ول ابا بريمة ؛ سؤال عن الدخن وفوائده

11:47 PM December, 30 2022

سودانيز اون لاين
امتثال عبدالله-NYC - USA
مكتبتى
رابط مختصر

ول ابا بريمة الامريكي العربي السوداني
قرأت في جريدة عربية ان للدخن فوائد صحية جمة
ومعروف ان الدخن موجود في السودان بكثرة وكثير
ما بناكل عصيدة الدخن بمناسبة وبدون مناسبة ؛
وسؤالنا هو ؛ هل فعلا للدخن فوائد ؟
وهل دقيق الدخن موجود في امريكا ؛
واذا موجود اسمه بالانجليزي شنو؟
والله يديك الصحة والعافية

حباب بت أبا العزيزة إمتثال،

سلامات .. وشكراً علي السؤال،

ما لك تورتي علينا مأسي أكل الماكدونالنز والبتزا والأكلات السريعة التى أضاعت كل مناعتنا الطبيعية. الدخن يا بت أبا، من أميز الحبوب في السودان تحديداً كردفان ودافور ومناطق القضارف .. لكن أهم وأجود أنواعه هى التي تزرع في المناطق الرملية في شمال كردفان وجنوب دارفور.

وللدخن أنواع كثيرة جداً، دخنا السوداني أسمه الإنجليزي Pearl Millet .. وإسمه اللاتينى Pennisetum glaucum .. أيضاً يوجد إسم مرادف في مناطق أخري في حزام الساحل في أفريقيا هو Cenchrus americanus ..

والخبراء الزراعيين في السودان يسمونه ال "ميليت" Millet ويسمونه كذلك ال "بنيسيتام" Pennisetum .. أما المزراعين يسمونه بأسمه الدخن وعندهم له أنواع: الدخن الصفراء وتزرع في الأماكن الرميلة والدخن الخضراء (هذه داكنة اللون في الحقيقة) وتزرع في الأماكن الطينية. الدخن الصفراء هى الأجود علي الأطلاق.

وبجييك راجع للفوائد

بريمة

بت أبا، لفت نظري كلامك في المقتبس التالي:

Quote: ما بناكل عصيدة الدخن بمناسبة وبدون مناسبة ؛

هل "ما" هنا نافية .. يعنى لا تأكلون الدخن؟ .. ضروري تردي عليّ .. نص عمركم ضائع لو فعلاً هذا الكلام صحيح وليس سهواً!!

خلينا نقيفوا علي الفوائد الشعبية التى أعرفها .. ثم نأتيك للفوائد العلمية المدروسة ..
من الفوائد الشعبية للدخن عند الكردافة والبقارة هى "مقوي" لو أكلت عصيدة دخن باللبن .. ممكن تزرع وتحرث يومك كله ولا تفتر ..
وكذلك تستعمل كأجود طعام للخيول في السباقات والحمير (التى تستعمل في ركوب العز، حمير الكارو بنأكلها البوش أي الذرة) والجمال في السباق ..

شباب وشابات البقارة يأكلون عصيدة تصنع من الدخن واللبن كالأتي:
تضع اللبن في النار حتى يفور .. ثم تضيف عليه دقيق الدخن .. ثم تنزله ليبرد تم تضيف عليه اللبن مرة أخري .. وهذه تسمى عصيدة "أم حليبين" أو عصيدة "أم لبنين".
وعصيدة أم حليبين الغرض منها .. فالبنات اللائي يتغذين هكذا هن الشابات راقصات النقارة والمردوم .. وهؤلاء البنات أمهاتهن لا يأكلهن إي نوع من أنواع الفتريتا .. إلا الدخن فقط .. وإلا البنت ح تتعب أثناء الرقص.
كما أن هذه العصيدة تخفض الوزن .. وبالذات تزول أي دهون في البطن .. البنات اللائي يأكلن هذه العصيدة ضامرات .. (الضمار لدي البقارة صفة وميزة جمالية للمراأة لا تدانيها أي صفة أخري .. )

بالنسبة لصبيان البقارة .. أكل وجبة أم حليبين هى وسيلة الأعداد للمصارعة .. فالشاب الذي يأكل عصيدة الدخن باللبن .. الله أعلم ينتصر عليه شاب يأكل الفتريتا ..

وعامة الناس يعملون عصيدة الدخن مثل عصيدة الفتريتا .. وتأكل بجميع أنواع الملاحات التى تأكل بها العصيدة العادية في السودان ..

أيضاً عصيدة أم لبنين هى طعام للنفساء .. فهي مقوي ومدرة للبن في حالة المرضعات .. لكن في هذه الحالة تعمل العصيدة إما بذات طريقة أم لبنين أو تنزل العصيدة وهى أشبه بالمديدة .. كالجلي .. ويضاف إليها سمن وقليل من السكر بدل اللبن .. والطريقة الأخيرة لا يأكلها الشباب والشابات لأنهم لا يريدون إضافة الدهون ..

بريمة

ونسيت حاجة مهمة وهى عصيدة الدخن مع إضافة اللبن الرائب هى وجبة السحور في رمضان .. يومك كله ما تعطش ولا يصيبك رهق الصيام.

أضف أن عصيدة الدخن هى وجبة (كراع عنقريب .. ضمن العشاء الخاص) للمتزوجين .. وهى وجبة العرسان طوال شهر العسل في مناطق البقارة ..

وهنا بعض التحذيرات من أكل الدخن .. أولاً بالنسبة للذين يأكلون الدخن لأول مرة .. يأكلوا عصيدة دخن مع الملاحات المعروفة .. ملاح نعيمية، ملاح روب، ملاح تقيلة وغيرها .. وأيضاً تتناولها في أوقات مبكرة بالذات في وجبة العشاء لأنها تزيد الطاقة وما بتقدر تنوم ..

أما عصيدة الدخن باللبن .. للناس الجدد لازم تأكلها يوم وتفط يوم .. لأنك لو واظبت عليها من قولت تيت يومياً تصل لحظة نفسك تقفل منها تب .. ولو ظليت يومك جعان لا تطيق أكلها .. كما يصيبك تكسر شديد وفتور عام في الجسم .. لكن لو أكلت يوم عصيدة اللبن واليوم الاخر عصيدة بالملاح .. حتى تصل مرحلة تطيق أكل عصيدة الدخن باللبن يومياً .ومن هناك توقف أكل الملاحات ويصبح طعامك هو عصيدة دخن باللبن .. (لبن حليب، لبن رائب، روب) من هناك تبدأ تظهر فوائد الدخن سواء التخسيس أو القوة البدنية أو زوال الدهون في الجسم .. وغيرها ..

بريمة

هنا نبدأ معكم بالفوائد العلمية:

الدخن هو من أغني الغلات السودانية في البروتين النباتي .. وبروتين الدخن هو بروتين نباتي خالص وخالي من الجلاتين gluten free .. وفي الغرب هنا في الولايات المتحدة أغلى أنواع المأكولات هى التى عليها ماركة Gluten free فهي تباع في رفوف خاصة وأسعار خرافية ..

سبحان الله، ربنا هبانا بأكل ليس فيه جلاتين بصورة طبيعية .. فالدخن يمنع أمراض القلب والكلوسترول والسمنة ويمنع السكري .. كما أنه غني بفيامين ب6، حامض الفوليك والحديد، الكالسيوم والبوتاسيوم والزنك وكذلك المغنيسيوم .. وهى عناصر ضرورية للجسم .. وحينما يضيف البقارة اللبن للدخن هم بذلك يضيفون فيامين أ .. vitamin A الذي يوجد في اللبن .. وبذلك تصير وجبتهم وجبة كاملة .. حيث يساعد فيتامين أ في نضارة البشرة وزيادة طول سبيبة الشعر وقوة البصر .. اضف أن الكالسيوم يقوي العظام والأسنان ويساعد في أمتصاص فيتامين "د" الذي يساعد في سهولة الهضم ويمنع القولون .. كما أن المغنسيوم يساعد في تنشيط الذاكرة ويهدأ الأعصاب ويمنع تمزق العضلات سواء في حالة الرقص أو رياضة المصارعة .. وغيرها الكثير


بريمة

هلا امتثال وبريمـة.. ويا شباب اسمحوا لى اخت الفرينى بتاعتى دى.. والدخن نحن ربينا بيه.. كنا نزرعه فى الخريف
ونحصده ثم ندعو اهالى القرى المجاورة فى بداية الصيف لدق العيش.. يعنى يعملوا حوض فى ارض صلبة.. واطاة
ساكت ويحتوا فيها قناديل الدخن، وهاك يا دق.. يكونوا صفين ويضربوا العيش بالتناوب.. الصف دا يهوى بعصيه والتانى
يرفعها، مع أغنية الدق التى هى ليست سوى لا اله الا الله.. ثم (يدروه) ويعبوا الشوالات.. الشوالات دى تتخزن ونأكل منها
الصيف كله ويفضل منها التيراب للموسم القادم (أنا كنت أتيرب لعمى) وهو يزرع بالسلوكة. وحباتنا التلاتة كانت دخن
باللبن والسمن.. مرات بالسمن فقط.. عصيدة الدخن دخانها يلوى يختوها ويحفروا نصحها ويملوه سمن بقر من بقرنا او زبدة
طازجة من (بعد الخض.. ) الدخن بتاعنا اصفر يا باشمهندس.. والأرض رملية ناصعة البياض.. pure silicone.. من نظافة
الرملة كنا نشر فيها الهدوم ولما تنشف ننفضها.. ولا ذرة واحدة تعلق بيها. حتى فى امريكا هنا أى مدينة أجيها فى زيارة
أسأل من دكان هنود واشترى منهم دقيق الدخن.. مافى طريقة. فى جيرسى ستى فى أكياس الدقيق فى دكاكين الهنود
فى شارع Newark Ave ورخيصة جداً.. بس ما يحصل دخنا ال fresh ..
عنوان أكبر دكان هنود هو:
780-782 Newark Ave. Jersey City, NJ 07306. Directions · (201) 222-7572
وهذه أحداثيات المحل: 40.5706592,-74.3082547


783 Newark Ave, Jersey City - Patel Brothers

العنوان تكتب مقلوب.. العنوان الصحيح هو:

780-782 الرقـم
اسم الشارع Newark Ave, Jersey City, NJ

الباشمهندس أبو الريش

Quote: هلا امتثال وبريمـة.. ويا شباب اسمحوا لى اخت الفرينى بتاعتى دى.. والدخن نحن ربينا بيه.. كنا نزرعه فى الخريف ونحصده ثم ندعو اهالى القرى المجاورة فى بداية الصيف لدق العيش.. يعنى يعملوا حوض فى ارض صلبة.. واطاة ساكت ويحتوا فيها قناديل الدخن، وهاك يا دق.. يكونوا صفين ويضربوا العيش بالتناوب.. الصف دا يهوى بعصيه والتانى يرفعها، مع أغنية الدق التى هى ليست سوى لا اله الا الله.. ثم (يدروه) ويعبوا الشوالات.. الشوالات دى تتخزن ونأكل منها الصيف كله ويفضل منها التيراب للموسم القادم (أنا كنت أتيرب لعمى) وهو يزرع بالسلوكة. وحباتنا التلاتة كانت دخن باللبن والسمن.. مرات بالسمن فقط.. عصيدة الدخن دخانها يلوى يختوها ويحفروا نصحها ويملوه سمن بقر من بقرنا او زبدة طازجة من (بعد الخض.. ) الدخن بتاعنا اصفر يا باشمهندس.. والأرض رملية ناصعة البياض.. pure silicone.. من نظافة الرملة كنا نشر فيها الهدوم ولما تنشف ننفضها.. ولا ذرة واحدة تعلق بيها. حتى فى امريكا هنا أى مدينة أجيها فى زيارة أسأل من دكان هنود واشترى منهم دقيق الدخن.. مافى طريقة. فى جيرسى ستى فى أكياس الدقيق فى دكاكين الهنود فى شارع Newark Ave ورخيصة جداً.. بس ما يحصل دخنا ال fresh ..

.. عليك نور يا باشمهندس .. غذاءكم غذاء غني بالطاقة والبروتينات ..
زمان كان هناك دكان هنود في جورانا .. فيه دخن جيدة .. والسبب لأن طقس جنوب الهند مشابه للطقس السوداني ..

لم أجد الدخن في أمازون أو إي بيي .. رغم أن هناك أنواع تزرع في غرب أفريقيا موجود منها لكني أخشي أنها تكون ذرة عادية وعاملين ليها ماركة دخن ..

الباشمهندس هل ممكن تذكر لينا المحلة بالضبط وين في الشرق؟


بريمة

Quote: هل ممكن تذكر لينا المحلة بالضبط وين في الشرق؟

جنوب بورتسودان يا هندسـة.. وأقول ليك ســر.. الأرض هناك لو رميت حجــر يقوم.. نحن بعد ما نأكل البلح السكوت
نرمى الحصاة بتاعته.. ولا نحفر ليها.. والله تقوم أول ما تجى المطر والحصاة فى البداية تكون طرية وحلوة جدا..
كنا نحفر شوية ونقلعها ونقشرها ونأكلها. الهشاب كان خلوى ونحن صغار كنا نطقه وبعد يومين نجى نأكله زى
العسل بس تخين شوية. بعد فترة ينشف لكن جواه لسة تكون لينـة. وأنا طفل صغير اكتشفت شجرة مطاط. طبعا
عرفته بعد الكبر.. برضو طقيتها زى الهشاب وهى تجم لبن فى محل الطق.. زى لبن العشــر.. لكن تمسكه فى يدك
وتعصره مرتين تلاتة يبقة مادة مطاطة لكنها لسة بيضاء.. أظن يتعالج عشان يتخلصوا من اللون الأبيض.
أما الذهب فشفته فى صخوره.. عروق طويلة.. وكنت اشلخه بظفرى والله العظيم لأن الذهب الخالص لين. ولم أكن اعرفه.. وحتى لو عرفته
لم أكن اعرف اهميته فى تلك السن..
كفاية على كدا يا باشمهندس.. too much info ههههه

Quote: وخالي من الجلاتين Gluten free

كده لخبت الناس يا بريمة .. فرق بين الجلاتين و الجلوتين ..

الجلاتين بروتين حيواني و الجلوتين بروتين نباتي ..
انا متاكد انت عارف .. لكن كتابتك ما صحيحة ..

اما الدخن .. فكنا مقسومين اتنين في البيت ..
نص يفضل عصيدة الدخن باللبن و العسل .. و النص التاني بالسمن و السكر ..
امي الله يرحمها كانت مع نزول اي مطر تشد العصيدة .. و طبعا طول الشتاء ..

ول ابا بريمة
شكرا كثير كثير على هذه المعلومات الثرة عن الدخن...
واحب اؤكد ليك ان ما هنا ليست نافية ،بل هي للتأكيد ...ونحن
لمن نرجع حلتنا بناكل عصيدة الدخن بمناسبة وبدون مناسبة
وخصوصا حبوبتنا مغرمة بالدخن وبتعزمنا كل ما نمر عليها...
..والله انت موسوعة علمية ...
وكتبت ليك البوست ده ونحن في زحمة التايمز اسكواير نسبة
لأهمية موضوع الدخن ....وتايمز اسكواير زحمة شديدة واحتفالات
راس السنة بكرة بدأت من اليوم ..
ولا شك كثير من زملاء المنبر بيكونوا
استفادوا من معلوماتك عن الدخن وفوائده ...وخاصة اسمه بالانجليزي
..اول مرة اسمع اسمه بالانجليزي ...
والله يديك الصحة والعافية ..
......
ول ابا ابو الريش
شكرا كثير كثير على مرورك البهي على البوست..
واستفدنا من مداخلتك كتير واهم حاجة عرفنا ان
مكان الدخن دكاكين الهنود...ودي حاجة مهمة ..
وفي حي كوينز في سوق كامل للهنود...وكنا بنمشي
دائما هناك نشتري الثياب السودانية من هناك ...والان
حنمشي للدخن...
والله يديك الصحة والعافية

ما تنسى فى دكاكين الهنود اسمه Millet flour أو بالهندى Bajri تتنطق باج أول بعدين رى باج ريىودا احسن نوع حسب تذوقى.. عصيدة خضراء مرة..ممكن تشتروه من هنا:

ishopindian.com/Jalpur-Bajri-Flour

Copy and paste

دا تقريبا أجود انواع الدخن عند الهنود.. ختى الصورة فى الموبايل ووريها ليهم بس

الباشمهندس ابو الريش

Quote: جنوب بورتسودان يا هندسـة.. وأقول ليك ســر.. الأرض هناك لو رميت حجــر يقوم.. نحن بعد ما نأكل البلح السكوت نرمى الحصاة بتاعته.. ولا نحفر ليها.. والله تقوم أول ما تجى المطر والحصاة فى البداية تكون طرية وحلوة جدا.. كنا نحفر شوية ونقلعها ونقشرها ونأكلها. الهشاب كان خلوى ونحن صغار كنا نطقه وبعد يومين نجى نأكله زى العسل بس تخين شوية. بعد فترة ينشف لكن جواه لسة تكون لينـة. وأنا طفل صغير اكتشفت شجرة مطاط. طبعا عرفته بعد الكبر.. برضو طقيتها زى الهشاب وهى تجم لبن فى محل الطق.. زى لبن العشــر.. لكن تمسكه فى يدك وتعصره مرتين تلاتة يبقة مادة مطاطة لكنها لسة بيضاء.. أظن يتعالج عشان يتخلصوا من اللون الأبيض. أما الذهب فشفته فى صخوره.. عروق طويلة.. وكنت اشلخه بظفرى والله العظيم لأن الذهب الخالص لين. ولم أكن اعرفه.. وحتى لو عرفته لم أكن اعرف اهميته فى تلك السن.. كفاية على كدا يا باشمهندس.. too much info ههههه

هههاي!! ما too much info ولا حاجة !! .. أنت عارف ال Ethno-botany هو هواية من هواياتي .. وأظن أفضل ما وثقته في كتبي عن البقارة .. هى المعارف الأثنية لدي البقارة في معرفة النباتات وخواصها ..

الغريبة كنا طلبة مشينا رحلتين للشرق .. بخصوص مشروع كنا طلبة نشتغل فيه هو هل شجر المسكيت ضار بشرق السودان أم مفيد؟ .. أغلب الشباب قالوا ضار بالبيئة .. وأنا طبعاً الوحيد الذي جاء بشيئ أخر وهو أن النفع والضرر يعتمد علي نوعية النشاط البشري في المنطقة .. ففي مناطق الزراعة مضر بالشرق، أما في المناطق الرعوية مفيد لأنه علف للحيوان .. أضف أنه يقاوم التصحر ويقلل نسبة الهبوب .. الهبباي .. وطالبت بتحسين النوعيات المستزرعة التى هى أشبه بالافة الزراعية .. وتعرفنا علي أشجار الشرق لكن ابداً لم نتعرف علي مناطق لزراعة الهشاب .. لو كان لقيت الهشاب في الشرق كان اليوم تكونوا ضمن أكثر منتجي الصمغ العربي في السودان .. فالهشاب مصدر دخل للأنسان (عملة صعبة) وغذاء للحيوان .. أفضل بكثير من المسكيت ..

حسي أنت كده ما عليك إن تذهب لوزارة الغابات والبيئة .. وتحاججهم بأن يستبدلوا المسكيت بالهشاب .. وتكون قدمت لأنسان الشرق ما لا تصدقه في المدي البعيد.

وبعدين أصف لينا شجرة المطاط .. البيئة التى تنمو فيها في المنطقة ..؟ برضو شكل النبات .. ولو حتى صورة تقريبية .. يعنى طول النبات .. لون ساق النبات .. الأوراق .. معلومات عامة ومبسطة عن النبات وهل هناك فوائد أو معارف شعبية في المنطقة بخصوصة ..


معلومات الذهب دسوها .. ما يجوك أولاد أم زقدة يقتلوكم بسببه .. حفاظاً علي أرواحكم .. أسكتوا عن الموضوع دا ..

بريمة

تسلم يا ول أبا يحي قباني

Quote: كده لخبت الناس يا بريمة .. فرق بين الجلاتين و الجلوتين .

تصحيح مهم .. أخوك طال عليه زمن الغربة وزمن الغربة عن مجال الزراعية ..

بعدين الدخن بالعسل .. دي جديدة عليّ ..

اهلنا البقارة لا يستعملون العسل في نوع من أنواع الطعام .. يأكلونه "فرش" .. يوم نسلوا العسل .. الفريق كله يلم يأكل العسل بصورة جماعية حتى ينتهي .. ونجمعوا ما تبقي من مضغ بروش العسل (الشمع) و تسمى العلكة .. وأهم إستعمال للعلكة هو تثبيت العطور الجافة والبلدية علي مؤخرة شعر الفيتات .. وهذا يسمى التربلول ..

التربلول هو خليط من الصندل المسحوق، ثم المحلب المدقوق وعطور أخري عطر بت السودان، السيد علي المرغنى واوراق الخريف (هل تتذكر هذه العطور .. عطور قديمة جداً في السودان) وعطر فلور دامور .. كلها أو بعضها يخلط مع الشمع (العلكة) ويثبت علي نهاية شعر البنات .. علي اليمين تشم رائحة العطور في الفتاة في الغابة من مسافة ما تصدقها ..

لما كنا شباب ونشموا رائحة التربلول في الغابة .. يوم داك تلقانا جاريين بهياج مثل ضكور النحل (الدرون) ... هههاي!

بريمة

إمتثال

Quote: زحمة التايمز اسكواير نسبة لأهمية موضوع الدخن ....وتايمز اسكواير زحمة شديدة واحتفالات راس السنة بكرة بدأت من اليوم ..

أيامكم مولد .. مبروك ..
الطقس عندكم كيف؟ نحن اليوم في فرجينيا .. جو حلو وشمس ساطعة .. ودرجة حرارة جيدة .. لكن في أعياد الكرسميس ورأس السنة ما قاعد أخرج من البيت ..

كل عام وأنتم بألف خير ..

بريمة

تمام يا باشمهندس


حلي بالك من كلمة السر .. Bajri .. دا يطابق الدخن السوداني .. لكن هناك أكثر من ثلاثة أنواع أخري وكلها غير مطابقة لدخنا ..

مرة أنا والمدام أشترينا معه العدس .. لكن طلع عدس مثل الفول، شدينا فيه نص يوم أبي ينجض .. وبرضو مرة أشترينا منهم لحمة أفتكرناه دجاج .. المدام شدته في النار أخذ 3 ساعات وزيادة حتى نجض .. شلت الكيس ورجعت لهم لقيته طلع لحمة "بط" .. والمدام تكره أكل "البط" قلت لها دا دجاج هندي!

بريمة

من عسل مصفى.. نأكله (فنَشَفَ) هههه

نحن طبعا نأكل عصيدة الدخن بالسمن والسكر.. السكر نخته فى نفس حفرة السمن فى نص العصيدة. أو اللبن
أو الروب. وعجينة الدخن لازم تكون خميرة.. ولو فطيرة إلا تأخذ ليك جرية عشرة ميل

الأخ بريمة
سلام
الدخن في المكسيك واليمن والسودان من أهم الوجبات النافعة.
واجود انواع الكورنكفلكس في أمريكا هو الكورن المخلوط بالدخن .
يعني خلطة العيشريف بالدخن .
ودا يكتب زي روشتة بعد عملية الباي بص سيرجري.
يعني الشغلة ماها ساهلة.
برضو عندنا في شمال السودان مديدة وعصيدة الدخن بالسمن بعملوها للعريس العرسو قريب.
وبرضو في أمريكا فطائر عجين الدخن وجبة للمصارعين مع جبنة الحمير .
الدخن اكتر اكلة بتشد الحيل وتكافي الخمول والنزلات ولواية المصارين .
نسيت اقولك في اليمن يسموها بنت الصحن والمكسيك يسوها ( اسوسا )
والهوسا يخلطوا عصيدة الدخن بالفيتريتا ويسموها بني كربوو .
وفي سوق ليبيا يسموها تقيف امبوبة.

السلام عليكم
تحيه طيبه
فى البدايه كل عام وانتم بالف خير والعام المقبل عام خير وبركه على الشعب السودانى وعلينا اجمعين يارب
بمناسبه الدخن
حكى لى عازف الكمان المعروف اسماعيل عبد الجبار عندما التقيت معه فى الصين انو الفنان المرحوم صلاح بن الباديه الذى مات اظن فى عمر اكثر من 88 عام
كان ياكل تالخن تقريبا اقل شى مرتين فى اليوم وقال لى والله يامصطفى كنا بنعمل البروفات ووقت الفطور بجيبوا لصلاح بن الباديه الفطور بتاعه
عصيده دخن مرات مع تقليه ومرات مع لبن ومرات مع زبادى ومرات مع تمر وعسل وبقول لينا اتفضلوا لكن انخن تخين
من كل العازفين مايقدر يدخل ايدو فى عصيد الدخن من السخانه وصلاح بن البديه بياكل بى ايدو فقط
وانا قلت ليه اه الان انا عرفت السبب فى نضاره وقوه بن الباديه الذى حتى مات كان حيوى وكان تشوفوا تقول شاب والله
وطبعا ده السبب ف الموضوع عشان كده اهلنا فى الغرب ودرافور تجدهم فى سن كبيره جدا ولكن اقوياء ونظرهم سته على سته
وانا الاسبوع الماضى احد الاخوه من ناس الفاشر عزمنى فطور والله الم اتناول شى فى الفطور غير العصيد بتاعت الخن بملاح التقليه
رغم وجود اصناف اخرى من لحوووم ومن اكل ولكن كانت العصيده بتاعت الخن هى الاجمل
الجو بارد جدا فى كل العالم وذكروتنى افتش لى زول يجيب لى شوال دخم من السودان

مع تحياتى
مصطفى نور

ول أبا مصطفي
هنا طبقين لمديدة الدخن، بالسمن وباللبن .. يوتيوب مليئ وصفات مديدة الدخن .. وكذلك عصيدة الدخن .. وبعدين أي زول عنده فقر دم .. جبروا فيه مديدة الدخن وعصير القضيم ..

هنا مديدة الدخن بالسمن


مديدة الدخن باللبن ..




بريمة

مرة مشيت امريكا ونسيت اشيل معاى دقيق للكسرة ….سالت مقيمة هناك تورينى دقيق ذرة قالت كيسو مرسوم فى راس هندى ؟
مرة فى السودان عملت مديدة دخن جاتنى خالتى قدمت ليها منها ابت تاكلا وقالت لى ما ثقافتنا !

والله يا اميرة سوق الهنود في حي كوينز في نيويورك تلقى فيه لبن الطير ...
واجمل ما في السوق الساري الهندي ...ونحن ينقطع ٥ أمتار من قماش الساري
ونعمله ثوب سوداني اجمل من الثياب السودانية في سوق شبرد بوش في المدينة
الكئيبة لندن ..
وبعد احتفالات راس السنة و الاجازة تنتهي حنتوجه للسوق نفتش الدخن وعرفنا اسمه
بالانجليزي والهندي....اما العسل والسمن فأكيد دكاكين اليمانية متوفرة فيها هذه السلع
ومعروف أن اليمن بلد العسل الاصلي الصافي ..مش العسل المغشوش النصه كيماويات..
وكل سنة وانتي طيبة ...

سلام يا عز الدين الفحل..
يا عزنا ياخى أنا الما مقيم فى الإمارات عرفت المحلات اللى تبيع دقيق الدخن.. وريتها لقرابتنا اللى كنت نازل معاهم..
فى واحد فى دبى فى شارع مزحوم بكرعينك ما تقدر تمشى فيه خلى بالعربية.. نسيت إسمه.. بس أمشى اى تجمع بتاع
هنود فى دبى وأسألهم من دكان بقالة هندية.. أى بقالة هندية تبيع الدخن.

من أضرار الدخن هو سحبه لمادة اليود من الجسم مما يتسبب في زيادة احتمال تعرض الجسم للأمراض المرتبطة بنقص اليود كأمراض الغدة الدرقية مثلاً.

الدخن عموماً بيمر بمراحل قبل طحنه ليصير دقيق ويتعمل عصيدة!

الدخن كحبوب صعب علي معدة الانسان!


عملية (القنفدة) او اخراج القنفود او الشرا
هذه العملية معنية بازالة الطبقات او القشريات الخفيفة التي تحيط بحبيبة الدخن.
وهي اشبه ب(الدمرقة) ومنها جات تسمية عصيدة الدامرقا.

لو جبتا دخن وطحنتو ساي وعملتو عصيدة، وانت ما متعود ممكن يودوك المستشفي😎
اعتقد الباشمهندس ملم بتفاصيل الحاجة دي،


انا من ساكنة الصحراء ناس تمر وحليب ودفان😅

ول أبا دكتور السنوسي،
جيداً جيت ..

Quote: و جبتا دخن وطحنتو ساي وعملتو عصيدة، وانت ما متعود ممكن يودوك المستشفي😎 اعتقد الباشمهندس ملم بتفاصيل الحاجة دي،

لا يا ول أبا، الدخن طعام عادي .. مثل بقية العصايد السودانية .. لكن عصيدتها فيها نوع من المرارة الخفيفة .. لا يستسيغها الأنسان الذي إعتاد علي الفتريتا والقمح .. لكن شوية شوية تظبط معه ..
الكنفته أو القنفدة .. إزالة القشرة .. تقلل المواد الغذائية للدخن ..

Quote: وهنا بعض التحذيرات من أكل الدخن .. أولاً بالنسبة للذين يأكلون الدخن لأول مرة .. يأكلوا عصيدة دخن مع الملاحات المعروفة .. ملاح نعيمية، ملاح روب، ملاح تقيلة وغيرها .. وأيضاً تتناولها في أوقات مبكرة بالذات في وجبة العشاء لأنها تزيد الطاقة وما بتقدر تنوم .. أما عصيدة الدخن باللبن .. للناس الجدد لازم تأكلها يوم وتفط يوم .. لأنك لو واظبت عليها من قولت تيت يومياً تصل لحظة نفسك تقفل منها تب .. ولو ظليت يومك جعان لا تطيق أكلها .. كما يصيبك تكسر شديد وفتور عام في الجسم .. لكن لو أكلت يوم عصيدة اللبن واليوم الاخر عصيدة بالملاح .. حتى تصل مرحلة تطيق أكل عصيدة الدخن باللبن يومياً .ومن هناك توقف أكل الملاحات ويصبح طعامك هو عصيدة دخن باللبن .. (لبن حليب، لبن رائب، روب) من هناك تبدأ تظهر فوائد الدخن سواء التخسيس أو القوة البدنية أو زوال الدهون في الجسم .. وغيرها .. بريمة

بريمة

ول ابا هاني عربي
سلامات ..

Quote: من أضرار الدخن هو سحبه لمادة اليود من الجسم مما يتسبب في زيادة احتمال تعرض الجسم للأمراض المرتبطة بنقص اليود كأمراض الغدة الدرقية مثلاً.

بالله وضح لينا أكثر كيف الدخن يسحب اليود من الجسم؟
حسب علمي اليود يتواجد في اللبن والبيض والسمك، الدواجن وكذلك الكبد. وهو معروف عنصر يتواجد طبيعياً ..

لو هناك حقيقة لمثل هذه المعلومة مفروض نحن ناس الزراعة نكون ملمين بها ... وساحل جداً توالد سلالات دخن جديدة لا تحمل تلك المواصفات السالبة ..

تعال يا ول أبا وأشرح لينا الموضوع دا شويه ..

بريمة

ول أبا فارس دار جعل
جيداً جيت ..

Quote: يلا ندور ع الدخن. كراع عنقريب بس وين نلقاهو في الخليج العربي ؟؟؟؟؟؟ الأشواق المعتقة .

ماكدونلاز، وك اف سي، والبتزا .. هى سبب أمراض السمنة في الغرب .. أختاها بكل ما أستطعت من قوة.

مديدة الدخن صحية وغير مكلفة .. وطريقة عملها بسيطة جداً .. تغلي اللبن ثم تضع عليه دقيق الدخن .. ثم إذا بردت وصارت تقيلة شوية .. زيدها لبن وهى باردة .. هناك الكثيرون متعودين علي السكر مع اللبن .. ضع قليلاً من السكر وأخلطها.
أملي كباية عصير كبيرة أو كورية تعادلها .. وأجقم جقم .. الدخن تعطي حيوية وطاقة جبارة ..


بريمة

ول أبا عثمان

Quote: والهوسا يخلطوا عصيدة الدخن بالفيتريتا ويسموها بني كربوو

يا ول أبا عثمان .. الفلاتة عندهم "قدو قدو" .. وهى دخن بدقوها في الفنادق دق .. ثم يعملونها ما بين المديدة والبليلة .. ويضفوا لها الروب والسكر ..
لو ضربت عبارين من القدو قدو .. يومتا تشرب جردل موية ما تروي .. توقف الواحد بمبة شويةعليها، واهلها يشكرونها يقولون "قدو قدو ما أحلاه وما أغلاه .. لو زدتها سكر زدتها حلاة .. ولو زدتها موية زدتها كترة" ..

بريمة

الدخن طبعا فى الشرق وفى الغرب.. فى الوسط مافى.. هناك عندهم الفيتريتة والعكر أو ودعكر (فيتريتة حمراء)
والفيتريتة عندنا يأكلها الناس اللى مضطرين.. لأنها رخيصة وعادة هى أكل البهائم عندنا لكن أظن ناس الجزيرة
والوسط بصورة عامة يأكلوا بهائمهم دخن والله أعلم.
بعدين مديدة دى ما نعرفها إلا فيما ندر.. عصيدة وكسرة بس.. والمديدة هى عصيدة بس موية زيادة موش كدا؟
طيب مخففينها مالكم؟ خايفين منها؟.. عالم جبانات

Quote: بعدين الدخن بالعسل .. دي جديدة عليّ .. اهلنا البقارة لا يستعملون العسل في نوع من أنواع الطعام .. يأكلونه "فرش" .

يا بريمة .. العصيدة لكة و بعملوها مسيخة فبدل السكر مع اللبن كنا نخت في الحفره يا عسل نحل لو اتلقي و لا عسل ابو اسد ..

اما المديدة الذكرتها اميره فما كانت في عرفنا زمان .. 🙂
فياها عصيدة الدخن يا بي اللبن و العسل يا السمن و السكر .. و الاخيره المفضلة عند والدنا رحمه الله ..
كمان اتذكر ابوي الله يرحمه يقول و هم شفع في الشتا كان يشربوهم السمنه بي نخرينهم ..

اهلا استاذة امتثال و"ضيف البوست" ولد ابا بريمة والمساهمين
وكل عام وانتم بخير.

بالصدفة وجدت التالي نصه عن تعريف الدخن في معجم مسيحي على الانترنت،
صادر عن "دار النشر المعمدانية"، عنوانه:
المعين
معجم الألفاظ العسرة في الكتاب المقدس

فمتى انتقل الانسان من مرحلة إطعام الدخن للحيوانات مثل الدجاج والطيور،
لكي يتخذه طعاما لنفسه،
حسب الصورة التالية في تعريف كلمة "دخن":؟

عندما ادعى صبى اسمه إبن صياد الرسالة، بلغ الخبر النبى عليه الصلاة والسلام.. لم يقل لهم أقتلوه أو حتى أتونى به.. بل قال لعمر
فلنذهب اليه.. تخيل النبى بنفسه ذهب اليه.. فوجده يلعب مع اقرانه.. فناداه وسأله.. أتؤمن انى رسول الله؟ فقال الصبى
أمنت انك رسول الأميين.. ثم سأل الصبى الرسول: أتؤمن انى رسول الله.. فقال له الرسول: آمنت بالله وكتبه ورسله..
فسأله الرسول: خبأت لك خبيئة.. (يعنى لو انت نبى تعلم الغيب قل ما هى).. فقال الصبى إنه الدخن.. فقال له النبى إخسـأ
فإنك لا تعدو قدرك.. فقال عمر: دعنى اضرب عنقه يا رسول الله: فقال له دعه فإن يكنه فلا تقدر عليه.. وإن لم يكنه فلا يفيدك قتله.
وهذه رواية غير التى سمعتها (تغيير ليس اساسى)

Quote: حدثنا عبد الله بن محمد حدثنا هشام أخبرنا معمر عن الزهري أخبرني سالم بن عبد الله عن ابن عمر رضي الله عنهما أنه أخبره أن عمر انطلق في رهط من أصحاب النبي صلى الله عليه وسلم مع النبي صلى الله عليه وسلم قبل ابن صياد حتى وجدوه يلعب مع الغلمان عند أطم بني مغالة وقد قارب يومئذ ابن صياد يحتلم فلم يشعر بشيء حتى ضرب النبي صلى الله عليه وسلم ظهره بيده ثم قال النبي صلى الله عليه وسلم أتشهد أني رسول الله فنظر إليه ابن صياد فقال أشهد أنك رسول الأميين فقال ابن صياد للنبي صلى الله عليه وسلم أتشهد أني رسول الله قال له النبي صلى الله عليه وسلم آمنت بالله ورسله قال النبي صلى الله عليه وسلم ماذا ترى قال ابن صياد يأتيني صادق وكاذب قال النبي صلى الله عليه وسلم خلط عليك الأمر قال النبي صلى الله عليه وسلم إني قد خبأت لك خبيئا قال ابن صياد هو الدخ قال النبي صلى الله عليه وسلم اخسأ فلن تعدو قدرك قال عمر يا رسول الله ائذن لي فيه أضرب عنقه قال النبي صلى الله عليه وسلم إن يكنه فلن تسلط عليه وإن لم يكنه فلا خير لك في قتله

الشاهد ان الخبيئة كانت * فارتقب يوم تأتي السماء بدخان مبين * والصبى استرق السمع وخطف بعض حروف من كلمة الدخان..

ول أبا الخواض
سلامات ..

Quote: فمتى انتقل الانسان من مرحلة إطعام الدخن للحيوانات مثل الدجاج والطيور، لكي يتخذه طعاما لنفسه،

هل تعلم أن المحاصيل الزراعية مثل الحيوانات .. لازم تعمل لها domestication .. والأنسان عمل علي تأليف الحيوان قبل النباتات .. والسبب هو أن الأنسان يمكنه حصاد المحاصيل من بيئاتها الطبيعية دون الحاجة لزراعتها ..

ظهرت الحاجة للمحاصيل الزراعية عندما نمت البشرية وتكونت المدن التى تحتاج إلي محزون من المواد الغذائية .. كل الغلات grains تمت ال domestications بتاعتها في حول 11 الف سنة مضت .. يعنى أقل من عشرة ألف سنة قبل مولد النبي صل الله عليه وسلم .. بالتقريب يصادف فترة سيدنا إبراهيم .. عليه السلام، أي زمن الحضارة البابلية تقريباً، والسبب ال grains أو الغلات هى محاصيل مناطق حارة .. مثل أفريقيا وجنوب الهند .. تم زراعتها بصورة شبه حديثة ..

وأنت عارف في البداية السم بجربوه في الكديس .. الأنسان بصير علي نفسه .. بعد ما يزرع المحصول يجربه في الحيوانات !

الموضوع عايز ليه شوية بحث ..

بريمة

Quote: كمان اتذكر ابوي الله يرحمه يقول و هم شفع في الشتا كان يشربوهم السمنه بي نخرينهم

يا قباني
جيل الاباء ده جيل واعر وقوي

جيل هسا ده لو ختيت ليهو موية في نخرينو احتمال كبير (يسحلب)😅

علي ذكر المديدة والدخن.

(المديدة) دي اظنها تسمية جديدة
زمان كنا بنعرف النشأ


عندنا قريبنا من سكان (الواحات) جاء الخرطوم لاسباب تجارية،
عندو اصحابو عزموهو نشا (مديدة) بتاعة دخن!
بيسموها (ام جنغر)!!

زولنا ده جانا منفوخ التقول نافخنو بكمبرسون!!
نفس ما قادر يتنفس!
الزول ده اخد ليهو زي يومين كده منفوخ وبطنو ملانه غازات!!


يا باشمهندس بريمة
كدي اشرح لينا الفق بين المديدة والنشأ
وام جنغر دي نشا ولّ مديدة ولّ شنو؟!

دكتور السنوسي
سلام يا ول أبا ..

Quote: بيسموها (ام جنغر)!!

أم جنقر .. هى أن تأخذ الدخن وتدقها في الفندق مع إضافة الماء لها أثناء الدق .. يعنى كأنك عايز تشيل منها القشرة .. وفعلاً الكثيرون يضرونها لكي يفصلوا القشرة .. بعد دا تضعها تغلي حتى تنجض لمرحلة تتفقش الحبات ..
تنزلها لتبرد .. ثم تجيب الروب أو اللبن الحامض .. وتكبه فيها .. وهنا لابد من السكر .. وسكر تقيل .. تظمط ليك كورية ام جنقر وقت فطور رمضان .. الأحساس بالعطش ينزول في حينه ..

أما النشاء هى دقيق + موية .. ودائماً النشاء دقيقها مخمر .. يتم تخميرة قبل عملها .. مديدة الدخن ليس فيها تخمير ..

بريمة

ول أبا يحي قبانى

Quote: فياها عصيدة الدخن يا بي اللبن و العسل يا السمن و السكر .. و الاخيره المفضلة عند والدنا رحمه الله .. كمان اتذكر ابوي الله يرحمه يقول و هم شفع في الشتا كان يشربوهم السمنه بي نخرينهم ..

أول ما تضع السكر والسمن في مديدة الدخن أنت حولة الوجبة إلي مشروع تسمين .. نحن البقارة لا نضع السمن إلا في حالة النفساء .. لكن العادة نضيف عليها قليل من الملح.
جربها بالطريقة التى ذكرتها لكم .. ضع اللبن ثم دعه حتى يغلي ثم أضف دقيق الدخن وقليل من الملح .. ثم دعها تبرد وتاني ملحها بلبن أخر .. وأستمر هكذا .. أنا مجرّب الأثنين بالسكر وبدون السكر .. أري أن العسل الخالص ممكن يكون إضافة .. لكن نحن ما جربناها بكده .. ما بقدر أفتي في النتائج.


بريمة

الأستاذة أميرة
سلامات ..

Quote: مرة فى السودان عملت مديدة دخن جاتنى خالتى قدمت ليها منها ابت تاكلا وقالت لى ما ثقافتنا !

مناطق أهلك ما القاعدين يأكلوا الدخن .. دي مناطق مشروع تجاري جاهز .. تفتح مطعم يقدم وجبات منطقتكم وفي جانب الطلب تقدم معه كورية مديدة دخن .. وتكتب "محلات المشاوي ومديدة الدخن الكردفانية" ..
من باب الكيوريستي .. الناس ح تجئ تجرب .. وح تشبك في الدخن .. لأن نسبة البروتينات فيها عالية بتشعر بشبع لفترة طويلة جداً .. ومع ظروف السودان الحالية وجبة واحدة مع كورية دخن ممكن تقعدك للغد.

بريمة

التحية لكم جميعا....

صاحبة البوست امتثال و ل أبا المسئول..و بقية العقد الفريد..

أذكر أن بوركهارت كتب في مذكرات رحلته للسودان وبلاد النوبة بما معناه أن الدخن كانت منتشر في شمال السودان و على ما أذكر في

اليمن و جدة أو السعودية لا أذكر...

وعلى ذكر بوركهارت ..لم يكن القمح موجودا حين زار السودان حوالي 1805- -1810 بالتقريب... فاستنتجت أن القمح دخل إلى شمال السودان في مناطق

المحس والدناقلة و الحلفاويين و الشايقية مع دخول المماليك... و ربما مع قبائل صعيد مصر مثل الجعافرة و الهوارة...لربما..

تحياتي للجميع

ول أبا د. محمد عبد الله

Quote: وعلى ذكر بوركهارت ..لم يكن القمح موجودا حين زار السودان حوالي 1805- -1810 بالتقريب... فاستنتجت أن القمح دخل إلى شمال السودان في مناطق المحس والدناقلة و الحلفاويين و الشايقية مع دخول المماليك... و ربما مع قبائل صعيد مصر مثل الجعافرة و الهوارة...لربما..

كان القح يزرع في دنقلا وبربر منذ العهد الفرعوني .. بصورة حيازات محدودة .. وكذلك جبل مرة ..

أنتشرت زراعة القمح في السودان بعد أفتتاح مشروع الجزيرة ومشروع حلفا الجديدة الزراعي .. لكي يساعد في سد الفجوة الغذائية وكذلك أنتاج الحلويات والباسطات .. التحلية عموماًً .. يقال في أفريقيا تمت إنتاج بذور القمح المحسنة في حوالي 1902م وتم استزراعها في منتصف خمسينات القرن الماضي حوالي 1957م .. حيث صارت أفريقيا تنافس في أنتاج القمح. ومن ثم زرع القمح في الشمالية ونهر النيل والنيل الأبيض .. في السودان حل القمح محل الذرة والدخن في المناطق المروية ..

بريمة

ناس كراع العنقريب .. هنا النجيضة:

Quote: إن الحاجة الصحية تحتم علينا العودة إلى الدخن هذا ما أكده الباحث دكتور عصام صديق، مستعرضا الفوائد الصحية للدخن وهي أنه مفيد لمرضى السكري والبدانة والقولون العصبي والضعف الجنسي وهي أمراض يعالجها بالمساعدة في الوقاية والتخلص منها مما يؤدى إلى خفض فاتورة الدواء والسبيل إليها استبدال القمح بالدخن وأن الهدف الاستراتيجى أن يتحول السودان من مستهلك ومستورد للقمح إلى مستهلك ومصدر للدخن والوضع الصحي لديه انعكاسات على الأمن القومي، كما يحقق الاتجاه إلى الدخن في معالجة قضية استراتيجية تواجه السودان وهي محاربة العطالة والتوظيف واستبدال المطاحن الكبيرة للقمح بمطاحن صغيرة للدخن.

لاحظ الباحث عايز يعكس العملية الزراعية .. بدل القمح يتوسع علي حساب الدخن .. يرجع الدخن بدل القمح ..


بريمة

بوست برائحة الدخن البقاري بنكهة امريكية شمالية وبطعم نيويوركي
صحيح صلاح بن البادية كان يضرب عصيدة الدخن الملهلبة وبقوم يغني وصوته يصل
الى اعلى منطقة فضائية بسرعة ٧ ماخ/ ث

Quote: أول ما تضع السكر والسمن في مديدة الدخن أنت حولة الوجبة إلي مشروع تسمين ..

بريمه يا حبيب ..

كلامك صحيح لو كنا بنعملها كوجبة يومية ..
لكن هي كانت مرتبطة بي نزول المطر الغزير
و ايام البرد للتدفئة ..
يعني بتاكلها مره مره بالمناسبات ./
او حسب لغة ناس امتثال هنا زي ال Pizza night 😂
لو اكلت بيتز ا يوميا حتسمنك .. لكن مره كل فتره ما بتعمل شي ..

وكأنّي أسمع بـ الدُّخُن لأول مرّة 😊
.........
الأحباب امتثال، ول أبا بريمة والضيوف الكرام:
شكراً للبوست المفيد جداً.

Quote: فاستنتجت أن القمح دخل إلى شمال السودان في مناطق المحس والدناقلة و الحلفاويين و الشايقية مع دخول المماليك

القمح طبعا نحن فى الشرق حتى اليوم لا نعرفه إلا فى رغيف الخبز من الدقيق الذى يأتى من الخرطوم.
الرغيفة كانت طرية ووزنها تقيل.. لما يرسلونا للرغيف نمشى ولما نصل البيت كان على الأقل رغيفتين منهم
أكلنا اللبة بتاعتهم فى الطريق.. الرغيف كان من دقيق الفينو واللبة طرية وسخنة من الفرن وحلوة جدا بدون سكر.
كنا نضرب اللبة ونجيب الرغيفة نحيفة وفارغة من (المحتويات).. تصـل زى البيتا فى دكاكين العرب هنا فى امريكا
صفحتين كتاب بس ملصوقات فى بعض!!

Quote: صحيح صلاح بن البادية كان يضرب عصيدة الدخن الملهلبة وبقوم يغني وصوته يصل الى اعلى منطقة فضائية بسرعة ٧ ماخ/ ث

ول أبا أحمد يسن .. كلامك وكلام ول ابا مصطفي نور يؤكد صحة أن الدخن مصدر غذائي مهم ...

بريمة

شكرا ول ابا بريمة على الرد

الامر نفسه ينطبق على الفول المصري.

في بلغاريا مثلا لا يأكل الشعب البلغاري الفول المصري،

بل يطعمه للخيول.

وحدث أن طالباً سودانياً ذهب ليشتري الفول المصري من بلغاري ،

فكان أن سأل البائع البلغاري الطالب السوداني عن عدد الخيول التي يمتلكها.

فقال له الطالب ممازحاً :
عندي اربعة خيول.

وكانت تلك الخيول "الأربعة" هم الطلاب "الأربعة"،

الذين كانوا في غرفته ينتظرون قدومه بعد أن يشتري لهم الفول المصري هههههههههه

*

يا محجوب
ليه مسحت الكلام الكتبته قبال ما نقراهو ...يمكن يكون مفيد للقراء ...

وهذا دقيق الذرة الفيتريتـة.. الذرة الأبيض بتاعنا بتاع الكسرة الواحــد دا. فى نفس دكان الهنود Sorgam flour

وهذا دقيق الذرة الفيتريتـة.. الذرة الأبيض بتاعنا بتاع الكسرة الواحــد دا. فى نفس دكان الهنود Sorgam flour

الباشمهندس

ما قصرت في ميزان حسناتك ..
أنت بتعرف تسوي العصيدة؟ .. أنت عارف عصيدة أم حليبين .. ممكن تعملها من دقيق الذرة إذا ما لقيت الدخن ..


بريمة

Quote: أنت بتعرف تسوي العصيدة؟ .. أنت عارف عصيدة أم حليبين

هلا يا هندسة بريمــة.. وأنا اعرف أطبخ بيض مسلوق!!
العصيدة الدخن مع اللبن هى الخيار رقم واحد إن وجدت.. طبعا النسوان
يعملوا فيها عطرون وحركات جيش كدا كتيرة.. لكنى لو عملتها بس أعجنها فى موية وخلاص.. الهنود اقترحوا على اخمر العجين
وعندهم خميرة فى ظرف صغير .. قمت خمرتها يوم كامل.. غايتو تانى إلا الواحد يتأكد من حرمتها من حلالها قبل يكرر تجربة التخمير.
رجعت للفطيــرة.

باشمهندس ابو الريش

تفادي التخمير .. لان سخانة الطبخ تقضي علي البكتريا probiotics التى تنتج أثناء التخمير .. وتكون فقدت الفائدة .. جسم الأنسان يعرف كيف يستخلص الطاقة بواسطة طريقتين: عن طريق التمثيل الغذائي بواسطة الأكسجين .. وإذا تعذر الأكسجين، مثلاً في حالة الرياضة .. الجسم يذهب للتمثيل الغذائي اللاهوائي .. ففي الحالتين أن الناتج النهائي مغاير لتركيبة المحتويات التى توجد في الدخن .. أهمية التخمير هى تسهيل الهضم .. لكن لا تضمن أن الفوائد الغذائية تظل كما هى ..

بريمة

Quote: أهمية التخمير هى تسهيل الهضم

بس عشان كدا.. لأنك كلمت تقدمت فى العمر الطاقة للهضم تقل لحد ما فى المراحل الأخيرة تأكل زبادى بس. بعدين
النار كفيلة انها تقتل البكتيرا بعدما حللت الدخن. ولو وقفت عملية التخمير فى ساعتين تلاتة ستوقف انتاج الكحول للحد المسموح به شرعاً

سلام ...
الدخن مرة أخرى بعد أن وجدت المعلومة التي كنت قد ذكرتها سابقا ..واليوم بعد أن وجدت نفس شوية وجدت المعلومة التي أكدها

السائح/المستكشف/ وغالبا الجاسوس بيركهارت وهو يزور السودان قبل الغزو التركي ببضع سنوات..

يقول بيركهارت في صفحة 21 ما معناه أنه لم يرى القمح إلا نادرا ...مع أنه زار شمال السودان وشرق السودان فقط...

وذلك يؤكد الفرضية التي توصلت اليها وهي أن القمح لم يكن غذاء في شمال السودان إلا بعد دخول المماليك والاتراك...وكان

الدخن هي الغذاء الشائع..ليس في السودان فقط ولكن حتى ساحل السعودية واليمن..

(الدخن غذاء في ساحل البحر الاحمر من جدة حتى اليمن، ويقول انه لم ير القمح )الا نادرا
ص21

ول أبا دكتور محمد عبد الله

Quote: يقول بيركهارت في صفحة 21 ما معناه أنه لم يرى القمح إلا نادرا

ودا لابد أن يكون في منطقة دنقلا العجوز ..

بريمة

الحبيب بريمة
سلامات وسلام للجميع
بدون مجاملة انت رجل مفيد جدا
وياريت لو تجود علينا بثقافة اهل غرب السودان من تجربتك الشخصية
وانت رجل مثقف واكيد سوف تكون حلقات مفيد

الحبيب ياسر،

سلامات .. وألف شكر علي الأطراء ..

ول أبا، في هذا المنبر، أنا لست وحدي الذي كتب عن تراث وثقافة الغرب .. أبحث عن ول أبا محمد النور كبر تحت إسم Kabar وأبحث عن أدم الهلباوي، عبد الرازق الطالب، أسماعيل عبد الله (كحل الشيخات) وكثيرون .. وديل كلهم بقارة كتب بثراء رهيبوا عن تراث وثقافة أهل الغرب، برضوا أبحث عن الأتي أسماءهم في اليوتيوب: ول أبا الفاضل الجبوري، ولد أبوك عيسي حميدان ..

أدخل في البوست المرفق .. وإذهب إلي مكان كتبت مقدمات لكتابين لي عن البقارة .. كتاب الفكاهة وحكاوي التراث .. وكتاب تراث الشاي ..


في ضيافة بادية البـــــقارة .. الطبيعة والجمال وحب الحياة.في ضيافة بادية البـــــقارة .. الطبيعة والجمال وحب الحياة.

بريمة

Quote: يا محجوب ليه مسحت الكلام الكتبته قبال ما نقراهو ...يمكن يكون مفيد للقراء ...

سلام بنتنا امتثال,
طبعا لقيت الاخوة ابوالريش و بريمه ما قصرو و تقريبا قالو كل الممكن كان اضيفو و لذلك دخلت علي سبيل التحية.
لاحظت انو اغلب الناس خبرتهم مع الدخن فى استخدامات كتحلية, يعنى زى الرر باللبن او الزلابية.
بالنسبة لينا هى الوجبة الاساسية و لذلك بكون التركيزعلي الملاحات اكثر. فالعصيدة هى العصيدة. يعنى زى صناعة الرغيف في الفرن (موية, خميرة و عجنة). بعدها يأتى الاستخدام الحقيقى من خلال الاضافات (ساندوتش فول و طعمية و بيرقر, الخ..)
بالنسبة لينا تأتى ملاحات الشمشومة و المرس و الدودرى والامبلت (بامية) و الملوخية و الروب, الخ.