قصّة تلاتة أخوان برهيد البردي

04:47 AM March, 23 2023

سودانيز اون لاين
أبوبكر عباس-الإمارات
مكتبتى
رابط مختصر

داير أحكي ليكم قصّة تلاتة أخوان مولودين على ضفة خور رهيد البردي؛
عبد الله، أحمد وأخ غير شقيق يدعى يعقوب ومعهم أمهم.
كانوا يرعون أبقارهم ولهم مع هذه الأبقار حصانين وحمار، نادراً ما كانوا يتحدثون مع بعض، وفي نفس الوقت كانوا يتفاهمون فيما بينهم بشكل دقيق، حتى أنني ظنت أن اللغة مفسدة وترف.
أحمد تزوج وأنجب محمود والخليل، قبل يموت بلحظات قال ليعقوب وكنت أظنه يوصيه على زوجته وعياله، لكنه لم يفعل إنما قال له:
ما كنت قايل في الجنّة ليس لنا أجساد!
وواصل:
طلبوا مني أن أنام في عُش ذلك الطائر الطنان، فنظرت للأسفل لأرى كيف لجسمي الثقيل أن ينام في ذلك العش الصغير، فوجدت أن لا جسد لي وأنني أخفّ من أنثى الطائر الطنان،
قام يعقوب بسرعة بقفل عيون أخيه وتمتم له بالشهادة، وكان في هذه اللحظة أن أجتمع حوله عبد الله وأمه ومحمود والخليل.
هذه القصّة تبدو للقارئ العابر بأنها تحكي قصّة بطل المهدية عبد الله التعايشي، لكنها ليست كذلك وإن تشابهت الأسماء وبعض الأحداث؛ فداخل كلٍ منا حيوات كثيرة منها من قصصنا عليك ومنها من لم نقصص.

في الخريف بتحركوا شمالاً تماماً زي ما بقول كتاب الجغرافية بتاع المتوسطة؛
رسم يوضح رحلة البقارة في الخريف.
عبد الله يتحرك راجلاً ويقود الحمار ويضع سامانه عليه ويتقدم القطيع والخيل،
يشبه قدرة الفول، لكنه يمتلك قوة عشرة رجال،
يستطيع سحق عضام يد من يصافحه إذا أراد!
في واحدة من استراحات الرحيل، الخليل كان بتطعمج على عمه مع أخيه محمود،
قال ليهو:
أقوى رجل الحصان دا ولّ كراع ود أم ظق؟
محمود لم يبتسم ولم يرد، لكنه في مناسبة ثانية قال للخليل:
عمك ود أم ظق دا بتحرك بالشم

في الرحيل أمهم قاعدة تركب تور وهي امرأة صامدة وكغير عادة النساء صامتة، قد يمر شهر دون ان تتحدث مع أحد، ما بقدر أوصف شكلها العجيب لأنو معاي صحبات كتار هنا ناشطات في مجال حقوق المرأة.
أما المرأة الثانية أم الخليل ومحمود سوف أسقطها من الحكي بدون أسباب واضحة وحتى ما داير ذاتو أتعب وأدبها اسم

Quote: عبد الله، أحمد وأخ غير شقيق يدعى يعقوب وأنجب محمود والخليل هذه القصّة تبدو للقارئ العابر بأنها تحكي قصّة بطل المهدية عبد الله التعايشي، لكنها ليست كذلك كان يشبه قدرة الفول

يعقوب اخو عبدالله التعايشي ونائبه وقائد الراية الزرقاء
الخليل قائد الكارة
الامير ... محمود ود احمد
قدرة الفول ... يبدوا انه تلميح الى محمد سعيد (جراب الفول)
....
واصل يا ايها المصباح في نقل الماضي للحاضر....
التعايشي سلم معاهدة المهدية مع امبراطور الحبشة (منليك) الذي تنازل فيها عن اراضي لصالح المهدية
الخليفة سلم الوثيقة الهامة دي لى ابوالقاسم هاشم شيخ علماء السودان داك الوكت
وثيقة المعاهدة اتسرقت من بيت ابوالقاسم .. على حظه الخليفة يوم الاحد قال ليهو جيب الوقة... مشى فتش للمرة المليون ما لقاها
قال للخليفة ما لقيتا.... امهلوا اربعة ايام قاللو حدك يوم الخميس ان ما جبت الوقة اقطع راسك دا
الشيخ اتخلع ورجف وهو يعرف بطش الخليفة.. مشى لى ولد الخليفة الكبير الاسمو(شيخ الدين) وحكى ليهو القصة
يتبع

شيخ الدين ود الخليفة قال ليهو امشي لاخوك شيخ الطيب احمد هاشم بوريك الحل،
مشى حكى ليهو بتهديد الخليفة وجابوا معاه البيت وقعدوا من يوم الاحد في الذكر والدعاء
صلاة وذكر ودعاء ليل نهار .. اها يوم الاربعاء قبل موعد الاعدام بى يوم .. اها يوم الاربعاء
شيخ الطيب وهو قاعد اخدلوا غفوة. وحلم انه الورقة المهمة دي موجودة جوة كتاب في بيت السارق
(فلان) ، كلم ابوالقاسم وراهو حتى كيف سرق الورقة..عشان يورطك. شيخ الطيب من مكانه مشى لبيت
الراجل السراق دا وجاب الورقة بدون ما زول يشوفوا بى غفلة كدة.
شيخ ابوالقاسم المرعوب مشى سلم الورقة للخليفة الغاضب يوم الخميس الصباح .. قالوا لقيتا وين؟
قاله لقيتا في بيتي بين اوراقي الخاصة وما وراهو الحاصل ولا انها اتسرقت....
طبعا السارق دخل في حالة وقرب يموت من الخوف.. وقايل ان ابوالقاسم حيكلم الخليفة بعد الامور تهدأ
وقعد تلاتة يوم لا بنوم لا بياكل ... في الاحير جاء عند شيخ ابوالقاسم وقال ليهو وقوع البلاء ولا انتظاره
كلم الخليفة عشان يقع البلا وارتاح... شيخ قاسم قال ليه في شنو؟ انا لقيت الورقة جوة كتاب جوة بيتي دا
واصر على الكلام دا..... يقال ان شيخ قاسم اوصى اولاده انهم ما يجيبوا سيرة لاي زول.

مرّة بعد محمود والخليل جوا راجعين للتايه والحصان ملان أرانب،
وأثناء ما خدمهم الثلاثة يعدون في الطعام،
محمود بعد سلم من صلاة المغرب، ألتفت للخليل وقال ليهو؛
كيف أنت وود أم ظق دا حافظين القرآن وما قاعدين تصلوا؟
وأنا وعمك يعقوب أبداقوسة دا الحمدو ما حافظنها كويس وترانا الصلاة دي بنعافرها؟
الخليل قال ليهو؛ لو درت شوري الصلاة أتركها وخليك في فروسيتك وصيدك ديل، راجيك دواس كتير،
وود أم ظق دا الله بكفينا شرو

مرّة بعد محمود والخليل جوا راجعين للتايه والحصان ملان أرانب،
وأثناء ما خدمهم الثلاثة يعدون في الطعام،
محمود بعد سلم من صلاة المغرب، ألتفت للخليل وقال ليهو؛
كيف أنت وود أم ظق دا حافظين القرآن وما قاعدين تصلوا؟
وأنا وعمك يعقوب أبداقوسة دا الحمدو ما حافظنها كويس وترانا الصلاة دي بنعافرها؟
الخليل قال ليهو؛ لو درت شوري الصلاة أتركها،
وخليك في فروسيتك وصيدك ديل، الما بلحقك فيهن زول ديل،
وأبقى مستعد راجيك دواس كتير،
وود أم ظق دا الله بكفينا شرو

معقولة البوست يمشي الصفحة الرابعة!!!!
لا كرامة لنبي في حلتو.

مِرض عبد الله مرض شديد، جاء يعقوب وقف في راسو وقال لمحمود جيب لي دم غزال،
طلع محمود والخليل راكبين حصان واحد،
محمود قال للخليل:
يمكن ود أم ظق ماشي يحصل أبوي؟
الخليل قال ليهو: لا ما بموت هسّ، لسّ عندو جولات وصولات كبيرة.
جولات وصولات دي أكلت مع محمود جنبّة فهو قليل الثقافة خارج الفروسية والصيد.
محمود قال للخليل: تلب من ضهري، شايف الغزال داك؟
بجيبو ليكم حي.
الخليل نزل من ضهر الحصان ومحمود انطلق وراء الغزال بسرعة خيالية جنونية لحدي ما حادى الغزال ودنقر وهو جاري بالفرس وألتقط الغزال.
الخليل ختّ يدينو في راسو وبدأ يضرب برجلينو الاتنين الواطة ويقول:
الله يكفينا شركم انتوا التلاتة ديل
الله يكفينا شركم
خيركم ما بنلقاهو

عبد الله والخليل ود أخوهو بتمتعوا بذكاء خارق ومعرفة بالطبيعة ونوايا البشر تصل مرحلة ممكن تقول عليهم سحاحير!
يعقوب تُجم لكنو عندو معرفة بتربية الأبقار وعلاجها لا يدانيه فيها أحد.
محمود فارس وصياد لم تر كردفان مثله،
مرّة عبد الله قال لمحمود -ولم يلحظ وجود الخليل فهو يتجنب أن يقول شيئا أمامه- بالرغم من نحالة جسمك يا محمود، إلا أنك أبرع من عنترة بن شداد،
محمود قال ليهو عنترة دا منو؟
رد الخليل:
يدعون عنترة والرماح كأنها أشطان بئرٍ في لباس الأدهم.
تضايق عبد الله وذهب في حال سبيله متكدراً

الطرفة البكاية والجبهة النداية:
لم تشهد كردفان مطراً بتلك الغزارة في طرفة ذلك الخريف، حتى خُيّل للناس أن السماء سوف تنشق من البروق والرعود وشهد الجماعة لأول مرّة من زمن بعيد عبد الله يصلي بتقوى شديدة.
غيّر عبد الله مسار الرحلة السنوية وتوجه بأهله وبقرهم ناحية بحر أبيض وأستقر بهم خارج حلة بالقرب من تندلتي تدعى كدايس.
بنوا عدة رواكيب واستعانوا ببعض العمال لحلب الأبقار وبيع الحليب في كدايس وما حولها.
وقال لأهله ح نقعد هنا للحول، العشب دا بلاقي.

يا سلاااااااام يآخ
الواحد طول من بنبر بكري دا .. لكن العزاء الوحيد انه الواحد اول من يجي داخل من باب الحوش
يلقى قدامه الإبداع البكوري دا منجلق ومدفق على الجنبات..

فعلاً السودانيين ديل حاسدين وكسارين مجاديف.. وإلا فجنس شغلك دا مفروض يكون هسه انتجته نتيفلكس في مسلسل محدود من 10 حلقات
مع نهاية بتوحي باجزاء اخرى قادمة..

شكرا يا اديبنا الراقي المبدع المتواضع على هذا الألق ..



...
أصلي العصر وارجع اواصل الكلام ؛)

هلا ود ياسين

Quote: يقال ان شيخ قاسم اوصى اولاده انهم ما يجيبوا سيرة لاي زول.

اها و بعد الوصية القاطعة دي الكلام ده وصلك كيف
و تم جميلك و ورينا الوثيقة دي هسي وين

اهلا وسهلا جلالدونا وشركاه

Quote: اها و بعد الوصية القاطعة دي الكلام ده وصلك كيف و تم جميلك و ورينا الوثيقة دي هسي وين

الوثبقة بقت في بيت شيخ علماء السودان وهو الشيخ ابوالقاسم احمد هاشم
وقبل اكتمال استعادة كتشنر حكم السودان الخليفة امر باحراق الوثيقة فاحرقوهاى

Quote: لا كرامة لنبي في حلتو.

من خلال كتاباتك النوعية السرد،
راجع جيمع لفافاتك لإدراجها في روايات، سيبك من يتيم في حلتو!