«أكلوني البعاعيت»

«أكلوني البعاعيت»


06-21-2022, 05:16 PM


  » http://sudaneseonline.com/cgi-bin/sdb/2bb.cgi?seq=msg&board=510&msg=1655828168&rn=0


Post: #1
Title: «أكلوني البعاعيت»
Author: دفع الله ود الأصيل
Date: 06-21-2022, 05:16 PM

04:16 PM June, 21 2022

سودانيز اون لاين
دفع الله ود الأصيل-
مكتبتى
رابط مختصر




∆ دا راندوك أقرب إلى لغة نفر من الجن
و تخلو تمامن من أية شاردة من، أو واردة
إلى حظيرة بنت عدنان ، و يمكن ترجمتها
إلى لغة الضفادع و نخنخة البعاعيت!

Post: #2
Title: «أكلوني البعاعيت»
Author: دفع الله ود الأصيل
Date: 06-21-2022, 05:25 PM
Parent: #1


∆ ممكن بشوية همهمات خرساء على حركات مبهمة
تمامن بلغة الجسد يقدر المتخاطبون يقولون حاجات
تانية فايتاني، لاكين و لا گأنهم قالو أيتها حاجة!!

Post: #3
Title: Re: «أكلوني البعاعيت»
Author: دفع الله ود الأصيل
Date: 06-21-2022, 05:52 PM
Parent: #2

∆ أخونا شيخي ود الفگي الشيخ يتحدى أي
واحد(ة) من جيل عيال ميكي لو يقدر يفقه فيها طظ من
سبحان الله قلنالو يا حليلك النايم على حيلك و هو منو الجابا
براهم!؟جانا طارق عثمان الحسن فال: ديل جاطو الذوق العام
بلغة شوارعية سطلنجية و گرستالاب ؛ كمان هنقا الحاج
كومر متنكر في جلد حنكوش داير يفهم:شنو رندوك؟
قلنالو يا هنقا دي لغة مدوزنة جاهز على إيقاعات
الراب الصاخبة ، و تتماشى أيضن مع رقصة
الفلامنكو على ضفاف بحيرة البجع!!

Post: #4
Title: Re: «أكلوني البعاعيت»
Author: صديق مهدى على
Date: 06-21-2022, 05:55 PM
Parent: #2

في دارك
سلام يا اصيل
راجلا جميل
بشوش مو بخيل
زراعتو تبلدي
ونخيل
وظهرو جمال
وخيل
دا ود قبايل
جمل شيل
ربنا يحفظه
من القال والقيل
ويحفظ اسرتو
بمحكم التعزيل
امين يا خالق
النهار والليل
باسمك الحي الجليل
تحفظ امة محمد
من عواصف وسيل
بالصلاة على من ارسلت له
امين الوحي جبريل

Post: #5
Title: Re: «أكلوني البعاعيت»
Author: دفع الله ود الأصيل
Date: 06-21-2022, 07:18 PM
Parent: #4

∆ صح لسانك ود مهدينا ، بركة الله
مع نفحات قبايل العيد ينعاد عليك بخيت و سعيد
إت راجلن صنديد و رايك سديد و نظرك بعيد و مديد
∆ هنا بنشرح لغة أكلوني البعاعيت و ٱخر تقليعاتا:
ياو ياو سلمك بارك فيك ملوك الصبات واسياد الرصات ،
بهگذا عبارات رشيقة منمقة كان يفتتح تجمع المهنيين
خطابه موجها إلى الراسطات و الجنيات الوقفو فلگاب و قنا .
∆فهو هنا يقوم بتقديم التحية والسلام لقادة الحراگ و لجان
المقاومة الشبابية،حتى يسترعى انتباههم و يعرفون أن الأوامر
قادمة إليهم، ثم يتلو عليهم الأوامر تباعا مثل "قفل الفرقة
صح و غلش يجى خفيف و لطيف و من غير بلاغات "
∆ عبارة گهذه ترمز إلى التصعيد الثورى بصدور عارية
فى عرض الشارع بكل ذكاء و إقامة المتاريس بشكل
متماسك گا البنيان المرصوص ثم الاختفاء عن انظار
االعسس و التبخر في الهواء و گانو« في رمشة عين
أبعدوك يا حنين» و كل ذلك لضمان استمرارية
المد الثورى بكل «حرية و سلام و عدالة».
.

Post: #6
Title: Re: «أكلوني البعاعيت»
Author: دفع الله ود الأصيل
Date: 06-21-2022, 08:22 PM
Parent: #5

∆ لكن الاستغلال السياسي السيء لهذه اللغة
من قبل أحزاب أم رخم الله فى توجية الحراك الثورى جعل
الأحزاب التى تقف خلف تجمع المهنين تتوهم بإمتلاكها للقرار
و تحريگ الراي العام ، وتراهن على أنها هي فقط التى تستحق
قيادة الشعب ، مما جعلها تستخف بحراك گيانات أخرى بأعتبار أن
ذلك ركوباً للموجة الثورية ليس إلا ، فملوك الصبات واسياد الرصات
لم يكونوا يعلمون بالمخطط الخبيث الذى يقف وراء هذه الخطابات
التى حولتهم من ثوار الى ضحية للنزاعات الحزبية الضيقة فتحول
جزء كبير منهم من التمسك بالمطالب الثورية إلى التمسك بالمطالب
الحزبية ،ولم تكن فى الساحة أحزاب أو تكتلات سياسية تستطيع
مخاطبة الشارع بفس الخطاب الراندوكي السابق ، مما قد أثر
سلبياً على جمود كبير وسط الشباب و عزوف عن الخروج
مادامت أذانهم لم تعد تطرب لهتاف مخنوق!!

Post: #7
Title: Re: «أكلوني البعاعيت»
Author: دفع الله ود الأصيل
Date: 06-23-2022, 01:15 PM
Parent: #6


حكاية الحاجة تفتيحة
حكت احدى الامهات أنها لاحظت أن إبنيها المراهقين يتحدثان بلغة غريبة
عليها لم تفهم منها شيئاً ، فقال لها احد الاشخاص إن الأمر بسيط فما عليهاسوى
ا التوجه للمكتبة القريبة من المنزل وشراء كتاب ( قاموس الرندوك السودانى )
*قامت الام بالذهاب إلى المكتبة وشراء القاموس وبعد أن قامت بتصفحه
أصابها الهلع لما قرأته من مفردات ومصطلحات يستخدمها شباب اليوم.
فى مساء ذات اليوم سمعت ابنها الأكبر يخاطب شقيقة :
- أيه رأيك نقوم ندقس الحاج ضيوف ونديهو (مكنة) نقول ليهو معانا واحد زميلنا أبوهو
إتلحس عشان يعمل لينا (زيدان أبراهيم) للضحاكات نقوم نظبط بيها (عشة الفلاتية).
ما أن إستمعت جارتنا (س) إلى ما قاله إبنها مخاطباً شقيقه حتى قامت بتصفح
(القاموس) بسرعة فى محاولة لفك الرموز لتجد أن الترجمة هى :
- أيه رأيك نقوم ندقس (نغش) الحاج ضيوف ( يقصد والده) ونديهو مكنة (كضبة)
نقول ليهو واحد زميلنا أبوه إتلحس (مات) عشان يعمل لينا زيدان أبرهيم (زياده)
للضحاكات (القروش) نقوم نظبط بيها عشه الفلاتية (العشاء).
*بعد خروج ابنيها عشان يعملو (عشة الفلاتية) بعد ان مشت (المكنة) فى الحاج
( ضيوف) جلست جارتنا (س) ممسكة بالقاموس وقد ألت على نفسها أن تقوم بحفظه
(صم) حتى تستطيع أن تتعرف على ما يقوله ابنيها من كلمات وعبارات وتراكيب
بعد أن أضحت هذه اللغة هى لغة التخاطب بينهما فى كثير من الأحوال.
*فى اليوم التالى بينما كانت (س) وابنيها يجلسون يتناولون الشاى
بالمنزل بعد عودتهما من الجامعة سأل الأخ الأصغر شقيقه :
- عملت شنو مع (الحنان) القاعد (تحنك) معاهو اليوم كلو فى الكافتيريا ده؟
تعرف اليوم كلو أقعد (أحنك) ليك فيها لكن هى عاملة ليا (عبدالعظيم حركة) بس أنا
مرات بعمل ليها (الفاتح النقر) ومرات كده بعمل ليها (عمر إحساس) وكم مرة كده عملت
ليا (شرحبيل أحمد) لكن أنا ح أقوم أعمل ليك (جوزيف لاقو) واقوم أمشى أعمل ليك
(محمود الخطيب) للبقاقة دى قالو أبوها (مقندل) وماسك كهرباء شديده.
- طيب أفرض قال ليك إنتا لسه وعمل ليك (الجزيرة أبا) ؟
- ما مشكلة بعمل للموضوع (كمال ترباس) طوالى
- طيب وكان ورطك وقال ليك عملت ليكم (إيهاب توفيق) ؟
- خلاص أقول ليهو نعمل (عقد الجلاد) بعد ما نتخرج
- طيب أفرض قال ليك تعمل (عرس الزين) طوالى
- ما (بدق ليهو جرس) طوالى
- وكان أصر على (عرس الزين)؟
- بسيطة بعمل ليهو (الفتيحاب)
معانى المفردات :
- الحنان = الحبيبة
- أحنك = أقنع
- عبدالعظيم حركة = عاملة حركات
- الفاتح النقر = بيفتح ليها كناية على عدم الإهتمام
- عمر إحساس = يعمل فيها حساس
- شرحبيل أحمد = الشرا وعدم الحضور للمواعيد
- جوزيف لاقو = مجازفة
- محمود الخطيب = الخطوبة
- مقندل وماسك كهرباء شديده = مرتاح وعندو قروش كتيره
- الجزيرة أبا = رفض
- كمال ترباس= يقفل على الموضوع
- إيهاب توفيق = الموافقة
- عقد الجلاد = عقد القران
- عرس الزين = الزواج
- دق جرس = للرفض بشدة
- الفتيحاب = يفتح ليهو
*وسط دهشة ابنيها ما أن إستمعت الام لذلك الحوار
حتى هبت واقفة بعد أن تحزمت بثوبها وهى تصيح :
*هووووى يا أولاد إنتو قايلينى (فاره) وما (ناقشة) حاجة .. إنتو ما عارفينى
خلاصبقيت (تفتيحة) وشايلا (مفاتيحا) .. هوووى يا أولاد أقيفوا بعيد (وجرو شخيط)
وأوعكم تقيفو فى الظلط وتتكلمو غلط ، أبوها شنو (المقندل) وماسك كهرباء .
*. نحن ذااااتو هينين ولا لينين نحمد الله الغدا ضأن و التحلية برتكان والعشا
حمام و التحلية شمّام و تربية بيت و فرش موكيت ولدونا فى الإمتداد و حبّينا
فى البلاط .. قال شنو يمشى يعمل عقد الجلاد .. إنتا لسه بصرفوا عليك يا
الما عارف كوعك من بوعك ولا أييندك من كرعيك .. يودوكم للقراية
تحنكو (الجكساية) .. (وهى تجر فيهم نور طويل)
- سجم و كمان عدم فهم ؟!!
- (بصوت واحد) : معقوله؟ الحاجة طلعت تفتيحة !