المبدع محمد المرتضى يكتب في سيرة الفنان الفخيم بادي

03:13 PM October, 10 2022

سودانيز اون لاين
Osman Musa-
مكتبتى
رابط مختصر

بادي

- محمد المرتضى حامد –

يا صفايا يا وفايا هاك برهان.
عفوا..
برهان عن غرامي وطول هيامي السابني ولهان،
إنت حكمه؟

في صباي شهدت حفل (صبحية) بحي العرب، غنى فيها الجابري الياما قال حكاوي ما خطرت ببال، والجابري الأسطوري دا أحسن نخليهو هسه لأنه كون لوحده. شارك في ذات الحفل النهاري (بادي) فغنى (قائد الأسطول) بحضور حورية البحر وغواصة يوم القيامة Belgorod وأردفها بالكواكب احتفلوا بالقمر وخرائد غيرها.

كان أنيقا في سكناته وحركاته، بشوشا ممراحا في احترام بائن لنفسه ولفنه ومعجبيه، رائعا في أدائه الوسيم، أذكر كيف تجاوب الحضور مع ذلك الفخم المائز وكيف أخذنا بقوة من مدارات وثقافة لاعلاقة لها بالغناء الشعبي، فقد كانت موجاتنا حينها مضبوطة على إرسال ناس (وليم أندريه) و(مريه) و (تائه الخصل) التي جسدتها واحدة (جيش هواها احتل قلعة الأصفاح) فلم ينفع مع تيه خصلاتها مُرشد أو GPS،
تتجازى بس..

في العام ٢٠٠٠، مع الميلينيوم التالثة، وبدعوة من سادن الحقيبة الصديق د. أحمد القرشي عبدالرحمن، زارنا بادي، أو (الشيخ طه) كما كنا نناديه، فأقام بمسقط لشهور أربعة، كثيرا ما شرف أثناءها داري المتواضعة بجلسات فوق القمر، في الواقع كانت مدة الزيارة ثلاث شهور لكن الجميع طلب إليه مدها لشهر آخر، وذلك أقصى ما تسمح به القوانين، فاستجاب بأريحيته الصوفية المعروفة لأن (الحاجزين) لبطاقات فاينال طرب الحقيبة كُثرٌ وطابور الباحثين عن اليوغا والميديتيشن البيعدل العصب كان طويلا.

في حفل حي العرب ذاك، مفاعل الفن النووي اليجمع جل أعراق السودانيين ومذاهبهم وتوجهاتهم السياسية والرياضية والفنية المختلفة، وهم في النهاية أهل، مسيحيين ومسلمين ولا دينيين، طرِب الجميع للقادم من (حلة عباس) والذي قدم يومها محاضرة في فن الغناء الشعبي لن تجدها في أكاديمية سانتاتشيشليا الوطنية.
صوت أصيل تخطى حاجز الصوت، حنجرة لم تمسها محسنات أو مساعدات، وال chorus (الشيالين) عارفين شغلم كويس. بادي دا عندو chorus ينشل قلبك وانت بتتفرج لأدائه وباصاته وزمنه وتماهيه مع الإيقاع،
مسكين جيمس لاست.
الرِق نفسه بكف بادي كريشة بين أنامل دافنشي أو إزميل بيد أنجلو.

ظباء المسالمة حضور بثياب رسالة لندن وفساتين نسجت من خيوط العشق وفُصّلت من قماش الهوى، هن زاااتن يُكمِلن لوحة ظللن يخططن لها في استراتيجية لا تقل عن إنزال النورماندي، سشوارات ورولات وتوكات وعيون ناعسات مضادة للدروع، أمدرمان الثانويه ياخ، البانزرز، فالحُسن وقتها كان أصيلا، بوهية شركة، ديملر، شتوتجارت ذاتا.

بادي يأسر الحضور بوجاهته وطلعته والجلابية الأنصارية التي أصبحت logo حصري لسيدي الشيخ طه، هسه ممكن تمشي لترزي تقول ليهو عايز جلابيه (بادي) وكفى. أصلو الجلابيه الأنصاريه دي مافيها كلام، زي سيادا الأنصار الذين أنسنوا أدبياتنا رأسيا وأفقيا، كيف لا وهم/ن من يناديك ب (الحبيب) وهذا لعمري تهذيب للأنفس في قمة التسامي والرقي والتسامح. أيوا، وأهل أم در بجانب معزتهم ليسارها وختميتها، ريدتهم لأنصارها والنصارى لا تدارى، فهم، بعيدا عن ساس يسوس، يجمعهم الصدق والأدب وسماحة النفس والوفاء، أها بادي دا منهم، إنسان مخلوق من أثير، صادق في مشاعره مع كرم نضاح. هناك خصال مستحيل تصطنعها، لا تُكتسب، لا تتأتى إلا إذا كانت مزروعة في ال DNA جوه.

ملك القلوب لنصف قرن باحترامه لفنه وبتواضعه ونظافة سيرته وسريرته وطهره مظهرا ومخبرا، شاهق مبنى ومعنى، تتعطر وتتطهر حين يحتويك معانقا، برئ حتى لينتابك إحساس أنه يعمل بقلب طفل لا يأتيه صبح وفي قلبه قطمير زعل من زول، لذا صادر القلوب دون إعذار مسبق. . زرته و د. القرشي بمنزله بالعباسية فقدم لنا ابن أخته (عباس) العصائر والشاي فبادره بادي قائلا: يا ود، ديل بكرموهم بالغنا، ناولني الرق والعمه، فهو لايغني إلا في كامل هندامه فأشجانا ب (مرضان باكي فاقد) و (زمني الخاين).
يا سلام ياخ.

ربما يعجب الناس للتلقائية التي تميز حفلاته حتى لو استضيف في أجهزة رسمية، الزول دا الفي خشمو في قلبو، وعندما قال (العبادي في "ببكي وبنوح وبصيّح" عمل شغل مجانين)، كان في قمة عفويته، مضيفا:
(يا جنة الطبيعه إياك زهرة ربيعا..
صَحَت شِراها وبيعا عينيك حروب ربيعه..
وووووك..
حرب البسوس ..
دا شنو يا خ دا).

هو كدا، لا تذويق لا فذلكة، لكن كل ذلك يأتيك في كأس من كريستال يمثل تحفة فنية بحد ذاته ومحتوى يشفي الروح والبدن معا.
لا يمكن أن تطرب لمغنٍ إذا لم يكن يطرب نفسه أولا، ما وارد، ناس خضر بشير وأبوداؤد (باري وايت السودان كما يناديه أخي د. أحمد طرواه)، تجد الواحد فيهم يتمرغ في شجنه ويتوهج في بدنه أولا، كما قال الفيتوري، حتى يحترق فيُسمِع الناس مزاميره وزفراته. لو ما انقلى في النار ما بغني..
بادي كان حادي قوافل أولئك الأفذاذ وكان يتبنى قصائد العماليق فيشجي بها البلاد والعباد كسيد وجعه حقيقي،. ففي أغانيه تتبدى حالات الوجد الصوفي في أقدس أحواله، فهوعندما يتغنى بالكواكب يدخلك معه في رحلة يتوارى معها جيمس ويب وناس ناسا تواضعا، وحين يشدو:
(الطِريف شبك رُشرُشه العمر والعيون سيوف تقضي ما أمر)..
طوالي يزازي ليك مسرور سياف الرشيد.

صديقي المًكهرَب قال لي بادي دا لامن يقول:
(ديسو للقدم وصّل الخبر والصدير برز قلع انتبر)
بفتش المحاليل الوريديه، ولامن يصل ل:
(الصدر قلع والردف نتر والضمير تِعِب حالتو في خطر)..بالجد كدا بسمع جرس الحريق وصوت الإسعاف لأنه بيغنيها زي ما جات في الكتاب ويدخلك simulator يشرح ليك أسس المِلاحة كويس عشان تاني ما تنسى، ففي (التغزل) بين المسارح التي سبق وقلت أنها شرح عملي لدروس الميكانيكا، قدم بادي عرضا أولمبيا أنصح طلاب الهندسة والفنون والجغرافيا بالإستماع إليه والإستمتاع به فهو ليس أغنية وصف للطبيعة وجمالها وحسب بل مشروع تخرج إستثنائي.

عبدالله العشوق قال فيها:
(طاوعنو وصدّن عصَنّو
شال جديهن ما خلّصنو
شوف جريهن كيف باقصنّو
خطوه خطوه المشي نقّصنّو
والردف بالحشا رقّصنو
يلا يا قُناص روقو صِنّو
والتلذذ في الإرتياح)

بالله مش عايزه Replay؟
بالله دا كلام دا؟

أمثال العشوق والعبادي وودالرضي وأبوصلاح ديل زي مكاتب التصميم المعماري، يرسموا خرائط شقانا ويسلموها ناس بادي الذي تفوق على فرانك لويد رايت ثم يأتيك بإدهاش هندسي إنقلابي متخطيا بمنحنياته زها حديد بهناك.

لم يترك غرضا في الشعر إلا وارتاده، فقد غنى لوطنه ترعاهو العنايه فأشجى ولفلسطين تناديكم فأبدع، وانتو عارفنو كان أمين عام معبد ومعهد الغرام فإذا ما أنشد نظرة يا السمحه ام عجن وقال (أحشاي هديل اتقطَّعن وبالفُرقه نشّابِك طعن) فهو فقط يشرح ماهية ال whipple procedure والحافظ الله..

ثمة مواقف إنسانية لذلك الملاك المتصوف لا داع لذكرها لخصوصيتها لكنك إذا أردت أن تتخيل رسما لأحد الصالحين الزاهدين في دار البوار هذه والذين تبوأوا مقاعدهم في دار القرار بين الأتقياء فعليك بالنظر إلى صورة الشيخ طه.

قال:
(أرحموني مارِضني الظعن..
آمالي جور لي قاطعن..)

رحمك المولى يا سيدي ولك عليين.

-

(وألقيت عليك السلام في صمت .. كيف حالك يا كل حالي).

أكتوبر ٢٠٢٢

ويجي واحد يقول ليك الحقيبة مسروقة من زجل الاندلس !!!!!

Quote: ويجي واحد يقول ليك الحقيبة مسروقة من زجل الاندلس !!!!!

هههههههه

صاحبك قاعد يتنازل شوية شوية .. هسي وصلنا انه البعض من الحقيبة من نمط الزجل ..
و انه البوست ما بحث .. انما بوست اخباري .. ههههههه

________________________________________________________

شكرا عثمان على هذه المتعة ..

الخوف يجي طارق كبلو يجوطه زي الباقيين ..

مرتضى لا يحتاج الى هراء كبلو .. بل كبلو في حاجة له ..

كلما ارجوه .. ان يكتب المرتضى حينما يأتيه جان الكتابه .. و ان لا يكتب لان كبلو ينتظر موضوع جديد ..

مرتضى يا صديقي الذي احب .. انت تعرف صراحتي ..و ناقشنا الامر سويا و انت لك رأي .. و انا على رأيي يا صديقي ..

قرأت لك مقال باسم ( ماريا) .. شعرت انه مكتوب على عجل .. هل كان كبلو ينتظر ؟

أخينا الكريم الناشط في حقل الفنون المهندس قباني
سلامات.
وكيف حالك في دي الدنيا المشغلبة.
ماك راجع لي امدر تزورا. ؟
عان يا قبة بالمناسبة بتذكر بدري .
كان لفت نظري واحد من الإخوان المتابعين للمبدع محمد المرتضى بنشرو في الفيس بوك
مقال ماريا .
بعدها تابعت مقال ماريا الرهيب .
اذكر انو المقال اتنشر في 21يونيو 2021 وقتها
وما انو شغل عمك الشفت
محمد المرتضى كان عامل ضجة في الاسفافير لكن برضو
أخينا الكريم أستاذ كبلو ما كان جايب للمقال خبر .
واظنو بعد حوالي 16 شهر حتين أستاذ كبلو جاب سيرة المقال .
..
اها دحين
هسع انا طالب منك تحكر لينا اغنية مدني بصوت شيخينا بادي
وتحدثنا عنو عليه الرحمة .
وليك فينا عظيم الأجر يا فنان .
مع التحية .

الأخ الفنان احمد
سلامات
ياخ دخولك ومشاركتك في البوستات تشرح القلب .
السودان بلد قديم وصاحب حضارة شاملة عمرها اكتر من سبعة الف سنة .
ف كيف يكون بعض من فنونا مسروق من زجل الأندلس ؟
ياخ كل الفنون مرقت من هنا. يعني ممكن جماعة الأندلس هم البكونوا لطشوا
مننا .
تحياتي .

قباني وشركاه

Quote: صاحبك قاعد يتنازل شوية شوية .. هسي وصلنا انه البعض من الحقيبة من نمط الزجل .. و انه البوست ما بحث .. انما بوست اخباري .. ههههههه

ياهندسة .. شوف عثمان موسى دا جايب كلام محمد المرتضى وهو عبارة عن درر
ولوحة من الحقيبة والاصالة السودانية وطبيعة الإنسان السوداني الفريدة .. وبادي واحد من ينابيع الجمال دا
بعدين نفترض انه انا عاوز اكتب في موضوع صعب زي الحقيبة ... انا بالتأكيد ما حاستخف واستهون بالمشاركين
لان فيهم من هو افهم واعلم مني ...وبكون حافظ تاريخ حتى الدوبيت الامدرماني.. ودوباي البطانة.
اهههههه ... بقى بوست اخباري؟ ..دي زي الجريدتين زمن الاتحاد السوفيتي السابق..البرافدا(الحقيقة)و ازفستيا(الاخبار).. حيث قالوا
لاحقيقة في الازفستيا و لا أخبار في البرافدا

سمعت بادي يقول انه في مسقط تقريبا في بيت احمد القرشي او بيت محمد المرتضى حامد
وديل طبعا من أكابر القوم وبيتهم سودانية اصيلة بيت العز والكرم
قال كان عنده محاولات ومجاهدات جادة انه يغني بالاورغن وحاول . لكن طلع الغنا(ما ياهو)
بالله يا عثمان اسأل لينا محمدالمرتضى عن الموضوع دا.

الأخ الفنان أحمد
سلامات
شهور النقاهة الأربعة القضاها الفخيم بادي مع حبايبو القرشي و ود الحامد .
اكيد بادي عليه الرحمة ما بكون قعد فيها ساكت وهو الزول المسكون بالتفانين والتجارب.
ما عارف لكن اكيد بكون هبش .
وبعدين في ديك البلاد وفي ديك الضيافة الطيبة والمريحة اكيد طلع الكتير من ابداعاتو .
وفي اضابير القرشي و ود حامد حكايات عن ديك الأيام.

يا سلام عليك يا ود موسى انت فتحت لينا طاقة من نور توازي طاقة حنجرة الغريد بادي .. ونور بركاته
دا سلطان الأداء وملك الخط الزمني في تفانين الغنا.
اورورووووووووك.....
الله .. حي
زمان في امتحان اجازة الصوت واذا كان الشخص المتقدم بعرف يغني ولا ما بعرف كانوا عاملين اغنية
" اذكريني يا حمامة " نموذج الامتحان وهي جواز العبور... يا... مع السلامة. شوف ليك شغلة تانية
بتاعة عبدالحميد يوسف وكلمات عتيق... بادى أدى الأغنية دي بأداء سحري .. او يمكن غناها الجن
وهنا ود عباس تجلى
زى خِصرك مقسم .. و خطبى زي ردفك مجسم
و كل من في الكون ناما .يا الهواك صار لي علامة
انتى يا الكاحلك نعاسك

نجي لمقطع قصير .... ...قصير بالجد هو
(واليوميني في هواك يا سيدي غلطان "
هل اتاكم حديث التنويع والتطوير والارتجال والتحليل والزخرفة
مقطع قصير زي دا بادي رسخو في اذهان المستمعين لى يوم الدين
بتبادل مع الكورس ... بسلم الكورس وقبل ما الكورس يخلص هو في جزء صغير من الثانية
يدخل بصوته " التينور " الصادح الصافي .. واليلومني خلي اليلومنيييي ..واليلومني..والله غلطاااااان
عارفين.... بادي ظل وفيا لكرومة وسرور ..والحقيبة ومع انه كان ممكن يكون بامكانياته الصوتية
والتطريبية الخارقة.. كان حيكون له شأن اخر .. ولكنه كان زاهد زي رمضان زايد

يا سلااااام ياخي

شكرا يا عثمان والشكر موصول لمحمد المرتضى حامد وضيوف البوست الأكارم.

ياخ بادي دا عجيب.

معليش الكيزان سرقوا أي حاجة جميلة في السودان. حتى جلسة زي دي سرقها حسين. و "قول لحسين هناك في الشرفة حمدالله الوصلنا سلامة"

وحاشا ما نصبِ

سلاااااااااااام يا مبدعين
ابوعفان وود المرتضي وضيوف البوست
اولاً : لعزيزنا محمد المرتضى
وَإِذا العناية لاحَظَتكَ عُيونُها **** نَم فَالمَخاوِفُ كُلُّهُنَّ أَمانُ
ثانياً : من يحاولون التشكيك فى ارثنا الادبي الضخم "فن الحقيبة " نقول لهم :
خلوا لينا حقيبتنا نحن راضينا بيها
https://soundcloud.com/omermahgoub/qfygeipzarju؟in=aminhamed/sets/towme3osmvvfandutm_source=clipboardandutm_medium=textandutm_campaign=social_sharing

والف سلام ونور على روح كروان الفن الشعبي بادي فى عليائه .

اخونا الكريم استاذ علاء
سلامات
عان عمك دا قال شنو .
...
خلنا البدر أشرق كامل في علاه

وخلنا الزهر فتح من أنفاس شذاه

جذاب حسنه رايع لادن خلقه مايع

رقص البان مشيه تحب تنظر وشيه

عيونك تختشيه من قوة ضياهو

ومن شدة حياهو

مرة إذا نظرته ونظره إليك رناه
...
حولا يا علاء .
هسع علاقة نضم زي دا بالزجل شنو؟
الحقيبة دي زي ما بقولوا اعمامك ( الحقيبة دي جنا مصارينا )
...
الف شكر على طلاتك البهية في بوست سيرة بادي

كتير الشكر اخينا أستاذ علاء على دعم البوست
وأرجو التكرم بوضع مزيد من اغاني شيخنا طه.
مع التحية

الأخ د. ياسر
سلامات
وكيف حالك مع فرانكفورت بالردمية. ؟
مشكور كتير .
عارفك دايما بتجي ضراعك مليان بالمفرحات والمبهجات
يازول يا أصيل.
الف شكر

في اغنية غناها بادي للشاعر"مصطفى بطران " وتعتبر من النوادر وغناها فنان غير معروف
اسمه" عبدالرحيم سليمان " والقصيده موضوع الأغنيةاسمها "ليل السعادة"و هي "رائية" عصماء..
كل ابياتها تنتهي بحرف الراء .. ودا جزء يسير منها:
يا ليل السعادة يا نور البصائر
جوك جو معطر بدرك ليله ناير
يا ليل جات نسايمك حاملات البشاير
اصدر لينا طيبا بالأفراح نشاير
الكون بالتهاني يتبادل الاشاير
ما بين القبائل وأفراد العشاير
الغيث بقدومك يا ليل جانا زاير
زار الساحة غيمك وأتقطع جزاير

الأخ الفنان أحمد
سلام
داير أسألك. لحن اغنية ود مدني دي . بادي عمل ليها اللحن
الخرافي دا كيفن؟
وشوف اندماجو و اندياحو وغرقو فيها .
الزول دا في لحظة من اللحظات في الأغنية بتحسبيهو محلق
في آفاق بعيدة.
ما ينزل مع خلق الله الواطة الا تنتهي كلمات الأغنية.
جد حزين لمرضو وجد حزين لرحيلو المر.

حبيبنا ودموسى الزول السمح وصاحب الذوق السمح

Quote: داير أسألك. لحن اغنية ود مدني دي . بادي عمل ليها اللحن الخرافي دا كيفن؟وشوف اندماجو و اندياحو وغرقو فيها

اغنية الخليل غنوها اربعة.. كل واحد اخطر من التاني
الخليل ...صاحبها
اسماعين عبدالمعين
بادي محمدالطيب
محمد الامين
كل واحد عمل فيها حاجة واضافة لكن بادي كان وفي لصاحب اللحن الاصلي الخليل وغناهامعتمدا على اللحن الاساسي ولكن تجلياته وحلياته ليس لها وصف او حدود
بادي الوحيد الغناها كاملة مكملة بكل بيت فيها .. لكن اسماعين وابواللمين غنوا منها مقاطع محمدالامين عمل ليها زخم موسيقي اوركسترالي رهيب واعتمد على المدخل:
آه علي حشاشتي ودجني ...وحنيني ولوعتي وشجنى
دار أبويا ومتعتي وعجني
اسماعين طبعا ملك الزنجران والشعبيات والاهازيج غناها بايقاع خففيف سريع عكس محمدالامين.. اضاف كلمات وجمل متداولة حتى اللحظة قبل ما يدخل في الاغنية:
يا شباب مدني
احب مدني
حنتوب مدني
ابو حراز مدني
يلا لي مدني
اما بادي حكاية تانية و(رواية بادي) ممكن نكتب فيها اربعين صفحة

يا أخ احمد
بادي لمان يصل المقطع البقول فيه (وحنيني ومتعتي وعجني )
بتخيل الحتة دي لو شغلوها لمريض راقد منتهي في غرفة الانتينسف كير.
حيقوم من سرير المرض وينتف السيور والكمامات وكل التوصيلات المطعونة
في جسمو .
وحيقوم يعرض ويدردق .
ياخ دا فن عجيب .
له الرحمة.

مولانا الذي عزانا بقلمه وقريحته وقبله أحاسيسه الجميلة والنبيلة عن شيخ طه وهو الذي كان لصيقاً به كما أعلم ...
أنا بالنسبة لي لو كتبت أي شي بيكون قمة الإستمتاع وأنا أتجول في السرد الجميل وبالذات قصص أم درمان بحس كانك بتدخلني بالعدني وتطلعني بسوق الموية وتوديني سوق العناقريب مروراً بالزقاقات العاملة زي حرف الـ U .. فما بالك بسيدنا وشيخنا بادي محمد الطيب "نسأل الله له الرحمة والمغفرة والجنة بقدر ما جَمْلّ دنيانا في حياته وبعد مماته"
عزيزي مرتضى بالله عليك لَحِق لينا المقال ده سريع سريع للأستاذ القامة / طارق كبلو ... وخليه ما يبخل علينا عند التسجيل بإيضاح الأحاسيس الجميلة المكتوب بيها الكلام ده ..


كسرة ::
- مرة تانية أو تالتة .. كتر خير الكورونا وياخي بُعد الشر عليك ..

تحياتي ومودتي ،،

دعوة للإستمتاع بشيخ طه في نوادر الأغنيات ::::

كان وهو صغير يمدح زي معظم اهلنا جنوب الخرطوم وحتى جنوب كوستي
مدا ئح حفظها عن والده المادح والمنشد.
لمن جا الخرطوم جا يشتغل ... واشتغل عامل نظافة ويغسل الصحون
في صالات الطعام في جامعة الخرطوم.... المشهورة في الوقت داك بتطلعات وافكار طلبتها وتمو الحداثة
والايدلوجيات وتحويل اذانهم الى وجهات اكثر حداثة من غناء الحقيبة ..بادي في الجو دا كان بغني ليهم
وكانت النشوى تسري في ارواحهم من هذا الصوت الذي تسرب اليهم... سحرهم بالاداء والحفظ ومخارج
النطق السليم والمخافظة على الموروث الغنائي للحقيبة وهي الملك المشاع لاهل السودان.
اشتهر هناك واصبح سانرهم وحاديهم وفنانهم ومرتع استماعهم للاصالة.

عثمان سلام و تحية للفنانين المعاك
ياخ محمد المرتضى ده كتاباته عجيبة ومبدعة لما يحيرك ذاته... حاجة مبالغة...تعبير وتصوير و إشارات ومقارنات

مبهجة وصارخة ومدهشة.. و إلمام بالمبدعين والإبداع في كل أنحاء المعمورة...ماشاء الله ..عيني باردة..

أحمد ياسين لسه ما شبعنا من سيرة الهدندوي...

تحياتي لكم جميعا وللفنان المبدع محمد المرتضى المدهش .

رق كرومة وبادي....حركة اصابعهم بين الاطار والجلد والجلاجل بالمناسبة هم عشرة ازواج
الاتنين ديل كان الرق هو سلاحهم .
بادي طبعا سمعنا عنو قصص كتيرة .. كان اذا سمع اي فنان نطق حرف واحد خطأ في
الاغنية كان بمشي الاذاعة وهو زعلان زعل شديد وهايج وبقول ليهم انتوا بتنشروا الخطأ دا في ربوع السودان كله
وحكي ليهم انه مرة بالليل جا ينوم. بعد ما رقد ..لهواء جاب ليهو صوت فنان بغني في حفلة اغنية عبيدعبدالرحمن
زاد أذاي يا صاحي واعتراني نحول *** طرفي دامع وصاحي وبالسهاد مكحول
المغني غلط في البيت دا بس غلطتين(كوبار) خلاص .
. الاولى قال(احتراني) بدل اعتراني نحول و(النصيبة) التانية قال (مكتول) بدل مكحول...
طبعا شيخ طه قام لبس جلابيتو ولف عمتو وطوالي على بيت الحفلة.. وصل واستقبلوهو وبى كل ذوق وادب
غنى ليهم نفس الاغنية بالشكل الصحيح او كما قيلت عند عبيد
...اغنية ( دمعة الشوق) لى بطران .. طبعا كابلي اعلد توزيعها وغناها بايقاع العشرة بلدي وابدع وختاها تحفة كدة
بادي بالرق بس رسمها رسم .