أعالي الناس - هاشم صديق

11:15 PM April, 17 2022

سودانيز اون لاين
أبوذر بابكر-
مكتبتى
رابط مختصر

هاشم الصديق

قطعا الاسم جا بالصدفة
لكن الأكيد صادفت الصدفة وانطبق الإسم علي الوصف
تكريسا وتصديقا للمعنى

هاشم اكيد من أعالي الناس
تربع على ذرى وهامات الفعل الابداعي الإنساني السامي

اي نهر عنده ضفتين اتنين
لكن هاشم النهر عنده ضفاف كتيرة وكبيرة ومثيرة وجديرة
جديرة بالوقوف عندها وفيها
هاشم الإنسان المنتمي للأرض، الأرض الخصيبة الحبيبة
بإنسانها الحقيقي الما مزيف
وبارضها الكريمة الغنية والمعطاءة

هاشم الدرامي الواعي برسالته
رسالة نبتت من عمق دواخل الحس الإنساني
رسالة طلعت من فجاج الوعي العامر بكل الخير والجمال
رسالة مرقت وعمت بوادي القلوب وحواضر العقول

هاشم الأكاديمي المعلم
يهب العالمين علما يبذره في أرضهم
عشان يستطيل ويثمر وعي وتنوير وخلق إبداعي ينفع الناس

هاشم الشاعر، واي شاعر
فتى غض نضير، يخلق ملحمة الياذية السمات، واوديسية القسمات
ملحمة تصبح نشيد انشاد وتمسي فتحا يسير بذكرها العباد

هاشم شاعر الغناء الذي يسمن ويغني من كل جدب روحي وكل يروي ايما ظمأ وقحط وجدب

هاشم لا يدانى في شعر الأغاني
يأتيك بالدهشة في الصورة من حيث لا تحتسب مسامعك
ويفاجئ مواطن الاحساس فيك باخيلة ومعاني ليس كمثلها شيء

وديدنه في كل دا، هو الصدق
هاشم لا يصنع ولا يصطنع، فهو نقيض الزيف والكذب

مثله مثل بقية الصادقين في كون غنانا البديع
بازرعة والتجاني سعيد ومحجوب سراج
منهم تمرق المعاني بهية وندية وسخية
وجواهم بتتفاعل المشاعر صدقا وتفردا

والوصف وتشكيل الصورة عند هاشم عالم مهول من التجلي والعبقرية
بذ بيه الأوائل وفات بيه الحاضرين واعجز بيه الجادين

حروف اسمك
جمال الفال
وراحة البال
وهجعة زول
بعد ترحال

نجوم ركت علي الياسمين

انا لله خالق الجمال يا هاشم

فرح في عين
جمالا حزين
اساور في ايدين طفلة
بتحفظ في كتاب الدين
زفاف عاشقين
بعد فرقة وسط باقات
دعا الطيبين

ويقول
حروف اسمك
عقد منضوم بخيط النور
وطلة وردة من السور

والله وتالله يا هاشم قد اتيت بما لم تستطعه اوائل القادمين من وادي عبقر

دا فقط مجرد انموذج من تجليات هاشم العالية

ودا غير "كلام للحلوة" و "حاجة فيك" و "اضحكي" و "النهاية"
وغيرها وغيرها من فرائد الإبداع الهاشمي

ولاحقا بإذن خالق الجمال
نعرج علي تجليات هاشم الدرامية

حياك الخالق يا هاشم
واسبغ عليك جلابيب العافية والسعادة والحبور

شاعرنا المحترم، أبو ذر بابكر لك التحايا والسلام~
من يوم ما عرفت قصة وتاريخ أبو ذر الغفارى زمان، عندى ليه إحترام وإعجاب لتوحده وإنسانيته|
فعاشت الأسماء! رغما عن إنه إعراب الإسم بيجهجهنى حسب موقعه من الجملة
*الجزء دا من قصيدة هاشم صديق(حاجة فيك) :

حاجة زى ..نقر الأصابع
لمـّا ترتاح .. لى الموسيقى

بيزكرنى أمى لما تكون فى موسيقى شغالة وهى بأصابعها تنقر فى حافات الكرسى بالجنبتين.
كلمات الشاعر هاشم صديق تصوير ما عادى لموقف ومشاعر الإنسان وتجاوبه.

شاعرنا المفضال
أبوذر بابكر
إحتارت اليراع كيف يسكب الأبجدية ويرسمها
فالتعبير المتداول الذي يشابه الموقف - بإفاءك شاعرنا الجميل
المبدع، الموسوعة الفنية الأستاذ هاشم صديق ما يستحق منا من تمجيد مستحق -
بِـ {{ أوفيت وكفيت }}
أراني أنصفتك وظلمته فكلامك طيًب وأعجبني وهاشم قامته أعلى
فشكراً لك على تنشيط الذاكرة حيث يسكن الجمال
مرفق:
صادق الدعوات له بالصحة والعافية

إسماعيل حميم

حبيبنا الحميم

حياك الله
وسقاك من غيثه الهميم
وجادك من خيره العميم

هاشم صديق ما بنوفيه حقه ولا بنقدر نجزل ليه التقدير
مهما حاولنا

ومعاك نسأل الخالق يواليه بكل ما يتمنى وينتهي

وتحية ومحبة ليك يا إسماعيل

تحياتي اختنا العزيزة هدى

مع انه "أبوذر" اصلا كنية زي ما بتقول العرب
وهم اساسا كانو بطلقو ال كنية علي اي شخص
رجل أو امرأة
والكنية بتبدأ ب "ابو" أو "أم"
غير اللقب طبعا

لكن ناسنا في السودان استعملو الكنية كاسم

تصريف "ابو" في الأعراب بتكون تبع الأسماء الخمسة
جاء ابوذر
رأيت اباذر
اخذت من ابي ذر

كدا يعني
ما صعبة

ههههههه

هاشم مثال للمبدع الحقيقي المتكامل

ربنا يديه العافية والسعادة زي ما اسعدنا

Quote: اساور في ايدين طفلة بتحفظ في كتاب الدين

شاعرنا الجميل أبوذر .. صدقني انت انسان في قمة الروعة
حبيبنا أبوذر

أجمل عبارة قرأتها في وصف الطهارة والنقاء والبراءة لم يسبقه شاعر
في مثل هذا الوصف .. هذا السمو في عالم هاشم الصديق فوق تصور البشر
ربما كان في عالم آخر غير هذا العالم المحسوس

( اساور ، طفلة ، كتاب الدين )
الاساور معروفة درجة النقاء وما أجمل السوار في يد طفلة
والطفلة النقاء والبراءة ويدها التي لم تلوث
كتاب الدين رمز الطهر في كل الديانات

هاشم صديق شاعرنا الجميل حلق بنا في فضاء آخر

شكرا أبوذر

قريبنا سيد العيون التلاتة

كيفنك ياخ وان شاء الله بخير وسعادة

تعرف هاشم دا
عبارة عن مجموعة من الأرواح المبدعة الخلاقة
في انسان واحد

كورجة أرواح سمحة

مفردة كورجة دي يا علي، كلمة فارسية، معناها كمية او مجموعة
وقطعت المسافات البعيدة دي كلها واستوطنت في عامية السودانيين

وصلت كيف الله اعلم
هاشم دا كورجة حاجات جميلة ومدهشة

عوافي يا صنديد
يا الصديق

طالبين السماح يا زول

نضب معين الكتابة من تالانا والله يا هاشم

كنا متمنين نكابرك ونكتب ليك ونواسيك

لكن ينظر يفاد

وبينا لسه الأيام جايه ونتلاقى
زى ملاقاتنا في بانت ديك
غرب النيل، شرق الجمال

هسه ما لقينا غير إجترار كتاباتنا القديمة

نتصبر بيها
الى أن يشاء الخالق ويفك عقدة اللسان
وحال الإنسان

هلا قريبى الترجمان والشاعر
ابوذر بابكر
فقط استرد انفاسى
واعود لنافذتك هذه
عن الشاعر والرمز الوطنى
الاخ الصديق هاشم صديق

الخرطوم- سوداميديا
أعلنت شركة تاركو للطيران في بيان مقتضب عبر منصتها، أنها تتشرف بنقل وتسهيل إجراءات السفر للشاعر القامة، هاشم صديق كما ترسل باقة من الدعوات الصالحات بالشفاء العاجل له ولكل مبدعي ورموز البلاد.

وتداول ناشطون صورة منسوبة للشاعر هاشم صديق وهو محمول على عربة (كارو) وهو مريض، مما أحدث موجة من الحزن على مرتادي مواقع التواصل الإجتماعي وحث شركة تاركو للطيران لقيادة زمام هذه المبادرة.

الواحد هسي يقول شنو في هاشم صديق حفيد المك ناصر

احمد ياسين

تحية عالية من مقام دو 4

كيفك يا موسيقار

قول في هاشم:

في حضرة روحك
تبقى حروف الغنيه بيارق
وفي ضل دوحك
نفرش أمل المنيه نمارق

تحية وسلام أخانا حيدر

كتر خير ناس تاركو

تب ما قصرو

ودا اقل القليل في حق الناس العوالي

ازيك يا بدر

كيفنك وكيف العقاب

دي كتابة قديمة عن سيدنا هاشم
من بداية السنة الفاتت

للأسف الآن نضب معين النضمي ونشف مداد الكتابة
الواحد بقى متبلد ومتجمد ومتكلس

والبطن طامه زي ما بتقول المقولة حقتنا ديك البتبدا ب الحِله

راجين كلامك يا بدر عن شيخنا الهاشم الصديق

أعالي الناس

كان من المفترض تكون سلسلة بنفس الإسم
لتمجيد وشكر ومحبة كتير من الناس العوالي في بلدنا المأزوم الحزين
في مختلف الحقول والضروب والمجالات

ولكن

تفرقت الكتابة وحروفها
أيدي سبأ

بعد سيل العرم المنبري