Post: #1
Title: درس بليغ وعميق في التنمية من مزارع في القضارف علي أيام الإستعمار
Author: Nasr
Date: 10-23-2022, 05:42 PM
05:42 PM October, 23 2022 سودانيز اون لاين
Nasr-Los Angeles
مكتبتى
رابط مختصر
هذه حكاية راجت في الأيام الماضية في الواتساب
أنقلها هنا رغم ظني أن كثيرين قد رأوها
لكني أتوقع مداخلات في ما حوت من دروس في شأن التنمية الإقتصادية
إلي الحكاية كما وجدتها في موقع في الفيس
========
عام 1949 زار المفتش الانجليزي المستعمر منطقة "#القدمبلية" بالقضارف في جولة الهدف منها معاينة حال الناس فيها ودراسة مطالبهم..وطلب زيارة منطقة حددها بالاسم حسب برنامجه الموضوع.
قال له ضابط المجلس السوداني أن مطالبهم معروفة:
مدرسة..شفخانة.
فسأله الخواجة المستعمر:
هل زرتهم وجلست معهم لتعرف أنها مطالبهم؟!
وكعادتنا نحن الذين نعرف أي شيء عن "ناسنا" أكد له الضابط أن الأمر بديهي جدا .. وأن مطالبهم لن تخرج عن المدرسة والشفخانة!
وقلبي تاه..
في يوم الزيارة..
يومها نُحرت الذبائح في كرم يشبهنا ويشبه أهل بوادينا المنسية عبر التاريخ.
وتم الاحتفاء بالمفتش والوفد " المنافق_له" أيما احتفال.
جاء الدور على معرفة مطالب الناس .. فوقف كبير القرية .. لما كان للناس كبار حكماء يحسون حسسهم .. ودار بينه وبين المفتش ما يلي:
👮♂️ المفتش: دايرين ايه؟!
👳🏽♂️ الكبير: دايرين #تركتر
*المفتش: ليه تركتر؟!
*👳🏽♂️ الكبير: نحن بنزرع مساحات صغيرة .. ولو لقينا #تركتر بنزرع مساحات أكبر وننتج اكتر .. ونحن مساكين ما بنقدر نشتري تركتر
*👮♂️ المفتش: وتاني طلباتكم شنو؟!
(هنا يتدخل ضابط الهنا ويهمس في أذن المفتش .. أها.. حيقول ليك مدرسة وشفخانة!)
*👳🏽♂️ الكبير مواصلا: ودايرين #لوري
*👮♂️ المفتش: وليه لوري؟!
*👳🏽♂️ الكبير: قدر ما #ننتج يجونا #السماسرة ويرموا لينا الأسعار في الواطة .. لكن لو عندنا #لوري نرحل محاصيلنا سوق القضارف .. ونخلف كراع فوق كراع ونبيع بالسعر المرضي للجميع.
(المفتش ينظر إلى الضابط بطرف خفي جلي 😏 .. ويسأل الكبير)
*والمدرسة والشفخانة ؟!
*👳🏽♂️ الكبير: نحن لو #زرعنا و #أنتجنا ممكن نبني المدرسة والشفخانة .. ونبني نقطة بوليس ونوفر السكن والمعيشة للحكيم والمدرسين وناس البوليس .. ما هم مننا وفينا!
ما اكثر العبر وما أقل الاعتبار!
ذلك الضابط الإداري كان متعلما لا شك .. في زمن عز فيه التعليم .. لكنه كان بعيداً عن الوعي باحتياجات أهله وفهم همومهم .. كان من "ذوي الياقات البيضاء" كان "موظفاً " ينهل من خيرات "الميري" وامتيازات الوظيفة!
والساقية لسة مدورة!
_____________________
رواها د.ابراهيم الأمين
|
Post: #2
Title: Re: درس بليغ وعميق في التنمية من مزارع في القض
Author: Nasr
Date: 10-23-2022, 06:08 PM
Parent: #1
الرابط
https://www.facebook.com/groups/337783729680264/permalink/2255552651236686/https://www.facebook.com/groups/337783729680264/permalink/2255552651236686/
طيب
حاحات (مستحدثات) كان لها الإثر البالع في تظور السودان الحديث
السكة حديد
مشروع الجزيرة والمشاريع المروية في النيلين والنيل ومشاريع الزراعة الآلية
كلية غردون والمعاهد الفنية المتخصصة
وأخيرا
التراكتور واللوري
نبسط مسألة التراكتر التي وردت في الحكاية موضوع البوست
لو أن القرية كانت تزرع ١٠٠ فدان بالسلوكة في موسم الخريف
فإنها تستطيع أن تزرع ١٠٠٠ أو يزيد في نفس الموسم
ويعني زيادة في الإنتاجية الف في المية
عشرة أضعاف عديل كدا !!!!
بأسعار الليلة
لو أن الفدان ينتج ٣ شوالات ذرة والشوال بثمن مية دولار
فإن كل ما أنتحته القرية بالسلوكة من عيش يسوي ٣*١٠٠*١٠٠ وذلك يساوي ٣٠٠٠٠ دولار
بعد التراكتور نفس القرية أنتجت ما يساوي ٣٠٠٠٠٠ دولار
عشرة اضعاف !!!!!
يعني كما قال حكيم القرية ممكن براهم يبنوا الشفخانة والمدرسة وبيوت المعلمين كمان
هاكم هذا السيناريو
البنك الزراعي يقوم في سنة بإستيراد ١٠٠٠ تراكتور
سعر التراكتور حوالي ٣٠٠٠٠ دولار
يعني الحسبة كلها ٣٠ مليون دولار
ما كتيرة علي أي بنك
طيب قول سلف أو باع هذه التراكترات للمزارعين في أنحاء االسودان المختلفة
لو كل تراكتر قام بزراعة الف فدان
معاناها في مليون فدان أتزرعت
في متوسط إنتاجية ٣ شوال للفدان
مجموع الإنتاج من هذه التراكترات هو ٣ مليون شوال
طيب لو قلنا الشوال مية دولار
دي حكاية بتاعت ٣٠٠ مليون دولار
البنك الزراعي قبض قروشه ومعاها ارباح معقولة
توفرت للإستهلاك الآدمي والحيواني حوالي ٣ مليون شوال
أكثر من الف أسرة مزارعين وضعهم تيسر خالص
وكمية جنقو وسواقين وأسياد لواري وتجار محاصيل وتجار للسلع الإستهلاكية
أستفادوا من هذا ال spill over benefits
وكم بيت معلم بنيت وكم شفخانة شيدت !!!!!!!
يعني التنمية صعبة لدرجة أنه يعملوا ليها مركز دراسات إنمائية ؟؟؟؟
يللا يا شرنوبي وناس الإقتصاد الزارعي مساهماتكم للتوسع في هذا الموضوع
|
Post: #3
Title: Re: درس بليغ وعميق في التنمية من مزارع في القض
Author: Hani Arabi Mohamed
Date: 10-24-2022, 03:45 AM
Parent: #2
لو باعو نصف التاتشرات اللافة بلا سبب وتوففو عن استيراد المزيد
ووجهو كل هذه الميزانية نحو منح تركترات مجانية للمزارعين في كل أنحاء السودان ...
لتغير الحال
|
Post: #4
Title: Re: درس بليغ وعميق في التنمية من مزارع في القض
Author: Nasr
Date: 10-24-2022, 06:43 PM
Parent: #3
لو أنهم فعلوا ذلك يا هاني
لصرنا من الدول الغنية زي البرازيل وأستراليا ونيوزلندا (ودي كلها دول زراعية أساسا)
الله يرحم محجوب شريف الذي قال
كي سنكي أحسن يبقي مصطرينة
|
|