شكية أصحاب البزنس من إرتفاع الأسعار في امريكا و قسوة الأوضاع الاقتصادية

12:36 PM March, 28 2023

سودانيز اون لاين
Osman Musa-
مكتبتى
رابط مختصر

شكية شديدة.
من ارتفاع مجنون في الإيجارات وتقفيل بالجملة للمحلات التجارية
و بعض البنوك والويرهاوسات الضخمة .
وزي ما بقول واحد من اخوانا تجار ( اب استيت نيويورك ) انا على وشك
التسكير .
شنو الحل ؟
وزيرة التجارة جينا ريموندو لابده ساكت.
و ليها 3 شهور تفرك في اصابعينها .
وشكلها ما شايفة اي بريق أمل .
الحل شنو يا شبيبة؟
الظاهر السودان محمدنا و لابد من العودة لملاطم البلوك اليدوي في امدرمان بالدقداق.

مطاعم الوجبات الشعبية تشكي.
متاجر الخضروات تشكي.
إيجارات السكن طارت.
و أصحاب المحلات التجارية يفتشوا للمستاجرين.
محلات الويسترن يونيان صايمة من تحويلات المهاجرين.
الحاصل شنو ؟

ول أبا عثمان،
ومع كل ما ذكرت الشغل بقي ما في .. والحال صار يعود بالناس للشغل مع اليمانين في دكاكينهم التى تدفع كاش ..
الناس بقت لا تستحمل الضرائب ..

وزير الخزانة خرب الأقتصاد .. الأمريكي والعالمي ..
خمسة بنوكة ضخمة أفلست جت
بنك سلفرغيت SilverGate Bank
بنك وادي السيلكون SVB Bank
بنك سغنتشر Signature Bank
سويس بانك Suisse Bank

والأن يا عثمان Deutche Bank يترنح للسقوط ..

وهناك 186 بنك .. أرسلت لوزارة الخزانة أنها علي وشط إعلان إفلاسها .. لأنها لا تستطيع تسديد الحسابات الجارية.

الله يستر يا عثمان ..

بريمة

الأخ مهندس بريمة
سلام
شوف يا بريمة الأمريكان لو ساطوا الدنيا والعالمين ما حيلاقوا وزير خزانة زي عمك روبرت روبن.
يا بريمة داك الجنا عجيب .
عينو بيل كلينتون سلاهو من بنك سل وقعد مع كلينتون في طربيزة 15 دقيقة عالجليك اقتصاد أمريكا
في 15 دقيقة .
وتعال شوف العيشة العاشوها الأمريكان في ديك الأيام .
عليك أمان الله تضرعنا في شوارع جزيرة مانهاتن كما يتضرع الوليد بن طلال في مدريد .
صحيح في البداية كنا سريحة جينز نبيع في الشوارع حارة حارة .
لكن كان اي واحد فينا بخت الفين دولار ربح كل يوم .
قايلنها بتستمر وتيرة ديك الأيام الكلينتونية.
ولا مصدقين حتجي حرب العراق مع بوش .
ولا مصدقين بلدنا بكون فيها وزير خزانة اسمو جبرين .
يا بريمة أمريكا كل ما الناس تنعصر تاني بتستعدل .
اي بلد بتستعدل الا بلاد النيلين الشريفين .
وتستعدل كيف مع البرهان والكلاش .
لكن برضو تعال .
احجز ليك قطيعة. في أحلام ممكن تتحقق .
يا بريمة تعال هنا احسن ليك .
اليومين دي ناس بلدكن مدورين تصدير
لحوم جمال وبقر للجزائر .
الاعمي شايل المكسر للفتح الجديد .
دحين الكع .

ول أبا عثمان
سلام ... والله كلامك حلو .. وأنت دوماً متفاءل .. يا رب ربنا يديك ال في نيتك يا ول أبا،
بخصوص الرفاه في أمريكا .. يا أخي أنت ماشي لكلنتون البعيد داك ..
في عهد الرئيس ترامب .. ومع زرة الكورونا .. عرفنا ليك طريق البورصات ..
والله يا عثمان قروش .. حياتي ما شفتها .. كبت كبت ..
اهلي في السودان في ناس عملوا بزنس في ضهري من القروش التى أرسلتها لهم ..
تعال شوف زولنا الجبناه فزع وبقي لينا وجع ..
حق فاتورة الدواء الأن غالبنى ..
وحسابي تبخر مثل مياه بحيرة ناصر لما النيل يصل أقل مستوي له ..
عشعش في حسابي العنكبوت ..
فقر ما بعده فقر ..
والمصيبة نحن في ال أي تي .. بطردونا من وظائفنا .. بدون سبب .. تقليص للموظفين ..

بخصوص تصدير اللحوم .. يا عثمان ما تمشي لأخواني في منطقة جنوب الأبيض
منطقة تسمى الحمادي .. منطقة آمنة أنا بنيت لهم هناك .. حوالي ساعتين من الأبيض ..
لدينا سوق قريبنا من منطقتنا يعتبر ثالث أكبر سوق للماشية في غرب السودان
الضأن الحمري، الجمال، وأبقار البقارة .. تأتيك من المنتج بأسعار بخسة
أخوانى وأبناء أعمامى هناك .. بس تقول ليهم أنا من طرف بريمة ..
وقول ليهم عايز محجر للصادر .. وأختار نوع الحيوانات التى تريد تصدرها ..
الباقي كله .. الشراء، والحفظ، والسقاية والأعلاف .. كلها بقوموا ليك بها .. مقابل أجر بسيبط جداً ..

لو لم أسافر اليونان للدكتوراة .. ثم نادي منادي الهجرة لأمريكا .. اليوم أعتي تاجر في سوق ليبيا ما يقرب منى ..
ناس شركة الرواسي من أم درمان .. يجونى أسبوعياً وأسلمهم حوالي 32 رأس عجالي .. ويجيبوا لي قروشي الأسبوع القادم بعد ماهم يسوقوا ..
تعامل كان مريح .. وأنا مستأجر القرية كلها .. منهم رعاة ومنهم من يسوقون الأبقار من وإلي السوق .. وسماسرة بيع .. وعييك .
الكلام دام كان عام 1994م .. والله رغم حكومة الكيزان ضيقتها علينا بالضرائب .. لكن كان هناك بهبوهة في العيش ..

يومين في الاسبوع .. الخميس والجمعة .. أيام سوق .. أنا بجيب لحوم ما لها حد ..
نساء أخوانى وأولادهم يكون متنظرين الوليمة .. بعد ساعة من حضوري .. خشوم الشفع وجضيماتهم تلقها مثل الزلابية من زيت الشية ..
والله أيام كانت جميلة ..

بريمة

هسع يا شيخ بريمة
حتعملوا شنو؟
بالنسبة للأكل للسودانيين ما مشكلة كبيرة دقيق الكورن المكسيكي راقد.
لكن المشكلة إيجار السكن. والبنزين.
اي مكان في الدنيا دي ضاق .
شنو الحل .

ول أبا عثمان
هل تصدق لأول مرة كثير منا سمح لنساءه بالعودة للعمل،
زمان كنا تاركين النساء مربيات .. يتابعن أنشطة الأطفال الرياضية والدينية،
لكن اليوم كل من أتي بزوجته من السودان حتى لو حديثاً دخلن السوق عاملات ..
شيئ خطير ..
وحتى بعد دا الناس رجعت لل "ولفير" والسكن المدعوم .. والأعاشات والدعم المادي ..
حالة صعبة ..
لكن إن شاء الله شدة تزول وربنا يفرج كربنا وكرب كل المكروبين ..

في نفس الوقت يا عثمان، ظهرت الأوبر وأوبر إييت .. والدلفري .. شغلانات سهلة .. ودخل سهل ..
لكن لم نعتاد إلي مثل هذا لكن المضطر يركب الصعب ..

وبرضو يا ول أبا، بدأنا نتعلم كيف نفرق الهموم .. أتاري السياحة وزيارة المناطق الجميلة هى في حقيتها ليس رفاه .. هى للترويح
الشعب السوداني محتاج يسوح حتى لو داخل السودان .. تركب وتقول أنا ماشي أزور الباوقة أو ماشي توتيل في كسلا ..
والله الواحد يجئ بمعونةعام من الراحة النفسية ..

بريمة

سلامات
يا أخ بريمة في بداية شهر مارس دا بعرف كم زميل هجرة رجع السودان.
بعض منهم دخلوا السوق وبعض لسع بفتش عن رأس الخيت.
الكويس انو السودان بيقبل اي زول .

ستفتقدك نيويورك التي طالما احببت وشيكاغو وفيرجينيا ونورت كارولاينا والزيداب والمحمية
نسال الله ان يتقبلك القبول الحسن ويرحمك برحمته التي وسعت كل شيء

ستفتقدك نيويورك التي طالما احببت وشيكاغو وفيرجينيا ونورت كارولاينا والزيداب والمحمية
نسال الله ان يتقبلك القبول الحسن ويرحمك برحمته التي وسعت كل شيء

نسأل الله له الرحمة والمغفرة .
إنا لله وإنا إليه راجعون ...

إنا لله وإنا إليه راجعون

اللهم تغمده بواسع رحمتك واغفر له وإسكنه أعالي الجنان يااااارب العالمين.
وحار تعازينا لأسرته وكل أهله.

إنا لله وإنا إليه راجعون.