بحبك يا سودان

Post: #1
Title: بحبك يا سودان
Author: Amira Hussien
Date: 06-07-2022, 10:14 PM

09:14 PM June, 07 2022
سودانيز اون لاين
Amira Hussien-Sudan
مكتبتى
رابط مختصر

حكمة الله السودانى مما يهاجر او يغترب يكتر حديثو عن القروش ورقتو وقلمو وحسابتو شغالين اليوم كلو ……وخلى ناس امريكا حسابهم كلو دولارات وكيف تعمل بيزنس ناجح يجعلك تربح الاف بل ملايين الدولارات………من نعم الله علينا نحن الفى السودان انو ما بنحسب حبة القريشات العندنا اول شى لانها ما كتيرة وتانى ماعندها طعم …..ما كتيرة يعنى بتكمل يمكن فى شى واحد او اتنين وما محتاجين نحسب ونوازن ……وطيب نحن هاديين مالنا ……لانو عندنا هنا ربنا ما شقا حنكن ضيعو للتراب ده سفينا وشربنا وراهو موية ……فى خوفة نوعا براهو مهما يحصل ما بتدخلك

Post: #2
Title: Re: بحبك يا سودان
Author: مصطفى نور
Date: 06-08-2022, 11:13 AM
Parent: #1

السلام عليكم ورحمه الله وبركاته
والله البوست جميل
وواقع ولكن الناس بتختلف من منطقه لى منطقه فى المغتربين بره البلد يعني النس الفي امريكا والناس الفي كندا والناس الفي الصين والناس الفي الامارات والناس الفي الكويت والناس الفي ماليزيا ومصراته لبييا انا عشت فى كل الدول دي والله كلها اولا فى ناس اصلوا القرش مابيقرق معاهم ابدا ابدا كلوا كلوا اولاد العاصمه المثلثه 85 % منهم ماشعال بموضوع القروش وثانيا ناس بره العاصمه المثلثه اغلبهم وبدون خوف الكثير من الناس البره العاصمه ومن بعض الولايات الاخري والمدن فى السودان الاخري ديل الدولار البدخل فى جيبهم الا امريكا تتطبع غيرو وعندك الاجناس والقبائل الفي السودان معروفين بالحرص على القروش والكل عارف منو ديل وعندك ناس ممكن يصرفوا القروش على بعضهم البعض يعني لو انت ما من نفس الناس ديل من نفس الجنس مافي طريقه تقدر تتطلع منهم قرش بتذكر مره فى نيويورك وواحد اخوانا سرقوا منو عربيه وكان شعال بيها تاكسي وقمت انا عملت ليه كشف ووبلقط ليه فى قروش مشيت لي شله عزابه من قبليه معينه ظريفين كده قلت ليهم والله فى زول سرقوا منو العربيه التاكسي بتاعه وانا بلقط ليه فى قروش قالوا لي اسمو منو قلت ليهم اسمو قال جنسو شنو يعني من ياتو قبليه قلت ليهم من قبليه كده قالوا لي قوم لف يازول ماعندنا ليك قروش هههه والله العظيم ده الحصل غايتو القروش دى فى كثيرين فى الغربه ما بحسبوا القروش لكن امكن فى بعض الاخوه المغتربين فى بعض الدول بتفرق معاهم عايزين يبنوا بيوت زعايزين يشتروا اراضي ومزراع
واحتمال يكونوا عايزين يلموا القروش لكن عموما السودان كلوا معتمد على المغتربين ديل واي زول منهم ماسك مشاكل كتيره للاهل فى السودان وفي الاخير القروش والغني والفقر من الله تعالي المهم ستره الحال وزي ماقال الكابلي الغربه اقسي نضال

Post: #3
Title: Re: بحبك يا سودان
Author: امتثال عبدالله
Date: 06-08-2022, 03:00 PM
Parent: #2

والله يا اميرة السودان اجمل بلد واروع بلد واحسن بلد بس لكن كنا عاوزينه سودانخالي من حميدتي والبرهان ومنى اركوي وجبريل ومالك عقار والتوم هجو والجنجويد ...
ونحن بنحب السودان ....وحنعشق السودان وهو خال من هؤلاء الذين يعيقون تقدم الوطن ويعيقون ازدهار ورخاء الوطن ...خال من هؤلاء وهم أعداء الشعب السوداني ..
ولعنة الله عليهم دنيا وآخرة وتبا لهم بجميع لغات العالم ....

Post: #4
Title: Re: بحبك يا سودان
Author: هدى ميرغنى
Date: 06-08-2022, 03:04 PM
Parent: #3

سلام للجميع~
العزيزة أميرة الأميرة~
من شفت الخيط تبعك دا، أغنية العطبرواى دى بكلماتها المعبرة عنى مدورة فى رأسى

Post: #5
Title: Re: بحبك يا سودان
Author: امتثال عبدالله
Date: 06-08-2022, 03:45 PM
Parent: #4

عزيزتنا هدى
بسمات من أرض الوطن تهدي لك التحيات النواضر وتقول ليكي شكرا على صورة عطبرة
وشكرا على صوت العطبراوي ...وانها الآن في كسلا في زيارة قصيرة وشافت صورة عطبرة
وانها فرحت وكأنها في يوم العيد .....
طبعا انا اتصلت بيها اول ما سمعت العطبراوي ..هههههههه
وان شاء الله نحن كمان نفرح قريب يوم نشوف سودانا خالي من أعداء الشعب وأعداء الوطن

Post: #6
Title: Re: بحبك يا سودان
Author: صديق مهدى على
Date: 06-08-2022, 03:51 PM
Parent: #5

يا حليل السودان
يا اميرة
زمن بحر الدميرة
زمن اهله جواهم غيرة

Post: #7
Title: Re: بحبك يا سودان
Author: هدى ميرغنى
Date: 06-08-2022, 04:44 PM
Parent: #6

Quote: عزيزتنا هدى
بسمات من أرض الوطن تهدي لك التحيات النواضر وتقول ليكي شكرا على صورة عطبرة
وشكرا على صوت العطبراوي ...وانها الآن في كسلا في زيارة قصيرة وشافت صورة عطبرة
وانها فرحت وكأنها في يوم العيد .....
طبعا انا اتصلت بيها اول ما سمعت العطبراوي ..هههههههه
وان شاء الله نحن كمان نفرح قريب يوم نشوف سودانا خالي من أعداء الشعب وأعداء الوطن

العزيزة إمتثال السلام يغشاك ،والتحية للعزيزة بسمات وأرد على المودة بالمودة، وربنا يحقق ليها كل ما تريد وين ما كانت ~
يارب لسه كسلا ما زالت بلد الخضرة والجنائن!
زرتُ بحكم عمل الوالد كان ابو جبيهة فى غرب السودان ،وناسها الطيبين والخضرة المغطية السماء،والمانجو والقشطة النادرة فى السودان.
الآن حروب الرباطة شغالة فيها تخريب.

Post: #8
Title: Re: بحبك يا سودان
Author: Amira Hussien
Date: 06-08-2022, 08:30 PM
Parent: #1

سعيدة بيكم مصطفى ، امتثال ، هدى ، صديق
بالجد بلدنا بى خيراتا ….

Post: #9
Title: Re: بحبك يا سودان
Author: يحي قباني
Date: 06-09-2022, 00:24 AM
Parent: #8

وينا بلدنا باللاهي؟
وعصيفير جنّتي اللاهي
علي معلاق مسراته
ينقِّد في الحياه وساهي
عن الشَّرك الفي مخلاته
وعن الغربة الورا الشبّاك
وسفراً ماهو متناهي
++
حليلها بلدنا والله
وكت ديك الفجر نفَّض نعاس الليل
وصفّق لي صباح طربان
مرق يعزِم علي الشاهي
وجرف هتّف نداهو وسال
وجدول كان مصحّي الشوق
وسبلوقتاً تحجيهو
وحويض راجيهو بيلاهي
+
ووين نقرة دليب جبدت من الليل الغُتا
وسرحت توصِّي الضفة ما تنعس
ولا تلك الجبال تكتم صداها
فما الجمال غير انو متباهي؟
ووين نيلنا البتبدا منابعو من جوانا
تنتهي فينا
وهل لا زال قعد يطرا؟
أغانينا
ودموع عشاقو عز الليل
وفي دفتر حكاياتن قعد يقرا؟
وهل حيث ابتدت احلامي في جرفو
المكان دافي؟
وهل عرق الصمود جواهو متعافي؟
وهل ما زال مثال
لي عزّتي وجاهي
++
وينا بلدنا باللاهي؟
ووين ناسا اللي كانت كيف
سماحاً يغلب الوصّيف
نضافاً زي نَجِمْةْ الضّيف
ومن نورن يشيل قمر السّما الباهي
ووين بهجة وناساتا
فناجين قهوة اللّمَّات؟
وريحة البن تفتش في شوارع الذات
عن الرايحين في قريافة
لحضن الخالة والعمّات
وسحر اللّيل
حُجِى الأمات؟
وبهرجة الحكي
ودارت علي لمة صحاب نسمات
وما نامت هناك غنيوة
ما فاقت هناك كاسات
ولا كان قد دهى الداهي
حليلها بلدنا والله
+
ووين راياتا يا فقرا؟
ضرايح الأوليا الشعرا
ومداديحا
ونقرة طاره والحولية
عشاقاً تغيب في الحضرة
عبرت روحا سكك الخوف
وسكنت بين جلال انوارو والسِّدرة
دراويشاً علي الفطرة
ويحمُّو النّوبة
بي نار آح وأوَّاهِي
ووين زيفة ندا المطره
وبروق الليل
إذا شالن
كرف عاشق قليبو حنين
وسبق الغيمة صب اشجانو في مسدار
ووينا رسايل العشاق
حروفا القايدي فيها النار
ووين لهف التلاقي، دموعو، رعشاتو
وجمالو الماب تحوقو اسرار
ولاب يردع ندا الناهي
+
ووينه حلاوة المشوار
ولوحات الحكي المسحور
وايدين الحبيب مسحت مراية اللّحن للطمبور
وبينات الحبايب سار مساء النور
ودمعات المغنين البينضحو عافية في الأشعار
ونيلنا تقطِّرو الأوتار
ويسكربو الغنا الزاهي
حليلها بلدنا....... والله

بدرى الياس