المئات من افراد اسر برهان/حميدتى معرضون للخطر

05:57 PM April, 17 2023

سودانيز اون لاين
النصرى أمين-كالغرى, كندا
مكتبتى
رابط مختصر

تاكدت ان هذه الحرب خاطفة و مفاجئة للاغلبية عند العسكريين و الجنجويد
عرفت كيف يا النصري؟
سؤال وجيه !!
اول يوم وقبل اطلاق النار فى جنوب الخرطوم بدقائق ، عميد فى الجيش( الادارة المالية ) طلع من البيت ماشى الشغل .وقفوه ناس الدعم و اخدوه اسير ؛ لاحقا عمل فيديو منشور فى الوسائط.
كيف عميد فى الجيش ما يحصل ليهو تنوير ؟

الحاجة التانية ، حميدتى رحل المئات من افراد اسرته و قبيلته و سكنو الخرطوم فى مناطق آمنة نسبيا لقربها من المناكق العسكرية ،
هذه المناطق الآن من اخطر الاحياء ...
الكيزان زمان لمن تحصل كعة من بدرى بيعملو اجلاء ...
حميدتى والبرهان مل افراد اسرهم موجودين فى الخرطوم معرضين لنفس الخطر الذى يتعرض له باقى الناس.
ما عندهم اى امتيازات و ما عندهم جحور يدخلوا فيها ...
يعنى الرعب والخوف على الاسر عند حميدتى ووالبرهان اضعاف الخوف عند باقى الخلق...
المهم انا فى الشغل و قلت اعمل الخاطرة دى ابوسريع

Quote: تاكدت ان هذه الحرب خاطفة و مفاجئة للاغلبية عند العسكريين و الجنجويد

سلام النصرى,
بالنسبة ل حميدتى, خطة الحرب الخاطفة هى الاستراتيجية الوحيدة بالنسبة له.
بعد 3 ايام او اسبوع بالكثير (بدون قيادة مركزية) بتنضب المؤن و الوقود و الزخيرة, تانى البندقية بتبقى زى العصاية و الواحد فيهم ممكن يبادلها برغيفة.

تعرف يا محجوب ، عقلى يجيب و يودى داير افهم
اذا الجيش بدأ الهجوم او الحرب ليه يهاجم معسكر فى الأطراف؟
لو الجيش داير يهاجم ليه ما كانت هناك خطة محكمة لضرب مراكز الدعم الاستراتيجية مثل قاعدة مروى او معسكر قرى او شمال امدرمان وديل فيهم عشرات الاف الجنود.

ليه تستمر مناوشات جنوب الخرطوم لساعات طويلة قبل يبدأ الهجوم الحقيقى. . ودى ادت فرصة للطرف الاخر يستعد.
مرات اظن ان الهجوم على معسكر جنوب الخرطوم قامت بيها كتيبة متمردة من الجيش تتبع للتنظيم الإرهابي لانه تسلسل الاحداث
doesn't Make sense

Quote: doesn't Make sense

الهجوم بدأ في مروى و الاثنين كانو عندهم خططهم للغداء قبل العشاء بالاخر.
الهجوم بدأ في مروى علي يبدو و خيار مروى ليس خيارا اعتباطيا بل استراتيجى لتدمير سلاح الطيران الذى ظن حميدتى انه مخزن هناك. قالو في الواقع سلاح الطيران تم تحويله الي مطار سرى و لم يعرف حميدتى ذاك المكان السرى.
حميدتى يظن او حسب مستشاريه انو سلاح الطيران هو الوحيد الذى يعطى البرهان the upper hand و لذلك خطته مبنية علي تدميره حتى يحصل علي ال plain level field و ذاك سبب هجومه الاول علي مطار الخرطوم قبل القصر الجمهورى.

و ثانيا فى ذهابه الى مروى دون اذن قائده, فهو رسميا قد تمرد او قال رسميا هو جيش مستقل و لا يتبع للقائد العام.
و ده بفسر اصراره اثناء المفاوضات انو الجيشين تحت امرة رئيس الوزراء كتف ب كتف و ليس في التراتيبية الهرمية. ده كان كلام عزت في قناة الجزيرة اليوم.
اتخيل ناس قحت يجيبو رئيس وزراء و يقولو ليهو انت رئيس ل جيشين متوازيين و هو معين بواسطة هذين الجيشين او احدهما. هل تظن انهم سوف يستمعون اليه و الطامة الكبرى تجى حكومة ديمقراطية منتخبة و برضو يلقى جيشين متوازيين بأتفاق لا يمكنه المساس به.
زى حمدوك المرة الفاتت قاليك 80% من ميزانية الدولة كانت في يد القوات المسلحة و الدعم السريع و سوف يستمر لمدة 10 سنين.
عموما الاتفاق الاطارى كان فيهو ثغرة او ثغرات كثيرة بخصوص المنظومة الامنية من الصعب علي الجيش سواءا كان برهان او غيره ان يوقع عليه بتلك الصيغة.
و ده بجيبنا ل بداية الاتفاق الذى تم التوقيع عليه ناقصا و ارجاء بعض البنود لمزيد من النقاش و تلك البنود التى تم تأجيلها لانها لا يمكن الاتفاق عليها حينها و لا يمكن الاتفاق عليها لاحقا فكيف يتصور البعض انو فى طرف لازم يرمش مجبر.
يعنى من يوم التوقيع واضح انو ح يكون توقيع ميت.
و ده بجيبنا لمسألة التكتيك اللحظى و الاستراتيجى, شغل رزق اليوم باليوم.

تحليل ممتاز جدا يا محجوب لكن يظل السؤال
اذا كان فى اعداد و استعداد للحرب لماذا لم يحصل اجلاء لاسر جنرلات الحرب ؟