|
|
|
 Re: عِن طلعت القمرا-عماد عبد الله ... (Re: بدر الدين الأمير)
|
هلا سيف،
مرّة كان عندي بوست هنا اسمو شمعة في مطرة في الكلاكلة صنقعت،
الكلام جاب الكلام وقام المثقف الكبير حيدر حسن كتب لي المداخلة دي:
ياسلام يامستنير ياخ
قطب الاقطاب الطيب صالح قال ذات مرة في تذكره للراحل صلاح أحمد إبراهيم أن هذه الأغنية (الخير" يا عشانا .. تودينا لاهلنا .. بسألوك مننا) من احب الاغاني الى قلبه
استحضرها في معرض تحسره على حال البلد وما أصابها عدم إستقرار .. وقال انهم كمثقفين سيسألون عن السودان مثل سؤال اهل هؤلا النسوة (للخير) المذكور في الاغنية
من خلال بحثي عن مناسبة الأغنية الحلوة دي لقيت الأتي:
(هذه الأغنية صاغت كلماتها أمه "الشاي بت احمد"
ذهبت مع نسوة من فريق "الشداداب" الى عرس الخير ود صالح في "ودكرار" احدى قرى الجزيرة وعندما تأخر بهم الوقت في الرجوع الى "الحلة" قالت مخاطبة "الخير" مستعطفة اياه في كلمات رقيقة وخالدة ان يعود بهن الى الديار في وقت مبكر رمزت اليه في الأغنية "بطلوع القمرا" خوفا من غضبة الأهل الذين ما كانوا ليسمحوا لبناتهم في ذلك الوقت البعيد بالسفر خارج القرية أو السهر لوقت متأخر خارج المنزل:
الخير يا عشانا
تودينا لاهلنا
بسألوك مننا)
| |
 
|
|
|
|
|
|
|
 Re: عِن طلعت القمرا-عماد عبد الله ... (Re: سيف اليزل برعي البدوي)
|
سلام يا سيف وضيوفك الكرام
ملحمة مروي فاتتك كيف ؟؟؟
بقلم عماد عبد الله في نواحي الفيس بوك
للحب عيد صحي صحي..
فهذا هو.. وأيما عداه فهو قصيروني وصغير.. وفاني.
حب سمح ودايم لي يوم الله.. وسيع وحدادي مدادي لكافة ما فيك يا هذا البلد العبقري المحزون.
_________
( ملحمة مروي/ لسيدي عبدالكريم عبدالعزيز محمد الكابلي).
وديني.. هذا جمال سوداني صرفٌ حلو طاعم أبلج ناصع نقي وصافي زي عين الديك.
...
أتذكر الصبا، وما كنت سمعت هذه الملحمة فيه إلا وانقشطت روحي غوراً في حشا ذاكرة تنِز بما زرته ورأيت فحفظت من بلاد السودان، وبما عرفت ما عرف أهله وخبروا، هي حياة حياة.. قاسمها الأعظم: المخاليق والحياة الهينة الوادعة التي تغدق عليهم ذاك السحر العظيم، سحر يلتئمهم بسلامتهم من أول ملامحهم الطيبات وإنت ماشي هيلا هيلا هيلا.. لغاية هواهم ومويتهم وواطاتهم ونارهم.. وعاكهم وعيكهم.
..
فههنا مروي..
أرض ناس دار صباح -أهل البحر والبحرين.. بحر أبيض وبحر أزرق وبحر النيل- وكذا عديد البحار التي تندلق عليهم من رحمات الله داير ما يدور.
كافة مخاليق الله الطيبين وحالهم وواطاتهم وفرحهم وكرهم وهمهم وطقوسهم.. محشودين دفس في فرد غنوة.
بنخيلهم وطواريهم وسلوكاتهم وكواريقهم وسواقيهم وهمبرتيهم وسعدتهم وسبروقهم وقمحهم وتمرهم وبرسيمهم، بالميع والباع والعرت والتك والحاو والهُرت، فالعوك والعاك والطنابير الشواديف القواديس المطامير القواسيب، فالمساير والضفاير والفدو والخرز والسكسك والكشو، فالنقرابي ودرب الطير والرشيم والخشيم والسلة والجورسيه والعراقي والمشنوقة والمزروقة والمخلوفة والكادينقة، فالسديري والشُمارة والعمة والشال وجناح أم جكو والدبلانة والبوبلينة والدمورية والقنجة والبُقجة واب قجيجة وأم رقيقة وخال فاطنة، فود اللحد وود اللدات والتبروقة والابريق والكاويق والملود والطرمبة والبيارة والشادوف والدميرة، فالزاوية والكاوية والساوية والنوريقة والبتيقة والإرتيقة، فالطهار والداية والبصيرة والحكيم والتُمنة والظبطية والجبّانة والشفخانة والطابونة والمقروعة فالممنوعة والحاحاية والنمّاية، فالمطمورة والردمية والجدول والنمچتي والهاموشة والناموسه وابو الحصين والسوساية والقلاية، فالراية والشاية والتاية والمنضرة والرُّقابة والكرار والفرار والقلة والزير والكمينة والبُرمة والعتود والجريو والواسوية والحلق والكتف والمرق والكرو واللداية والعواسة والمعراكة فالمُحراكة والقراصة والفطيرة والمشلعيب والبنوت والسباتة والترتيرة والحمحيمة والنقدة والريشة والصقرية والجودية والمحرية والمكرية، فالحوباية واللولاية والوطاية والزغرودة والضريرة والحريرة والجدلة والزمة والعمتة والغمتة والحسيان والحبيان والتاتاية، فالزمام والقشة والكحل والحنة والطمبرة والدليب والكريب والبتيب، فالدلوكة والشتم والبشارة والفدعة والجدعة والفقلة والتلة، فالعوعاية والودعاية والمروة والشيلة والعويشة والفصداية والفلجاية والنوناية والختة والصرفة والكرفة والقلدة والباشري والطبق والطابونة والمزيونة و... إييييييييك.
فيا اللوري.. تشيل منو ولّلا منو؟؟
............
هذا التسجيل الأولاني لملحمة مروي.. التسجيل اب فاروظة تسي كدي ها، ثم فوق ده وداك مدهونة بحس سيدي الكابلي النديان التريان وطلي. وفرقة الإذاعة الموسيقية -الأوركسترا- تبادلو بداعة ببداعة.. شيل خت شيل خت شيل خت.. مرات مرات بشويش بشويش تعلو وتصعد تصعد تصعد.. حتى ترتقي فوق في البكان الربّاني العالي.. ثم تصد راجعة مترترة بالروقة حاسية شيش بشيش.. تحسا تحسا لااامن تشمط وتقمط في حراية قلبك المجدوع يفرفر ضبيحة طير.
..
الله يرضي عليكم.. الداير يسمع يخشع في الاول.. إذ لا تجوز أي فرفرة ولا نفس يتشال ولا يتخت (أثناء التلاوة.. كما أفاد سيدي علي المك)، فالرجاء التماسك.. والله المستعان.
...
( ملحمة مروي )
فيكي يا مروي شفتَ كل جديد
وفيكي شفت عيون لعبو بيّا شديد
وانكويت بالنار من زهور في خديد
ومهما زاد وجدي ما بسيبو الريد
لأني قلبي حنين بعشق التغريد
بى محاسن الكون وبى جمال الغيد
...
يللا نمشي النيل
في أواخر الليل
بين رمال ونخيل
يغني لينا جميل
بوبا عليك تقيل
يا القمر بوبا عليك تقيل
...
يا مريسيل يا مريسيل
يا مريسيل تعال نوصيك
في الرمال الصيد بلاقيك
هو بيعزمك ويعتلق فيك
قوللو حالف ما بباريك
وما بدليها التهمة فيك
...
جيت ماري العصير
لقيتا بتملا فوق زير
الرقبة قزازة عصير
العيون شبه الفناجيل
الزراق فيها تقول حرير
الضمير عاج التكارير
السنون برّاقن يشيل
إنتي ريحتك دمور فرير
ولّلا بت السودان أصيل
...
شوف فلانة الواردة وحوا
سكنت قلبي من جوه
واتغابت فوقو الخوه
تحكي خطو الريم العايره
على نغم الساقية الدايرة
تغني ليها تقول:
والله ظلم علينا ظلم
يا ناس القوز ده لينا ظلم
الشال السيدة وخلى حرم
سفر التلاتا والله عدم
سعينا الريد جنينا حِكم
وقلنا الحب والله قِسم
...
متين يا ساقية نترك النوح
يجيلي قميري يقوللي نروح
نقابل الشوفتو ترد الروح
حِبيبي السادة خفيف الدم
يا ناس القوز ده لينا ظلم
...
فيكي يا مروي شفت كل جديد
فيكي شفت جمال كل لحظة يزيد
يسبي وجداني بحلاوتو أشيد
وإن نسيت ما نسيت
يوم لقيت الصيد
زاهي بى حسنو بغناهو سعيد
كم أضاع صبري
يا الحلة تنوري يا البنية تنوري
إنتي حاشاك تتغيري
كنتري الشبال نتّري
يا قلوب الناس كبّري
ويا عيوني اتصبري
يا اللوري تشيل منو
غير شباب نوري تشيل منو.
...
| |
|
|
|
|
|
|
|
|
|
Re: عِن طلعت القمرا-عماد عبد الله ... (Re: Osman Musa)
|
محمد محمد القاضى
مستنيك تقول رايك بعد ماثبت راي
كوبى بست في حاكوى وقصص عماد عبدالله
البقت ماسخة وممجوجة عماد موهبة قتلها الطراء
وتضخم الذات واضحى لايحتمل غير الحواريين والمصفقين
الصفقاء
برضو هذه المداخلة ممكن تعمل منها كوبى بست عشان ما انكرها
او اتراجع عنها او عدلها
| |
|
|
|
|
|
|
|
|
Re: عِن طلعت القمرا-عماد عبد الله ... (Re: سيف اليزل برعي البدوي)
|
هلا يا ابو لبيد
أنا وضعت علامات إستفهام لرأيك السلبي المقتبس
ومندهش ومستغرب علي هذا التغيير في المواقف
يبدو أن هناك مياه جارية تحت جسوركم والله أعلم
بعدين إنت عايز رأي في شنو؟ في ما يكتبه ولا في
عماد ذات نفسه مثلا ؟
يا سيف وينك؟
ملحوظة: عماد عبد الله عضو هنا وعنده مكتبة زاخرة ومليانة
قصص وحكاوي وحكايات غميسة وحنين المخاليق إلي الأمكنة
| |
|
|
|
|
|
|
| |
سيف اليزل برعي البدوي
بدر الدين الأمير
أبوبكر عباس
محمد محمد قاضي
Osman Musa
فيس بوك
تويتر
انستقرام
يوتيوب
بنتيريست