06:14 PM December, 25 2022 سودانيز اون لاين
يحي قباني-فى الدنيا العجيبة
مكتبتى
رابط مختصر
كان كريسماس
في عوالم يُمّه لعيونِك جديده
النبيذ في عروقي بقَّ
ولهلبت روحي الموسيقى
والبنات يا يُمّه عينيهِن تودر
كلُ لوناً
كلُ رمشاً بي قصيدة
..........
وجَان بترقُص
ولمّا ترقُص جان بِتغرق
مره زي لهباً مجنّح
ومره زي أهل الطريقة.
الطبول جواي دقّت
الموسيقى اتفجّرت جوّه المكان
السقِف إتضارى بي غيم الدُخان
الرزيم تاه بالبِنَية
الوقَفَت قلب الزّمان
وفي السما اللوّن عيونها
جنحّت نغمَة كمان
.........
وإحترت يُمّه
طِرت يُمّه
للسمّا الوّن عُيونها
ونمت في الأفق المريح
دقّت أجراس الكريسماس
وغنّا للدنيا المسيح
وغِبت أسجد
للإله الصوَّر اللوحَه
وأصلي
مره أعرِض .. مره أرقُص
مره أشهق مره أبكي
الجمال يا الله قَدري
وروحي ساكناها الموسيقى
وفي العيون الحِلوه
بقرا المابَعَرْفو
وبلمَح الرّب والحقيقة
والطبول لامن تدُق جواي
بتمتد الجسور من (نُمُلي)
( للحِله الجديده)
والرزيم لامن يهوِّم بالبنيّه
الغايبه زي أهل الطريقَه
ببقى زولاً شكلو تاني
وحرفو تاني
ورسمو تاني
وروحو ريشتو
الجمال في الدُنيا عِيشتو
الجمال في الدُنيا عِيشتو .