كديسة محظوظة من كافتيريا مطار الخرطوم تسللت للطائرة الإماراتية ليجدوها في العفش في بيرمنجهام

03:48 PM November, 15 2022

سودانيز اون لاين
Osman Musa-
مكتبتى
رابط مختصر

الدنيا حظوظ... 😂😂😂

⊙الكديسة الصغيرة ال فـي الصورة دي سودانية
عمرها شهر ونصف تقريباً..

⊙ الأسبوع الفات كانت حايمة فـي مطار الخرطوم بين الكوشة بتاعت كافيتريا المطار ومنطقة الشحن ..

⊙شوية شوية دخلت جوه طائرة الخطوط الجوية الإماراتية المسافرة من الخرطوم وماشّة برمنجهام فـي إنجلترا.....

⊙ فعلاً إتحركت الطيارة والكديسة جواها من الخرطوم ..

⊙طول الرحلة 3000 ميل تقريباً ..

⊙وصلت الطيارة لـ إنجلترا و عمال المطار لقوا الكديسة وسط الشنط وطوالي بلّغو أمن المطار ..

⊙ أمن المطار استلم الكديسة من وسط العفش وحولها إدارة الطب البيطرى فـي برمنجهام عشان يكشفوا عليها ..

⊙حيخلوها تحت الملاحظة الطبية والنفسية لمدة 14 يوم مع التغذية الجيدة
عشان يتأكدوا إنها خالية من الأمراض وتكون بصحة جيدة ..

⊙ خطوط الإمارات عرضت إنها تتحمل تكلفة الكشف الطبى على الكديسة السودانية باعتبار أنها راكب من ركاب خطوط الإمارات قادم من الخرطوم
لكن السلطات في بيرمنجهام اصرت على معاملتها~ كما تعامل قطط بيرمنجهام~ .

⊙ الجميل إن فـي برمنجهام سموا القطة: (سودانيس بيوتي)
وبيدلعوها(سو بيوتي) ..

⊙بعد إنتهاء وضع ( سودانيس بيوتي) تحت الملاحظة الطبية لمدة 14 يوم، ح يتم عرضها للتبنى من أي أسرة إنجليزية
وفعلاً إتعمل إعلان لـلاسر الإنجليزية عن (سو بيوتي) وتلقت السلطات عدة طلبات تبنّي.

واحدة زهجانة قالت اريتنى كديسة... 😂😂😂

الكديسه المحظوظه بتاعت السودان بعد ان تمه الاعتناء بها وجدنا ليها الصور التاليه

قطط وكلاب بمطار الخرطوم.. ماذا هناك
مايو 17, 2022
طالب خريج الضيافة الجوية الشاب “عمر نصر الدين” سلطة الطيران المدني بمعالجة قضية القطط والكلاب بمطار الخرطوم التي أكد تشكيلها خطورة على حركة الملاحة.
وكتب على تطبيق الفيس بوك:” بحسب حساب طيران بلدنا بالفيس بوك أعزائي في حاجه مهمه جدآ لفتت نظري وانا قادم من رحله داخليه كميه من الكلاب والطيور وانا بشباك الطائرة شايف الكلاب تجري والاخطر انها قريب من Runway كنت عايز اصور المشهد بس في لحظه الطائره اقلعت ماقدرت وكمان بقت تسك الطائرة، زمان كانت بتخاف من الصوت لكن شكلها اتعودت و عندها مضاد ضد الصوت، لكن صراحه في إهمال شديد ولاحظت السياج كمان شبه مفتوح حتى البشر ممكن يحصلو المدرج مابالك بالحيوانات نناشد سلطه الطيران المدني بحل القضيه دي لأنها أرواح ناس ما لعبة، الله يكون في عون السودان “.
وكانت إدارة مطار الخرطوم قد نظمت حملة كبيرة لازالة الحشائش جنوب المطار، ونظافة مكب النفايات الذي يقع داخل المطار، وكان عدد من الخبراء قد حذروا من خطورة الكلاب والقطط والطيور على حركة الملاحة الجوية.

كديستنا قبل السفر الى اروبا

الأخ مصطفى
سلام
الف شكر على المتابعة .
لكن الصورة الجبتها دي ما صورة البيوتي سودان حقتنا.
الجبتها انت في الصورة دي كديسة حنكوشة جدا .
بس كديستنا الفراسة الفي عيونا بتقول انها أجمل رغم صعوبة مكان المولد .
انا عندي صورة كديستنا المهاجرة مصورة في صحيفة انجليزية .

Osman Musa
تحيه طيبه
والله الكدايس دى من المخلوقات العجيبه
الكديسه الفى الصوره دى اتى بها الى المنزل ابني الصغير معاذ وكان عمرها شهور امكن شهر
واطلقوا عليها نتاشا والله يا اخوى عثمان
الكديسه دى ياعثمان بتاكل تونا وفراخ وكرهت التونا والفراخ بفت تاكل هوت دوق والله كل الوجبات بتاكل لحوم
والله فلست بى الصباح بيعملوا شندونشات المدرسه للعيال وفى نفس الوقت بيعلموا للكديسه النصيب بتاعه من نفس اكل العيال هوت دوق فراخ بانى
والاغرب من كده مايتنوم والله الافى سرير مع اى زول من ناس البيت
وبتاخد كل كم يوم حمام شامبو ووالله الكديسه دى بقت من الاسره وبتلعب مع كل ناس البيت مع العيال ومع ام العيال ومعاى انا قصتتها من ما ادخل المطبخ
بتجى جاريه وتقيف على كراعييها وماتنزل منى الا بعد اعمل ليها هوت دوق ولا تونا ولا فراخ والله وبتشرب حليب
وعندها فى البلكونه اناء بلاستيكى فيه رمله نظيفه والله عشان تقضى حاجتتها
وطبعا نتاشا من الاسم اثنى والله بعد ماتاكل اى وجبه تقعد تتنظف مده طويله سبجان الله حتى الانثى فى الكدايس تعتتنى بنفسها
وبعد كده لما تجى تنوم بتسرح شعرها فى كل الجسم تلحس وتسرح وتنظف جسمها
والاغرب من كده والله بتتطلع فى الكراسى بجوار الستاير وتفتتح وتجر الستاره عشان تتفرج فى الشارع اقسم بالله حيرتنى
عارف مره جلدت ابنى معاذ وقعد يبكى جات الكديسه دى قعدت تلعب مع معاذ وسلمت عليه فى خدو والله
طبعا اى زول فى البيت عايز يشيل نتاشا واى زول عايز يلعب معاها والاغرب الصباح لما المدام تكون بتشرب فى الشاى بتجى وتتطلع وتقعد فى حجرها
وتاكل بسكويت تشرب الشاى بارد
والله مرات انا بتجى فى الغرفه وبقولها نتاشا بره طوالى بتتطلع بره وكم مره بقول امكن صدفه لكن امنت انو بتعرف وبتفهم كلمات اترددت ليها كثيرا
العيال علموها كلمه سلمى بقت تمد يدها وتسلم والله وتسلم
سبحان الله الكديسه نتاشا دى عملت برنامج فى البيت وبقت مصدر فرح للعيال ووامهم والله وانا والله مابرضى زول يزعلها ولا ينهرها
الغريب عندى اختى بتخاف منها ومن ما اختى تجى عندنا نتاشا بتحاول تنط فيها كم مره يعنى نظام انا بخوفك هههههه

اكتر بره سودانية محظوظة .
كشفوا عليها كشف عام بول ودم و كلو مية مية .
طعت نتيجة الفحص ممتازة لا سكري لا كلسترول . النظر تمام . الأسنان تمام.
الحالة النفسية تمام.

الكديسة دي قاصدة وعارفة هي كانت بتعمل في شنو يا استاذ عثمان ما صدفة ، قرفت من الوضع وقالت ما فيش حد احسن حد

الأخ الفنان ترهاقا
سلامات
افادتنا بعض الأخبار الجديدة عن الكديسة واصلها وفصلها.
الأخبار بتقول انو صاحب الكديسة كان موظف في بورتسودان
وانتقل للعمل بالخرطوم . وطبعا كدايس بورتسودان مشهورات بالذكاء وحب السفر
ف عادي ممكن اي كديسة تتسلل وتنط في اي باخرة من الأواخر وبعد اسبوعين يلقوها
في ميناء في آخر آلدنيآ .
كدايسنا كدايس تتمرد على الأوضاع الملكلكة في بلدنا . يعني القصة ما قصة جوع .
ابدا ما جوع . السودان اكتر بلد فيه لحمة واكتر بلد فيه نفايات . لكن شم الهواء واجب .

في صحيفة انجليزية حتعمل مقابلة مع الكديسة الهاربة .
الكديسة حتحكي فيها عن رحلتها التاريخية الطويلة . وعن خطة التسلل للطائرة الإماراتية.

حنية عجيبة من البرطانيين على كديستنا .
ليه كل دا الاهتمام؟
بعد الكشف وضح انو الكديسة حامل. وهاك يا اهتمام.
اكيد حيتعمل أضخم فيلم عنها من رحلت امها من بورتسودان ولاحدي الخرطوم
وكافتيريا المطار وليلة التفكير في الهروب . بسم الله.