دعوة لعلاج ومساعدة الشاعر صلاح حاج سعيد

11:25 PM May, 18 2022

سودانيز اون لاين
زهير ابو الزهراء-السودان
مكتبتى
رابط مختصر

https://top4top.io/
منقول من صفحة كتلة ابناء ام.درمان ..
وهناك في المقابل
يرقد شاعرنا ( صلاح حاج سعيد ) مريضاً دون سؤال
وما أدراك ما صلاح …..!!
زول كتب
لسه بياناتنا المسافة والعيون
واللهفة والخوف والسكون ……
هسا دا زول بخلو بينو مسافة وما بنعرف الحاصل عليه شنو …!!؟؟؟
وهو القائل
لا رسالة تجينى منـّك لا خبر طمنـِّى عنك
وإنت سايق فينى ظنك
رغم إنك ..
إنت عارف إنو منك ..
لا الزمن يقدر يحول قلبى عنك
لا المسافة ولا الخيال يشغلنى منك
شغلتم وانتهت يا ابوصلاح ..!!
صلاح حاج سعيد دا هو الكتب
لقيتو واقف منتظر
تشتاق عيون لي طلعتو
نفس الملامح والشبه
والمشية ذاتها وقدلتو
وصدح بها الرقيق ( الطيب عبد الله ) في أبلغ صور الشوق والحنين والتي ( هبشت ) المتلقي السوداني من جوه
وهو لايعلم أين أخذت الحياة الطيب والسعيد …؟
ليقدل ( حاج سعيد ) مع البلابل وينورن ….!!
وينور كل شارع سوداني ….ويدغدغ قلوب المنتظرين على حافة الأمل وبوابات الرجاء وعتبات البيوت ….!
ونور بيتنا وشارع بيتنا يوم ما جيتنا
يا الهليت فرحت قلوبنا
واطريتنا الليلة وجيتنا
ولم يطراه احد …!!
لم يكن ( صلاح ) يدري أنه يكتب لنفسه وآخرين إنو الحب طريقو قاسي وصعيب من أولو ..
وهو من نثره فينا حروفاً وعطر .….!!
وما قلنا ليك الحب طريق
قاسي وصعيب من أولو
ما رضيت كلامنا وجيت براك
أهو ده العذاب اتحملوا….
ليشكل ثنائيه مدهشة مع الملهم مصطفي سيد احمد حيث كان لقاء السحاب
وكان نفسي أقولك من زمان
بالكاتمو في سري
ومكتم في حشاى مدسوس سنين…..
صلاح حاج سعيد الرمزية في أبهى معانيها …والحب
عنده طعم ….والشوق كما ينبغي ان يكون
الا سايق فيني ظنك
وهذه التي وضع اساسها ود المهدي
وبنيتها انت جروف …
طوريتك في الطين مرمية
كوريتك يابسة ومجدوعة
لا غيبتك كانت مرضية
ولا فوتك كانت مبلوعة
والله رقدتك الدون سؤال دي هي الما مبلوعة يا أبو صلاح …..إلا البلد مفجوعة …..!!!
وسطوة محاسنك عندى ما كسرة جفون
تحدث عن نفسه دون ان يدري في ايقونته الساحرة الحزن النبيل
وبقيت اغني عليك
غناوي الحسره والاسف الطويل
وعشان اجيب ليك الفرح
رضيان مشيت للمستحيل
ومعاكي في آخر المدى
فتيني ياهجعة مواعيدي القبيل
بعتيني لي حضن الاسى
وسبتيني للحزن النبيل…..
تحية الصحة والعافيه لك …والرجل في حاجه فقط الي سؤال….مجرد سؤال…..!!
فهل عز السؤال…..!!
وبين عمر والسعيد حكاية وطن وقصة ريد …!!
وكان نفسي اقولك من زمان …!!
معقولة يا بلد …!!؟
ارجو من الاخوان والاخوات الاهتمام والتفكير الجاد في عمل مبادرة انسانية لعلاج هذا المبدع
غدا سوف يقوم وفد من مبادرة بلسم لعلاج جرحي الحراك الثوري للشاعر

https://top4top.io/
كتب الشاعر أ زهري محمد علي·

صلاح حاج سعيد اسم لا يمكن تجاوزه في تاريخ الشعر والغناء في السودان ....شاعر متجاوز ..وصاحب تجربة صعدت بالأغنية مقاما رفيعا،، عبر أصوات وتجارب عظيمة ...صلاح صاحب إسهام عظيم في مشروع مصطفي سيد احمد ،بعدد من الاغنيات البديعة الطليقة في فضاء لايدركه ويبلغ مداه غير صلاح نفسه .اطلق عبر مصطفي عصافيره تغرد في كل دوح ،،تجمل حياة الناس وتحيلها الي اخضر يضج بالحياة ..والمحبة ..والجمال ..الشجن الأليم ..المسافة ...الحزن النبيل ...قمر الزمان.. قلت ليها ..ياجرح ..كان نفسي اقولك من زمن ...وكثير مثير ...يضاف كل ذلك الي بساتين فتحها مع اخرين ..الطيب عبدالله .يخلق من الشبه أربعين ..البلابل ..نور بيتنا.. كفايا الوحدة ما بقدر ...محمد ميرغني ..ياجميل ياراقي إحساسك حسين شندي .:وأخريات خالدات لايسع المجال ذكرهن ..صلاح شاعر يقف دايما مجاورا لنصه ،بكل رقته فتفيض روحه ومسلكه بالرقة .والوقار .والاتزان .قولا وفعلا وحالا ..متعه الله بالصحة والعافية ..راجت في الايام الفائتة صورة بين مواقع التواصل.. وكتب البعض مستصحبا الصورة عن تردي حالته الصحية مما ازعج أحبابه داخل وخارج السودان ...ما احب ان أقوله صلاح بخير الحمدلله ..بالامس سعدت بزيارته رفقة الأصدقاء ..الشاعر مكاشفي محمد بخيت ..والفنانين ..وليد ذاكي الدين.. وعماد احمد الطيب ..والأخ معتز حسن حامد.. والأخ صلاح احمد ادريس متابعا عبر الهاتف من جدة كانت لحظات عامرة بالمحبة والتثاقف في الشأن العام والخاص الشكر لاسرته الكريمة علي الحفاوة وحسن الاستقبال والحمد لله صلاح حاج سعيد بخير

شئ محزن جدا بان شاعر سطر مثل كل هذا الابداع لا يجد العلاج ولا يجد الاهتمام من الدولة ..
ولكن للاسف ليست لدينا دولة ...فان دولة السودان وكأنها غير موجودة بعد ان تكالب عليها اهل الجهل
ويقودها الاقزام لعنة الله عليهم ..
ولكن اين نقابة الفنانين ..واين روابط الشعراء واين اهل الخير والاحسان ..لماذا لم يمدوا يد العون للشاعر
الفذ صلاح ...والذي تغنى بكلماته فنانين كبار...
شعب عظيم يقوده اقزام ....لعنة الله على هؤلاء الاقزام ..
لعنة الله على حميدتي
لعنة الله على البرهان
لعنة الله على زعماء الحركات المسلحة الانتهازيين
لعنة الله على كبار ضباط القوات المسلحة الذين يرون الفساد
ويرتجفون هلعا من الجنجويد ...
لعنة الله عليهم جميعا وهم يقودون الوطن للهلاك وللهاوية ...
ونسال الله ان يرينا فيهم عجائب قدرته ..

شكرا صديقى ابو الزهور
ومستعدين لكل أشكال
الوقفو مع الشاعر الكبير
صلاح حاج سعيد لصلاح
علينا دين مستحق سوف
أتواصل معك عبر الهاتف
لمزيد من التنسيق

في تقديرى
هناك ثلاثة شعراء
من بين الواحد وستين
شاعر الذين تغني بكل بكلماتهم
التى وقعت في يده اي مصطفى
سيد احمد هم حميد القدال صلاح
حاج سعيد
على فكرة اغانى مصطفى سيد احمد
ومن بينها افكار الألحان لم تتجاوز المئة وعشرين اغنية
كما أن عمر مصطفى كفنان محترف لم يتجاوز الخمستة عشر سنة
ورحل وهو في الأربعينات من عمره

أسألوا أهله عن الحقائق أولاً ، اتذكرت كلام حسن موسى زمان لما الناس يدأت حملة زي دي لمحجوب شريف

الاخوه الافاضل السلام عليكم طبعا انا قبل ايام فتحت بوست لنفس الهدف وهو عمل نفير لمساعده الشاعر المرهف صلاح حاج سعيد الي ان وصلني الرد التالي من اخ عضو معانا الاخ العضو ابوبكر عباس
والرد كان مفاجاه لي لاننا نحن معشر السودانين عندنا الشهامه والنخوه وبنعمل اشياء من تلقاء انفسننا بحكم الناس الاخرين الرد كان كالتالي وبعد ان قرات الرد كتبت واتصلت على الاخ بكري ابوبكر شخصييا فى امريكا فى ولايه اريزونا وطلبت منه سحب البوست وتحيرت فى تصرف الابن جمال صلاح سعيد وانا اعرف معني التعفف واعرف معني كل شي ولكن انا عندما كتبت البوست والله لان الشاعر ثروه وطنيه ولا اعرف عنه اي شي غير ذلك المهم حصل خير والي كاتب البوست ان شاء الله تعالي ما يحصل ليك نفس الحصل لى والله المستعان وانا بقول ليك انو لكل امري مانوي وانما ما الاعمال بالنييات وجزاك الله الف خير
سلام يا شباب، جئتكم من سبأ بنبأ عظيم؛ عندي صديق ثقة قرأ البوست وأتصل بجمال صلاح حاج سعيد مطمئناً على صحة الشاعر العظيم؛ جمال استغرب من البوست وطلب نبلغكم بأن صحة والده في تحسن شديد وليس لهم رغبة في سفره خارج السودان ولا يحتاجون لمساعدة في الوقت الراهن، وطلب شكركم على المشاعر الطيبة. شكراً يا مصطفى على احساسك الجميل ويا ريت تطلب من بكري سحب البوست حتى لا يتناسل في الوسائط وهو يسبب حرج لأسرة الشاعر العظيم صلاح حاج سعيد

واليكم نص الرساله التى ارسلتها الي الاخ العضو ابوبكر عباس

أبوبكر عباس
اخي الغالي الف شكر لك علي التوضيح الكافي والله العظيم كان البوست من منطلق المرؤه والشهامه السودانيه فقط وان شخصييا قرات في كثير من المواقع عن مرض الاستاذ الشاعر صلاح حاج سعيد وقلت لابد من المساعده رغم انني لا اعرف الشاعر معرفه شخصيه ولا اعرف له اي عنوان ولا اى معلومه عن مكان السكن وولا اين هو الان والدليل هو انني بقول لي بودراب الخرطوم ابحثوا لنا عن العنوان ووالموبيل وعليه فقط كنت اعمل من اجل المساعده الحمدلله انو الشاعر في تحسن وانو مافي حوجه للمساعده طبعا كما ذكرت من تلقاء نفسي وعندما قرات خبر مرض الاستاذ صلاح حاج سعيد فكرت فى عمل شي يساعد والله يعلم ماوراء القصد
مع تحياتي وشكري لكل من ابدا الشعور الطيب في المساعده ودي المحريه فيكم الف شكر

مداخلة مصطفى نور الفوق دي مجوبكة وغير مفهومة!
قبل أيام فتح الأخ مصطفى نور بنفس معنى هذا البوست،
تداخلت أنا بالمداخلة التالية وأوجهها أيضاً للأخ زهير:

"سلام يا شباب،
جئتكم من سبأ بنبأ عظيم؛
عندي صديق ثقة قرأ البوست وتواصل مع بجمال صلاح حاج سعيد مطمئناً على صحة الشاعر العظيم؛
جمال استغرب من البوست وطلب نبلغكم بأن صحة والده في تحسن شديد وليس لهم رغبة في سفره خارج السودان
ولا يحتاجون لمساعدة في الوقت الراهن، وطلب شكركم على المشاعر الطيبة.
شكراً يا مصطفى على احساسك الجميل ويا ريت تطلب من بكري سحب البوست
حتى لا يتناسل في الوسائط وهو يسبب حرج لأسرة الشاعر العظيم صلاح حاج سعيد"

سلام للجميع
قرأت رسالة من بنته في الواتس بتقول لم يطلبو مساعدة مادية و هم ما محتاجين لي مساعدة مادية
الراجل بتعالج و في تحسن
و طلبت فقط الدعوات له

دعواتنا وصلواتنا للشاعر العظيم....
حتى الان لم افهم ربط الصورة ب المساعدة وتحديدا فى حالات المرض ورغم سلامه النيه إلا انها تهدر كرامه الشخص المقصود وتقلل من مكانه المخاطبين وكأنها دليل ليسرعوا فى مد يد العون
رغم ان اسرة الشاعر اعلنت على الملأ عدم حوجتهم الماديه فربما تكون هناك إحتياجات اخرى ومخاطبت اهل الشاعر بفضله على الساحه الثقافيه والوجدان العام ربما تكون لائقه ومقبوله لتقبل المساهمات المختلفه فى علاجه
لكنها من آفات زماننا ان تتسرع الوسائط العجوله فى لهفه للفح الاخبار دون تمحيص وتأكيد لايضيرهم صدق ولا كذب طالما الهدف اثارة وجذب قراءة
خلاصه الامر ان الشاعر صلاح حاج سعيد يمر ب محنه صحيه ونسأل رب العرش العظيم ان يتلطف به وييسر له اسباب الشفاء بدعوات المحبين الصادقين و باطباء يشخصون الداء والدواء