ما تهتموا للايام ظروف بتعدى وصيه للشباب

الاخوه الافاضل فى سودانيز او ن لاين
التحيه والاحترام
من الاشياء التى تشغل المجتمع وهاجس كبير جدا للاسر كثرت مشاكل الطلاق بين الشباب وان بقول للشباب مافي بيت يخلو من المشاكل والحل فى الصبر والتحمل ولين الكلام والمعامله الحسنه هي من تجعل العلاقه تستمر الى اجل طويل وانا عند مثل قطعوا من راسي انو العلاقه بين الزوج ووالزوجه زي قطعه القماش القديمه لو كل زول جره من طرف بتنقطع ولكن الجر يكون من طرف انتي تجري وهو يرخي ان ترخي وهو يجر وبرضو لمن ظروفه كعبه ووصعبه بقول ليكم زي ماقال الشاعر عو ض جبريل ما تهتمى للايام ظروف بتعدي و طبيعة الدنيا زى الموج تجيب وتودى ما تهتموا للأيام ما تهتمى اصلو الناس حياتا ظروف بتتعود تغير كل خط مالوف مصير الزول حياتو ياما فيها يشوفو و فى دنيانا بنلاقى الفرح والخوف ماتهتموا للأيام ومن اسباب الطلاق فى السودان وبين الناس فى دول الاغتراب الظروف الصعبه التى يمر بها العباد والناس فى السودان وفي بعض دول المهجر الشي الثاني قصه التفاخر وشوفوني لو تمه الزواج ممكن يكون فى الف دين على عاتق الرجل لانو اهل العروس طلعوا الزيت منو وعصروه عصر الجن جيب وجيب وفلانه ديك وعلانه ديك ودي جابوا ليها ونحن مابنرضي باقل من كده لانو بت الجيران جابوا ليها وبت عمها جابوا ليها وصحبتها جابوا ليها وكلام فارغ فطور العريس مويات رمضان قيدومه العروس قيدومه العريس الصبحيه طيب الزوج مرات كثيره خاصه الشباب بيكون زول غير مسئول عايز ينوم وعايز وماعايز يشتغل وزول غير مسئول وفجاه يجد نفسه امام مليون مشكله ووامام مليون طلب جيب الكهرباء - جيب الغاز - جيب السكر - امشي اقيف فى صف العيش - عندنا عرس بت خالتى جيب توب - عايزه لى قروش ماشه الكوافير عندنا قيدومه ماشه اتحنن - عندنا بكاء عايزه لى قروش موجب فجاه الزول اساسا هو الاكل والشراب فى الله الله يقعد يفكر فى المخارجه ويقرر الهروب بجلده ويقوم بدل ما يتحمل ويصبر ويحل المشاكل ويتحرك ويبقى زول مسئول يقوم بدون اي تفكيير و اقصر الطرق واسرع شي الطلاق وتكون المصيبه ويتهدم البيت وتكون محسوبه على البت المسكينه ان عرست وبقت محسوبه عليها عرسه وتكون دى النهايه المحزنه عشان كده لو عندك بت تاكد انو الولد يتقي الله فيها ويكون عندو اخلاق وزول عندو صبر وزول مسئول شوف اول شي شغال كم سنه فى نفس المكان لو زول بنطط من شغل لي شغل وبطلع من الشغل بدون سبب مقنع وسبب جوهري
اوعك تديه بتك اعمل حسابك ده مابكون زول مسئول ومابقدر يفتح بيت وبرضو ايتها الام الحنونه عليك الله وصي بتك انها لو تزوجت عن قناعه انها تكون تعرف متي تتطلب ومتي تسكت ومتي تتكلم وده برضو مشكله اغلب بنات الزمن ده لاتعرف كيف ومتى تتطلب ولا تعرف ظروف الرجل ولاتعرف كيف تحافظ على بيتها واهم شي بتك ما تكون امعه وتسمع كلام البنات والنسوان البخربوا البيوت لانو البنات البايرات والمطلقات لما يشوفوا بت فى حالها والدنيا كويسه معاها ومستقره وماعندها مشاكل فى حياتها بجوا ويعكروا عليها الدنيا وشي تحريش وشي وصايا وشي نبذ فى الزوج المسكين واهل الزوج واصحاب الزوج والبت لو هبله ووامعه بتمشي تخرمج القصه مع الرجل وواصلوا الرجال خاصه الشباب الان قاعدين على الهبشه والله لانو ظروفهم فى السودان وفى اغلب بلاد الغربه زي الزفت وما عايزين اى كلام كتير ووجع راس غايتو الله يكون فى عون الاسر وخاصه البنات والرسول قال الكثير والايات قال الله تعالى في سورة الرّوم: {وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِي ذَلِكَ لآيَاتٍ لِّقَوْمٍ يَتَفَكَّرُون}. قال الله تعالى في النّجم: {وَأَنَّهُ خَلَقَ الزَّوْجَيْنِ الذَّكَرَ وَالْأُنْثَى}.[٨] قال الله تعالى في سورة النّور: {وَأَنْكِحُوا الْأَيَامَى مِنْكُمْ وَالصَّالِحِينَ مِنْ عِبَادِكُمْ وَإِمَائِكُمْ إِنْ يَكُونُوا فُقَرَاءَ يُغْنِهِمُ اللَّهُ مِنْ فَضْلِهِ وَاللَّهُ وَاسِعٌ عَلِيمٌ}. قال الله تعالى في سورة الرّعد: {وَلَقَدْ أَرْسَلْنَا رُسُلًا مِنْ قَبْلِكَ وَجَعَلْنَا لَهُمْ أَزْوَاجًا وَذُرِّيَّةً}روى البخاري ومسلم في صحيحيهما عن أبي هريرة ـ رضي الله عنه ـ أن رسول الله ـ صلى الله عليه وسلم ـ قال: «استوصوا بالنساء خيراً، فإن المرأة خلقت من ضلع، وإن أعوج ما في الضلع أعلاه، فإذا ذهبت تقيمه كسرته، وإن تركته لم يزل أعوج، فاستوصوا بالنساء خيراًسئلت السيدة عائشة – رضي الله عنها – عن خلق رسول الله – صلى الله عليه وسلم إذا خلا بنسائه فقالت: كان كالرجل من رجالكم إلا أنه كان أكرم الناس، وأحسن الناس خلقا، وألين الناس في قومه، وأكرمهم، ضحاكا بساما.كان صلوات الله عليه حسن الخلق مع زوجاته وكان لين حنون كريم ومبتسم الوجه معهم، فكثير من الزوجات الآن تشتكي دائما من أن زوجها مكشر طول اليوم لا يضحك ولايبتسم معها، وياريت كل البنات والنساء يعرفوا مرات ان ضغوط الحياه فى الزمن الصعب ده هي السبب وحاولي ابنتي وابنى ان تحافظ على بيتك شديد عشان ماتبقي الحياه نكد وحياه جايطه وتكثر عليك التجارب والله يصلح الحال والاحوال
مع تحياتى
مصطفى نور

أخ مصطفى إزاى الحال

الدعوى -موضوع البوست - بلا شك دعوى كريمة
قلت

Quote: شوف اول شي شغال كم سنه فى نفس المكان لو زول بنطط من شغل لي شغل اوعك تديه بتك اعمل حسابك ده مابكون زول مسئول

و الله يا أخى "النطيط" نفسه أنواع فهنالك من" ينط " من شغل لآخر لأجل وضع أفضل ، دخل أكثر ، بيئة عمل محفذة ..ألخ . بالتالى لا أرى غضاضة فى تزويج بتى لشاب لمجرد أنه "ينط من شغل لآخر" أو ان عدد سنين خدمته فى وظيفة ما قصيرة !
امّ التقوى فهى بلا شك مكسب والتحقق منها يحتاج الى زمن إن لم يكن الشاب مشهود له بهذه الخصلة الكريمة .

تحياتي ،،

walid taha

اخي الغالي تحيه طيبه
انا اقصد ان ينطط من شغل لي شغل لانو الشغل صعب عليه ولا يقول ليك ده ما شغلي ولا يقول ليك الراتب مابكفي اصبر واجتهد وقدم الجديد فى الشغل وحاول تتطوير الشغل ووشوف صاحب العمل كيف ممكن يثق فيك ويحاول يرضيك بالف طريقه وبرضو بذكر الشباب بشي مهم علاقتك بربك وعلقتك فة بر الوالداين هل اسباب السعاده والتعاسه فى الحياه
وانا بحكي عن تجربه وان كان انو ينط من شغل لي شغل من اجل الاحسن طبعا انا لاقصد هذا ولكن هناك الكثير من الشباب من تصعب عليه الشغله
ويكون حقل تجارب
عندي امثله الاف انا اساعد فى التوظيف فى الكثير من الوقت وويجي الشاب للوظيفه ويقدم وانا اعمل ليه تزكيه ويشتغل ايام وشهور فقط ومن ثم يكتشف انو الشغل صعب ولا يكفي
الاحتياجات ولا مليون سبب تخلي الشاب يترك العمل قبل ما يجد الفرصه التانيه ولا الفرصه الاحسن
الشباب الان والله ماعندهم اي ادني مسئوؤليه تجاه البيوت وانا اقول الا من رحم الله ربي
عايزين السهر والعطاله والتسكع فى امام ستات الشاي وفى الكوفي شوب وعارفين انو نحن الاباء ما بنقدر نتخذ قرار انو زي الامريكان وواروبا عندما تبلغ تتخارج من ىالبيت وتتحمل المسئوليه
بتاعت نفسك والله الامريكان والغرب انا افتكر رغم السلبيات فى التربيه نجحوا انو يطلعوا اولاد مسئولين عكسنا نحن عليكم الله قولوا الحقيقه فى طريقه اولادنا وطريقه اولادهم
نجن الشاب نايم وعاطل وماكل وعندو مصاريف وانت الاب روحك طالعه بدل ماهو يشليك انت شايله عشان كده بطلع زول ما مسئؤل ومن مايعرس بطلق وحقوا نحن نحاول نعالج المشاكل مش ندفن رؤسنا فى الرمله ونقول مافي كلام من النوع ده ولا كلام كده
وماعارف انا الحل شنو لمشاكل الشباب الان
انا لا اعمم بل اقول الا من رحم الله ربي
الجيل الراكب راس ده جيل غير الاجيال السابقه والله فى كل شي فى الاخلق فى التعليم فى بر الوالدين فى المعامله فى الصدق
وربنا يستر علينا


مع تحياتي

مصطفى نور

تعرف يا اخ مصطفى ، وتعليقا على حتة "العمل والإلتزام " دىهنا فى السعودية تكاد تكون المعيار الأوحد فى تقييم الشاب المقبل على الزواج ، ليس لمعرفة المقدرة المادية فحسب بل قياس مدى جدية الشاب وإنضابطه .
.السؤال يكون على شاكلة : " ويين تداوم" ؟
عاجباني الحاجة دى فيهم :)
تحياتي ،،