بمناسبة المؤتمر السابع؛ نعمات مالك بدري عروس الحمى
Post: #2 Title: Re: بمناسبة المؤتمر السابع؛ نعمات مالك بدري ع Author: أبوبكر عباس Date: 03-23-2023, 09:25 PM Parent: #1
بمناسبة المؤتمر السابع للحزب الشيوعي: نعمات مالك بدري عروس الحمى: بعد خمسين سنة من إعدام نميري لزوجها سكرتير الحزب الشيوعي؛ عبد الخالق محجوب، وهي في الثمانين من عمرها تدندن بأغنية محببة لديهم، ضحكت ضحكتها الجميلة وقالت لينا عليكم الله، شوفوا بعض الشيوعيين الحاسدين ديل، قالوا ليهو ما تعرس نعمات، هسّ لو ما كان عرسني منو الكان ممكن يغني ليهو غُنا الكابلي للآن غُنا بصوت عذب زي دا؟! وواصلت في دندنتها وعرجت تغني بحزن؛ عريس الحمى عريس الحمى المجرتق بالرصاص المحنن بالدما إيدن آذتك ما نسالما ما بنسالما قلت ليها يا أستاذة، شنو الخلى عبد الخالق محجوب يختارك من دون باقي الشيوعيات؟ قالت لي بعد صلحت النضارة ومثلت فيها بتزح في خصلات شعرها من جبهتها، وأبتسمت ابتسامتها الجميلة ديك؛ القلب وما يهوى وبعدين شنو اختارك دي؟ نحن أخترنا بعض وأنا كنت زولة مثقفة وتقدمية وجميلة ولطيفة وحيوية وفوق دا نحن ناس بدري ديل فينا ميزة؛ الفي قلبنا على لسانا، لكن والله، ما عارفة شنو العجبو فوقي بالظبط، لكن لو زارني بكرة في النوم بسألو ليك فهو ما زال زوجي وحبيبي ولا أرضى أبداً أن أوصف بألأرملة وقعدت تضحك. قلت ليها بسخرية لاثارتها أكثر؛ لكن الزميلات ديك أعرق منك في الحزب وأكتر نضالاً قالت لي بضحك أنا ذاتي مناضلة كبيرة، نحكي ليك دي؛ مرّة زمان في يوم بالمساء ناس نميري اعتقلوني ومعاي صديقتي خنساء زوجة بابكر النور، وودونا القسم ودخلونا الحراسة مع متمردات المدينة من بائعات الهوى وستتات العرقي وشقيات الحال، الصباح بدري وردية القسم اتغيرت وجاء داوم جديد فيهو ضابط شاب وجيه، فتح الحراسة وعمل مسح للنزيلات، لقاني وصاحبتي مختلفات لابسات بطريقة عصرية المهم مختلفات، طوالي نادى على العسكري وشاكلو، وقال ليهو ديل بختوهن هنا؟ طلعن وديهن المكتب، طلعونا وجابوا لينا شاي وهاك يا ظرافة من الضابط، قايلنا بنات ليل قبضونا في كشة ولو في الزمن دا كان شال تلفوناتنا، بعد شويّة قعد يقرأ في يومية التحري وعرف إنو نحن معتقلات شيوعيات، الود زي اللدغتو عقرب قام على حيلو وقلع مننا الشاي وكشانا رجعنا الحراسة بلؤم شديد قال لينا؛ قومن بلا شاي بلا كلام فاضي تشربن السم.
مراجع: الكتابة من خيال الكاتب من وحي ونسات مع عبد الناصر أحمد طه
Post: #3 Title: Re: بمناسبة المؤتمر السابع؛ نعمات مالك بدري ع Author: هدى ميرغنى Date: 03-24-2023, 02:00 AM Parent: #2
السلام والإحترام، أخى ابوبكر~ لك التقدير والشكر على هذا الخيط وسيرة الأستاذة الصامدة ، الشجاعة نعمات مالك #أسألها كيف اخافت القاتل نميرى فى ود نوباوى (بعد أن أعاده الكيزان) - الا طلعوه بالباب الخلفى، موقف شجاع لكن الأستاذة بتحكيه بلطفها داك …
*الصورة دى لفتحها من الراكوبة الأستاذة نعمات مالك وابنيها وهما أطفال وقتها حاليا: -الباشمهندس عمر عبد الخالق محجوب - الأستاذ الجامعى المعز عبد الخالق محجوب أيضا بالصورة خالهم أخ الاستاذة نعمات مالك
https://www.0zz0.com
Post: #4 Title: Re: بمناسبة المؤتمر السابع؛ نعمات مالك بدري ع Author: osama elkhawad Date: 03-24-2023, 02:14 AM Parent: #3
Post: #5 Title: Re: بمناسبة المؤتمر السابع؛ نعمات مالك بدري ع Author: Yasir Elsharif Date: 03-24-2023, 08:53 AM Parent: #4
سلام ليك يا بكور وللأستاذة هدى
والتحية للأستاذة نعمات مالك ولأسرتها وأخص صديقنا عمر عبد الخالق الذي كان معنا هنا في ألمانيا.
هناك صور جميلة للأستاذة نعمات في مركز الأستاذ محمود في واحدة من احتفالات ذكراه سأبحث عنها واضعها هنا.
Post: #6 Title: Re: بمناسبة المؤتمر السابع؛ نعمات مالك بدري ع Author: Yasir Elsharif Date: 03-24-2023, 10:10 AM Parent: #5
والتحية للأستاذ أسامة الخواض
إعتداء على قيادات (لا لقهر النساء) بالرصاص والبمبان في سيارة يستقلونها
Post: #7 Title: Re: بمناسبة المؤتمر السابع؛ نعمات مالك بدري ع Author: Yasir Elsharif Date: 03-25-2023, 06:04 AM Parent: #6
عند تشغيل الفيديو من هذا الموضع تطالعك صورة الأستاذ محمود 4:14
