كردفان في الخريف للشاعر الراحل قاسم عثمان بريمهِ

10:32 AM March, 16 2023

سودانيز اون لاين
حيدر حسن ميرغني-Colombo -Srilanka
مكتبتى
رابط مختصر

كردفان في الخريف
للشاعر الراحل قاسم عثمان بريمهِ

يا حليل كردفان وكتين تدودي رعوده
ويموج السحاب وأطياره تعزف عوده
يتبلل نسيمه يشرح ليك معاني سعوده
تبين زى عروس بالهناء والنعيم موعوده
********
ما إنفج السحاب إلا تانى عب وشيل
زرف دماعه فضّ جفونه زرّقٍ نيّل
بعد مرح السرور اتغافى صيده وقيّل
في تل رمله زى برادة الدهب إتخيّل
********
العينة تلو العينة لمن جاتنا الطرفه
كالت بالكتير دموع السحاب منزرفه
ناسا في الخلاء متلفحين بى قرفه
وناسا في المدن ممطرين في غرفه
********
ليالي شهرزاد ويشرق صباحه الهادي
ينبثق الضـــياء وتغـــرد طيور الوادي
لحظات والسحاب يغطيها ويطير متسادي
تضلم من جـــديد وتولــع بالعــــبادي
********
الخور بصعيدها خرّ و لمع حصحاصوا
والصيد إنتشى وما تفادى جور قناصوا
متحدى أهل الكلاب والجاى بي رصاصوا
وفى كنف الإله تالي سورة إخلاصوا
******
من لفح الهجير إتبلمت بضبابه
اخضرت كلها وبجبالها صبحت غابه
كل شاعر صدح لغناها شال ربابه
والسندس رقص وانشر فوق لترابه
*******
إتكيف جوها وحلقن صقاره
فرهد أرنبه اتوالد تحت تقاره
السخيل إن لمحته بغفله خلتو حباره
متكدس الشحم من قرضة الشوقاره
*******
جمالها القارضة لعنان الفروع تتشابه
وزاهية خرافه تمرح راتعه في أعشابه
إن ذكرو الجنان أنحن نتفاشابه
خزانا التبلدى وأملنا جو هشابه
********
أخدت زينتها ورحلنا شوفنا بهاها
نسجت كل جميل إتوشحتبوا رداها
ألوان خضرتها المعكوسة في أمواها
زادت روعتها ويا قدرة السواها
*******
مرتع للجميع الزغاوي والكباشي
متعايشين حنان وكل شيء ميسر ماشي
قدام جحر الكديس مبيض الغباشي
تلقى المرفعين يحاشي فوق الحاشي
******
شمسها للأرض تتحدى قاصدا حرابه
خيوط من لهب يتزارقن حرابه
صلت الأرض نارا نجضت تيرابه
شبعت ماشيتها وزواحفها وأعرابها
*******
خلاص دارتت وإتنوعت خيراتها
وصبحت لوحة كاملة إترابطت فقراتها
بنقيق قعونجا وجنادبها الزغراته
ملت أعماقنا فرحة وعشنا في مسراتها
*******
لمينا الحصاد وفركنا الورق بالويكه
والسمسم انظلط للجربه والتمليكه
في بنك السعادة أيامنا صرفت شيكه
وهبيله اتهابلت قندولا سرف الريكه
********
العيش انقطع ضروه بعد اندقه
مردوم بالصبر لعمل اللقمه والدقه
العنكوليب زرق الفص طويل ومنقه
وبالغ السدر النبقاية توزن وقه
*********
لالوبا العسل البيحكو بيهو حكاوي
مرصوص غابة جم عربي وحاج مكاوي
طايله فروعه لى نخل الشمال بتكاوي
أحلى من العجوة بكثير وأقلد من البركاوي
********
وان مريت بابو جهل والله نعم السوق
تلقى النرمتى والسبلى داك مسلوق
سورنى وقنقليس والدكوه والهالوق
والبامية أم قرون البتخلى الملاح لايوق
*******
أنا كردفان منو البقيف في قصادي
أنا رباية اليتيم آواية الجياع والصادي
أنا ست عز قديم أنا كعبة لي قصادي
يلقوا الخير منبلج يلقوا النعيم في حصادي
******
مرفوع راسي عالي مفتخرة بأولادي
البيبذلو كل نفيس لرفعتي وإسعادي
مليون مئذنة ومليون أذان بينادي
مدارس بالكتير ومعاهد علم ونوادي
أنا كردفان أنا جمل بقاع الوادي

ول أبا حيدر حسن علي
سلام ..
هاك ..
كردفان بانوراما الخريف والمطر ..



كردفان .. بانوراما الخريف .. (صور)كردفان .. بانوراما الخريف .. (صور)

بريمة