السبب هو ان الحلـو ومن خلفه الحركة الشعبية عندهم مبدأ لم يحيدوا عنه عبر العقود.. من عقـدوا ما نقضــوا. فى حين أحزاب الشمال ضايع ليها الدرب وفقدوا البوصلة.. لذلك لما يشوفوا زول راكز، لا يتزحزح عن مبدئه وليس خفيفا تذروه رياح المتغيرات الفارغة فى نشاط الأحزاب والعسكر والقحت والحرية والغيير والتغيير الجذرى وما عارف شنو تانى ناس الحيرة أطبقت عليها لأنها اساسا غير مؤهلة للقيادة.. حينها يميلون للحلــو لإتمام النقص والظهور مع الرجل الذى نجح فى الثبات على مبدأ واحد عبر العقود، لأن الصورة واضحة أمامه ولا يتناول السياسة رزق اليوم باليوم مثل هذه الأحزاب وإنما وفق تخطيط لهدف إستراتيجى مرسوم رسمــاً ومخطط تخطيطاً.. وما يقوم به هو تنفيذ لخطط مرسومة وليس رزق اليوم باليوم أو التصرف نتيجة إنفعالات وردود فعل أو بدوافع المنفعة الشخصية أو الحزبيـة
Post: #2 Title: Re: ما ســر هــرولـة الأحزاب الشمالية نحو عبد Author: Biraima M Adam Date: 09-08-2022, 04:46 AM Parent: #1
الباشمهندس أبو الريش سلام
الحلو نفسه ينفذ مخطط .. هو مأمور .. ينفذ مخطط مثل المخطط الذي رسم في الجنوب .. وسايق النوبة معه بالغابة .. مش الخلا وبس ..
بريمة
Post: #3 Title: Re: ما ســر هــرولـة الأحزاب الشمالية نحو عبد Author: Abureesh Date: 09-08-2022, 05:55 AM Parent: #2
Quote: الحلو نفسه ينفذ مخطط .. هو مأمور .. ينفذ مخطط مثل المخطط الذي رسم في الجنوب .. وسايق النوبة معه بالغابة .. مش الخلا وبس ..
ول أبا مهندس بريمـة.. سلام دا الكلام اللى أنا قلته برضو.. الحلو ينفذ مخطط.. وأنت ضربت مثل بالجنوب.. ومخطط الجنوب كان واضح ومكشوف.. الشهيد قرنق ما دسـاه.. قال ليهم انا مع وحدة السودان بدون فئة معينة تفرض هوية عربية وإسلاموية على كل القطر.. العرب اقلية فى السودان فكيف تكون هويتنا عربيـة؟ ورغم ان قرنق كان سيكون له الحق لو دعا لهوية افريقية إلا انه لم يفعل، رغم ان أغلبية السودانيية افارقة وليسوا عربا..ولكنه قال دعونا نكون سودانيين فحسب.. رفضوا إقتراحه.. يعمل شنو؟ هو قال بصراحة تانى الربيت فى الأكتاف ما ينفع.. إما ان يكون سودان جديد فيه الكل متساوون فى الحقوق والواجبات والدولة محايدة لا تفرق بين الأديان أو كل قرد يطلع شدرتو.. هذه كانت خطته وكانت واضحة لا لبس فيها ولا غموض. وقد نفذ الجزء الثانى منها حين رفضت الجلابة الجزء الأول.. مافى تانى دغمسـة. نفس الخط ماشى فيه الحلو وعبدالواحد.. وربما منى وحميدتى (الأخيران لا اعرف عن خططهما ما يكفى).. فهل الجلابة يتعظون أم لا يستفيدوا من تجربة الجنوب.. ومعلوم كل تجربة لا تورث حكمة تكرر نفسها.. زمان يا هندسة الكيزان كانوا يكررون نفس العبارة.. قرنق مأمور وينفذ أجندة أجنبية.. ما فى إتجاه لتحريك الخلايا الدماغية عشان يفكروا ويحللوا.. شماعة العرب.. أى معضلة يفشلون فى حلها يعلقوها فى شماعـة الغرب.. هذه سهلة ولا تحتاج أى تفكير. الحلو ينفذ مخطط.. وهذه محمدة لأنه ما قاعد يمشى سبهلل بدون خطة وبدون نظام محكم يحدد سيره وتكتيكاته.. هل عاجبك البروس القايم فى أرض السياسة بدون أى أهداف ولا خطط؟ شوف قحت.. من ديسمبر أولادنا يموتوا.. زهرة الشباب يموتوا وهم مرة يضربوا يمين ومرة يضربوا شمال زى السواق السكران. طبعا هم غشماء ومتواضعى التفكير.. اعتقدوا انهم ما دام الشباب سلموها ليهم مقنطرة فى خط ستة.. اعتقدوا خلاص هم ملكوا السودان وصاروا حكام ووزراء، وتجعصوا فى الكراسى الوثيرة.. حين كان العسكر فى حالة حرب خفية معهم حتى أخرجوهم وأنزلوهم من كراسيهم.. أغبياء وما عندهم ذرة من الحس الأمنى.. نفس تفكير الطائفيين.
Post: #4 Title: Re: ما ســر هــرولـة الأحزاب الشمالية نحو عبد Author: Omer Abdalla Omer Date: 09-08-2022, 03:39 PM Parent: #3
Quote: لحلو ينفذ مخطط.. وهذه محمدة لأنه ما قاعد يمشى سبهلل بدون خطة وبدون نظام محكم يحدد سيره وتكتيكاته.. هل عاجبك البروس القايم فى أرض السياسة بدون أى أهداف ولا خطط؟
الله ينصفك يا ابا الريش! زول شاف الأستاذ بعينه دي بصيرته ما بتنقفل!
Post: #5 Title: Re: ما ســر هــرولـة الأحزاب الشمالية نحو عبد Author: طلحة عبدالله Date: 09-08-2022, 04:40 PM Parent: #4
Quote: ما ســر هــرولـة الأحزاب الشمالية نحو عبد العزيز الحلو والحركة الشعبيــة؟ (صورة)
لأن الأحزاب الشرقية لا تريد أن تهرول ولا حتى تزحف على بطنها ( لا توجد صورة) .............. وأنا أقول اللخو عبدالله دا بحب التنميط كدا لشنو اتاريهو حاجة جميلة ياخ خخخخخخخ
Post: #6 Title: Re: ما ســر هــرولـة الأحزاب الشمالية نحو عبد Author: Abureesh Date: 09-08-2022, 06:24 PM Parent: #5
Quote: لأن الأحزاب الشرقية لا تريد أن تهرول ولا حتى تزحف على بطنها ( لا توجد صورة)
شكرا با طلحة انك فصلت احزاب الشرق عن الشمال.. وابشرك كل الشرق سيستقل عن السودان رغم انف الحاج وراق
Post: #7 Title: Re: ما ســر هــرولـة الأحزاب الشمالية نحو عبد Author: الشيخ سيد أحمد Date: 09-08-2022, 08:52 PM Parent: #6
ابوالريش الشيوعي والإتحادي والأمه - يعني كلهم من الشمال. باقي البلد قاعده في الصقيعة يعني؟؟ يعني مافي مفكرين سياسيين غير في الشمال؟؟ طيب ياخي اعمل ليك اي حركة ولو في شكل "وردة".
معقول يا ابوالريش انت بتفكر بالصورة دي.
العنصرية دي إلا يضووا ليها النور يعني؟؟
Post: #8 Title: Re: ما ســر هــرولـة الأحزاب الشمالية نحو عبد Author: الشيخ سيد أحمد Date: 09-08-2022, 08:55 PM Parent: #7
قبل ما ترد اتذكر انو "محمود محمد طه" من عندنا في الشمال.
ياخي لو ما الليلة ليلة الخميس كنت قلت زووووووط.
Post: #9 Title: Re: ما ســر هــرولـة الأحزاب الشمالية نحو عبد Author: Abureesh Date: 09-08-2022, 09:06 PM Parent: #8
Quote: اتذكر انو "محمود محمد طه" من عندنا في الشمال.
يا الشيخ معقول ما تعرف ان الحزب الجمهورى لا يحسب مع الأحزاب السياسية سواء فى الشمال او فى غيرها.. ما تعرف انه من 1945 لم ييشارك فى الإنتخابات لا كحزب ولا كأفراد.. بل سياسة الحزب واستراتيجيته عدم المشاركة فى أى إنتخابات وعدم قبول أى وزارات فى أى حكومة سواء عسكرية أم مدنية؟ ما تعرف؟!! محمود من (إنديكم) عارف.. هو من الركابية مناطق شمال (كريمى).. لكنه صار مواطنا (ســودانيا) وعنده كل أهل السودان لا فرق بينهم قبليا أو جهويا.. لكنكم رفضتم طرحه القومى وصرتم قبليين عنصريين (أنت غير مقصود شخصيـاً)..
Post: #10 Title: Re: ما ســر هــرولـة الأحزاب الشمالية نحو عبد Author: الشيخ سيد أحمد Date: 09-08-2022, 09:21 PM Parent: #9
لا يا ابوالريش الاحزاب محتاجة قيادات - قيادة الحزب الجمهوري وصاحب الفكرة والكمونيه كلها من الشمال.
يبقى لمن تصف بصيغة مبطنة إتهام انسان الشمال ممثلآ في أحزابه (كما وصفتها) بالسعي نحو مصالحه فقط فأنت تعني أننا "براغماتية".
حقيقة أستغرب طرحك - وأنت تطرحه للمرة الثانية وهي إشارة واضحة بأنك ترسل رسالة مفادها ان ناس الشمال ناس "مصالح" ويبيعوا اي شيء في سبيل مصالحهم.
طيب خلينا نعمل "فرش متاع" هنا .
خلينا نبدأ بمساهمات( أحزاب الشرق) بإعتبارك من الشرق في الحركة الوطنية مند المهدية- خلينا نبدأ من المهدية بس. عشان نشوف من الراس ومنو "الترلة" في الشأن العام. أول شيء أدينا إسم حزب في الشرق - ومتى تم تأسيسه؟؟ ومن هو القائد؟؟ وماهو برنامجه السياسي؟؟
ارمي بياضك يا ابوالريش.
Post: #11 Title: Re: ما ســر هــرولـة الأحزاب الشمالية نحو عبد Author: Abureesh Date: 09-08-2022, 09:32 PM Parent: #10
Quote: يبقى لمن تصف بصيغة مبطنة إتهام انسان الشمال ممثلآ في أحزابه (كما وصفتها) بالسعي نحو مصالحه فقط فأنت تعني أننا "براغماتية".
يا الشيخ بالله لما تعلق على ما تقرأ خليك rationale (معقول).. وكلام المصالح كان عن السيد الصادق.. واتشهدت بالراحل الشريف حسين الهندى .. فهل شمل الشريف حسين الهندى نفسه وحزبه مع الصادق فى موضوع المصالح؟..
Post: #12 Title: Re: ما ســر هــرولـة الأحزاب الشمالية نحو عبد Author: Abureesh Date: 09-08-2022, 09:37 PM Parent: #11
