في مارس من العام 2007 تنادى أعضاء رابطة أصدقاء محجوب شريف في العاصمة القطرية الدوحة لتكريمه، وقد نُشر حينها أكثر من بوست في هذا المنبر توثيقاً لحفل التكريم.
إلاّ أن ما كان ينقص ذلك التوثيق هو عرض تسجيل الأعمال الموسيقية التي قدّمت في الحفل.
صحيح أن هذه التسجيلات زاد عمرها عن الخمسة عشر عاماً، توفي لرحمة الله بعض الحضور من بينهم المحتفى به نفسه "محجوب شريف" رحمة الله عليه، والأطفال الذين شاركوا في الكورال لم يعودوا أطفال.
أسباب عدم نشر هذه التسجيلات طوال هذه السنوات عديدة، ليس هذا مجالها، أو لنقل أني لا أريد الخوض فيها، لكني أستأذن أستاذي محمد آدم المنصوري ملحن وموزع العملين، وشاعري العملين، الأستاذة/ آسيا عوض سكينجة، والدكتور صيدلاني/ محمد حيدر المشرف ... كما أستأذن كل من شارك في الأداء والعزف والتسجيل في نشر هذه الأعمال، وما كان لها أصلاً أن تبقى دون نشر.
Post: #2 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-21-2022, 10:23 PM Parent: #1
green] العمل الأول بإسم (عافية) كلمات الأستاذة/ آسيا عوض سكينجة
Post: #3 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-22-2022, 05:20 AM Parent: #2
تنبهت إنه كان في مشكلة في إعدادات الخصوصية.
يفترض أن يكون الفيديو الآن ظاهر
Post: #4 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-22-2022, 06:32 AM Parent: #3
العمل التاني بعنوان: إلى صوت مي محجوب شريف، كلمات د. محمد حيدر المشرّف.
Post: #5 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-22-2022, 07:48 PM Parent: #4
يانا المهيريات في الحارة ما بننجم بالصبر نتحزم نعرف نشيل الليل نعرف نقسم الهم محجوبنا يا أكرم دين الوطن كمين ورينا دينك كم .................... ليك من عيونا النور ليك من وريدنا الدم ليك في الفجر دعوات العافية ليك تنتم ومن عزة حنية تهب عليك نسمات تغشاك مع الصلوات تلقاك تتبسم تتنسم الصحة وتطويه توب الهم .................... والفرحة تملا الكون الرملة جنب النيل يغازلوا في القمرة والقمرة وضاحة تضوي مليون ميل ونخلاتنا تتمايل والقمري ليهو هديل و(السنبلاية) تميل ومعاها (مريم ومي) وعزة في اليوم داك بالفرحة عايزة تطير باللَّه وريها قول ليها دينك كم؟ .................... (محجوب) بشارة الخير يا شمعة ضواية يا غيمة فوق الكل يا نجمة سراية محجوب حديثك در يا المن حروفك نور كحل عيون عزة وختاها فوق الحور يا المن سماك رذاذ نقّع سقي الوديان خدّر ربوع سودانا وعلينا ما عزَّ .................... إشراق صباحاتنا أطفالك الحلوين ما عرفو نوم الليل سامروا النجمات إتلموا لعبوا شليل شع من عيونم ضو صح الصباح في التو إتنادو مافي مقيل إتغنوا أنشدوا كم قصيدة لي محجوب وقالوا ناذرين دم كرامة لي محجوب وجوك جارين سيل وإلتفوا هم حواليك ذي سكسكاً منضوم في وسطو سوميتة وسمعتهم سألوك يا بابا دينك كم؟ باللَّه ورينا يا بابا قول لينا باللَّه دينك كم؟
آسيا عوض سكينجه
Post: #6 Title: Re: أعمال كورالية في تكريم محجوب شريف لم تنشر Author: يحي قباني Date: 06-22-2022, 08:14 PM Parent: #5
Quote: العمل التاني بعنوان: إلى صوت مي محجوب شريف، كلمات د. محمد حيدر المشرّف
ابو الريش صديق الزمن الجميل ..
ده ود المشرف ما غيرو؟
انا عارفه بكتب قصص و روايات .. لكن شعر غنائي دي جديده علي ما بخليو الليله داسي مننا الجمال ده ..🙂
ثم مشتاقين ..🙂
Post: #7 Title: Re: أعمال كورالية في تكريم محجوب شريف لم تنشر Author: محمد حيدر المشرف Date: 06-22-2022, 08:59 PM Parent: #1
و... ايوا بكيت يا ابوالريش، عندما رأيتني اعانق عم محجوب في الفيديو ..
حقيقة فاقد قدرة التعبير.. وقدرة الشكر الجزيل ليك بهذا التوثيق المتفرد.. لاسيما وقد ضاعت النسخ التي تم تصويرها بواسطة مصور الحفل .. او هي اختفت في مكان ما ..
شكرا جزيلا وجميلا يا صديقي وشكرا للصديق العزيز والحبيب يحى قباني ان ارشدني لهذا البوست الجميل
Post: #8 Title: Re: أعمال كورالية في تكريم محجوب شريف لم تنشر Author: هدى ميرغنى Date: 06-22-2022, 09:45 PM Parent: #7
سلام للجميع ~ شكرا أخى محمد أبوالعزائم أبوالريش - هذا عمل عظيم لشخص يستحقه جاءنى إحساس برهبة، ود وتقدير التحية ليكم جميعا. يا دكتور المشرف شكرا ليك ويا لروعة الكتابة وصدقها - لقد صدقت فى عبارة "فكر واضح وإلتزام…"
Post: #9 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-22-2022, 10:08 PM Parent: #8
قباني يا دفعة ... شوق شديد والله،
Quote: ده ود المشرف ما غيرو؟
أهو جاك الرد منو شخصياً ... الزول ده لابد، لكن عندو حاجات خطيرة.
Post: #10 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-22-2022, 10:43 PM Parent: #9
إلى صوت مي محجوب شريف
هذا الشجن.. من ذاك الرهيف محجوب شريف.. يا كم لطيف.. يامي أبوك.. كمين ظريف.. وسعت مواعينو الكلام.. الفين سلام.. يا ذا الهمام.. يا من تخلل في المسام.. يا من تواتر في النزيف.. نغما شفيف.. وطنا مقام.. فوق النجوم.. وسط القلب.. جوة العضام.. فارس صدام.. يا مي ابوك.. ما هو الضعيف أو المضام.. بس هو الرهيف.. لامن يغازل.. من شوارع أم در رصيف كالضو عنيف.. ما بين جهالات الضلام كالضل خفيف.. لما يزحف في المسام فكر واضح.. والتزام.. من قام عفيف.. كالحب نضيف.. كالحب نضيف..
محجوب شريف
(محمد حيدر المشرف)
Post: #11 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-23-2022, 08:06 AM Parent: #10
Quote: و... ايوا بكيت يا ابوالريش، عندما رأيتني اعانق عم محجوب في الفيديو ..
ليلة سجلها التاريخ يا مشرّف. ذكرى ما حتنمحي ... أمس بعد رفع الفيديوهات إتصلت بأستاذنا المنصوري وإتكلمنا طويلاً فيها والبروفات وميلاد اللحن.
Post: #12 Title: Re: أعمال كورالية في تكريم محجوب شريف لم تنشر Author: Yasir Elsharif Date: 06-23-2022, 10:18 AM Parent: #11
سلام للجميع
وشكرا محمد أبو العزائم أبو الريش
منتهى الروعة
رحم الله الشريف محجوب وكل الذين رحلوا والمجد لشهداء الوطن نحو سودان جديد.
يا شعب يا أبو الكل
Post: #13 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-23-2022, 08:29 PM Parent: #12
Quote: يا دكتور المشرف شكرا ليك ويا لروعة الكتابة وصدقها - لقد صدقت فى عبارة "فكر واضح وإلتزام…"
تعرفي يا هدى، ما يميّز محجوب شريف، رغم إلتزامه بفكره واتجاهه، لا يقحم ذلك في كل شئ، يخاطب كل الناس ... جميع الناس، بلغتهم البسيطة ... لذلك أحبه من لاقاه أيديولوجياً ومن كان صاحب فكر مختلف وبالطبع من كان سودانياً فقط ... فهو سوداني قبل كل شئ.
Post: #14 Title: Re: أعمال كورالية في تكريم محجوب شريف لم تنشر Author: هدى ميرغنى Date: 06-23-2022, 08:42 PM Parent: #13
تحياتى أخ محمد أبو العزائم ~
Quote: تعرفي يا هدى، ما يميّز محجوب شريف، رغم إلتزامه بفكره واتجاهه، لا يقحم ذلك في كل شئ، يخاطب كل الناس ... جميع الناس، بلغتهم البسيطة ... لذلك أحبه من لاقاه أيديولوجياً ومن كان صاحب فكر مختلف وبالطبع من كان سودانياً فقط ... فهو سوداني قبل كل شئ.
أتفق معاك تماما. أول مرة يجينا فى البيت ، طوالى بقى أهل ومشى جاب فول العشاء. وامى ختمية وعقيدتها قوية بس ما بتخت زول فى محلهم 😀 محجوب شريف صديق واهل للجميع.
Post: #15 Title: Re: أعمال كورالية في تكريم محجوب شريف لم تنشر Author: يحي قباني Date: 06-23-2022, 09:27 PM Parent: #14
رحم الله محجوب ..
هدى و محمد و محمد .. قبل سفر محجوب للعلاج في الخارج .. كان في بيني و بين قدال رحمه الله مكالمات شبه يومية شغالين تصحيح لاشعاره المرفوعة عندنا في المكتبة .. و في احد الاتصالات كان في العربية و قال لي كويس الاتصلت انا خاشي على محجوب اودعه لانه مسافر بكره خليك معاي تسلم عليو و تطمئن على صحته .. و بالفعل سمعته يقول لي محجوب ده يحيى قباني من كندا داير يسلم عليك و يوادعك.. و اول ما مسك التلفون .. يا قباني ازيك ياخي .. . طمني كيف وليداتك .. و كيف الناس في كندا .. قلت ليو لساك تسأل عن الناس و تطمن على الناس و شايل هم الناس و ناسي روحك .. الناس كلها هي البتسأل عليك و دايراك بخير ..
الله يرحمهم جميعا ..
لما مات حميد .. هاشم صديق قال لي ما فضل شعرا في البلد غير محجوب و قدال ..
Post: #16 Title: Re: أعمال كورالية في تكريم محجوب شريف لم تنشر Author: Hamid Elsawi Date: 06-24-2022, 07:25 AM Parent: #15
شكراً أبو الريش و كل العزاء المتداخلين من أجمل البوستات لكم التحية و لي عودة و ليكن البوست عالياً خاصة مع الايام القادمة
Post: #17 Title: Re: أعمال كورالية في تكريم محجوب شريف لم تنشر Author: Ahmed Yassin Date: 06-24-2022, 08:52 AM Parent: #16
"" عشة كلمينا ميري حدثينا "" دا .. اداء كورال كل الحضور في القاعة صغيرهم وكبيرهم بايقاع سوداني سريع وخفيف..اصوات متناسقة متوهجة بمصاحبة محجوب شريف اداء بطريقة الملحمة ... من بين تلك الاصوات الفنانين محمدابوالعزائم ابوالريش و محمدحيدر المشرف بالاضافة الى عادل التجاني ...واستاذنا الكبير المنصوري
Post: #18 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-24-2022, 09:21 PM Parent: #17
Quote: يا شعب يا أبو الكل
أيوه يا ياسر ... محجوب شريف أمتعنا وعبّر عننا في كلماته بصوت وردي ومحمد الأمين وقصائده غير الملحنة .... عشان كده كان لازم التكريم
Post: #19 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-24-2022, 11:43 PM Parent: #18
Quote: لكم التحية و لي عودة
مرحب بيك حامد الصاوي، نحن والبوست في انتظارك.
Post: #20 Title: Re: أعمال كورالية في تكريم محجوب شريف لم تنشر Author: حيدر حسن ميرغني Date: 06-25-2022, 07:30 AM Parent: #19
تحية مستحقة للأحبة في قطر .. بورداب وبوردابيات حقيقة الجالية الوحيدة في الخليج التب تعلي من الشأن الوطني في كل فعالياتها وتحية كبيرة للحبيب دكتور المشرف الذي يبدع في صمت وألف رحمة ونور على روح الشاعر الفذ محجوب شريف ومليون سلام لشعبنا البطل
Post: #21 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-25-2022, 12:09 PM Parent: #20
Quote: اداء بطريقة الملحمة ... من بين تلك الاصوات الفنانين محمدابوالعزائم ابوالريش و محمدحيدر المشرفبالاضافة الى عادل التجاني ...واستاذنا الكبير المنصوري
تحياتي الأخ أحمد ياسين،الحقيقة، كانت مشاركتي بالأداء الموسيقي، أما الصوت فلا يصلح للسمع إلا لو عايز تطفّش الناس :)نعم، شارك في الأداء أخونا الفنان عادل التجاني في العمل الأول والفنان ياسر مبيوع في العمل التاني.
عفواً ... التعديل لخطأ مطبعي في إسم أ. عادل التجاني
Post: #22 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 06-28-2022, 06:12 AM Parent: #21
Quote: لما مات حميد .. هاشم صديق قال لي ما فضل شعرا في البلد غير محجوب و قدال ..
الرحمة لمحجوب والقدال ... وربنا يطوّل في عمر هاشم صديق.
Post: #23 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 07-03-2022, 07:08 AM Parent: #22
Quote: تحية مستحقة للأحبة في قطر .. بورداب وبوردابيات حقيقة الجالية الوحيدة في الخليج التب تعلي من الشأن الوطني في كل فعالياتها وتحية كبيرة للحبيب دكتور المشرف الذي يبدع في صمت وألف رحمة ونور على روح الشاعر الفذ محجوب شريف ومليون سلام لشعبنا البطل
ما شفناك جيت تاني يا حيدر ... أو يمكن جيت وما اتلاقينا.
Post: #24 Title: Re: أعمال كورالية في تكريم محجوب شريف لم تنشر Author: محمد أبوالعزائم أبوالريش Date: 07-04-2022, 09:44 PM Parent: #23