السودانيون في مصر حدو وين شي مؤسف منقول

10:00 PM September, 17 2022

سودانيز اون لاين
عماد الدرديرى-
مكتبتى
رابط مختصر

قاهرة المعز ❤️ منو المسؤل!!

. جيت من القاهرة قبل إسبوعين ، مشيت قبل رمضان ، وعندي شقتين في المهندسين ، مؤجر وحده
. المرة دي لفت نظري كمية السودانيين القاعدين من غير هدف ومن غير وجيع.
. الناس الطلعت بفهم معيشه ووضع أحسن. القاهرة حاليا عبرت شديد لا في شي رخيص لا في شي بتباصر.
. الناس ديل اقتصاديآ عبروا وبستاهلو لأنهم شعب بشتغل، كباري ساي نقول ليهم مبروك ❤️

. طيب عن كمية الشباب السودانين البشوفوم قاعدين وشغالين أشغال بسيطة وهامشية وقبل أي شي، أي شغل حلال لا فيه عيب لا فيه نقد وكلها أرزاق نحمد الله عليها 💚
. طيب وقت انت قادر تشتغل لبيس أحذية ودليفري وبواب وعامل نظافة وحارس مش ممكن هم زاتم نشتغلم في البلد !!!
. ماهو الليلة بالمنطق انت ما حتاخد أكتر من 100$ أو أقل في الوظيفة دي، ودي حاليا بقت رقم بسيط شديد في القاهرة ودي ما بتغطي منصرفات ما فيها أي نوع رفاهية حتي الأكل والشراب والسكن حد الجوع والحرمان 💔
. ولو قاعدين منتظرين وظائف هم في بعض بتمنوا ومنتظرين.
. إحساس إنك قاعد مبهور بكم الانوار وتامي حياتك لف في قهاوي وآخر شي تبيع كليتك.
بيع الكلي باب براه باب بوجع شديد 💔
. قهاوي وسط البلد لبيع الكلي للسودانين بقت مقصد وباب حل جاهز وانت فريسة جاهزة.
. كمية الشباب القاعدين بس يلمو في قروش عشان يركبو السمبك تقطع القلب عشان خط الرجعة ليهم حار. وبكون نفسك تقول ليه انت بتدفع في تمن موتك !
. كمية الشباب السكارى وضاربين مخدرات في شوارع وسط البلد شي محزن.
. شقق المحرمات للسودانيات شي بقطع القلب وبحزن ويخليك تبكي دم بحرقة.
. كمية البنات الكلهم سماحة وطاقة وبشترو في وهم 💔
. كمية الناس الباعت أملاكها وجات القاهره حاليا ببكو ندم لأنهم اتخلعو بصرف البلد والحوجة بقت في المنصرفات ما قادرين عليها، وشوارع المهندسين بقت مرتع للشحدة باسم اتقطعت للعلاج.
. الحرمان في عيون أطفال الجالية السودانية شي ما بتوصف ما بتوصف ما بتوصف، لأنها بلد للأطفال مغرياتها لا تعد، وفِي بلدنا العندو والماعندو بلعبو في نفس المكان.
. الإجرام في المدارس السودانية والفشل في الجانب الأكاديمي بصمة محزنة.
. السودانين واصلين مرحلة في مصر ما بسلمو على بعض لأنه بخافو من بعض يطلع حرامي أو مجرم.
. من يومين شاب أدى راجل كبير حبوب يوصلها ليه السودان، طلعت مخدرات والأمن جرجر الحاج والله أعلم طلع منها وله لأ 😭
تصرف أناني حقتل المروءة بين الناس...
السودانين في القاهرة قاعدين ساكين سراب.
أولاد وبنات بحرقو في زهرة عمرهم تحت تمني السفر لدول الغرب .
ولافين من دسكو لي بار لي قعدات سهر وشراب 😭
المصائب البعملو فيها ما بتوصف وما طبيعية.
ياريت الأهل يجو يفتشو حال عيالهم قبل الحال ينكشف💔💔💔
وفِي النهاية ما بتقدر تقول لي زول حب السودان بالغصب لأنه صكوك الوطنية ما بتتباع.
بس ياريت نرجع نفتش عن عزة نفسنا لأنو دي أجمل خصلة كانت فينا 🤍

منقول

السلام عليكم
السودانى لايعرف قيمة ومعنى الانتاج وينظر لللخروج من البلد للكسب السهل باقلمجهود والمتعالمباحه (كما فى تصور كثيرين)
االخروج من السودان رقص على السلم
امن الحاجات اللاحظتها فى السودان انو شريجه كبيرة من البشر تعتمد على المغترب والمهاجر من الاسرة والدليل شوفو بنك الخرطوم والوسترن يونيون -طبعا فى غيرها كتير من القنوات الاخرى غير الرسميه لنقل الاموال- خلق كتيرة معتمده على تحويلات اهلهم من برا وشباب عاطل عايش على كدا وبالكتير على ريع ايجارات او سيارة لخده البيت والصياعه مع الاخرين واذا كان فى فايده فى الشاب يمارس بعض النشاط الطفيلى (السمسرة)مهنه 90%من شعب السودان الان
متار ليه المهاجر او المعترب ما يجى ياسس لشباب اسرتو مشروع انتاجى حقيقى تعيش منو الاسرة بجهد شباب الاسرة بدل التسكع على ابواب بنك الخرطوم ووسترن يونيون وغيرها اول كل شهر فى انتظار الشيك الخدرى
السودانى داير يطلع ويعمل قروش زى البيرسلهافلان او علان وهم ماعارفين الزول برا بيطفح الكوتة كيف عشان يكسب بالحلال
ماورد فى المقال زيو واكتر خاصه فى مصر
مارس كراهيه لها بفعل سلوك القطيع لكن نغفل ونتغافل عن كونهم شعب يعمل ويحب وطنو ويقدس قيمه العمل
المصرى واليمنى يخرج للسعوديه والخليج يمشى يشتغل قدر مايؤسس منزلز وراس مال مشروع خاص وبعدها يعود مباشره لوطنو
لكن السودانى يرجع السودان بعد يكون خردة عدييل

للاسف القصة دي مدورة من منتصف الثمانينات ومافي زول جايب ليها خبر لأنه الوضع في بلدما كان نوعا ما كويس
اقول ذلك كطالب كنت شاهد على مآسي لا تقل عن ما يحدث اليوم
طبعا سفارتنا للأسف الشديد لا تبادر في تصحيح الوضع ابدا بل متكيفة جدا من الحاصل