جابر عصام

11:59 AM June, 30 2022

سودانيز اون لاين
أبوبكر عباس-الإمارات
مكتبتى
رابط مختصر

جابر عصام:
(١)
في الونسة دي داير أونسكم عن تلاتة شخصيات ونسني بيهن زول قبل أيام بمقهى ستاربكس غرينسبورو؛
هم ديفيد وأبوهو جابر وجده عصام،
والحقيقة التلاتة دا أجمل من دا، لكن أنا معجب بجابر، عشان كدا ببدأ بيهو.
جابر:
وصل سان فرانسيسكو سنة واحد وتسعين، وهو ابن تسعة عشر ربيعاً، أرسله والده من الخرطوم لدراسة الفيزياء وهو من مواليد أمريكا.
قرأ في الجامعة سنة واحدة وتركها بعد أن أنجب ولده ديفيد من صديقته ماريّا.
طبعاً المتابعين للونسة دي بكونوا دايرين شمار هل جاب امو حضرت العرس؟
عرس شنو؟
تفكيركم اتجاه واحد،
ماريّا كانت صاحبتو بس وجاب منها ولد،
وأزيدكم من الشعر بيت؛
ماريا يهودية روسية.

جابر سنة الفين وطمنتاشر قرر ينتحر من فوق جسر غولدن غيت بتاع سان فرانسيسكو المسمى بجسر الانتحار.
اتنين صباحاً كان طالع في الجسر، قبل ينط بشويّة مرت جنبو بعض الحشرات البطلعن ضوء ويختفي أثناء طيرانها ديك، تأملها للحظة وذهب خياله بعيداً وتذكر رحلة ببص دنقلا للدبة لأهل والدته وهو طفل صغير، نزل من مكان الانتحار وقعد في طرف الكبري ودلدل كرعينو من بين السياج.
الحشرات دي ذكرتو ونسة امو أثناء تلك الرحلة والبص واقف في محطة خلوية بالليل،
كانت بتقول ليهو شايف يا جابر الضوء الفي الخلا داك البظهر ويطفي؟
دا ضوء شيطان اسمو أبلمبة بضيّع الناس في الصحراء.

خلونا نخلي جابر مدلدل كرعينو ونمشي نشوف أبوهو عصام كرتلّة ونرجع نكمل قصّة جابر الجديدة.

عصام كرتلة:
لقيط ربتو دايّة في سنار التقاطع اسمها آسيا متزوجة ليها رجل في غاية الطيبة.
عصام قال لزوجتو بعد جابر وصل طمنطاشر سنة وفي عدم حضور جابر؛
تعرفي يا فلانة، فلان دا ما أبوي، وآسيا ما أمي، في طفولتي الأولى كان معاي في البيت تلاتة أخوان برضو مربياهم أمي آسيا دي، لكن شردوا من البيت، لأنو شفع الحلة والنسوان كانوا بقصدوا يسمعونا انو نحن "أولاد حرام"
أنا ما شردت لسببين؛
الأول؛ كنت معجب ومفتون بطيبة أمي وأبوي ديل.
التاني؛ كنت طفل نابغة في المدرسة والشفع المعاي كانوا حاقدين علي، كيف "ود الحرام" دا أشطر منهم؟!
قررت أن لا أنهزم ليهم، كنت متفوق حتى على الاساتذة
والحقيقة ود حرام ولّ حلال دي ما كانت فارقة معاي ولا شايف ليها أهمية وغير كدا كنت وما زلت شايف إنو الحياة في حد ذاتها رائعة بأي طريقة وصلتها.

أها و ديفيد ؟

تحياتي و إعجابي بأسلوبك الفكِه الجميل
وكما إعجابي في ردك على منتقديك أحياناً.. وتحويل نقدهم لسخرية..
ما عارف أضعك في أي خانة لكن انت زول مبدع مبدع وظريف كمان فوق البيع...أظني ما قصرت معاك..
في ناس قريبين منك في المنبر لكن ما بيلحقوك.. ما عايز أقول ما بيشبهوك ..
تحياتي يا وريف

المستنير

Quote: قرأ في الجامعة سنة واحدة وتركها بعد أن أنجب ولده ديفيد من صديقته ماريّا.

أها وجدتها ..
جابر .. دا .. هو حسين .. أبو باراك أوباما ..
وديفيد .. هو بوراك أوباما .. ذاتو

----------------
أها المستنير أعترف أنت ظابها علي كده ..

بريمة

المستنير

Quote: قرأ في الجامعة سنة واحدة وتركها بعد أن أنجب ولده ديفيد من صديقته ماريّا.

أها وجدتها ..
جابر .. دا .. هو حسين .. أبو باراك أوباما ..
وديفيد .. هو بوراك أوباما .. ذاتو

----------------
أها المستنير أعترف أنت ظابها علي كده ..

بريمة

مع التحيات الزاكيات للجميع
"أرسله والده من الخرطوم لدراسة الفيزياء وهو من مواليد أمريكا"
مين الاتولد في امريكا؟ جابر ولا ابوهو؟
اذا كان تقصد ابوهو .. كان تخفف من ضمير ال(هاء) في"أرسله" "والده"و"هو"

تمنيات شخصية بترميز مفضوح لكل ذي بصيرة

كويس يا وليد طه، إنك سألت عن ديفيد،
يمكن كان ما نتم البوست وما نجيب سيرتو،
أهم حاجة ما في زول قال ليهو انت ود حرام،
لكن لمان يجي دورو في السرد ح أكتب عنه؛
ديفيد، يهودي من أب أمريكي من أصول سودانية،
يلبس -أي ديفيد- طاقية اليهود الصغيرة المعفنة ديك يوم السبت،
ويوم الجمعة بلبس طاقية خضرا بتاعة السادة المكاشفية.

هلا حبيبنا محمد عبد الله،
طبعاً أنا عارف إنو أنا أحسن من يكتب بالمنبر،
موش أحسن بس،
المشكلة الفرق شاسع في المتعة بين كتاباتي ومثلاً كتابات المدعو الخواض أو منو الجديد دا نور،
أو المدعو ود الأصيل أو بقية رجرجة المنبر
لا توجد مقارنة أصلاً
لكن والله، برضو مداخلتك سرّت بالي في الزمن الوهم دا
فشنو؟
شكراً

هلا بالصديق الجميل جداً بريمة صديق الصديق الجميل جداً عاشق الأغاني السودانية وأحسن من يتذوقها،
إمام الحساسين محمد النور كبر.
أبداً يا بريمة ليس لاوباما علاقة بالبوست
البوست له علاقة بعشق العبقري عصام بتوربينات خزان سنار والقطار البخاري

أحمد يس، عليك محمد وردي، اتصلح معانا
أقول ليك أبو جابر لقيط أو ود حرام زي ما بقولوا ليهو نسوان سنار،
ترجع تقول الضمير دا حق منو؟
الضمير دا حق الله في السماء توقف من أن يمنحه للبشر في أفريقيا

طاعم حتى في حمبكتك يا مستنير
واصل
تحياتي

Quote: طاعم حتى في حمبكتك يا مستنير

بذكرني بحمبكة أمير القصة القصيرة الراحل يوسف ادريس
قال نجيب محفوظ لا يستاهل نوبل .. مجرد مؤرخ حواري .. يستاهلها هو او الطيب صالح
وعشان موقفهم من القضية الفلسطينية وااااضح جدا حرموهم الجائزة
نجيب كان من مؤيدي اتفاق كامب ديفيد طبعا

الحمبكة المجيهة في حد ذاتها فن لا يجيدها إلا المستنيرين

اها

متابعين

المونساتي ابوبكر عباس كيف حالك متابعين بشراهة
تحياتي
يا عدو الثورة والثوار اسع عليك الله دا وقتو ولا عدم احساس منك ياخ الناس طالعة في الشوارع في السودان في المدن والقري وبموتوا بدم بارد يا رجل اختشي فهم شنو العندك

صديق
الزول ده قال إستشهد قبل كده ورُفِع عنه النضال من زمن الجامعة