07:14 PM April, 21 2023 سودانيز اون لاين
دفع الله ود الأصيل-
مكتبتى
رابط مختصر
*عيد حمام الدم*
∆آسفين، يا عيد،
ما تدق الباب..
ما شايف الدم،
السائل كيف؟
ما سامع صوت
الطلقة الطاشة،
ابت ما تقيف
علي اي رصيف..
لا بتعرف شيخ
لا طفل كفيف!!
∆آسفين.. معليش
القاتل يغني الله أكبر
و لابس كاب..
أجلنا الفرحة،
فقدنا شباب..
شوف طمع
الجاهل والكذاب
حالفين الاخضر
يبقي يباب..
راسمين خطين:
بينا وبين
الفرح الغاب..
داقين اٍسفٍين..
ساقونا اتنين:
مصاصين دم
وبقايا أحزاب..
الكل طمعان
في كرسي خراب..
لا فكر منير
لا فهم صواب..
ونعيش العمر
الجاي عذاب..
∆ آسفين.. يا عيد،
ما تدق الباب..
∆ وزعنا علي
الاطفال باقات ورد
أكياس حلوى؟!!
كلاب والله!!!
اكياس رصاص
واصوت دانات
وكلاشنكوف..
وزرعنا الخوف..
وحرقنا حشا الامات
قطعنا الجوف..
∆ آسفين.. يا عيد،
الشعب بيموت..
وتعيش السترة
وأصوات البوت..
∆ آسفين اسفين
طاطينا سنين..
سلمنا اروحانا
تجار الدين..
أكبر خاذوق
جد ندمانين..
شان التمكين..
صانعين جيشين..
والآن جاين..
جايبين العيد
شايلين الوهم الأكبر
وفرحانين..
∆ آسفين جدن يا عيد.
ما تدق الباب
نحن خلاص
هدا نحنا الآن نازحين
خلينا البيت
لا زيت لا طحين..
∆ آسفين لك يا عيد،
كفاية انين..
آسفين.. آسفين
مانا فرحانين
وجد قرفانبن..