وش الزول الفي القمر

05:43 PM April, 20 2022

سودانيز اون لاين
أبوذر بابكر-
مكتبتى
رابط مختصر

الاسبوع الفات
منتصف الشهر بالتقويم القمري/الهجري

كلما يصادف والزول يكون في السودان، بتتوفر فرصة الاندغام والامتزاج بكل عناصر الطبيعة
البراح والهواء والليل الفسيح والنهار المريح
ومن ضمن مقاعد الأنس البهيج والمريح، الانضمام ليلا والجلوس في حضرة ستنا القمرا

ومن زمن بعيد، قامت ونمت علاقة الفة بالقمر
بالذات في الأيام البتكون فيها القمرا في اوج وذروة تبرجها الجميل

وطوالي تجي في البال كلمات الشاعر مسعد حنفي

وجه القمر سافر
يضوي شعاع ونور وافر
يا بدر ساءلك
جاوب ليش أخوك نافر

من حيه السباع تنتر
ومن رمشه السهم طافر

ريم يسحب لسيف لحظو
وآخر بالسلاح غافر

يادمع أدفق ودع يا قلب سافر

شوقي لي ضافر

هل بي نظرتك أظفر يا من بالقلوب ظافر

الخ كلام الأغنية الباذخة

لكن في وجه ذلك القمر السافر
كنت وانا لسه طفل، ولغاية قبل كم يوم
بشوف صورة وش زول
بكامل التفاصيل
زول وشه ظاهر بالجنبه، Profile

وفي ايام مجلة الدوحة القطرية، المجلة السمحة وتريانه ديك
في واحد من الاعداد كانت صورة الغلاف ل الدكتور طه حسين
واذكر انها كانت من نوع الصور المعالج في شكل رسم او تشكيل بنفس الدقة في ملامح وتفاصيل الوجه

شفتها وطوالي مرقت اكورك زي ارخميدس

Eureka eureka

وجدتها وجدتها

نفس الصورة الفي غلاف المجلة هي نفسها صورة الوش الفي القمرا

قبل كم يوم شفت القمرا وشفت الوش الفيها

مشيت فتشت الدواليب والكراتين عشان القى عدد مجلة الدوحة

وبرضو تاني قعدت اكورك كوراك عمنا ارخميدس

لقيتها والله
يعتليها الغبار ويستوطنها الحنين

الا ليت ايام الصفاء والبهاء والنقاء جديد

ويا ليتنا عدنا او عادت الايام

قاتل الله النوستالجيا

وحيا الله وجه القمر السافر

وحيظل وش الزول الفيهو خالد ومقيمه

كان وش طه حسين او طه القرشي

والبقاء لهذا الحنين المرير

بالله زول يعاين للوش دا
ويشاركنا التأمل

يمكن يقوم يتلفت علينا

ويقول حاجه

اي حاجه

في سنوات الطفولة ، عند النظر إلى ذلك الوجه العجيب، كان يننابني خليط من الخوف والطمأنينة .. العذاب والرحمة
خاصة لما احدق للسماء ومزاجي مضطرب(خاصة لما كنت احضر خطبة صلاة جمعة والامام أكثر فيها من الويل والعذاب الذي ينتظرنا يوم القيامة)
ربما إرتبط ذلك أيضا بالترهيب الذي كان يمارسه اهلنا علينا حين يجبرونا على النوم (يهددونا بهذا الوش أذا لم نغمض أعيننا وننوم)

بعد شفت صورة طه حسن وقارنتها بالصورة الفي قمر
قلت خلاص طه حسين دا اكيد جان
مافي سبب بخلي صورته تظهر هناك

وبعد قريت كتابه عن الشعر الجاهلي
اتاكدت فعلا انه جان

يا صديقي
انها ليالي الغياب واجترار الذكريات لحظة الإلتقاء بطلة بلوغه بدرا كاملا
يا صديقي ها أنت تهرب من أحلام ابناء الغياب لتكتب عن أحلام القمر ..حلا وسطا لاشكالية الفراق والوحدة...دهشة تأخذ مدمني السهر أمثالي إلى اقصي درجات الخيال...فيهبون احلامهم غير المستردة لوجه القمر....
ياصديقي
ينام القمر فيحلم العاشقون وابناء الغياب به ...وينام العشاق وابناء الغياب فيحلم القمر بهم...سر تتبادله ارواح ابناء الغياب في لحظات الحنين والضعف الناجم من عبور الذكريات احيانا في ليال مقمرة...ياصديقي لا يحلم القمر الا باحلام مريديه ومدمني النظر اليه
ورغم ذلك لا يلعن العشاق لحظات الغياب لأنها تهبهم متعة الشوق الحارق..ومتعة نظم القصيد في الغزل وغناء البعاد والسهر ...(لولاها ماغنت البنيات ....الحبيب وين) .... هي من وهبها خضر بشير إيقاع صوته النيلي الفاره وغناها نيابة عن كل العاشقات..ياقسيم الريد... تعال لي وتعااال
لك ولمدّاحي القمر تحايا وغناء

يا صديقي الأخضر
يا عبد الله

بل هي نوافذ الهروب إلى الداخل
نأوي إلى حلم يعصمنا من التعب
ويعفينا ولو قليلا من مباكدة الركض المضني
في دوائر هذا التوجس المقيم

سنغني للقمر
اغنية في أعالي تبرجها الفخيم
شاهدنا المساء
وبعض امنيات