طارق ابو عبيدة مطرب حقيقي عكس البسمو نفسهم فنانين وهم مؤديين صييتة رفقة فرقة موسيقية والسلام
فرق شاسع بين المغني المطرب الفنان المطرب وبين الفنان المؤدي
طارق صوت اخاذ وتريان ومليان تطريب وطارق مغني مسكون بالابداع يطرب نفسه قبل كل شي عشان كدا بينساب الأداء مشحون بالانفعال الجميل ويتسرب لروح المتلقي قبل أذنه
طارق بختار درر الأغاني من غيره ويغنيها وبختار درر الأشعار عشان يعيشها ويندغم ويندمج ويمتزج مع معانيها ويلحنها عشان تنساب شلالا رويا زي ما بالضبط عمل مع قصيدة بشرى الفاضل
وصديقنا واستاذنا واديبنا الشامخ د. بشرى الفاضل كمان كون هائل من الإبداع في كل شي
شكرا يا طارق علي تجميلنا بيك
-يتبع-
Post: #6 Title: Re: هكذا يكون الغناء - 1 Author: Osman Musa Date: 11-08-2022, 07:59 PM Parent: #4
بالحيل يا ابوذر طارق فنان مختلف. طارق مرق من نفس الواطة المرق منها بابكر الزكار وما ادراك ما قطار الشوق. نفس الفجة المرق منها عثمان بشير نفس البكانات المرق منها ود السافل. نفس حتات سيد الجعلي . نفس المكان القامت فيه ورشة اغنية .. بدخل الساحة.. واشيل مفتاحة واشوف الزول.. الحماني الراحة الليل والليلة ازاي الليلة وحرق بي نار الكماين ديلا ويا الصلاح ويا .... اقولك كم عدد الكرابيج التي تقطعت في ضهور عشاق النم اخوان البنات .؟ طارق ترعرع في دي الفجج الملهمة. طارق قبل هجرتو بين امستردام وفرجينيا تدردق سمح في دلجة الباوقة اللذيذ تفاحا. له التحيات ممدودة وحار التعازي في صديقنا المشترك الزميل الشاعر خطاب ود حسن أحمد عليه الرحمة .
Post: #8 Title: Re: هكذا يكون الغناء - 1 Author: الطيب بشير Date: 11-10-2022, 08:42 AM Parent: #6
. وبعدين معاك.... هو ما غنّاها بس ..لا لآ ..ده همسها في الوجدان مباشرةَ عثمان بشرى ذاتو كتبها كأنشودة الجن و أرمي ليّ مطار، الراحل المقيم خطاب أحمد، وفيها كمان تطريب رفيع و البنات البنات...ألطف الكائنات يا مطر مشكور للإحتفاء بالفنان طارق عبيدة فقد زيّن عمرنا و لا يزال يفعل فيما تحتفي القنوات بردحي القونات!
المنطقة دي كمان منجم من الإبداع الغنائي وياما طلعت للناس افذاذ المطربين
من لفة النيل في ابو حمد شمالا لغاية شندي جنوبا
ود السافل واحمد عمر الرباطابي والشفيع والحويج واللحو لغاية ما نصل محجوب كبوشية وحسين شندي وحسن شرف الدين والبشرى جاد السيد
Post: #9 Title: Re: هكذا يكون الغناء - 1 Author: هشام الدرديري Date: 11-10-2022, 09:49 AM Parent: #1
قدر ما اسمعة تاني ارجع اعيدة من تاني ارمي لي مطار المبدع خطاب حسن احمد والرائع المخرج والمنتج ود العبيدة طارق ابوعبيدة ياخي الزول دا يرد الروح ويعشرق في حلقك من حلاوة غنائة وادائه وينك ياخدر ياريت تعود للمنبر من تاني طارق لو غني ليك الاسماء في دليل الهاتف تطرب وتغني معاهو
رحم الله القامة الاستاذ خطاب حسن احمد وامد الله في عمر اخونا طارق ابوعبيدة المنتظرين منه الكثر أرمى ليا مطار فى الفضا المفرود بين بلود وبلود أرميهو يا أ خيه
طعم البلل ياخي فى الغابه والصحري السهل وفوق الصي بتكرف المطره فردة جناح يا بت ارميها يا بنيه
مقعد علي الشُباك والدنيا قمريه طائر ونص الليل فوق السحاب لا عش لا شجره فى النجمه
صبحا ً اقولك إيش وانا كنت ليش ما فيش قوليلى يا بنيه
Post: #10 Title: Re: هكذا يكون الغناء - 1 Author: نزار عبد الوهاب Date: 11-10-2022, 01:48 PM Parent: #1
مشكور العزيز أباذر وأنت تفرد لنا رقراق ضي في العتمة الحاصلة ... وعبرك التحايا الزاكيات للأعزاء المتداخلين حُباً وجمالاً ... ومن العجائب قبل فترة كانت قناة الشروق بدأت في البث بتقديم برامجها القديمة ... وكلما أفتح القناة وأجد لقاء المبدع طارق أبوعبيدة في برنامج على ضوء الشموع ... لا أخفيك أنني حضرتها مرات ومرات لدرجة كنت أريد أن أعمل بوست وأسأل عن هذا المبدع ... لدرجة أخذت لقطات بالجوال من التلفزيون لأرفد بها البوست ولكن ظروف العمل في وقتها حالت دون ذلك ... وقد ذكر الأستاذ طارق أن بداياته كانت من سودانيز أونلاين ... أشكرك أخي أبوذر على هذا البوست المترف بكل الجمال ... وأسمح لي أن أشارك بهذه الصور ...
Post: #11 Title: Re: هكذا يكون الغناء - 1 Author: Ahmed Yassin Date: 11-10-2022, 03:50 PM Parent: #10
