Post: #1
Title: السودانيون في مصر حدو وين ؟؟ ( منقول من قروبات دنقلا)
Author: علي عبدالوهاب عثمان
Date: 09-18-2022, 08:15 AM
07:15 AM September, 18 2022 سودانيز اون لاين
علي عبدالوهاب عثمان-جدة
مكتبتى
رابط مختصر
أفتكر المشكلة تفاقمت .. رغم ذلك الشباب وبعض العائلات
مصرين انهم يهاجروا لمصر مع بيع ممتلكاتهم .. حتى الجامعات
اصبحت مزدحة الطلبة والطالبات بالالاف
مقال منقول من قروبات دنقلا الاصالة والتاريخ
Quote: *السودانيون في مصر* حدو وين شي مؤسف
منقول
قاهرة المعز ❤️ منو المسؤل!!
. جيت من القاهرة قبل إسبوعين ، مشيت قبل رمضان ، وعندي شقتين في المهندسين ، مؤجر وحده
. المرة دي لفت نظري كمية السودانيين القاعدين من غير هدف ومن غير وجيع.
. الناس الطلعت بفهم معيشه ووضع أحسن. القاهرة حاليا عبرت شديد لا في شي رخيص لا في شي بتباصر.
. الناس ديل اقتصاديآ عبروا وبستاهلو لأنهم شعب بشتغل، كباري ساي نقول ليهم مبروك ❤️
. طيب عن كمية الشباب السودانين البشوفوم قاعدين وشغالين أشغال بسيطة وهامشية وقبل أي شي، أي شغل حلال لا فيه عيب لا فيه نقد وكلها أرزاق نحمد الله عليها 💚
. طيب وقت انت قادر تشتغل لبيس أحذية ودليفري وبواب وعامل نظافة وحارس مش ممكن هم زاتم نشتغلم في البلد !!!
. ماهو الليلة بالمنطق انت ما حتاخد أكتر من 100$ أو أقل في الوظيفة دي، ودي حاليا بقت رقم بسيط شديد
في القاهرة ودي ما بتغطي منصرفات ما فيها أي نوع رفاهية حتي الأكل والشراب والسكن حد الجوع والحرمان 💔
. ولو قاعدين منتظرين وظائف هم في بعض بتمنوا ومنتظرين.
. إحساس إنك قاعد مبهور بكم الانوار وتامي حياتك لف في قهاوي وآخر شي تبيع كليتك.
بيع الكلي باب براه باب بوجع شديد 💔
. قهاوي وسط البلد لبيع الكلي للسودانين بقت مقصد وباب حل جاهز وانت فريسة جاهزة.
. كمية الشباب القاعدين بس يلمو في قروش عشان يركبو السمبك تقطع القلب عشان خط الرجعة ليهم حار.
وبكون نفسك تقول ليه انت بتدفع في تمن موتك !
. كمية الشباب السكارى وضاربين مخدرات في شوارع وسط البلد شي محزن.
. شقق المحرمات للسودانيات شي بقطع القلب وبحزن ويخليك تبكي دم بحرقة.
. كمية البنات الكلهم سماحة وطاقة وبشترو في وهم 💔
. كمية الناس الباعت أملاكها وجات القاهره حاليا ببكو ندم لأنهم اتخلعو بصرف البلد والحوجة بقت
في المنصرفات ما قادرين عليها، وشوارع المهندسين بقت مرتع للشحدة باسم اتقطعت للعلاج.
. الحرمان في عيون أطفال الجالية السودانية شي ما بتوصف ما بتوصف ما بتوصف،
لأنها بلد للأطفال مغرياتها لا تعد، وفِي بلدنا العندو والماعندو بلعبو في نفس المكان.
. الإجرام في المدارس السودانية والفشل في الجانب الأكاديمي بصمة محزنة.
. السودانين واصلين مرحلة في مصر ما بسلمو على بعض لأنه بخافو من بعض يطلع حرامي أو مجرم.
. من يومين شاب أدى راجل كبير حبوب يوصلها ليه السودان، طلعت مخدرات والأمن جرجر الحاج والله أعلم طلع منها وله لأ 😭
تصرف أناني حقتل المروءة بين الناس...
السودانين في القاهرة قاعدين ساكين سراب.
أولاد وبنات بحرقو في زهرة عمرهم تحت تمني السفر لدول الغرب .
ولافين من دسكو لي بار لي قعدات سهر وشراب 😭
المصائب البعملو فيها ما بتوصف وما طبيعية.
ياريت الأهل يجو يفتشو حال عيالهم قبل الحال ينكشف💔💔💔
وفِي النهاية ما بتقدر تقول لي زول حب السودان بالغصب لأنه صكوك الوطنية ما بتتباع.
بس ياريت نرجع نفتش عن عزة نفسنا لأنو دي أجمل خصلة كانت فينا 🤍
منقول
|
|
Post: #2
Title: Re: السودانيون في مصر حدو وين ؟؟ ( منقول من قرو
Author: علي عبدالوهاب عثمان
Date: 09-18-2022, 08:17 AM
Parent: #1
حبيبنا مصطفى نور تحياتي يا جميل
الموضوع اصبح الهم والهاجس للشباب
قبل فترة نقلت من مقالاتك الى القروب
تحياتي
|
Post: #3
Title: Re: السودانيون في مصر حدو وين ؟؟ ( منقول من قرو
Author: الزبير بشير
Date: 09-19-2022, 07:04 PM
Parent: #1
اخي علي
احيانا الكتابه عن مصر لا تعكس الواقع و حقيقه ليس كل ما يكتب صحيح
السكن في القاهرة زي السكن في الخرطوم / احياء في غاية الرقي و الناس كويسه و في احياء زي الزفت
يعني الخرطوم كلها كويسه
اضف لذلك الاحياء الوسط في القاهرة افضل مليون مره من ارقي احياء الخرطوم
اضف لذلك الطابع المدني و الحضاري لسكان القاهرة
القاهرة عبرت
نسال الله الله ان يكتب لنا عبور حمدوك مع 84 حركة مسلحه
في القاهرة تشعر بوجود الدوله مش الاستهبال و الاستسهال لحياة المواطن
الزبير
|
|