Post: #4 Title: Re: احمد ربشة Author: أبوذر بابكر Date: 09-29-2022, 05:42 AM Parent: #1
تحياتي يا علاء
صباحك انسام وأنغام
شكرا ياخ علي تجميل المكان ب ربشة الجميل
احمد ربشة سيرة ومسيرة مدهشة لسه الناس ما اوفوه حقه وقيمته الحقيقية
ربشة حاجة مختلفة ومتميزة ومتفردة بشكل غير عادي
لينا عودة كان الله هون
Post: #5 Title: Re: احمد ربشة Author: Yousuf Taha Date: 09-29-2022, 07:57 AM Parent: #4
متابع
ربشة رحمه الله صاحب مدرسة متفردة سر على نهجه الهادي الجبل تقريبا والأجيال التي تليه.
Post: #6 Title: Re: احمد ربشة Author: Ahmed Yassin Date: 09-29-2022, 10:38 AM Parent: #5
بصراحة انا زايغ من البوست دا لانه عايز نفس طويل
Post: #8 Title: Re: احمد ربشة Author: أبوذر بابكر Date: 09-30-2022, 08:10 AM Parent: #6
ازيك يا موسيقار يا جميل
في كلام بين ووسط زملاء واصدقاء ربشة انه من اكتر الأشياء السرعت ب فوتة ومشي ربشة من السودان ومغادرة البلد الكان بعشقه هو انه كان من المفترض تعيين ربشة معيد في المعهد في قسم التأليف
لكن ولأسباب كتيرة، غير اكاديمية طبعا، ما حصل الكلام دا
ما عارف هل الشي دا صحيح ولا مجرد كلام
كدي شوف بالله يا احمد واستقصى عن الموضوع دا
Post: #7 Title: Re: احمد ربشة Author: أبوذر بابكر Date: 09-30-2022, 08:06 AM Parent: #5
تحياتي يا يوسف طه
ربشة كان متفرد في كل شي في حضوره وعزفه واختيار اغنيات الغير واختيار اغنياته الخاصة
متميز في طريقة الأداء ومعالجة المقامات الخماسية السودانية
ربشة كان عازف مجيد لآلات موسيقية مختلفة
اعتقد أنه ربما يكون في تشابه بين طريقة الأداء عند الهادي الجبل وعند ربشة بس ما اظن انه هو تأثر بالمعنى المعروف
تحياتي
Post: #9 Title: Re: احمد ربشة Author: Ahmed Yassin Date: 09-30-2022, 11:55 AM Parent: #7
و بيني و ما بين عيون القمرة عذابات المِهجر و وعثاء الطريق و حنين الرجوع احمد ربشة..مدرسة في اداء التوافق الصوتي للعود عود سوداني بحت بعيدا عن اي مقام شرقي سودنة للسلم الكبير كان يستنطق العود و يطلع جميع الدرجات البينية المعقدة للمقام الخماسي الكبير احمد ربشة صاحب الاغنيات الكبيرة...... من اليمن للصومال لاثيوبيا الى كينيا ولكنه وجد السودان قعد خمس سنوات في المعهد ... كان اشطر طالب .. بهر الجميع نواصل في معاناته
Post: #10 Title: Re: احمد ربشة Author: Ahmed Yassin Date: 09-30-2022, 12:52 PM Parent: #9
في عزف الوتريات .. في حركة الاصابع على الاوتار او الوتر الحركة دي عند احمد ربشة كان لا يجاريه فيها احد.. اطلاقا بسموها "عفق العود"'او العفق ..قلنا كان يستنطق العود احمد ربشة عنده( 5) اغنيات... بس ولكنه ترك كل هذا الارث والزخم الموسيقى..... ان بتاسرني وبتمتعنيى وتحيرني من زمن دراستنا للموسيقى اغنية "النسمة البتحرق شوق" يا.. الهي.... ابوذر مالك علينا ياخ ...... انت شنو ياخ ..مرة عثمان حسين ومرة عوض احمد خليفة ومرات.... ولسع يا ود بابكر في رؤيتك بحلم نجي لاغنيات احمد ربشة الاربعة الباقية: * انت لسى شباب بدري(شاقي روحك ليه ) * بيني ما بينك *يا مواسم للشاعر بشرى سليمات * وأساليني
Post: #11 Title: Re: احمد ربشة Author: Ahmed Yassin Date: 09-30-2022, 01:16 PM Parent: #10
نجي للاجابة على سؤال الشاعر والفنان الجميل ابوذر (ومشي ربشة من السودان ومغادرة البلد الكان بعشقه) هو انه كان من المفترض تعيين ربشة معيد في المعهدفي قسم التأليف ....... دا كلام صحيح ومن المفترض ان احمد ربشة يكمل دراساته حتى الدكتوارة الشىء التاني الحصل والزعل احمد ربشة وهاجر مباشرة الى الامارات لم يرجع فيها ابدا لاحب بلد الى قلبه الطيب والكبير....شىء مخجل وسخيف ومحزن انا حاحكيهو ليك: احمد ربشة جهز اعمال غنائية ضخمة ومشى الاذاعة لتسجيلها.... قوبل ببرود شديد وادوهو اعذار واهية وغير مقنعة ...امشي وتعال بكرة ..واحيانا يلطعوهو بالساعات وهو ظل لفترات طويلة يتردد عليهم ونفس الاسطوانة القديمة... عرف ان دي مماطلة من ناسىالاذاعة بايعاز من منافسيه من اعداء الفن وهو مجال يسع كل المواهب وكل الدنيا ولكنه الحسد والغيرة و صغر النفس . حرموهو من الناس وعم ما عارفين انهم حرموا الناس وحرموا انفسهم من الجمال ومن موهبة فطرية دارسة اكاديميا.....صوتا ... واداء وعزفا.... وتاليف موسيقى . الاتعمل من حرب خفية لاحمد ربشة نتاج سوء النفس البشرية