|
|
|
 Re: اي امرأة انتى قمه الوفاء (Re: مصطفى نور)
|
السلام والإحترام ، أخى مصطفى نور~
شكرا على هذا البوست عن نضال الشعب الفلسطينى متعدد الأشكال
ودور المرأة فى النضال
#يحيا نضال المرأة أينما كانت ويحيا نضال المرأة السودانية اليومى متعدد الأشكال
كتب محجوب شريف لرفيقة دربه ، أميرة الجزولي وهو فى المعتقل بسجن بورتسودان:
Quote:
لو فى يوم رميت سيفي ورفعت ايديَّ
وخنت الثورة جيت والذلة فى عينيَّ
حرام عينيك يناغموني ويرحبو بىَّ
حرام ايديك ينومن تاني فى ايديَّ
بس لكنى يا ويلي
أقبل وين وأقول يا مين
لمن أخون صباح العين وأخون جيلي
أعاهدك يا قمر ليلي
أشيل شيلي وأشد حيلى وأموت واقف على طولى
…
وأقول ليك يا صباح العين
بنادق وين بتمنعنا العديل والزين
بنادق وين
|
| |
  
|
|
|
|
|
|
|
|
Re: اي امرأة انتى قمه الوفاء (Re: هدى ميرغنى)
|
هدى ميرغنى
اختاه
تحيه طيبه
وشكرا على الرد الرائع
ومثل محجوب شريف واميره الجزولى
وعمر الطيب الدوش وسعاد
هولاء لن تنجب الارحام قريبا مثلهم فهم مثال للتضحيات وتحمل الصبر والتفانى من اجل البلد ووالوطن
اتذكر زواج الرائع محجوب شريف من الرائعه اميره الجزولى كانه كان امس فى الثوره الحاره الخامسه امدرمان
واتذكر الجمع الظريف منهم الرائع محمد وردى والفنان الكبير محمد الامين كانوا من ضمن الحاضرين ونخبه كبيره من اهل الفن
واتذكر انو الرائع مححوب شريف كان قد جاب فى الشليه الجمليه وبسيطه كميه من الكتب المختاره التى نقيت بعتايه فائقه
هولاء كانوا اشخاص لديهم العشق للوطن والعشق للسودان
ولا انسى استاذى الرائع الذى كنت احد تلميذه فى مرحله الثانوى العام لقد كان انسان يشع غيم وثناء ويكفى قصه زواجه من سعاد التى فى نظرى اجمل من قصه
تاجوج واجمل من قصه عنتر بن شداد
وتعالوا معا نسمع قصه الرائعه سعاد محمد الحسن عن الرائع الجميل الشفيف عمر الدوش
تحدثت الممثلة سعاد محمد الحسن عن الأستاذ المبدع الدوش وعن قصة الزواج ومواقف أخرى في حوار لها فإلى ذلك الحديث: كنا ندرس في معهد الدراسات الاضافية بجامعة الخرطوم آنذاك في فترة حكم مايو 1983م خرج أساتذة المعهد لاستقبال شخص ما لا نعرفه نحن الطلبة وكانوا (متكتمين) عليه كنا ننتظر هذا القادم بشغف بعد أن عرفنا من الأساتذة أنه صديق عزيز لديهم فجاءنا شخص أشعث أغبر يحمل كمية من الكتب لا يستهان بها كنت أول من أصدر تعليقاً عليه وصحت (سجم أمو واخواتو بدل ما يجيب ليهم شنطة هدوم جاب ليهم شنطة كتب)، درسنا تاريخ المسرح وبعد شهر على بقاء هذا الأستاذ معنا عرفنا أنه عمر الدوش.
وعن اللقب (الأستاذ أبو حجاب) تروي الأستاذة سعاد: عندما جاء الدوش لتدريسنا كان يعلق حجاباً قديماً على عنقه (ضحكت وأردفت بطريقتها المسرحية (أظنو مما سافر كان لابسو)، أطلقت عليه الأستاذ أبو حجاب، في أثناء المحاضرة انقطع حجابه وهوى على الأرض فتناوله مسرعاً ومده إليّ ووسط دهشتي قال الدوش(أمشي أعملي لي خيط للحجاب دا)، خرجت احتج بين زملائي وأقول (قال لي صلحي الحجاب الأستاذ دا عذبني) ومن الحجاب بدت الحكاية.
وتحكي الأستاذة سعاد حكاية زواجها من الأستاذ الدوش (زواج مخالف للعادات السودانية كان في شهر سبتمبر 1986): أنا أول فتاة تتزوج بلا مهر ودون شبكة الدوش دفع لأهلي خمسة عشر جنيهاً وقال لي(إنت أغلى من إني أشتريك)، خالاتي زعلوا شديد وقالوا لي (الترابة في خشمك إنت ناقصة من البنات شنو)!، كنت مقتنعة بالفكرة ووقتها كنا نناهض المظاهر الفارغة في المجتمع السوداني لذلك قررنا أن نبدأ بأنفسنا، تم الزواج دون حفلة ولم أرتدي الزفاف، عند المساء اشترينا (جردل) فول وذهبنا إلى بيت أخت عمر، الوحيدة التي حضرت عقد القران من أصدقائي هي سهير عثمان قوليب، في المساء تجمع أصدقاؤنا في بيت أختو، حسب الرسول كمال الدين شال العود وغنى وأصحابي غنوا لي، وأنا ذاتي غنيت فاصل في العرس، وناس بيتنا ذاتهم اشتروا عشاهم من الدكان!
وتقول الأستاذة سعاد: عمر كتاب مفتوح للجميع، بسيط، واضح وساخر جداً للدرجة التي كانت تغضبني منه، سهل ممتنع يمكن لأي شخص أن يتعايش معه، لا يعيش في دور الأستاذ والشاعر، كسول جداً (الموية دي الإ أديها ليه) لا يساعدني في المطبخ لكن كانت عنده (حلة) بيعملها كل شهر، عمر ما كان بيرضى أنظف غرفته لأنه كان يكتب الشعر على الأرض، يكتب في صندوق السجائر وعلى قصاصات الجرائد، كان يكتب تحت شجرة ظليلة في البيت وعندما ألحظ أنه انصرف عني إليها أدرك أنه يكتب في قصيدة أو رواية.
الشاعر / عمر الطيب الدوش
دقّتْ الدَلّوُكَهْ
قُلنا الدنيا ما زالت بخير
أهو ناس تعرِّس وتنْبَسِط
تكْكَّتَ سروالي الطويل
سويتْلُو رقعات فى الوسط
فى خشْمِ عضّيت القميص
أجرى وازيّد شوق وانُط
لا مَن وصلتَ الحفلَهْ زاحمتَ الخلق
وركزْتَ
شان البِتْ سُعاد
أصلى عارف جِنَّها فى زول بيرْكِز وينْسَتِر
لكنِّى عارِف إنَّها
لو كلو زول فى الحلة بالسُتْرَهْ إنجَلَد
يانى الآزاها وجِنَّها
برْضِى عارِف أظنَّهَا
دِيمهْ فى صَرَّة وشيهَا
يلفحْنى شوق نافِر لَبَد
وركزْتَ للحُرقَهْ المَشَت فوق الضلوع
تِحت الجِلد
ضمّيت قزازتى مرقتَ عِن طَرَف البلد
وسِكرْت جَدْ
وأنا جايىّ راجعِ مُنْتَهى لاقتْنى هِى
قالت "تعال"
كِبْرَتْ كُراعى من الفرح
نُص فى الأرِض نُص فى النِّعال
اتْلخْبَط الشوق بالزَّعل
اتْحَاوروا الخوف والكلام
"ه-يْى يا سُعاد
على ودْ سكينَهْ وكِلْتِي في خشمو الرماد
علي ود سكينَه ومَات أسى
وأنا بِت بلاك ملْعُون أبوى لو كنتَ أرْضَى أعرِّسهْا
وأنا يا سُعاد
وكتين تصُبى سحابَهْ تَنْزِلي زي دُعاش
بفْرِش على روحى واجيكْ
زولاً هِلِك تعبان وطاش
وأنا يا سعاد وكتين أشوفِك ببقى زول
فَرَشولوا فَرْش الموت وعاش)
قالت سُعاد
(بطِّل كلام الجِرْسَهْ انجض يا ولد)
مزّقْت روحى نِتَف
مرّقْتَ من جيب القميص
عرقى وأسق
طبّيت قزازتى وصلتَ لى طَرَف البلد
وسكْرتَ جَد
اذّنت فى الشوك والسَلَم
وسرحْتَ بالناس والغَنَم
وركعتَ للعرقى البِكِر
وقدتَ فى الألم الحِكِر
وحلمتَ زى شالنى ومشَى
فوف زحمة نْبيْ الله الخِضِر
صحَّانى صوت العُمدهْ قال
(مسئول كبير زاير البلد)
قال لينا
(وكَتْ الزول يجِى ، لازِم تقيفوا صفوف صفوف
وتهيّجُوا الخَلا بالكفوف
وتقولوا عاش.. يحيا البطل)
صلّحْتَ طاقيتي الحرير
واتنَحْنَح الحشا بالكلام
ورميتُو من حلقى الوصَل
قُتْ ليهو يا عُمدهْ اختشى
مسئول كبير في الدنيا غير الله اِنْعَدَم
ما شُفْنا زول رضّع صغار
ما شفنا زول نجّح بَهَم
ما شفنا زول لمْلَم رِمَم
لا صِحِينَا عاجِبنا الصباح
لا نُمْنَا غطّانا العَشَم
والحِلَهْ من كلَّ الجِهات محروسَهْ
بالخوف والوهم
ومضينا من زمناً قديم-يا عُمدهْ-مرْسوم انتحار
الموت مُباح
والحب نِطاح
والصِدقِ من جِنس الزِّنا
العافيهْ مولودَة سِفاح
والرغبَهْ مكسورةَ جناح
الحلم والوعد النبيل
الطِفلهْ والأم ، النخيل
الرّنَهْ فى الوتر الاصيل
تلقاهَا فى قاموس نكاح
يا يُمَّه واح..يا حِلَّهْ واح
يا سعاد تعالى ولمِّى من كل البيوت
عِدَّة السَفَر الطويل
زَخْرِفى الفجر النهار
شخْبِطى الضُحى والأًيل
المَغْرِب
الفجر
النجوم.
فى صُرَّهْ وارمِيها البحر
خلِّينَا فوق الشك نَعُوم
والعُمدَهْ فاض
العُمدَهْ صار مليون عُمَد
العُمده فيل
جبلاً تقيل
لبْوَهْ وأسد
حَسَنَهْ وغَصِب
جُمْعَهْ وأحَد
بقّيتْ قزازتى
مرقْتَ عِن طرف البلد
وسكْرتَ جَد
وأنا جايى راجِع أجهجهو
لاقانى هو
ساايق العساكر والكلاب
رامى بين عيني وعينو
كلب وتَكْشيرهْ وحُراب
ضاقت نِعالى من الزّعل
من تحتهَا اتْمَلمل تُراب
الغيم سكب ضُلو ومشَى
والدنيا غيما سراب سراب
والحِلهْ زى بلداً بعيد
زوَّد بُعاد وقُرُب سُعاد
اتجمَعَت كلَّ البيوت فى راحتَا
زى بِت لِعاب
مجنونَهْ تصرخ فى الزوال
ممزوجَهْ فى الدم واللُعاب
عينيَّ ضاقت نظْرَتهْا
والجوف يطقْطِق بالكلام
قُبَّال يقولوا لي سلام
اتلمُوا حولى بلا نِظام
شال وعِمَّهْ
توب وغُمَّهْ
فاس وطوريَّه وحزام
شالونى بى كُل إحترام
ورمونى فى قَعَر السجن
حصلّنى قبل اليوم يِتم
جارنا المدرِّس ودْ خدوم
قال ليَّ
لا زول قام هتَف
لا كف مشَت بتلاقِى كَف
والعُمدَهْ زى هَمْبول وقف
يا صمت أُف
يا دنيا تُف
وأنا يا سُعاد للشوق نغَم
للهَم عَلَف.
| |
|
|
|
|
|
|
| |
مصطفى نور
هدى ميرغنى
فيس بوك
تويتر
انستقرام
يوتيوب
بنتيريست