Post: #1
Title: #لا للعنصرية نحن كلنا في شوارع برلين ولا باريس ولا واشنطون Negro
Author: مصطفى نور
Date: 07-21-2022, 02:37 PM
01:37 PM July, 21 2022 سودانيز اون لاين
مصطفى نور-امريكا نيوجرسي
مكتبتى
رابط مختصر
ماقادر أبلع موضوع انو سوداني يعتدي علي سوداني أخر
تعنصراً لجنسه ولا إننا نقتل بعض عشان في واحد شايف نفسو احسن من التاني
يخوانا نحن كلنا في شوارع برلين ولا باريس ولا واشنطون
(Negro)
وفي دول الخليج القريبة دي خيلان وتكارين
زغاوة علي هدندوة علي فور علي شوايقة علي فلاته علي دناقلاة علي جعلين
مافي زول بفرق بيناتنا زاتو العالم دا كلو ماشغال بموضوع العنصرية دا الا نحن وكمان عامل لينا عقده..
بنفتخر علي شنو ونحن بننتج %80 من الصمغ العربي العالمي وبنجي نستورد صباع الامير والسورتيب والغراء اللاصق
بنفتخر علي شنو ونحن ثالث دولة في انتاج السمسم بعد الهند والصين وبنستورد الطحينة من الخليج ومصر وتركيا
بنفتخر علي شنو ونحن ماعندنا مستشفي واحد محترم
وعندنا اغرب حالة وفاة في العالم (توفي لعدم وجود سرير عناية مكثفة فاضي )
بنملك 153 مليون راس من الثروة الحيوانية وبنملك فقط 4 مسالخ معتمدة ونكاد نكون من اغبي الدول في تصدير المواشي الحية
بنملك مساحات زراعية شاسعة تكاد تكون كل الاراضي السودانية صالحة للزراعة وللاسف غير مستخدمة
بتلقي سوداني يملك 20 فدان مروي ويموت بي قرحة عشان ماعندو حق العلاج
عندنا ترليون حزب سياسي ولغايت هسه ماعندنا دستور
عندنا ترليون جهة أمنية وفي شوارع الخرطوم وفي عز النهار ممكن زول يضربك بساطور عشان يشيل تلفونك الربيكا
ماعارف نحن بنفتخر بشنو وشايفين روحنا علي بعض علي شنو
اخلاقنا زاتها الكنا بنفتخر بيها انتهت وبناتنا ماليات التكتوك رقيص وهديييك بت سودانية علي الهواء بتقول نفسها تبول في الشارع وعندنا سوداني عضو في منظمة المثلية العالمية ويتفاخر بسودانتو وبيرقص بي علم الالوان معاهو العلم السوداني في نص امستردام وهديلك ليهم لافين فاسخين وجالخلين ومتمنتشين
ياخ لاعندنا مسارح لا سينما لا اماكن ترفهية عائلية
دولة
لا عندنا كُتاب لاروايات لا اعمال درامية لا مسلسلات
لا نجوم لا قنوات اعلامية
عايشين لغايت هسه علي سيرة الطيب صالح وعبد الله الطيب واغنية البامبو السوداني
بنعتقد انو نجوم السوشل ميديا ديل رهبين ياخ نحن لغايت هسه قايلين اننا شعب طيب وشعب كريم
في الكورة دي لا جبنا كاس لا وصلنا لنهائي لا عندنا لاعب محترف في الابطال اخر كاس جبناهو قبل 50 سنة
انا مالاقي سبب واحد يخلينا نتعنصر علي بعض
كلنا كدا مفروض نخجل من روحنا
نخجل اننا طيش الامم شعب حاسد حاقد فاقد الموهبة والمسؤلية ..
مفروض نرجع نلوم نفسنا ونعاين للمراية ونشوف روحنا وين وباقي الشعوب وين وننهض زي ما الرجال نهضوا
الكلام مُر لكن الواقع اكثر مرارة
منقول بمزاااج
#لاللعنصرية
|
|