فاطنه

05:07 PM August, 05 2022

سودانيز اون لاين
أبوذر بابكر-
مكتبتى
رابط مختصر

يا فاطنه
صباحنا الفيكي قيّل
تحت الضليل الرامي منك
شايل شمسو فى ايدو
ومباريكي

وفرحنا من دونك حزين ميّل
صمت فات حد السكوت
متوسد غناهو ويحكي عنك
وسط البلد واقف
يناديكي

يا فاطنه
سألتك بى دم الروح
الطامح مدفق نيل
امرقي على الخلوق الشاته
تنده فى سماك الفوق
مغطيكي
وانا معاهم ندهتك
بى لسان شغفى الأساهو طويل
فكي جداول إسمك المسحور
واسقينا
شوفي بلية الولد المرق مجبور
ونادينا
اربطي جبيرة الخاطر الدوام مكسور
وداوينا
نرسم ليك شمس
محروسة بالأفلاك
نجرتق ليك قمر
فى حضنو رك ملاك
نحلب ليك غنا الليل المحين ريد
ونغني
"تشربي بي كفوفنا
لما تتكفي"
وتنهلى من قلوبنا
لما تدفي

يا فاطنه

هاكي الفينا عربد من غنانا
بعد عشرق علينا الصوت
وهاكي الدنيا طربانه
مستفه بالشدر والناس
مسقيه من روح الفرح احساس

تسبح ديمه بى نونك
لا بتفوت ولا بنفوت
تتحاوي بي اسمك
وبي عيونك
لا بتموت ولا بنموت
هاكي رحيح ارواحنا كايسك يوت
وشيلي الباقي من فضلة منانا

يا فاطنه
راوي الحله غناكي

ب الفا
فرح يغشاكي يملاكي
ب الآ
أرض مكسيه بى خدرة بهاكي

ب الطا
طعم اشهى من الشهد
السكن جواكي

ب النون
نعيم يغمر رباكي

ب الها
هيام ماسك في تلابيب البريدك
ومن زمن سادر وراكي

حي الله أبا ذر الغفاري،
دي بالطمبور ما تخلس وهاك دي قيدمة
من تالانا أهل العوض في حشرو عباس
على لسان ولدنا غنية الامين عبد الغفار
( امنــــــــــــــــة)
مع كامل حفاوتنا لتبرع لشرح المفردات الشوارد:
إذا خمش الخريف دار اللُّقُد وإتلمنا السارحات
وعلى طرفالفريق رتعن بُشاريات (ألبل)
إذا عود الملود الدوغري شقَّ حرات (حرث)
وقام ضل الدرت أمن عشى البايتات
وإذا قضى الضيق تلحقو لقمة في البلدات (الغيط)
أمنة بشارة الجايات مع الرايحات
أمنة خلاصة الصلوات
أم الكل وست الكل إذا طرينا الشطارة ثبات
وإذا عصرنا الجوع عاد أمنة وييين تنفات
هميمة كريمة بديهة ما بتتدنى للشينات
حليل أمنة وحليل أمنة البتغزل لنا النسمات .

خليل العازة آه بتخيل قصاد أم در وزازيناً حلات العوم ...
بشوف الدنيا وردية وهناك إيدين عليها الصيد ورد قيل وخدر مقرن الخرطوم ...
أه .. أه غناياً بشق الليل على المردوم قبل توتي وضريح الشيخ جنا أم مريوم ..
ودرويشاً غرق ترجم مع النوبات وذكر الله وحي قيوم ..
يا السراي رجال الليل ويابا التوم ويا دفع الله صايم ديما ريس القوم ...
حليل أهلي البشابيلم تقول مفطوم حليلم هم قدر ما أطش أشوفم في سمايا نجوم ...
ببكي الخال ..دمع هطال صبيب مو رش نجيض مو هش بطانة الخير بشوش وخدوم ...
كريماً جود .. وجود أروش خريف الدالي والمزموم ...
سريع النهمة مو منكش إكفي الناس عموم وعموم ...
إيقن جوف ضعيفاً باكي وإكفكف دمعة المظلوم ..
..... فارقنا أعز الناس أه يا مسافر نار الشوق شديدة خلاص ..
قلت ليها ما تمشي .. في الغربة ما شي

الأصيل

زي ما يشدو حسن عطية

يا ماري عند الأصيل
وحدك بشاطي النيل
صدقني شكلك جميل

وانت يا ابا الدفاع
حضورك جميل ومعناك نبيل

شكرا ياخ علي تجميلنا بيك

قصب السكر اللحمر