ارسلت لى ضحكت لما بكيت انا كنانة دي .. سكر منها ما بشربو..

09:23 AM February, 02 2023

سودانيز اون لاين
مصطفى نور-امريكا نيوجرسي
مكتبتى
رابط مختصر

فرقو شويه يا جماعه
اتكاءة مسائية ...
حكى لي عصمت وهو معلم بالمرحلة الثانوية وكان يؤدي الخدمة الوطنية .. ولعدم وجود معلمة رياضيات
تم ارساله لقضاء فترة الخدمة بواحدة من المدارس الثانوية بنات بمدينة (كنانة).
قال لي علي الإيمان المدرسة دي ما فيها راجل غيري انا وعمك الغفير 😂😂
قال لي بجي داخل مدنقر ومارق مدنقر تقول بيت نسابتي ما مدرسة 😂..
المهم صاحبنا استلم راية التدريس كمعلم اول رياضيات في المدرسة .. أولى اسماء .. وأولى شيماء .. وتانيه سكينه .. وتانيه سعاد وتالته أدبي .. وتالته(لِندا )😳
- يا مولانا قول تالته علمي ..
- لا لا تالته (لِندا ).
- قلت ليهو كيف يعني؟ 🤔 طيب في تالته علمي ولا خاجنها مع تالته ( لِندا) دي؟
- قال لي تالته دي ياها تالته علمي ذاااااااتها😍...
- ياخي بطل استهبال كيف يعني؟ 🤔..
- قال لي حكمة الله ما فيها زول شين. الفصل كلو علمي وأحياء كمان. 😊 ناس كودات ساااااااكت
🌹😇 طب .. وصيدلة .. ومختبرات .. علوووووووم صَر يا ود عوض الله 🤔
قال لي من دخلت الفصل عرفت مافي زول مربت .. الناس دي كللللها ناس تسعيناااات سااااااكت 😁..
قال لي سماحة .. وشطارة ( قادر الله).
قال لي الأطلق اسم (لِندا) دا عليهم .. عمك الغفير. زول متجوهل خلاص. جنو يحلق دقنو وشنبو ..
رابط مكنة ثلاثيني .. وبسمع لاحمد الصادق .. ونانسي عجاج. كلو غناء عاطفي .. ومجلي حنك أغاني زمان داك .
. ورابط سماعات الهيدفون 24 ساعه في اضنينو 😅. يداً شايله الهيدفون والتانيه مفاتيح مخزن الكتب .. ومكتب الناظر 😂.
نرجع للموضوع 🤔...
قال يوم وانا قاعد في المكتب "طبعا مكتبي جنب مخزن الكتب جادعني هناك زي شايب الهارت".
قال لي لقيت خطاب مُظرف وعليه اسمي 😳.
قال لي علي حسب الفلسه العلي قلت دي رقعه من مجلس الآباء😅😅.
المهم فتحت الظرف وألقى ليك القلوب تتطاقش 😇😇 عبارات خلت قلبي تف تف تف يدق .. وركبي يرجفن .. تقول ترزي 😂😂...
حبك شمعه انارت طريقي🌹😊
كن ملاذي 😇
يا واحة في شمس الهجير 😘
( الليله والليله وبصات ابو رجيله)😂😂
و ما هممت بشرب ماء الا رأيت خيالاً منك في الكأس 😅😅
قال لي يمين يا محمد يا اخوي اقرأ وابكي علي شبابي الراح مني في ود اللبيح وقبوجة 😂😂..
البتكتب دي ما عارفه انو الراس دا أي مغترب جاء اداهو في حنانو وخلاهو يقلع في تبسات الفول وياكل.
قال لي اكتر شاكوش اخدتو .. بدون ما اشعر لقيت رقبتي مركب لي عود في بصله ومولع لي هبله واشوي في البصلة وآقرم فيها تقول البيك 😥
المهم بعد الكلام السمح دا البت كاتبه لي ملحوظه :
الكوره الآن في ملعبك عزيزي ونور عيني الفرتكاني 😁 إذا انت موافق على هذه العلاقة ..
رجاء بكرة لامن تجي الحصة بعد بسم الله الرحمن الرحيم والتاريخ ولما تكتب عنوان الدرس مثلاً (مثلثات، تفاضل )
اعمل علامة صح ✅ وأنا طوالي بعرف موافقتك 😍 وإذا كمان رافض 😥 ما تعمل اي حاجه وانا بعرف رفضك😊
وتحت كاتبه اسمها 😳😍 قال لي لما قريت الاسم لامن جاتني كتكوته 😂 تخيل كاتباهو كارينا كابور السودان بنفسها.
"دي بت خالطين معاها كل العلوم .. والأحياء .. وآينشتاين .. وابن سيناء و باسطة بالحليب " 😂😂
قال رافض قال .. وديني وإيماني انا من جيت البلد دي شايف وليداتي في عيونك 😂😂
بكره .. صباح العمياء علي الكحل جيت المدرسة .. وشاكي للبنكرياس 😂 ودخلت الفصل قبلهم "شفقة العدو" 😂😂😂
قال لي من الاستعجال ما كتبت البسمله .. خليت بسملة استاذة التاريخ البايته من امس زي ما هي ..
وطوالي كتبت تفااااضل .. بصفحة التباشيرة عريييييضة وهاك يا صااااااااااااح ✅✅✅✅
قال لي ديني وإيماني .. لامن عملت الصاح ده تقول جبت هدف في الكلاسيكو ...
الفصل انقلب سانتياغو برنابيو ..
وحدس ما حدس صفافير .. ودق ادراج .. وكواريك ..
حكمة الله .. المدرسة في نص السوق .. دقيقتين مافي .. السوق .. والحي الجنب السوق .
. ومدرسة الاولاد .. وحامية الجيش .. ديل كلهم كانوا جوه المدرسة 😂😂
قال لي انا واقف ما فاهم اي حاجه .. بس كتكوت صابه فيهو مطره 🤨..
ديني وإيماني لحظات بس .. المحافظ عرف بالحاصل 😂....
ومديرة المدرسة تعاين لي ولاويه خشمها .. نظام كنت عايزاك لي بتي بس طلعت وسخ 😂.
اتاريهن بنات تالته (لِندا) كاتبات الجواب سوا مشركاتن لي 😭😭...
وانا فار المخزن ده صدقت.
🙂 شوية كدا ناظر مدرسة الاولاد جاني قال لي "يا ابني عايزك تكون واضح معاي وتحكي لي بصدق .. الحاصل شنو؟"
قال لي فتيتو ليهو كللللو.
قال الناظر قال لي "انا بساعدك عشان ما تضيع عليك سنة الخدمة الوطنية .. بنقلك الجبلين تكمل باقي سنتك دي هناك"😅😅
"وانت وحظك هناك .. وأبقى عشره علي رقبتك." 😩
قال لي .. وفعلا .. ومن اليوم داك انا كنانة دي .. سكر منها ما بشربو..