قاطعة من منتصف ليل اول امس جات اليوم بعد صلاة العصر

يا بشاشا
شكرا ليك دائما بترفع طرحي
وردك يا هو ردك
مافي جديد د
نفس المفردات
معاي ومع غيري
يا اخي ذاكر شوية
وبجيك صادي
وواصل مداخلاتك

اخونا قدورة قال:
اما قولك يا قدورة:

Quote: جعلت الملايين مشردين في فيافي الارض يبحثون ع ن لقمتمهم بالحلال

الملايين مشردين دي دايرة استفهام ؟
ممكن ملايين بس في مصر
اها واجيك لقولك

Quote: لقمتمهم بالحلال

واضح انو الطرح دا بيستهدف فئة معينة وهي الاكثرية والاغلبية
وهم الحاصلون على جواز الدول الغربية
اسا ديل بياكلو حلال؟
والله الا من رحم ربي
فجلهم يعيشون على الدعم الاجتماعي
صدقات تدفع
ويتلقفونها دون وعي منهم
فكل لحم نبت من السحت فالنار اولى به

ثم ثانيا يا قدورة
لاحظت ليك انك صاحب كلامي غير منطقي وعندك هوشة في كل اطروحاتك
اسا داير تقنعني وتقنع القارئ ان هناك :

Quote: جعلت الملايين مشردين في فيافي الارض يبحثون ع ن لقمتمهم بالحلا

اسا رقم الملايين دا صاح ؟
وان كان صاح كلهم وجدو موقع عمل وبياكلو بالحلال؟

شفت كلامك اعوج كيف يا قدورة:

Quote: لن تشعر بالم هؤلاء يا كنزي فانت في رغد من العيش علي ما يبدو ويدك في الماء وربما لك امتيازات تاتيك علي شكل مظاريف

والله صدقت انا فعلا في رغد من العيش ويأتيني رغداً من كل مكان ولم اكفر بانعم الله علي
اقسم لك بالله فصلت من العمل بوفد دولة قطر بجنيف ف ٢٩ يوليو ١٩٨٩ وانزعج اهلي كثيراً
خاصة السلطات السويسرية المنظمة للهجرة طلبت مني مغادرة ارض بلادهم في فترة لا تتعدى ٣١ مارس ١٩٩٠
وصلني خطابهم في شهر يناير ١٩٩٠
اتدري ما قلت لأهلي الجازعون علي وعلى رزقي:

قلتُ لاهلي واعني زوجتي : والله إن ثقتي بربي وبرزقه الذي كتبه لي اكاد أجزم موقنا إنو لو رفعت وسادتي لوجدت تحتها الفرنكات السويسرية
وهل تصدق انه ما يجري لي الان
عجيب انت يا الله يا من (اطعمتني من جوع وامتني من خوف)
اها يا اخوي عرفت الظرف بجي من وين ؟
أنسان كهذا هل يحمل في قلبه حسداً؟
يا اخي ثق قلب وسع واستقر فيه اسم الله
لا مجال لمكدر فيه

Quote: يعمل ولا يعمل الكهربا قاطعة من منتصف ليل اول امس جات اليوم بعد صلاة العصر

المقشاشا ده خلي لي انا بظبتوا ليك .
نحنا اصلا بعد الحرب دي " بقينا مارقين للربا والتلاف ".

٠٠٠٠٠٠٠٠٠

شوف ياشيخ الكنزي ، اصلا نحنا تأقلمنا مع الظروف الجميلة دي .
حتي قبل الحرب . كهرباء مافي ، ومويه ماف ، ونت ماف . فشنو بقت مابتفرق معانا كتير .
حاول انت برضو أتأقلم مع القصه دي . ياها بلدنا ، وياهو حالنا ، وحكامنا هم هم .
والحرب دي انا متكيف منها شديد " رغم انها مستنئ بضر " وفقدت بعض الاعزاء
لكن ده حال الدنيا ، وفي النهاية كلنا ماشين .( الديناصورات انقرضت ي عمك ) .

متكيف منها ، لانو بعد ماتنتهي " الفلترة دي " ماحيكون الامر كما كان قبل يوم ١٥ ابريل ، وشهر ابريل ده بالذات شهر تغيرات .
وانا طبعا بأيدك في سحب الجنسية المزدوجة. عشان نقدر نمييز . وبلاش تنكر لذاتنا ، ونقعد نغش في روحنا .
مرقتا مننا . الله يسهل ليك . وفيما يخصنا ، نطم ويسكت ساي ، لانو كده كده ، لبس ليهو قناع تاني ، فما من حقو يتكلم فيما يخص الشأن السوداني .
يحق الكلام فقط لاصحاب الوجعة القابضين علي الجمر فقط .

أها يا قدورة
نواصل معاك

Quote: فان جاء امتياز لهؤلاء المهاجرون المساكين كي يرفدوا اهلهم بما يعينهم علي الحياة في السودان تحسدهم علي هذا الامتياز امنت بالله

عارف امس توفى قريب لنا في الشوال ومشينا الحارة ٢١ الثورة للعزاء
وتحدث الناس عن السلع الاستهلاكية وغيرها والتي تباع بثمن بخص دراهم معدودة لأنها منهوبة
فقال احدهم إن واحد اتى للامام الشافعي وبلغه ان (غنمايتو سرقت)
فسأل الامام الشافعي كم من السنين يعيش الماعز
قيل له ست
فحرم على نفسه اكل لحم الماعز لستة سنوات خشيت ان يأكل لحم ماعز مسروق
بس اصحاب الجنسية المزدوجة ديل
بياكلو الف معاز من نظام الدعم الاجتماعي بدول الغرب
طبعا هذا الكلام لا يشملهم حميعا ولكن جلهم هكذا

با قدورة اراك تقول:

Quote: يعني لم يجني علي السودان حكوماته القاصرة ولا الكيانات الهلامية التي امتهنت السياسة ارتزاقاً ولا جيشه الذي دائما ما يجهض الديمقراطية ولا قصر نظر من يقودون زمام الامور فيه ولا الحرب الابادية التي يشعلها الجيش في اطرافه مزدوجو الجنسية يا كنزي هم ضحايا الحروبات العبثية التي تشعلونها باسم الدين وباسم الاله وبكل المسميات الاستهبالية

يا اخوي من ذكرتهم ديل كلهم جناه
بما فيهم بعض مزدوجي الجنسية
لاحظ كلمة
بعض مزدوجي الجنسية
وليس كلهم
افهمت
(اهلنا قالو البصلة العفنة في الشوال بتعفن غيرا)

الاخ منتصر (بالانجليزي)
اراك متسائلاً:

Quote: الكنزي هل يحمل أي من أبناؤك جنسية أخرى غير السودانية

جميع ابنائي وامهم يحملون الجنسية السويسرية
فقد حصلوا عليها قبل اكثر من عقدين من الزمان
وانا الذي قدمت لهم للحصول عليها
بعد الحاح منهم وامهم
وقتها كان جميع ابنائي قصرا
ادنى من ال ١٨ سنة
اكبرهم كان في المرحلة الثانوية
الطريف في الامر انني ساعدت بعد الاسر السودانية
في اجراءآت الحصول على الجنسية السويسرية
وكانو يقولون لاهلي
باب النجار مخلع

الاستاذة تسنيم
الف شكر على الحضور
وراك متسائلة:

Quote: هل البشير وعلي عثمان وعقدهم الفريد يحملون جنسيات مزدوجة؟!! هل حميدتي والبرهان يحملان جنسيات اجنبية!!!؟؟؟ تحياتي

هل تعتقدين انني املك اجابة على هذا السؤال؟
منتصر سألني واجبته فيما يخصني
اما انت فاحيل سؤالك لاصحاب الشأن
ولمن لديه كشف بيانات باحوال مثل هذه الشخصيات
شكرا لحضورك
ونحيك باحسن مما حييتينا

يا بشبش
اراك تقول كلام الطير في الباقير

Quote: ده كلو أو هو مرقا لي اوربا، أو لما ظروفو اجبرتو علي العودة، شغل غيرة، اوحسد، عشان يتفشا، الان كايس يعاقب المرقو من سودان فسقة هذا الزواحفي، المامرو بي ظروفو الحاقد! مهتري الدواخل!

واحيل الرد عليك للاخ كاروري
فقد تعهد بك
سما قدر عشاك
اخد جرعة
نوم على كدا

يا هلا كاروري
اراك تقول:

Quote: شوف ياشيخ الكنزي ، اصلا نحنا تأقلمنا مع الظروف الجميلة دي . حتي قبل الحرب . كهرباء مافي ، ومويه ماف ، ونت ماف . فشنو بقت مابتفرق معانا كتير . حاول انت برضو أتأقلم مع القصه دي . ياها بلدنا ، وياهو حالنا ، وحكامنا هم هم . والحرب دي انا متكيف منها شديد " رغم انها مستنئ بضر " وفقدت بعض الاعزاء لكن ده حال الدنيا ، وفي النهاية كلنا ماشين .( الديناصورات انقرضت ي عمك ) . متكيف منها ، لانو بعد ماتنتهي " الفلترة دي " ماحيكون الامر كما كان قبل يوم ١٥ ابريل ، وشهر ابريل ده بالذات شهر تغيرات . وانا طبعا بأيدك في سحب الجنسية المزدوجة. عشان نقدر نمييز . وبلاش تنكر لذاتنا ، ونقعد نغش في روحنا . مرقتا مننا . الله يسهل ليك . وفيما يخصنا ، نطم ويسكت ساي ، لانو كده كده ، لبس ليهو قناع تاني ، فما من حقو يتكلم فيما يخص الشأن السوداني . يحق الكلام فقط لاصحاب الوجعة القابضين علي الجمر فقط .

فعلا الحرب دي جانب المشرق
انو السودان ح يكون غير
انو فلترة الناس وصفتم
الفيهم اتعرفت
يكفي انهم جعلو من السودان فندق خمس نجوم
وعندما تردت احواله وبقت خدمتو لا تساوي حتى نجمة
رأيناهم يولون الدبر
نحو بلاد ظنو انها بلادهم
اما بخصوص بشاشا
بخليهو ليك
بس بالله بالحتة الفيها الحديدة

أطالب صديقي السوداني الأمريكي بكري أبوبكر بطرد المدعو الكنزي من هذا المنبر السوداني الأمريكي،
لأنه رجل يضيق بالآخر ويحسده.

دا انت بالقول عليك
( المستنير)
يا ابوبكر عباس
تقول:

Quote: أطالب صديقي السوداني الأمريكي بكري أبوبكر بطرد المدعو الكنزي من هذا المنبر السوداني الأمريكي، لأنه رجل يضيق بالآخر ويحسده.

بالله طرد عديل كدا؟
مافي كلمة more soft
يا سلام عليكم
قال ليك شعارهم
حرية سلام وعدالة

Quote: أطالب صديقي السوداني الأمريكي بكري أبوبكر بطرد المدعو الكنزي من هذا المنبر السوداني الأمريكي، لأنه رجل يضيق بالآخر ويحسده.

وانا معاه بالله . اصلا انا روحي محرقاني

يعني بتستغل علاقتك مع بكري وتطرد الماعاجبك ؟
سمعت يالمستنير ، بنار الضلع ؟
نحنا نار الضلع ،،،،،،

الكنزي
السلام عليكم و رحمة الله و بركاته
يا اخوي ما تقفل القزاز و الشبابيك
خلي لروحك مساحة تتحرك فيها
صاحب الحوش أمريكي
شلنا منو الجنسية السودانية دي
امش شوف ليك حتة تانية اكتب فيها غير حوش الامريكي دا
و سؤال بي جنبة كدة ...
زمنك دا كلو قاعد هنا
اشمعنى اخترت التوقيت دا بالذات
عشان تطرح طرحك دا؟

ساعود غدا للرد على جميع المتداخلين
ولكن سؤال عماد الدين
المنطقي والعقلاني
استفزني
واشكره كثيرا على استفساره وهو يقول:

Quote: و سؤال بي جنبة كدة ... زمنك دا كلو قاعد هنا اشمعنى اخترت التوقيت دا بالذات عشان تطرح طرحك دا؟

بكرة ان شاء الله ولو اصبحنا من الاحياء وفي كهرباء وفي نت
برد عليكم جميعا خاصة
عماد الدين
والى اللقاء
وشكرا

اخونا عماد الدين الطيب ياخ هو الزول ده ارتكب جريمة قتل ؟ ولا قاد تمرد للاطاحه بنظام شرعي ؟قال في عنوان البوست " اطالب " . زيها وزي " ارشح " في عنوان واحد من البوستات الموجودة اليوم .بعدين ياخ ده رأي شخصي . انتو ليه بتتدخلوا في ارأ الناس الشخصية ؟وين حرية التعبير البنادي بيها المستنير ؟ مش ياها دي زاتها الحجر علي الرايوتكميم الافواه والديكتاتورية والقمع الفكري ؟وانت زاتك فتحت معاه تحقيق ، القزاز وما القزاز ، ومساحه وماعارف شنو .ده منبر عام لو صاحبو اميركي ولا هندي ودي ماعندها علاقة بكلام الراجل ده . ده منبر عندو قوانين ونظم ولوائح ، والجميع سواسيه امامه.اكتر حاجة ممكن تتعمل للمخالف ، ايقافه عن الكتابة وبس مش حيكون اعدام .لكن استغلال المعرفه ،والمحاباه ، وعشان وعشان . دي هي الودت السودان والسودانين في ستين داهيه .لو كل زول اهتم بشؤؤنه الخاصه ، ومايتدخل في شؤؤن الاخرين، ويخلي قصه " الوصايا دي " . يكون احسن .

السلام و رحمة الله و بركاته
اخونا هاشم
ابدا ما حجرت على اخونا الكنزي
في حريته الشخصية
و لا قلت له ما تتكلم ...
لكن يا حبيبنا ... اخونا الكنزي انت ما
شايفو عايز يحجر على الناس؟
دا نفس المنطق المتكلم بيهو اخونا على علي...
و اخونا علي أولاده عندهم جنسيتين... ف كيف يطالب
الناس بتوحيد الجنسية؟
فعلا باب النجار مخلّع ...
الجمل ما بشوف عوجة رقبتو...
و لا حلال على بلابله الدوح .... ....؟

عفوا مكرر

لا احب ان ينحو اى نقاش المنحى الشخصى. ولكن
استغربت كيف يدعو شخص الناس للتنازل عن احدى الجنسيات
وفى نفس الوقت يساعد الناس على الحصول على جنسية ثانية.!!!
كون مساعدة الآخرين كانت عام 1990 لا يغير من الحقيقة
حتى يعلن انه كان مخطئا فى مساعدتهم.
شخصيا احمل الجنسية السودانية فقط. ليس لانى ضد
الجنسية المزدوجة ولكن لاسباب اخرى لا علاقة لها.
واستحق الجنسية من عشرات السنين.. عمرى الان
66 عاما قضيت منه 33 عاما هنا.. ولو حذفت سنين
الطفولة فان حياتى هنا اطول من التى عشتها فى السودان
لست ضد الجنسية المزدوجة بل لو قدرت ان احصل
على كل جنسيات العالم لفعلت لان الكرة الارضية
هى وطنى الذى خلقنى الله فيه

Quote: ألان وكما قلت في اول مرة بالتحاقي بهذا المنبر ان اكثر من جنى على السودان هم من ابنائه المزدجو الجنسية لهذا على حكومة السودان القادمة ان تعيد قانون الجنسية لوضعه القديم فلكل من يرغب بالتجنس بجنسية اخرى عليه التنازل عن جنسيته الاصل وهي السودانية لهذا على كل سوداني ذكر او انثى متجنس بجنسية بلد آخر ان يختار احدهما وان شاء قشة ما تعتر ليهم وهلا هلا على الجد والجد هلا هلا عليه

غلبني كلّه كلّه أفهم مغزى منشورك ده، أخي الكنزي.

ما وضّحت كيف جنى مزدوجو الجنسية على السودان؟

هل يُفهم من منشورك ده إنك بتطالب بسحب الجنسية الأجنبية ممن ذكرتَ، "بس" عشان بيأكلوا حرام ولاَّ في سبب تاني لسه ما قلته؟

وهل يُفهم من كلامك أن هناك علاقة ثابتة بين أكل الحرام وازدواج الجنسية؟ وهل الناس اللي ما عندها جنسية بلد آخر معصومين من أكل الحرام؟

وطالما إنك بتقول "إلا من رحم ربي"، فلماذا تطالب بسحب الجنسية من "كلَ المتجنسين"؟ ألا ترى في ذلك ظلمًا "للقلة" منهم التي لا تأكل الحرام على حدّ قولك؟

وما هي العقوبة التي تراها مناسبة لغير المتجنسين الذين يأكلون الحرام، لأنه من باب العدل لازم يكون في تساوي في العقوبة، فطالما إنك طالبت بتخيير مزدوجي الجنسية بين سودانيتهم وازدواج جنسياتهم، فكيف ستعاقب آكلي الحرام من أحادي الجنسية؟

وهل للأمر علاقة بالحرب الدائرة الآن؟ وإذا كان في علاقة، فما هي؟

من حقك طبعًا تتطالب بأي حاجة، ولكن عشان طرحك يكون متماسك، وخصوصًا في موضوع حسّاس زي ده، لازم تكون درستُه كويس وتقول كلامك كلّه مرة واحدة بالأسباب والحجج وبالردّ على أي تساؤلات محتملة قد تدور في ذهن القارئ قبل ما يسألها. وبعد داك ممكن تاخد وتدي مع المتداخلين معاك.

مع كامل التقدير والاحترام.

ول أبا شيخ الكنزي
سلامات ..

Quote: ألان وكما قلت في اول مرة بالتحاقي بهذا المنبر ان اكثر من جنى على السودان هم من ابنائه المزدجو الجنسية

فكرة الجنسية المزدوجة جاءت أصلاً من السودان لدواعي أقتصادية .. لكي يرفدوا خزينة الدولة بالعملة الصعبة نسبة للحصار المفروض علي السودان .. هل أنتفت مصلحة السودان في الجنسية المزدوجة؟

لم أر أنك قدمت حيثيات لماذا أو كيف أن أصحاب الجنسية المزدوجة قد جنوا علي السودان؟ لفائدة النقاش قدم لينا حيثياتك .. لعل الناس تناصرك ..

لو أسقطت جنسية أي شخص سوداني يحمل جنسية أخري .. يظل ذلك الشخص السوداني يأتي للسودان حتى لو بصفته كأجنبي .. دي تحلها كيف؟ وحتي إن لم يحضر إلي السودان ممكن يؤثر في رأي المتواجدين في السودان عن طرق الميديا المتاحة ..

في مقابل رأيك، أنا طالبت ومازلت أطالب بتخصيص مفوضية قومية للإهتمام بشؤون المهاجرين السودانيين .. نحن نختلف عن المغتربين .. ومشاكلنا لا تشبه مشاكلهم ..

بريمة

خالص التحايا للجميع
أظن أن الأفضل هو ان يتول المناصب التنفيذية و السيادية العليا في البلد حملة الجنسية السودانية فقط.
اما بقية خلق الله فلا ضير من حملهم لجنسية مزدوجة.
بمعنى ان كانت لك جنسية مزدوجة يجب عليك أن تتخلى عن جنسيتك الأخرى لكي تتول اي منصب تنفيذي او سيادي عال

Quote: خالص التحايا للجميع أظن أن الأفضل هو ان يتول المناصب التنفيذية و السيادية العليا في البلد حملة الجنسية السودانية فقط. اما بقية خلق الله فلا ضير من حملهم لجنسية مزدوجة. بمعنى ان كانت لك جنسية مزدوجة يجب عليك أن تتخلى عن جنسيتك الأخرى لكي تتول اي منصب تنفيذي او سيادي عال

سلامات أخي زكريا.

لم يتحدث الأخ الكنزي عن تولّي المناصب العليا. كلامه حتى الآن عن آكلي الحرام من مزدوجي الجنسية. ولذلك، أنا سألته هل عنده سبب تاني غير أكل الحرام لمطالبته بسحب الجنسية الأجنبية.

الجنسية بالميلاد لا تسحب ولا يملك أي شخص ولا سلطة حق سحبها

حتى الجنوبيين المولدين في السودان هم سودانيين غصباً عن عين أي حكومة وتجريدهم من الجنسية السودانية هو إجراء غير دستوري

واتفق في كلام انو تحميل المغتربين وزر المصائب التي تجري في السودان هو نوع من الحسد ربما ليس إلا

يعني السودانيين القاعدين برة هم الولعوا الحرب دي ؟؟ ما ياهو بما كسبتم إيديكم

نعم اخي محمد لقد فهمت مرمى الأخ علي
فقط أردت أن تكون مطالبته بسحب الجنسية ممن يسعون لتولي المناصب
اما من أراد أن يقيم عملا ما او مشروعا فلا ضير من حمله لجنسية أخرى
ومن أكل حراما او أفسد في الأرض فالمحاكم اولى به

لمن الحكومة تقوم بتجنيسك فيكمنها أن تضع من القوانين ما ينزع منك هذه الجنسية لأنو هي أدتك الجنسية منحة

لكن تعال وريني الجنسية بالميلاد دي تسحب كيف ؟؟ يعني تستطيع الحكومة تغيير حقيقة مكان الميلاد ولا كيف ؟؟

لو أسقطت جنسية شخص مولود بالسودان تسقط جنسيات جميع الموجودين داخل السودان

Quote: نعم اخي محمد لقد فهمت مرمى الأخ علي فقط أردت أن تكون مطالبته بسحب الجنسية ممن يسعون لتولي المناصب اما من أراد أن يقيم عملا ما او مشروعا فلا ضير من حمله لجنسية أخرى ومن أكل حراما او أفسد في الأرض فالمحاكم اولى به

الأخ الكنزي حتى ما ذكر آلية تتبعها الحكونة السودانية لتحديد أنه الناس ديل آكلي حرام وفي دولة تانية كمان؟

صحيح الواحد ممكن بالملاحظة يقول أنه كتير من المتجنسين في أوروبا معتمدين على إعانات الضمان الاجتماعي، ولكن الحصول على هذه الإعانات برضو بيكون بموجب القانون وإذا الدول دي ما قدرت تكتشف التلاعب في الخصول عليها، فيظل الحصول عليها قانوني ولا يخضع لانطباعات شخصية. لكن ده كله برضو ما بيوضح العلاقة بين أكل الحرام في أوروبا وتخيير السودانيين بين الجنسية السودانية أو التخلي عن الجنسية الأجنبية. ننتظر توضيح من الأخ الكنزي.

كدي يا هادي، عليك الله، بطّل وورينا وين الدستور قال أي زول مولود بالسودان يستحق الجنسية؟!!

القصّة بتاعت الميلاد بديك جنسية الدولة التي ولدت بها دون قيود فقط في هذه الدول والسودان ليس من ضمنها:
The following countries have unrestricted birthright citizenship:
Antigua and Barbuda, Argentina, Barbados, Belize, Bolivia, Brazil, Canada, Chad, Chile, Costa Rica, Cuba, Dominica, Ecuador, El Salvador, Fiji, Grenada, Guatemala, Guyana, Honduras, Jamaica, Lesotho, Mexico, Nicaragua, Panama, Paraguay, Peru, Saint Kitts and Nevis, Saint Lucia, Saint Vincent and the Grenadines, Tanzania, Trinidad and Tobago, Tuvalu, the United States, Uruguay, and Venezuela.

بطّل تنظير

عماد الدين الطيب
وعليك السلام
بالله يا عماد
اسا دا كلام بقولو زول فاهم

يا اخ بكوري
لا حطت انني لا استطيع الاسهاب في الرد
وعندما اختصر المداخلة في كلمات محدودة تمضي

كنتُ حريص على الرد لكل متداخل
ولكن وجدت نفسي محصورا في كلمات محدودة
لا تتسع للرد
لهذا ساعود اليكم متى ما انقشع الاشكال

أخي العزيز علي الكنزي

وإخوتي الأعزاء المتداخلين

الأخ علي طرح وجهة نظر....وهو حر... قد لا يكون شرح أو فسر مقصده بشكل تفصيلي..لأنه كالعادة

في ناس تختف الكلام من خشمك...

لكن برضه شايف المداخلات بقت تاخد منحى فيه شوية دعابة ..وده بخلي الناس تعبِّر عن رأيها بأريحية..

***بشاشا بالله أقيف بعيد..ههههه ( تحياتي ...وبالله خفف لغتك دي شوية بماء مقطر عشان تتبلع شوية)..

*** طريقة طرح الأفكار و اختلاف الآراء حولها بتدل على أننا بعيدين عن أي حل سياسي أو أي احترام للديمقراطية..

واعتقد ما يجري دائما هو انعكاس لما يحدث في الساحة السياسية من جميع الأفراد و المكونات الحزبية( وإن عِلَت

أو تسامت، أو إدعت الديمقراطية)...

ارتاح شوية يا كنزي وواصل....

ابو الريش راجل ظريف في معارضته وفي تراجعه.... حتى خشونته أحيانا مبلوعة..تحياتي له..

أعذروني على الفضفضة.. واحترامي وحبي للجميع والله دون فرز...

Quote: أظن أن الأفضل هو ان يتول المناصب التنفيذية و السيادية العليا في البلد حملة الجنسية السودانية فقط. اما بقية خلق الله فلا ضير من حملهم لجنسية مزدوجة. بمعنى ان كانت لك جنسية مزدوجة يجب عليك أن تتخلى عن جنسيتك الأخرى لكي تتول اي منصب تنفيذي او سيادي عال

حبيبنا كنزي تحياتي ومودتي
والتحية للحبيب زكريا

في التواصل تم نشر صور وهم يغادرون الوطن
لرشيد سعيد
وقمرالدين
ولقمان
ياسر عرمان ... الخ
بأن هؤلاء اشعلوا الحرب وهربوا وظل هناك تحريض
على بعض المزدوجي الجنسية مما هيأ رأي البعض
ولكن بالنسبة لنا في قريتنا في ضواحي الدنيا كل مشاكلنا المادية تحل من أبنائنا المهاجرين
المغتربين من امثالنا في الخليج لم يعد لديهم نفس القدرة كما كانت في السابق
تخيل احد ابناءنا من أمريكا تبرع للمستشفى (غرفة عمليات وغسيل كلى وسيارة اسعاف وسيارة عادية ...الخ)
وابننا بكري زمراوي اصبح وزير في ولاية امريكية على ما أذكر الينوي ويدعمنا كثيراً

ربما الكنزي الحبيب قصد المنخرطين في السياسة

مع التحية والتقدير للحبيب زكريا
ومودتي الحبيب الكنزي

حبيبنا الجميل الكنزي مودتي
وجودوك مهم في المنبر وانت تنقل الوضع في الداخل
ممكن تسحب البوست حتى لا يتم تحديد مداخلاتك
نحن في سودانيز مجموعة رائعة جداً نختلف نتفق ونتخاصم نتنازع
هي سنة الحياة
الخلاف والنزاع احياناً يكون داخل اسرة واحدة ما مشكلة
ولكن تدوم المحبة والاخوة
لولا هذا الخلاف والاختلاف وحتى النزاع لم يكن للمنبر طعم في الاساس
وأننا عند المصائب نكون عائلة واحدة

تحياتي الحبيب الكنزي

تحياتي أخي علي , أتمني أن تكون و الأسرة بخير
ذكرت في مستهل البوست

Quote: ان اكثر من جنى على السودان هم من ابنائه المزدجو الجنسية

ممكن توضح لي كيف؟ و ما هو الدمار الذي سببوه؟
عشان أواصل معاك.

السلام عيكم جميعا
خاصة المتداخلين الذين لم اتمكن من الرد على مداخلاتهم
لهم شكري
على امل ان تكون مشكلتي الفنية انتهت بعد العمل بنصيحة المستنير
والى ردودي عليكم
فردا فردا

اها اجي لمداخلة عماد الدين الطيب
وفيها جاء :

Quote: و سؤال بي جنبة كدة ... زمنك دا كلو قاعد هنا اشمعنى اخترت التوقيت دا بالذات عشان تطرح طرحك دا؟

يا اخوي
ديل منهم سماعون للكذب اكالون للسحت
وشرورهم بدأت منذ ان طلع الكتاب الشهير عن الرق في السودان
وتعال شوف كرستيان سولدالتري
بمدينة بازل كيف استثمرت الحدث
وصار عندها Big Business
ولم نفق من هول تلك الصدمة وتداعياتها
فامطورنا
بجرائم الابادة بدارفور
والتي لا يمكن نكرانها ولكنهاصورت وكأنها ابادة جماعية
وكان يا ما كان لانسان السودان
وليس للحزب الحاكم ولا نخبته
فحصدنا جريمة مصنع الشفاء
وحصدنا انفصال الجنوب
وحصدنا مقاطعة العالم لكل سوداني وما هو سوداني
واسا اشعلوا لنا الحرب
وهربوا لاوكارهم

يا عماد
اجيك صادي لقولك:

Quote: و اخونا علي أولاده عندهم جنسيتين... ف كيف يطالب الناس بتوحيد الجنسية؟ فعلا باب النجار مخلّع ... الجمل ما بشوف عوجة رقبتو... و لا حلال على بلابله الدوح .... ....؟

اولا اريد ان انبهك لامر
تقدمتُ كما ذكرتُ سابقا
للحصول على الجنسية السويسرية استجابة لضغوط اولادي وامهم
والله وتالله عندما استلمنا خطاب الموافقة بالتجنيس وطلب منا دفع رسوم الجوازات
اعتذرت انا وطلبت ان تتم الإجراءات لاسرتي
والمراسلات الان بطرفي
وانا اعرف حدودي
وهو انه ليس من حقي نزع الجنسية من احد
ولكن ساتقدم باقتراح للحكومة القادمة بتخيير السوداني المتجنس بجنسية اخرى
اما ان يبقى سودانيا ويرد جنسيته الاخرى
او يتمسك بجنسيته المكتسبة ويعيد الجواز السوداني
هذا اقتراح من الممكن قبوله او رفضه او تعديله
او حتى تجاهله
وسأواصل الرد على عماد فيما اثاره من نقاط هامة

عارف يا عماد
انت اثرت نقاط هامة ربما لم تنتبه لها انت ولا غيرك ونجدها في قولك:
اخونا علي أولاده عندهم جنسيتين... ف كيف يطالب
الناس بتوحيد الجنسية؟
طبعا ابنائي ومن مثلهم يعرفون بالجيل الثاني
خاصة مواليد الدول الغربية الحاصلون على جنسية البلد التي يقيمون فيها
هل لهؤلاء صلة بالسودان؟
انا شخصيا بذلت جهود خرافية في تعليم ابنائي اللغة العربية والدين الاسلام ومنهم من اعتمر ومنهم من حج البيت الحرام في شبابهم
وسعيت سعيا حثيثا بتزويجهم من السودان وليس سودانيون في المهجر
وفعلا لدي بنت تزوجت بسوداني من السودان
وولد تزوج بسودانية من السودان
اما البقية فلا امل ان يقوموا بذلك
وهذا الجيل الثاني لا صلة له بالسودان ألا القليل منهم وما اظن باحد يعارضني فيما ذهبت اليه
وهذا الجيل الثاني غير معنين باقتراحي
لأن البلاء الذي اصابنا من ابائهم

بالله يا اخوانا شوف التناقض المريع الفي الكلام الزول الأسمو علي الكنزي ده لمن جاء الكلام بخصوص أولاده

قعد يبربر ( باللهجة السعودية) ويبرر لي أولاده بينما يطالب بنزع جنسيات الآخرين

طيب ما نفس المنطق الدافعت بيهو عن أولادك ديل بينطبق على الآخرين ( لجهة انهم سودانيين بالميلاد)

ياخ انت زول ما عندك موضوع صراحة والنقاش معاك شكلو ضياع زمن ساكت

الجنسية بالميلاد لا تنزع ما تضيع زمنك ساي

ده اسمو حق طبيعي

انتخاب طبيعي

ما في سلطة (في الدنيا) تملك حق نزع أو سحب جنسية بالميلاد أو تغيير حقيقتها

زول مولود في الأرض الفلانية ـ هو ينتمي للأرض للفلانية دي حقيقة ثابتة لا تستطيع الإجراءات الحكومية تغييرها

الجنسية بالتجنس داك موضوع تاني لأنو أساساً الشخص حاصل عليها عبر إجراءات واشتراطات وقوانين الحكومة التي يمكن عكسها أو إلغاءها

فكلامك ده ممكن يتوجه للحكومات الغربية وتطالبها بأن تسحب جنسيات السودانيين (بالتجنس) ـ دي ممكنة إذا انت كعلي الكنزي قدرت تقنع الحكومت الغربية بالكلام ده وانها تغير قوانينها عشان ترضيك

غير كده كلامك ده ونسة زول محبط ساكت ـ ويحاول لوم الآخرين الذين لا ذنب لهم في مصيبة حلت بيهو

سلام يا أخ الكنزي

كدي أولا بنزع الجنسية السويسرية من أولادك
أو بالعدم أنزع عنهم الجنسية السودانية وخليهم خواجات
حتي تثبت بالبيان بالعمل جدية وأخلاقية طرحك
............

ومن ناحية أخري
صاحب البوست رفض إزدواج الجنسية مطلقا ـ قال تنزع عنه الجنسية
إذا أصر علي الإحتفاظ ـ بالجنسية الأجنبية
ولم يقصر كلامه علي من يتقلد المناصب الدستورية أو العليا

إحترمو عقولنا وكفو عن هذا التبرير الواهي
أو أنصحوه دقري بأن يتخلي عن تصوره ويتبني رؤيتكم المعدلة ــ

المستنير كمال
اولا اشكرك على النصحية التي يسرت لي الرد باسهاب واقول كامل ما اريد
واعود الى قولك:

Quote: سلام يا أخ الكنزي كدي أولا بنزع الجنسية السويسرية من أولادك أو بالعدم أنزع عنهم الجنسية السودانية وخليهم خواجات حتي تثبت بالبيان بالعمل جدية وأخلاقية طرحك ............ ومن ناحية أخري صاحب البوست رفض إزدواج الجنسية مطلقا ـ قال تنزع عنه الجنسية إذا أصر علي الإحتفاظ ـ بالجنسية الأجنبية ولم يقصر كلامه علي من يتقلد المناصب الدستورية أو العليا إحترمو عقولنا وكفو عن هذا التبرير الواهي أو أنصحوه دقري بأن يتخلي عن تصوره ويتبني رؤيتكم المعدلة ــ

بالنسبة لابنائي
انا لستُ الرقيب عليهم اصغرهم تخطى الثامنة عشر
ثم ثانيا ليس لي سلطان على احد حتى اسحب منه الجنسية التي هي حق له
انا قدمت اقتراح بان تنزع الجنسية السودانية ممن له جنسية اخرى ويخير باي يريد ان يحتفظ
لا تحجروا علينا عقولنا ومن حقنا ان نبدي ما في عقولنا
دون خوف او تهديد
اي من كان شأنه

اخ ابوالريش
شكرا لحضورك
اما قولك:

Quote: لا احب ان ينحو اى نقاش المنحى الشخصى. ولكن استغربت كيف يدعو شخص الناس للتنازل عن احدى الجنسيات وفى نفس الوقت يساعد الناس على الحصول على جنسية ثانية.!!! كون مساعدة الآخرين كانت عام 1990 لا يغير من الحقيقة حتى يعلن انه كان مخطئا فى مساعدتهم. شخصيا احمل الجنسية السودانية فقط. ليس لانى ضد الجنسية المزدوجة ولكن لاسباب اخرى لا علاقة لها. واستحق الجنسية من عشرات السنين.. عمرى الان 66 عاما قضيت منه 33 عاما هنا.. ولو حذفت سنين الطفولة فان حياتى هنا اطول من التى عشتها فى السودان لست ضد الجنسية المزدوجة بل لو قدرت ان احصل على كل جنسيات العالم لفعلت لان الكرة الارضية هى وطنى الذى خلقنى الله فيه

اتظن اني انسان جامد لا يتغير اذا ما تغير الاحوال وما يحيط بالفرد
هي وجه نظري الان وجهرتُ بها
فما الخطأ هنا؟

كنتُ اريد ان اتوقف عن الردود لهذا اليوم
واعود غدا لمواصلة الحوار
ولكن
المداخلتين للاخ الهادي حيرتني
حيرتني لقلة فهمه لما ارمي له
ودون اسراف في الرد عليك احيلك لمداخلة الاخ محمد عبدالله الحسين التي جاء فيها

Quote: أخي العزيز علي الكنزي وإخوتي الأعزاء المتداخلين الأخ علي طرح وجهة نظر....وهو حر... قد لا يكون شرح أو فسر مقصده بشكل تفصيلي..لأنه كالعادة في ناس تختف الكلام من خشمك...

اسا انت في مداخلتك هما اثنان
كانو الكنزي اصدر قانون يخول سحب الجنسية السودانية ممن تجنسوا بجنسية بلد أخر
يا اخي
الامر ليس كذلك
هو اقتراح اذا قبل سينظر فيه مجلس الامة او الشعب سمه ما اردت ويمكن ان يجيزه وممكن ان يرفضه ويمكن ان يعدل فيه
واقتراحي هو:
ان الحاصلين على جنسية اخرى مع الجنسية السودانية
يخيروا بالامساك باحدهما
والخيار للشخص وليس للكنزي
اما بخصوص اولادي فينطبق عليهم ما ينطبق على غيرهم
(هم اتا قايلم اولاد حميدتي ولا البرهان)
اتوقف عن الرد حتى يوم غدا فقد تعبت العينان من ضوء الكمبيوتر
فالف شكر لحضوركم

أستغل هذا البوست للمطالبة بالتراجع عن نزع جنسيات أبناء جنوب السودان ـ مواليد السودان

ده حقهم الطبيعي والدستوري والذي لا تملك سلطة أياً كانت حق نزعه حتى مع انفصال جنوب السودان

Quote: لهذا على حكومة السودان القادمة

متفائل يا شيخ علي .. دي حاجة جميلة ..

Quote: اطالب بسحب ميزة الجنسية المزدوجة

طيب يا عم علي .. لو سحبت مني الدفتر الاخضر الاسمه الجنسية ..

حتسحب سوداني الجوه وجداني كيفن !!

يا علي .. البلد خانوه ابناؤه القاعدين جواهو .. سرقوه و نهبوه .. و شردوا العالم ..

اذكرك:
سيئ الذكر السفاح عمر البشير اول ما شرّف قال انحنا ما دايرين غير 17 مليون سوداني جوه البلد .. الباقين يفوتوا محل ما يفوتو ..

قال الكلام ده في نفس الوقت القال فيهو صلاح كرار (دولار) لو ما الانقاذ جات و لحقت البلد .. الدولار كان يصل 20 جنيه ..

عموما .. كدي نتأمل انه تجي حكومة قادمة بعد البلد البقت خراب دي ..

الكنزي
ما مشكلة ابدا. ببيتك واولادك
ادعوهم للتنازل عن احد الجنسيتين
حتي ترسي لنا نموذجا
يا اخي. انت ما قادر تقنع اولادك بالحجة والمنطق عاو. تقنع الاخرين
باب النجار. مخلع !

ياكنزيً
ما تمارسه يسمي اسقاط

يتضح
من سرديات وما ذكرته عن اولادك
ان المشكلة. نفسية وسياكًولوجية
او سوشو سايكلوجية
تخصك. وتشعرنا والدائرة الاسرية بالفصام
والحمدلله. مشكلة ما اخلاقية وانما قيمية ومفاهيمية

حقو تمشي تعالجو حتي. تحس بالانسجام والامان النفسي
. بدارك
فالرسول بدا دعوته بداره واهله واصدقائه. ثم مضي للغريب

Quote: بس اصحاب الجنسية المزدوجة ديل بياكلو الف معاز من نظام الدعم الاجتماعي بدول الغرب

...........
هسي دا دخلو شنو بموضوع إزدواج الجنسية ؟
أها لو ما أكلو الويلفر ـ حا يستحقو إزدواج الجنسية؟
خلاص قطعت صلة الناس بسودانهم وسودانيتهم
والناس عايلة أسر وأهل وشيال حمل تقيل ياللا شد حيلك أنت وحكومتك القادمة تكفلو هولاء ـ وتعيشوهم ماتخلوهم يتكلو علي من إختار الجواز الأجنبي ولفظ الإنتماء للسودان !

.....

اعتذر المتداخلين والقراء
وذلك لاني عاجز في الاسهاب في الرد
لاسباب ربما فنية

ايوا يا مستنير

Quote: بياكلو الف معاز من نظام الدعم الاجتماعي بدول الغرب

انهم يطعمون اهلهم من الحرام
وهم لا يعلمون
اي الاهل بالسودان

https://sudaneseonline.com/board/510/msg/1634562315.html

ابداع كيزاني سوداني
المواطن السوداني شارك في كل جرائم الانقاذ
والانسان السوداني ثبت ضعفه امام المال السهل

صدقني بعد عودتي للسودان
وفي مجال الحياة كلها
وجدت ان الدين عندنا مظهر
ثوب قصير ولحية طويلة
حتى ان هناك طرفة تروى تقول:

دعا الشيخ
" اللهم اغننا بحلالك عن حرامك"
فرد تلاميذه عليه يا مولانا انت بالله اسال الله يرزقنا وما تفرز حلال من حرام
بس خلي المال يجي من اي باب والله كريم

لنا عودة

يبدو ان اشكال الكلمات المحدود للرد والتعليق قد زال
لهذا ساقوم بالرد على المتداخلين الذين لم اتشرف بالرد عليهم
والى هناك