أعالي الناس - برعي محمد دفع الله

07:03 PM April, 25 2022

سودانيز اون لاين
أبوذر بابكر-
مكتبتى
رابط مختصر

كأنه علم في راسه نار

زي ما قالت تماضر بنت عمر بن الشريد، الخنساء
في وصف أخيها

ونقوله نحن كمان برضو في وصف برعي

يكفي انك تقول برعي وبس
ويكون المقصود هو ذلك الإنسان المترع بالفن والموسيقى والإبداع حد الثمالة

زي لما تقول النيل او الشمس او الخريف
ما بتكون محتاج مزيد من الوصف والتعريف

برعي حدث فريد ومختلف في حياة الفن الموسيقي في السودان
وكان نتاج جميل وعامر وحافل لمجتمع وبيئة المدينة وما توفر فيها من معينات مساعدة ومحفزة

برعي ايضا كان نتاج إبداعي لمؤسسة الخدمة المدنية في السودان
بكل عنفوانها وترتيبها ونظامها وتاسيسها الراسخ والشامخ
زيه زي بقية اقرانه من المبدعين الطلعو من رحم الخدمة المدنية
سهولة الحياة وسلاسة العيش وقتها مع الحياة الاجتماعية الراقية والمنظمة والمشجعة، كل دا ساهم في خلق منظومات إبداعية جميلة وخلاقة في كل ضروب الفعل الابداعي والفني في مجتمعات السودان
سواء في الموسيقى او الكتابة او المسرح او الرياضة

برعي مثال قياسي لكل التفاعلات السوسيولوجية دي

موهبة وشغف برعي بالموسيقى، كانت هي الطريق المنير ليه عشان يمشي كل المشوار الانيق والجميل دا
ويبدع ويخلق كل النتاج العبقري والما اظن توفر عند أي من السابقين واللاحقين لبرعي

مهارة وتفرد في العزف على العود
جدية والتزام بناصية الفن الحقيقي والملتزم
مع استصحاب رسالة فنية واضحة السمات والمعالم

برعي أنجز خلال مشواره الابداعي ما لا يقل عن ٣٥٠ عمل
من الحان موسيقي بحتة وألحان نصوص أغنيات
وما اعتقد في موسيقار يبز ويتفوق علي برعي في عدد المقطوعات والمؤلفات الموسيقية، لا سودانيا ولا اقليميا ولا حتى عالميا
والاحصاءات خير دليل وشاهد

غير الحان الاغنيات المبذولة لكبار اساطين الطرب في السودان
برعي اتعرف واشتهر باعماله الموسيقية البحتة بتاليف عبقري وسبك محكم وميلودية راقية ومتفردة
ونال بيها ارفع الجوائز وحاز بيها علي أعلى درجات وشهادات التقدير

ولو اخدنا مجرد نماذج وامثلة قليلة لأعمال برعي الموسيقية فقط، غير الاغنيات، بنلقى

المروج الخضراء
ينابيع المياه
أجراس المعبد
رمال توتي
أجري يا نيل الحياة
عهد الرشيد
هليت يا عيد
أحب مكان عندي السودان
أنا إفريقي أنا سوداني
هل أنت معي
ليالي الخرطوم لاح الصباح
قطار الشمال
الوصية
ملتقى النيلين
أحب يا دنيا
جمال دنيانا
ليل وكأس وشفاه
يا نديمي
داك الصباح
أيامنا
عروس الرمال
خرير الجدول
ميدالية
فرحة شعب
ومقطوعة هنادي

وجزء من الأعمال دي طلع للمتلقي في أغنيات ومقطوعات في نفس الوقت

اما سفر خلود برعي النفعم والنضاح بقمة الجمال
فكان ارتباطه العجيب بسلطان الطرب، عبد العزيز محمد داود

وكأنهم الاتنين زي النيل الأزرق والنيل الأبيض
اتلاقو في مقرن الإبداع وشكلو وخلقو لينا النيل
نيل عظيم وفخيم ومعطاء وكريم من البذل السامي وساق وسمح وجميل

ودا موضوع تاني

كل المحبة والتقدير والعرفان والامتنان
لبرعي

علي تجميل حياتنا بابداعه وفنه وتجلياته الخالدة ابدا

المرحوم برعي مدرسة فريدة من نوعها