حسن الترابي

03:35 AM July, 04 2022

سودانيز اون لاين
أبوبكر عباس-الإمارات
مكتبتى
رابط مختصر

شيخ حسن الترابي:
جدو النبي حمد النحلان وجدو التاني الشيخ ننّة، أصلهم بديرية دهمشية هاجروا من الدبّة في الشمال وأسسوا قرية ود الترابي شمال الجزيرة.
والده القاضي الشرعي عبد الله الترابي،
ولد شيخ حسن بكسلا ويقال حسب روايتي المتخيلة انو يوم مولدو بقّ نور من قبّة سيدي الحسن أبجلابية أضاء لوالدته مقرن النيلين، من اليوم الأول أطلقت عليه والدته اسم شيخ حسن
وحصد كل بركات سيدي الحسن.

واحد صديق كردفاني قال لي انتو الجلابة ديل كلكم ناس مستهبلين،
يا أخي، سنة تسعين ونحن داخلين الجامعة الكيزان لمونا كلنا وجابونا كبراملة من كل الخرطوم لشيخ حسن بقاعة الصداقة عشان يخاطبنا.
قال لي أول حاجة قالها لينا إنو أبوهو بدأ تعليمه وهو طفل صغير ولمان وصل سن تسعة سنين العلم الكان عندو أكتر من معرفتكم وأنتم داخلين الجامعة،

قلت ليهو؛
شيء لله يا حسن
يا حسن
يا حسن
لمع نجمه عام ٦٤ بعد الثورة وأصبح حديث كل مثقفي السودان،
الفتى المدلل الوجيه العائد من السوربون، يتحدث الفرنسية والانجليزية وبحب الموسيقى الغربية ومفتون بالمعري والمتنبي.
تزوج من آل المهدي طمعاً في المجد، لكنه وجد أن مقدراته العقلية والسياسية لا تحتاج لواسطة آل المهدي،
شق طريقه كالصاروخ وجذب عدد كبير من المتعلمين لتنظيمه الحداثي وأفتتن الناس بحديثه الجذاب،
الأخوان المسلمين جناح الحبر، كانوا بقولوا لعضويتهم لا تناقشوا الترابي عندو سحر البيان بسحركم!
أصبح نبي عصره وخلق تنظيم حديث منظم تنظيم دقيق ومعظم عضويته من المتعلمين وسحر الناس بأفكاره،
أحبه حيرانه حب يفوق التصور ويطيعونه طاعة عمياء بحب شديد ومستعدين يفدونه بأنفسهم وأموالهم.

حقق لجده النحلان حلمه وأصبح نبي له أتباع كثر من الصفوة،

يقولون أنه مأسوني
يقولون عليه يهودي
يقولون عليه من المخابرات الغربية
ويقولون ويقولون، لكنه ذكي جداً
ذكاء غير معتاد في السودانيين

لا يخاف ويقول كل ما يخطر على باله،
يفكر بصوت عالي ويجعل من حوله فئران تجارب،
يأخذهم في حرب مقدسة ويعود ويقول لهم
إنها ليست كذلك،
يفتي بقتل المرتد ثم يعود لينكر أبجديات الدين،

هو سني وشيعي وصوفي وعلماني وشيوعي يقود جيش من السلفيين،
هو حسن الترابي
الذي غير كل شيء بالسودان

علاقتي به زي لمان تكون بتشجع ريال مدريد ومفتون بميسي.

قبل أن يذهب لقبره سخر من الدين والمتدينين

لا بأس ان تكشف لنا عورة الترابي الفكرية..
و قيادة عمليات القتل المبرمج واستباحة دم السودانيين
عموما شهادة معلمه الاول وقائده صادق عبدالله عبدالماجد فيه .. تكفى

هو عند ربه الان وربه اعلم به

Quote: هو عند ربه الان وربه اعلم به

برضو يا ابوالريش الرسول صلى الله عليه وسلم يقول فى الصحيح :
" أنتم شهداء الله فى الارض " شرحاً لقوله تعالى :{وَكَذَلِكَ جَعَلْنَاكُمْ أُمَّةً وَسَطاً لِتَكُونُوا شُهَدَاءَ عَلَى النَّاسِ وَيَكُونَ الرَّسُولُ عَلَيْكُمْ شَهِيداً 143 البقرة }
وطبعاً شهادة الناس بالظاهر والباطن على الله .
وحسن الترابي فى ظاهره كان شيطان يمشي على رجلين وكل الدماء السودانية التى سالت ولازالت تسيل هو مسئول منه امام الله .
والله لن يفلت من العذاب والعقاب على الدماء .

و زى ما قال الكابلى عليه الرحمة
وتشاهد مواسم يتوه فيها الخيال
تعجز اى راسم للناس قلبو مال
وما تغرك مناظر انطقت المزامر
وما يهزك منمق من محتال متاجر
يتوه للحقيقة يرقص للمنابر
ويسحر بى بيانو كل من كان مغاير
تلقا الناس وراهو مسحورين تنادوا
واهم إثر واهم والشاهد قمر
…….
متابعين

Quote: سنة تسعين ونحن داخلين الجامعة

ماشاءالله تبارك الله
.. وكما قيل :
يا اخا العرب انت اصغرنا و اشعرنا
... و انت نلت لقب المستنير بالمنير
لك التقدير و الاحترام و ربنا يزيدك علما و خلقا و عمرا فى الطاعات
..
اما حسن الترابى
فذاك حديث لا ينتهى و لن
و الرجل لاشك له تاثيره البالغ
فى الحياة السودانية عموما
فى الدين و التنظيمات السياسية على وجه الخصوص
... نسال الله له الرحمة
عسى ربنا ان يجعلنا من المتسامحين و يغفر لنا ذنوبنا
..
مودتى و تقديرى


... متابعين

من طرائف الترابي .. قال بينه وبين الأمام الصادق "وصال" ثم ضحك ..

فلم يعرف كل الحضور إن كان يقصد وصال المهدي .. أخت الأمام .. ام وصال بمعنى متواصلين !

بريمة

امتدادا لطرائف ( بريمة)
انا لو لقيت ابليس الكبير بخطب ممكن اسمعه .. لكن لا اطيق كلمة من الترابي او النظر اليه
بالصدفة واحد وراني الترابي وهو يخطب في جمع من الناس..
جمع غفير من الناس قال في مفرط قوله(وهو يؤشر بيديه الغير كريمتين) :
(يا جماعة الدين دا ما حقنا نحن بس، ما دينا برانا..نعم الدين دا(سكت شوية) وواصل... "دينكم كلكم"
وابتسم ابتسامته الثعلبية الصفراء..

هوي يا أبو الريش ولّ منو اسمك،
الحركات القاعد تعملها في بوستات ناس حافظ حسين دي خليها،
أنا بوستاتي ما بوستات نقل وطباعة وسيدها ماشي،
دي بوستات متعوب فوقها وهي نتاج فكري أدبي،
خلي تجي تجدع لي هو عند رب قدير وشنو كدا؟!!
داير تشارك معاي،
أجتهد شويّة
بدل الكلمات المحفوظة وبايخة دي

يقال برضو يا يسو بريمة،
قالوا ليهو؛ أولادك ما طلعوا زييك،
قال ليهم: طلعوا لخيلانهم

يا بدر الدين،
الدخل الجامعة سنة تسعين دا صديق من أولاد الفولة كردفان ،
ركز معانا

Quote: ركز معانا

م دة زاتو التركيز الزيادة ..
بمناسبة ركز معانا ... عندنا نكتة او دعاء لواحد من اندينا لو كتبتها هنا ..الجماعة حيكفرونا ..و نحن م ناقصين
و جيراننا المصريين يسالوك انت من وين .. تقول ليهم من مدنى يردوا عليك اجدع ناس
.. و العمر كلو يا استاذنا
مودتى و تقديرى

محبة زنديق ، أسمع عشان القصة ما تبقى urban legend زي قصص كتيرة في السودان هل فعلاً الشيخ حمدالنحلان قال هو نبي ولا ونسة سودانيين بقوها حقائق بالسلفقة

أنا القصة القريتها إنه قال انه هو المهدي المنتظر في مكة وجُلِد لكن قصة إنه قال إنه نبي دي اتخيل لي مكايدات لي حسن الترابي أثناء الخلافات على قيادة الأخوان المسلمين يعني كيزان في بعض

Quote: هوي يا أبو الريش ولّ منو اسمك، الحركات القاعد تعملها في بوستات ناس حافظ حسين دي خليها، أنا بوستاتي ما بوستات نقل وطباعة وسيدها ماشي، دي بوستات متعوب فوقها وهي نتاج فكري أدبي، خلي تجي تجدع لي هو عند رب قدير وشنو كدا؟!! داير تشارك معاي، أجتهد شويّة بدل الكلمات المحفوظة وبايخة دي

لا شوية لا كتير.. وبوستيك دا مانى معتب عليه تانى.. بوست سيده لا يحترم قراءه دع عنك احترام حريـة المتداخلين فى الرأى إلا إذا وافقوه الرأى.. تريد أن يقرأ زوارك ما تختاره أنت لهم من المداخلات..
محفوظة؟ ربما ولكنك لن تجد هذا التعبير إلا فى هذا المنبر وفى هذا البوست وفى هذه المداخلة.. أما الكلمات كل على حدا، فإن ما كتبته أنت كل كلمة فيه أبحث عنها وستجدها مكررة مليون مرة.
ما علينا يازول مبروك عليك ومعاك الف سلامة.

لا شوية لا كتير.. وبوستيك دا مانى معتب عليه تانى.. بوست سيده لا يحترم قراءه دع عنك احترام حريـة المتداخلين فى الرأى إلا إذا وافقوه الرأى.. تريد أن يقرأ زوارك ما تختاره أنت لهم من المداخلات..
محفوظة؟ ربما ولكنك لن تجد هذا التعبير إلا فى هذا المنبر وفى هذا البوست وفى هذه المداخلة.. أما الكلمات كل على حدا، فإن ما كتبته أنت كل كلمة فيه أبحث عنها وستجدها مكررة مليون مرة.
ما علينا يازول مبروك عليك ومعاك الف سلامة.

ملحوظة: هو عند ربه هذه رأيى الذى لى كامل الحق فيه.. وأنا مع النقد ولكنى أقول رأيى لو تعدى النقد الى إساءات وشتائم رجل فى ذمة الله. وبالمناسبة انتم لا تنتقدون الترابى ولا تملكون الآلية لذلك.

مشكلتك يا منتصر،
علاقتك بعلم الباطن ضعيفة جداً،
يا تعبان لمان الله يرسل المهدي المنتظر (حمد النحلان)
دا عند نحن أهل الباطن بيعني أنه نبي إختاره المولى،

عليك الله، أحرد مع أبو الريش وتاني ما تتداخل في بوستاتي

جواك كوز كبيييير

بس مشكلتك ما قادر تعترف بيهو ولاقادر تتخلص منو

في محاضرة عام ١٩٨٢ بجامعة الخرطوم تكلم عن حديث الذبابة،
الحديث يقول:

قال صلى الله عليه وسلم " إذا وقع الذباب في شراب أحدكم فليغمسه ثم لينتزعه فإن في إحدى جناحيه داء وفي الأخرى شفاء "
الترابي علق على هذا الحديث:

في الأمور العلمية يمكن أن آخذ برأي الكافر، وأترك رأي النبي، ولا أجد في ذلك حرجاً البتة، ولا أسأل فيه أيضاً عالم الدين

وبكون أداها ضحكة في نهاية التعليق

- كيف شيخ حسن قاد أتباعه بخطابين مختلفين؛ خطاب علماني وخطاب سلفي؟
- أثر شيخ حسن علينا نحن الذين يثقون في العلم ويرون تناقضه مع الدين ولا يجدون مخرج من الدين.

الناس تنقسم لعدة مجموعات في ردة فعلها لكلام شيخ حسن حول حديث الذبابه؛
١/ أتباعه، لا يعلقون ولا يرغبون حتى في مناقشة كلامه بين أنفسهم، لكنهم يحمونه من الهجمات المرتدة.

قال: الواحد في نهاية الصلاة ..يلتفت يمنة" السلام عليكم ورحمة الله" ثم يسرة "السلام عليكم ورحمة الله"
اذا في شخص ما سألك .. انت بتسلم على منو ؟ !! كيف ترد ؟