حأطرح رقبتي كاتب ..

03:30 PM April, 16 2022

سودانيز اون لاين
يحي قباني-فى الدنيا العجيبة
مكتبتى
رابط مختصر

بما انه الكتابة هِملَت .. :)

و بما انه اي زول عنده شوية قصص قديمة قام حكاها في زمن لا يعرف فيه الناس اي شي عن الماضي ..

و بما انه اي زول .. بعرف زول تاني عنده شوية قصص قديمة قام (استلفها) ثم ادعاها ثم حكاها في زمن لا يعرف فيه الناس اي شي عن الماضي ..

فكما قال احد الاخوة هاهنا .. المافي شنو؟

اهم مافي الامر .. النقد مرفوض .. لانكم حتنقدو شنو ؟ ما دي قصص قديمة و بنحكيها .. :) و بعدين نفرضها عليكم تحت مسمى نص ادبي ..

انا ما حاكتب (قصص) جديده (قديمة) .. حاليا .. فقط ساعيد تدوير كتابات كنت قد كتبتها من قبل:

القصة الأولى:

ميز الموظفين
______________

زمان في السودان كل مصلحة حكومية عندها فرع في جميع مدن السودان ...وكل فرع بيتبعه بيت للموظفين او ميز كما كان يسمي ..

احد الاخوان الله يطراهو بالخير كان مفتش ضرائب في كوستي في السبعينات .. وكان عزابي .. فساكن هو وكل الشباب الموظفين في مصلحة الضرائب في الميز ..

المن الخرطوم .. المن مدني .. المن الفاشر .. المهم كلهم عايشين في ذلك الميز وبرامجهم معروفة ..

كشاتين .. والذى منه ..

المهم في نهاية فترة خدمة اخوي .. كان العرف انو المفتش الجديد يجي ...وتكون فترة تسليم و تسلم شهر علي الاقل ..

وبما انو المفتش الجديد عزابي قام نزل مع المجموعة في الميز .. وصل كوستي يوم الأربعاء بالليل .. والجماعة منتظرنه .. قاشين حوشهم

مفرشين سرايرهم .. وراشين الضفرة .. وراجين زولنا .. المهم وصل ..وكان رجل سكوت .. قالو ليهو داك دولابك ..وهداك سريرك ..

صاحبنا جاي تعبان رقد نام طوالي ..

صبحو الخميس ماشين علي المكتب .. قال هو تعبان من السفرية فحيرتاح الخميس و يبدأ العمل من يوم السبت ..

جماعتنا مقلقين داير يعرفو مويتو شنو .. وصلو البيت الساعة 2:30 صاحبنا راااقد في سريرو ..

المهم سوطك سوطك عملو الغدا صاحبنا ما مد يده بالمساعده ..لكن قعد اكل و فات سريره تاني رقد ..

اها بعد شراب الشاي قالو ليهو .. يا استاذ الليلة في كورة حارة جدا بين الوطن و الرابطة .. تمشي معانا .. ؟

قال لا شكرا والله انا ما عندى قضية مع الكورة دي ..

رجعوا من الكوره .. لقوهو رااقد في سريرو .. قال ليهو والله الليلة في فلم عالمي في السينما تمشي معانا ؟

قال لا شكرا .. والله انا ما عندي قضية مع السينما دي ..

رجعوا الشباب بعد السينما شدوا حلتهم ( ما الدنيا خميس ) ..ودفرو اخونا قالو ليهو ما تشوف لينا لو الراجل ده بيفضل العرقي ولا نجيب ليهو شرى ؟.

أخونا قام سألو قال ليهو كيف شرابك ؟

قال لا والله .. انا ما عندي اي قضية مع الخمرة دي ..

شدو تربيزتهم .. وقالو ليهو وست ولا حريق ؟

قال والله انا ماعندي قضية مع الكشاتين دي ..!!!

لما بقت الساعة 10 قالو ليهو ياخي في شابات ظريفات كده بجو يتونسوا معانا .. تحب نكلمهم يجيبوا ليك واحده زيادة ..

قال لا والله انا ما عندي قضية مع الأشياء دي ..

اها جماعتنا قالو بسسسس .. صاحبنا أظنو مولانا.. لا كشتينه لا كاس لا سينما لا كورة .. بس ياهو مولّانا ..

قامو يوم الجمعة من بدري .. غسلو جلاليبهم وكوو عممهم ..

و مشو لي صاحبنا قال ليهو اجهز عشان نمشي صلاة الجمعة من بدري ونقعد في الصفوف الأمامية ..

صاحبنا في اتكايتو الفي سريرو قال ليهم ..لا والله انا ما عندي اي قضية مع الصلاة دي !!!

الجماعة اتلفتوا علي اخونا مخلوعين ..

يضحك اخونا قاليهم ..

انا نقلوني .. لكن الزول الجابو ليكم ده اظنه ( شيطان ما بني آدم ) ..حلو ( قضيتكم ) معاهو بي طريقتكم ..!!!!
________________________________

القصة رقم تنين .. كنت قد (سردتها) ردا على صديقي الجميل ابونوره حينما سمع بعض القصص فقال لي شكلك طلعت بتاع بنقو يا عمك .. و انا لم اجربه: :) :

حبيب نوره ..

لو عاد بي الزمان الي سنوات ( الضياع ) .. لجربته ..

اقرب ما وصلت اليه من ذلك المدعو ( البنقو ) اني انسطلت بالريحة في جلساتي مع بعض الاخوان المنصقعين ..

وكنت منبهرا من قدرة احدهم بلف السجارة تلاتة كرت .. و كان يدعوها العروس ..

كان حريفا و سريعا .. ولا يخطئ في تلك العملية بتاتاً .. و كانما خلق ( بُنْصُرُه ) و لسانه لعملية اللف تلك ..

كنا يا حبيبها نجلس تحت شجرة الليمونة امام سينما النيل الأزرق .. جلسات غنائية مبهرة

وكان منا من يأتي من اجل الانس و البهجة .. ومن يأتي لشرب كاسين .. ومن يدخن تلك الملعونة ..

اذكر قصة بطلها احد الزملاء ..

كان يدخن البنقو ( إسكتو ) .. ويشرب الوسكي ( إسكتوا ) ايضا ..

جاء الي جلستنا .. وكانت الاغنية هب النسيم يا ظبية لعثمان حسين .. و الليل أنس و الهواء عليل ..

وعند انتهاء الاغنية قرر الشباب ان يتباري في رمي القوارير الفارغة في النيل .. لمعرفة من سيرمي ابعد ..

وكان صديقنا ( الإسكتو ) رجلا انيقا هادئا .. ولكن فيما يبدو مع نسمة هواء عليل ربطت اموره بعضها ببعضٍ ..

قرر ان يتنازل و يتباري معنا ..

وقف صديقنا وقفة الفارس ..و سينما النيل الأزرق من خلفه و النيل الأزرق امامه .. والدنيا ليل .. فقط القمر الساطع ينير صفحة المياه المسرعة ..

برم صاحبنا يده ممسكا بزجاجة .. و طوح بها بكل ما اوتي من قوة .. وكلنا ينظر نحو النيل .. ننتظر مستقرها ..

وفجأه نسمع .. ( كشلووووو ) .. تكسرت الزجاجة .. وابتسم صاحبنا وقال ..ناس بحري جاهم بلا ..

ما زلنا نضحك .. فالزجاجة طارت الي الخلف وتكسرت في شارع الزلط امام سينما النيل الأزرق ..

يحي قباني
تاريخ التسجيل: 08-20-2012
مجموع المشاركات: 17212
للتواصل معنا

FaceBook
تويتر Twitter
YouTube

20 عاما من العطاء و الصمود
Re: حأطرح رقبتي كاتب .. (Re: يحي قباني)

لاحظت فوق اني كتبت القصة رقم (تنين) بدلا عن اتنين .. اخطاء الكتاب مغفوره ..

القصة رقم تلاتة .. و ساتوقف الى حين بعدها .. ثم اعود ..::

القصة بطلها اللاعب الحريف جدا ولد امدر .. (كَلـْـبـُـــــو ) .. كابتن فريق ( ود نوباوي ) ..

في اعتقادي ان كَلـْـبـُـــــو يعد من احرف من لمس المستديره .. وانا رايته عن قرب في ميدان صغير مجاور لمنزل صديقي جلال صالح في ابروف البحر ..

مقابل محل ازهري ( الميكانيكي ) اذكي مكانيكي في السودان .. ولي معه قصة محيره في اصلاح كاربريتر سيارتي الكريسيدا ..

كان كَلـْـبـُـــــو يلعب للتسلية مع اولاد الحي في ذلك المربع الصغير .. وكانت له سيطرة لم اراها الا عند طيب الذكر ( ميسي )

الفرق ان كلـــبـــو كان مشاكسا جدا ..

كانت كابتن ود نوباوي وكانت لهم مباراه مصيرية .. فاجتمع المدرب باللعيبة ووضعوا خطة اللعب ..

ووقف كلــبــو مخاطبا التيم قائلا ( شوفو .. انحنا لو استمرينا 11 لاعب لغاية نهاية المباراه الناس ديل ما بغلبونا ..

هدو النفس .. وابعدوا من المشاكسات عشان ما يطردوا مننا لاعب ) ..

كلام زي الورد !!!

بدأت المباراه ... وبعد خمسه دقايق فقط ...اشترك كلــبــو في قفزة ( عادية ) مع احد المهاجمين ...وكان هذا المهاجم قد قام ( بكسر ) كلــبــو في مباراه قديمة ...

واذا بكَلـْـبـُـــــو (يغمت ) المدافع في الارض .. وهنا صفر الحكم و اعطاه البطاقة الحمرا ..

لم نفهم لماذا بطاقة حمراء ( مرة واحده ) ..

الي ان اكتشفنا ان الكابتن الذى كان يوصي لاعبيه بالتحلي بالصبر .. كان يحمل ( طوبة ) داخل قميصه المحشي ..للإنتقام من ذلك المدافع ..
_______________________________
هكذا كانت الكورة ..سألت مره الراحل سامي عزالدين ايام دورة سيكافا عن الفاولات الخشنة .. وهل بالفعل يقوم اللاعب بالإعتذار ؟؟ لاننا في المدرجات نجده ارتكب الفاول

ثم يذهب للاعب المضروب و يربت علي كتفه ..وهنا تهلل الجماهير علي الاخلاق الحميده ..

ضحك سامي وقال .. في معظم الاحوال ..يرتكب الفاول .. ثم بالفعل تذهب و تربت علي كتف المضروب .. ولكن ما لا تعرفوه ..

ان الضارب يربت علي كتف المضروب وهو يقول ..( انت لسه شفت حاجة .. المره الجاية بشيلوك بالنقالة ) ..

تحياتى أخى باشمهندس قبانى~

Quote: انا نقلوني .. لكن الزول الجابو ليكم ده اظنه ( شيطان ما بني آدم ) ..حلو ( قضيتكم ) معاهو بي طريقتكم ..!!!!

هههههههها
نوع قصتك. ى يعملوا منها كتب عديل..
*كتاب الراحل خليل الياس "كوبنهاجن"
ياها قصص زى دى (عن نضاله)
أها يوم رحيله ، قعدوا يفكروا نكلمها كيف ، وأنا كنت عرفت وماشة على بيته
وزعلانة من أهلى ،إستلفت جملة من كتابه "قلت ليهم - أنا كان ما بعرف أكتب ، جردل البوهية ما بعرف أشيله"
#جملتك الفوق دى من كثرت ما عجبتنى حأستلفها منك😀

يا أخي، معقول قصصي بهذا الملل السردي التقليدي؟!
عموماً هذا البوست ممكن يكون مرآة جيدة لي،
ولو طلعت كتاباتي هي بنفس هذا الملل في الحكي،
ورب الكعبة محتاج أدفع تعويض للناس لهذا الأذى

بعدين في مقدمة البوست لا تبني المخاطبة للمجهول، قول؛
أقصد الكاتب العبيط أبوبكر عباس
لأنو البوست سوف يصبح في المكتبة ولو جاء زول بعد زمن طويل يقرأ البوست،
سوف يفتقد سياق البوست

Quote: تحياتى أخى باشمهندس قبانى~ Quote: انا نقلوني .. لكن الزول الجابو ليكم ده اظنه ( شيطان ما بني آدم ) ..حلو ( قضيتكم ) معاهو بي طريقتكم ..!!!! هههههههها نوع قصتك. ى يعملوا منها كتب عديل.. *كتاب الراحل خليل الياس "كوبنهاجن" ياها قصص زى دى (عن نضاله) أها يوم رحيله ، قعدوا يفكروا نكلمها كيف ، وأنا كنت عرفت وماشة على بيته وزعلانة من أهلى ،إستلفت جملة من كتابه "قلت ليهم - أنا كان ما بعرف أكتب ، جردل البوهية ما بعرف أشيله" #جملتك الفوق دى من كثرت ما عجبتنى حأستلفها منك😀

اختنا الواعية هدوية..

اشكرك على الاطراء و التقريظ .. 🙂

استلفي طوااالي و لا يهمك من زول ..

سعيد بمرورك جدا والله ..

Quote: ا أخي، معقول قصصي بهذا الملل السردي التقليدي؟! عموماً هذا البوست ممكن يكون مرآة جيدة لي، ولو طلعت كتاباتي هي بنفس هذا الملل في الحكي، ورب الكعبة محتاج أدفع تعويض للناس لهذا الأذى بعدين في مقدمة البوست لا تبني المخاطبة للمجهول، قول؛ أقصد الكاتب العبيط أبوبكر عباس لأنو البوست سوف يصبح في المكتبة ولو جاء زول بعد زمن طويل يقرأ البوست، سوف يفتقد سياق البوست

يا (زميل) .. لماذا الغضب .. هل هي غيرة الادباء ؟

و هل لك رأي في ان الحكايات القديمة تصلح ان تكون نص ادبي ؟

فلتكتب .. و دع غيرك يكتب .. فالابداع لا سقف له .. و النص الادبي ليس (اسطمبه) ..

نقدك لا يعتد به .. لانه نابع من دوافع غيره ليس الا ..

اقرأ فقط .. لعلك تستفيد ..

ثم .. لماذا تصف نفسك بالكاتب العبيط ؟ حاشاك .. انا لم اقل ذلك ..

الكتابه لها اهلها ..

يا أستاذ قباني،
موضوع الخلاف مع الخواض أفندي هو هل كتابات المستنير هي كتابات يوميات عادية زي كتاباتك دي ولّ كتابات فيها ابداع سردي مغاير ويمكن أن تصنف كتابات أدبية متميزة؟
يعني البوست دا تحصيل حاصل، كأنك تونست مع الخواض وحابي تردد وجهة نظره بايراد نماذج أخرى من كتاباتك غير نماذج عبد المنعم.

خلينا نكسب زمن ونركز على موضوع الهلال
وما في زول بمنعك اكتب
أنا فقط أقاتل لما في ظني أنني أديب متميز

اكتبوا كلكم من غير شكل كتاباتكم جميلة ونحن محتاجين نقرا ……وبحرى جاها بلا

Quote: يا أستاذ قباني، موضوع الخلاف مع الخواض أفندي هو هل كتابات المستنير هي كتابات يوميات عادية زي كتاباتك دي ولّ كتابات فيها ابداع سردي مغاير ويمكن أن تصنف كتابات أدبية متميزة؟ يعني البوست دا تحصيل حاصل، كأنك تونست مع الخواض وحابي تردد وجهة نظره بايراد نماذج أخرى من كتاباتك غير نماذج عبد المنعم. خلينا نكسب زمن ونركز على موضوع الهلال وما في زول بمنعك اكتب أنا فقط أقاتل لما في ظني أنني أديب متميز

اولا استخدامك للقب المستنير اصلا يقلل من شأنك و يشكك في كل ما تكتب و انت تعلم انك (استلفت) الكثير من غيرك لتكملة كتاباتك
المستنير الذي نعرف حيا يرزق .. فقط زهد الكتابه هنا و قد يكون قد انزلق في الفيس بوك كالكثيرين ..
فاستلافك للقب غيرك يوضح انك لا تتردد في اخذ ما ليس لك و تنسبه الى نفسك ..

ما علينا ..

الخواض رجل اديب .. بيريود ..

Quote: اكتبوا كلكم من غير شكل كتاباتكم جميلة ونحن محتاجين نقرا ……وبحرى جاها بلا

اميره يا صديقتي ..

مافي شكل و حياتك .. صاحبي ده في راسو ريشة بس 🙂

اشكرك على الاطراء .. و لك الوعد في ان اواصل .. مع قليل من الفواصل ..

سلام و احترام يا باشمنهدس و رمضان كريم و لضيفك الكرام التحية و التقدير

مرحب بيك كاتبا و كلنا تعلمنا الكتابة هنا و من هنا تخرج كثيرا من الكتاب و مشاهيري اللايفات و غير اللايفات... بعضهم اصبح كتابا مرموقين،واخرون اصحاب اعمدة،و كتاب ثوريين اصبحوا مع الانقلابيين وضد الثورة و الثوار ...تخيل...

عوافي يا قباني

وكل الزملاء العزاز

الروح هي البتكب
والاحساس حبر الكتابة

اكتب ياخ
فكيفما كتبت، يصلنا خراجك

ومن هنا كمان
رسالة صغيرونه لحبيبنا بكري
ازيك يا حاج بكري

يمين بالله فضلك علينا وفينا

حده السماء

Quote: سلام و احترام يا باشمنهدس و رمضان كريم و لضيفك الكرام التحية و التقدير مرحب بيك كاتبا و كلنا تعلمنا الكتابة هنا و من هنا تخرج كثيرا من الكتاب و مشاهيري اللايفات و غير اللايفات... بعضهم اصبح كتابا مرموقين،واخرون اصحاب اعمدة،و كتاب ثوريين اصبحوا مع الانقلابيين وضد الثورة و الثوار ...تخيل...

زارتنا البركه يا هندسة ..

و مافي شك سودانيز اونلاين صاحبة افضال على الكثيرين ..

الله يديك الف عافية يا جميل ..

و حنستمر نكتب هنا .. و لن ننزلق الى مزالق السوشيال ميديا ..🙂

الكتابات الجيدة يحددها عداد الزوار مش الشللية البغيضة في البورد او الاسافير وعالم الانترنت البهيج
المثقف العربي هو الكائن الوحيد في العالم من يؤمن بنظرية الجوقة والهتيفة والرجرجة
فقط عداد الزوار والترند هنا وفي الاسافير يحدد الكتابات الكبيرة فعلا
https://www.0zz0.com

البورد دا مافيهو شللية يا عادل أمين،

البورد دا مافيهو شللية يا عادل أمين،

Quote: عوافي يا قباني وكل الزملاء العزاز الروح هي البتكب والاحساس حبر الكتابة اكتب ياخ فكيفما كتبت، يصلنا خراجك ومن هنا كمان رسالة صغيرونه لحبيبنا بكري ازيك يا حاج بكري يمين بالله فضلك علينا وفينا حده السماء

شاعرنا الجميل ..

كبفك يا صديقي ..

حقيقة .. لقيت كل حجّاي طرح نفسه كاتب .. فقلت حجيتكم ما بجيتكم .. خيرا جانا و جاكم ..
ما كلنا بنعرف للحجى .. .و ما الف ليلة و ليلة الا حجوة كبيره ..
فلكنتب اذاً .. 🙂

مداخلة بكري أبوبكر عجيبة!
قال لقباني مرحب بيك كاتب، كلنا تعلمنا الكتابة هنا.
يا سيد بكري،
موضوع البوست عن الكتابة الأدبية،
انت وين تعلمتها؟
بعدين قباني لا يمتلك موهبة خيال حتى تقوم بتشجيعه يخوض في هذا الكار.

أكرر
موضوع البوست ليس حرية الكتابة،
إنما الكتابة الأدبية الابداعية

Quote: حقيقة .. لقيت كل حجّاي طرح نفسه كاتب

ههههههههههههههههههه

يجازي محنك يا قبة.

شايف ابوبكر أشار ليك لي موضوع "خواض".
الحقيقة "خواض" شغال بالحتة الفيها الحديدة مع أبوبكر:)
وطلع كتاباتو شمار في مرقه ههههههههه.

بالمناسبة يا قبة انا شايف انك مشروع كاتب خطير-
كسرة: خواض احبطني يا قبة - وقال لي اني محتاج لي سمكرة نصوصي ههههههه
التحيات النواضر لك ول أبوبكر ولكل من مر من هنا.

يا شيخ،
الأديب هو زول حجّاي
ومشروع كتابتي أقرب للحجّاي؛
مشروع كتابة وسط جمهور اسفيري يختلف عن جمهور الحجّاي المحبين له والمستمعين فقط،
في إنو دا جمهور يجمع بين المحبين والكارهين المشاركين في النص عشان كدا بيتولد نص قوي وحي.

يا ابو بكر

الحسد بياكل صاحبه ياخ ..

مفروض تراجع و تتلمس ادواتك الكتابية بعد كتاباتي دي
و تحاول تكتب ./ و يا ريت تكتب حاجاتك انت و ما تعتمد على مواد خارجية تدعم بيها كتابتك
فشنو .. خلي عندك شوية ثقة في رقبتك 🙂

شكرا يا قباني على هذا البوست.

هنا ساتحدث بشكل شخصي.

بوستك يثبت اثباتا قاطعا ان تحليلاتي النقدية قد وصلت الى القرّّاء بشكل بيّن واضح لا شك فيه .

بل انت قمت بتطبيق بعض منها ههههه

باقي ليك "المعيشة الطفيلية" أي التناص الفاشل و "الإغارة" على نصوص الآخرين ..
هههه

لا أبداً يا قبّة،
أنا ما حاسد، أنا محب وعاشق للكتابة الساحرة
وفي هذه اللحظة أعشق صلاح الزين الذي كتب لنا بالأمس الرتينة
كتابة لم أقرأ مثلها ولن أقرأ وحتماً سأشركها في كتاباتي فهو عشق واحد
الكتابة الساحرة كلها متصلة مع بعض.

Quote: يا شيخ، الأديب هو زول حجّاي ومشروع كتابتي أقرب للحجّاي؛ مشروع كتابة وسط جمهور اسفيري يختلف عن جمهور الحجّاي المحبين له والمستمعين فقط، في إنو دا جمهور يجمع بين المحبين والكارهين المشاركين في النص عشان كدا بيتولد نص قوي وحي.

تمام يا ابوبكر
كدي خلينا نسحب إقتباسات الغير من كتباتك - خليها قاعده في السهلة - كويس
وبعدين نشوف "خواض" ح يقول شنو.
اقول "خواض" لأنو ناقد له وزنه - بالرغم من إحباطه لمحاولاتي الأدبية :)

جيب لينا نص هنا يا ابوبكر يكون مافيهو اي إقتباس أو إضافات لأي كاتب آخر وخلينا كلنا نقول رأينا.
إتخيل لي رأي "خواض" أنه يبحث عن نص يقف بمفرده دون أي إتكاءة على نصوص "محشورة " في النص.

طلبك دا يا الشيخ، لا يقل غباءً عن أدوات نقد الخواض أفندي البالية

يعني انا و خواض الاتنين اغبياء في محراب كتاباتك .
ياخي اديتني احساس انك "جابريال جارسيا ماركيز" ههههههه

كسرة: انت ليه متخوف من ايراد "نص" مجرد من اي مادة محشورة فيه حشرآ.

كدي فكر في كلامي ده و "أعد" ضبط المصنع.

منتظرين نصك.

طيب أها فكرت في كلامك؛
النص كان قلت فيهو؛
كنا في راكوبة وقلت لست الشاي ح أحكي ليكم نص ليحيى فضل الله،
حكيتو بتشويق شديد لو سمعتنا سلمى الشيخ كانت أصرت أجي أشتغل معاهم بالاذاعة،
ست الشاي ركزت معاي تمنيت أن تحدث شكلة بالمنبر تحرف البوست.

أوكي بشيل يحيى فضل الله برّة النص
وسلمى سلامة برضو يمكن تطالب تطلع من النص،
وبكري أبوبكر بقول منى شكلة المنبر حقتو

أوكي النص الجديد ح يبقى؛
كنا في راكوبة

أديتني إحساس إنك ماعيز تورد نصك ورافض للفكرة.
بعدين انت ليه متخيل انو اي زول ممكن يكون متابع ماتكتب.
راكوبة شنو يا عمك - جيب لينا الشغل هنا كامل - عشان نحن زاتو نقرأ ونقول رأينا.
لازم تعرف حاجة مهمة جدآ - انو عدد القراء أكثر من عدد النقاد- يبقى انت بتكتب لينا نحن
النقاد بينظروا بي زاوية شوف مختلفة بغرض التقييم والتقويم.
اما تجيب لينا النص هنا او قول لينا وين موجود عشان نقراهو ونقول راينا - جيب اللنك يا ابوبكر.

كسرة: اظنو "خواض" عمل ليك عقدة من النقاش حول كتاباتك ههههههههههه.

التحايا مرفقة بالجمبه.

إيراد المستنير لـ (خارجيات) وردت مرة او مرتين وما فيها عيب طاالما لم ينسبها إلى نفسه
طالعوا نصوصه الاخرى
لا تعمموا فتعموا عن النصوص الدرر
المستنير كاتب مجيد

Quote: حأطرح رقبتي كاتب .. بما انه الكتابة هِملَت .. :)

قباني يا صديقي

اكتب اكتب اكتب ما فى زول ح يحجر عليك الكتابة وانت تملك ادواتها
واهمها التعبير واللغة البسيطة المفهومة والعمق .
بقي شئ مهم جداً وهو : عدم الخوف من النقد ومن الرقابة
اكتب كل ما تؤمن به دون خوف او وجل من كائن من كان بخيال واسع
وخصب .

صدقني يا قباني احياناً اشتري كتاب وابدأ اقرأ فيه ما اكمل صفحات بسيطة
الا ووجدتني طرحته جانباً لافتقاده للروح والمشاعر الانسانية واللغة السهلة .

Quote: كنا في راكوبة

الراكوبة تعيسة حظ:
الراكوبة في الخريف
و
ابوداوود لاعب المريخ أنهى مسيرته الكروية الحافلة حاملا لقب "الراكوبة".

وحده الراحل "سعدالدين ابراهيم"، أعاد الاعتبار الى الراكوبة:

Quote: تدخل رواكيبنا وأوضنا

لم يكتب شعراء الحقيبة عن الراكوبة، كأن يقولوا مثلا:
كنّا في راكوبة نسكر
من غرام مفرح واخضر
هههههه

ربما لانهم شعراء مدينة.
"مدينة " طبعا بالتعريف السوداني هههه

استاذ علاء بعد التحية:
أوعى تشيل القفة هههه

المعيشة الطفيلية"
عبارة معبرة شديد

Quote: استاذ علاء بعد التحية: أوعى تشيل القفة هههه

هههه

وبعدين محمد جبارة لازال يردد :

**راكوبة حرها أحر من حر النهار **

والعزيزة اميرة حسين سبقتنى الى " التناص "

عرفت ليه محمد طه محمد احمد قال اعلام السودان زي اكل المستشفيات
هسى يا قبة كتابتك الابداعية زي اكل المستشفيات وفضائية سودان بكره
ونقد الخواض ده درب كلوريد صوديوم
والغربية جلادونا كمان
والله ذكرتونا البورد سنة 2001 قبل الميلاد

Quote: البورد دا مافيهو شللية يا عادل أمين،

فيه رجرجة
اذا اجتمعو ضرو واذا تفرقو لم يسمع بهم احد
وكبيرهم الذى علمهم (السكر)
اسا مة الخواض


....الرجرجة........الرجرجة....

اهلا اميرة :

شكرا على التقريظ .

والمعيشة الطفيلية تضاف الى راي حيدر التالي:

Quote: إيراد المستنير لـ (خارجيات) وردت مرة او مرتين وما فيها عيب طاالما لم ينسبها إلى نفسه

المشكلة الكبرى ان المثالين يسقطان في امتحانات الابداع والمكاواة والدياكة ،
وهما الغالبان في خطاب المذكور .

اما عادل امين:
لو أدخلنا نصوصك القصصية الى المختبر النقدي ،
فالنتيجة لن تكون في صالحك،
ابتداء من لغتها .

Quote: والمعيشة الطفيلية تضاف الى راي حيدر التالي:

لا معيشة طفيلية لا يحزنون يا استاذ
تضمين اشعار للغير في نصوص ابداعية ليس بجديد بل لايعيب النص في شيء اذا كان يخدمه
ليس بالضرورة ايراد امثلة على ذلك وانت كناقد تعرف ذلك جيدا
-
الناقد عموما ليس وصياً على الكاتب، بل وصي على معايير الكتابة .

يا خواض أفندي،
"الكتابة الابداعية مادة هاربة يصعب الإحاطة بها"
يا لها من جملة عظيمة من كاتبة عاشقة للجمال!
يصعب على الذين لديهم قلب مثلها أن يلمسوا مآلات الكلمات والخيال،
فما بالك برجل متبلد معسم مثلك؟!
أمس سألني صديق جديد باستاربكس،
من أنت يا مستنير؟
قلت ليهو أنا نص متمرد يحاول أن يجد وحدة للجمال
قال لي؛ موحد الجمال هو الله
قلت له: وكيف أحيط به؟
قال لي أكتب وحاطالله هكذا كما ترسمها ماما دومة

Quote: ا معيشة طفيلية لا يحزنون يا استاذ تضمين اشعار للغير في نصوص ابداعية ليس بجديد بل لايعيب النص في شيء اذا كان يخدمه

اهلا حيدر
راجع ملاحظاتي في البوست المغلق بالضبة والمفتاح.
المعيشة الطفيلية هي وصف للنص المركزي للمكاواتي في تناصه مع نص غائب يحتل المساحة كلها ولا يخدم النص المركزي.
وتبدو المعيشة الطفيلية واضحة تماما في العنوان.

عموما في حالتي المكاواة او الدياكة والابداع الفشل هو الثمرة:
بثمارهم تعرفونهم.

بعدين انت يا حيدر خاتف لونين:
ديّاكي على وزن ديامي وترتدي في احايين كثيرة قبعة الناقد من باب الدياكة اللطيفة.

ارى أشلاءك يا مستنير مبعثرة في نواحي المنبر.

لكن ذلك ايضا يسعدك ايما سعادة:
طالما انت مركز تلك البعثرة.

Quote: قال لي أكتب وحاطالله هكذا كما ترسمها ماما دومة

ما قادر ما تمد يدك على كلام غيرك ..

زي ما قال عادل امام .. امو كانت صاحبة امي .. بس كان عندهم داء السلف ..

هسّ يا أميرة في ذمتك، أنا متطفل؟
التطفل زي حياة الناقد القرادة وليس ما أفعله مع نصوص غيري.
لو فتحتي سودانيزاونلاين ولاقنك تلاتة مداخلات واحدة لي والتانية للكاتب المعسم (في بوست أنا ليس طرف فيه)
والثالثة لبكري أبوبكر صاحب المنبر وعندك خيار تفتحي مداخلة واحدة
أي مداخلة سوف تختارين؟
إذاً من المتطفل أنا ولّ انتي ولّ بكري ولّ الخواض أفندي؟

Quote: الكتابات الجيدة يحددها عداد الزوار

جقود ..

كيلة قرنفل و لاااا اردب لوبا عفِن ..

حاشاك من التطفل انا عجبتنى العبارة وقلت يا ريت لو سمعت بيها من زمان (بينى وبين نفسى)

أنتم تتطفلون على إبداعي ويعود ريع تتطفلكم لبكري، وهو بعين قوية يدخل لمناصرة خالي الموهبة دا،
ويقول له أكتب كلنا تعلمنا الكتابة هنا
كتابة شنو الاتعلمتوها؟
كدي أكتب اسمك صاح

طبعا يا با شمهندس قبانى عاجبانى قصصك دى والمفارقات الفيها
خاصة بتاعت الشيطان داك، من أمس كل ما أحاول أحكيها أنا بكون من الضحك غلبنى أصل آخرها،
الشخصية تشبه واحد من أقاربى!
بس عندى سؤال :
ليه إخترت لخيطك دا عنوان خطر كدا ؟
يعنى أو يشابه:
"I would stick my neck out”😀

Quote: ترتدي في احايين كثيرة قبعة الناقد من باب الدياكة اللطيفة.

معقولة يا استاذ ارتدي القيعة الفخيمة دي في حضرة جلالك ولو من باب الدياكة اللطيفة
انا - كـقارئ- بستمتع بسحرية االسرد وجمالياته في نصوص المستنير وبصدد عمل دراسة حولها كمان

حيدر أنا خليني، لكن أنت وهاشم الحسن من أعظم الناس ثقافة ومعرفة واحاطة وتمتلكون قلب محب،
لي زمن بقول ليك أعمل برنامج ثقافي تلفزيوني وعرف الناس بمبدعين زي حسن موسى، بشرى الفاضل وعجب الفيا ومصطفى مدثر وآخرون
أنت تستطيع بمعرفتك الثرّة وحبك للجمال أن تخرج برنامج عجيب.

أنسانا من خواض أفندي دا

بعدين الزول دا زول أصنج وأنت رجل في غاية التهذيب ما تدخل معاهو في كلاش،
ما ح يفتكّ منك
خليني برصعو وفي نفس الوقت بونس الجمهور عشان ما يملوا

Quote: معقولة يا استاذ ارتدي القيعة الفخيمة دي في حضرة جلالك ولو من باب الدياكة اللطيفة انا - كـقارئ- بستمتع بسحرية االسرد وجمالياته في نصوص المستنير وبصدد عمل دراسة حولها كمان

من حقك طبعا الاستمتاع بدورك الفخيم الجديد:
ميم دال


مساعد ديّاكي هههه

للمستنير ان يستمتع بهجائيتنا الاسفيرية بينما هو يجمع أشلاءه المبعثرة: :
التوأمة الثغرية الدبرية.

Quote: ههههههههههههههههههه يجازي محنك يا قبة. شايف ابوبكر أشار ليك لي موضوع "خواض". الحقيقة "خواض" شغال بالحتة الفيها الحديدة مع أبوبكر:) وطلع كتاباتو شمار في مرقه ههههههههه. بالمناسبة يا قبة انا شايف انك مشروع كاتب خطير- كسرة: خواض احبطني يا قبة - وقال لي اني محتاج لي سمكرة نصوصي ههههههه التحيات النواضر لك ول أبوبكر ولكل من مر من هنا.

كتر خيرك يا شخشوخ ..

الخواض رجل اديب و متمكن .. فكيفما قال .. ننتصح ..

ابوبكر لو خلى استلاف ذاكرة الغير و نصوصهم .. حيفضل ليو سطرين لا معنى لهم ..

بعدين انا ما عارف نفسو قايم هنا كده ليه ؟ الاسافير دي واسعه .. يكتب .. يلطش .. ما في زول محاسبو ..

Quote: شكرا يا قباني على هذا البوست. هنا ساتحدث بشكل شخصي. بوستك يثبت اثباتا قاطعا ان تحليلاتي النقدية قد وصلت الى القرّّاء بشكل بيّن واضح لا شك فيه . بل انت قمت بتطبيق بعض منها ههههه باقي ليك "المعيشة الطفيلية" أي التناص الفاشل و "الإغارة" على نصوص الآخرين .. هههه

استاذنا الخواض ..

معلم و منك نتعلم ..

هسي التعبان ده كان التزم و سمع الكلام .. ما كان طور من نفسو شويه .. بدل دايرة الشحده الكلامية دي ؟

حقيقة .. اسفاف ماليو بيهو صفحات المنبر بلا فايده .. السيرفر اشتكى و بكا ..

Quote: حقيقة .. اسفاف ماليو بيهو صفحات المنبر بلا فايده .. السيرفر اشتكى و بكا ..

بمناسبة السيرفر .. او ( السيرفا) كما يحلو لي الباشمهندس بكري كتابتها ..

كتب في مره :



نجيكم لحكاية ( السيرفا ) ..

كل ما اقراها من بكري .. اتذكر زمااان .. اول دراستنا للانجليزي كانت في اولي عام

انحنا طبعا دفعة محي الدين صابر حقة السلم التعليمي ..

يعني لما بدينا الانجليزي كنا رجال كبار بالغين .. واتعلمنا شويه القندفة و الصعلكة..

تدريس الانجليزي كان .. يجي الاستاذ .. يكتب الكلمة في التختة .. ويقولها ( بي نُطقُه ) هو ..

وانحنا بي وراهو ( كما الطير ) ..

وكانت هناك طريقة معينة لنطق الكلمات البتنتهي بحرفي ال ( إي و الآر ..)

يعني chair .. ينطقها الاستاذ ( chiah )

وكلمة NEAR بدل ما ننطقها ( NEER ) يقوم يخلينا ننطقها ( NEYAH )

اها الكلمة كانت ( نيا ) دي زاتها ..
هو يقول ...
نيااا

وانحنا الطيور بي وراهو
نيااااا

تاني ..
نياااا

وانحنا
نياااااااا

في وسط الزحمة كان صديقي ياسر حسن عثمان ( النسناس ) .. واللواء فيما بعد ..
يردد مع الزحمة و يقول ..

طحنية ..

انحنا .. نياااا وياسر مردف معانا .. طحنيااااا

الاستاذ غلبو يعرف منو البقول طحنية ده ..

سألنا واحد واحد .. نكرنا كلنا ..

قرر يدق الفصل كلو ..

وجات فروع النيم العجيبة .. وكل ما الاستاذ يرفع السوط لي فوق ..

يردد .. طحنية !!!! طحنية يا صعاليك .. طحنية عند اليمانية ..

وتااااااحححح ..

Quote: قباني يا صديقي اكتب اكتب اكتب ما فى زول ح يحجر عليك الكتابة وانت تملك ادواتها واهمها التعبير واللغة البسيطة المفهومة والعمق . بقي شئ مهم جداً وهو : عدم الخوف من النقد ومن الرقابة اكتب كل ما تؤمن به دون خوف او وجل من كائن من كان بخيال واسع وخصب . صدقني يا قباني احياناً اشتري كتاب وابدأ اقرأ فيه ما اكمل صفحات بسيطة الا ووجدتني طرحته جانباً لافتقاده للروح والمشاعر الانسانية واللغة السهلة .

علوبة يا جميل ..

النقد اساس النجاح .. ما لم تكون جاهلاً .. فقط هناك .. تفعل مثلما يفعلُ صاحبنا كما ابو الدقيق .. (يفتفت و يحت) ..

Quote: حيدر أنا خليني، لكن أنت وهاشم الحسن من أعظم الناس ثقافة ومعرفة واحاطة وتمتلكون قلب محب،

إستدرار العواطف .. آخر محطات الإفلاس ..

Quote: بس عندى سؤال : ليه إخترت لخيطك دا عنوان خطر كدا ؟ يعنى أو يشابه: "I would stick my neck out

هدويتنا الواعية ..

لو للحقيقة فانا Actually I am sticking my tongue out to everything

لا شيئ يسوى ..

Quote: نتم تتطفلون على إبداعي ويعود ريع تتطفلكم لبكري، وهو بعين قوية يدخل لمناصرة خالي الموهبة دا، ويقول له أكتب كلنا تعلمنا الكتابة هنا كتابة شنو الاتعلمتوها؟ كدي أكتب اسمك صاح

عارفها حارة قصة بكري .. معليش شوف ليك كمادات ..

اكتب اسمك صاح و يا بتاع الاغاني .. افشل ناس في المنبر لامن ينزنقوا ديل فرمالاتهم .. هههههه

بالنسبة لاسمي .. امي الله يرحمها ( اجمل امرأة في الوجود في نظري) بدت تعلمني الكتابه و انا عمري ما جاب 4 سنين .. و علمتني ليها كده ز.. و هي لم تكمل اولى كتاب ..

ولم اتخلى عن كتابتها منذ ذلك الزمن بهذه الطريقه .. فهي وسيلة اتصال خاصه بيني و بينها .. و حتى حينما فارقتنا بجسدها .. اسمع اسمي على لسانها و اقرأ حروفه كما علمتني لها .. يحي ..

فهو شأن خاص .. اتمنى ان لا تدخل فيه ..

تخريمة: انا من دراويش الشاعر اسماعيل حسن .. و الذي كان يمهر قصائده باسمه هكذا ( سماعين حسن ) .. لم يتجرأ عليه احد في كتابة اسمه كيفما يحلو له ..

دعو الخلق للخالق ..

Quote: ولم اتخلى عن كتابتها منذ ذلك الزمن بهذه الطريقه .. فهي وسيلة اتصال خاصه بيني و بينها .. و حتى حينما فارقتنا بجسدها .. اسمع اسمي على لسانها و اقرأ حروفه كما علمتني لها .. يحي ..

يا قبة مهما حاولت ما اظن انك ح تكتب كلام اجمل من ده.
مقتبس فيهو كمية صدق تفوق الوصف - تسلم على هذه النفحة المليئة بالعاطفة.

Quote: ولم اتخلى عن كتابتها منذ ذلك الزمن بهذه الطريقه .. فهي وسيلة اتصال خاصه بيني و بينها .. و حتى حينما فارقتنا بجسدها .. اسمع اسمي على لسانها و اقرأ حروفه كما علمتني لها .. يحي ..

يا سلام يا قباني على هذا الوفاء .. ربنا يتغمدها بواسع رحمته ويتقبلها قبولا حسنا
بالطبع الاسماء يمكن أن تكون ممثلة لثقافة الفرد وتراثه وعرقه وهويته العامة ، بل وكل ما يرتبط بها من دلالات وذكريات حميمة .
حسنا فعلت بهذه الإبانة التي كانت فائتة على الكثيرين أمثالي في هذا البورد وخارجه (بتذكرها لما ود البشرى يزعل من كتابة اسمه هكذا (البشري) )

الروائي يحي ابراهيم
يجي منك
طالما طرحت رقبتك كاتب ..لازم تراجع الحاجات البسيطة دي

Quote: وكان هذا (( المهاجم)) قد قام ( بكسر ) كلــبــو في مباراه قديمة ... واذا بكَلـْـبـُـــــو (يغمت )(( المدافع)) في الارض

جك الفول
لست بالاديب ولا ااممتلك لناصية النقد
لكن كتابة مزاج و معاها حراق روح
الكتابة الواقعية لها عمقها و اثرها الواضح في الادب
و لها ساطينها و لم تبدّ بالمدعو ابوبكر احمد عباس وميل الاستاذ الطيب صالح
و لن تنتهي بأبراهيم يحيي .... يالمناسبة هو برضو كاتب اسمو غلت ... الزميل المرتقب للكيب صالح برضو
فالكتابة الواقعية في ابسط تعريف ليها هي مزج الواقع بخيال الكاتب و الناتج ابداعية النص
في جك الفول و الواقع فيها الصيدلية و ابوروف و البوكسي و السينما
و صيوان الفرح و الجك و الدكان و سيدو و الزمان زمن ناس كانو طلبة جامعيين و حياتهم التكافلية التي تصل حد زيارة البيوت
و تواصلت حتي بعد التخروج و ولوج الحياة العملية و الراوي في سرده هو البطل الحقيقي للنص الى حين ظهور بطل آجر
هو حسين ابن اخت نادر و مفردته المفصلثة ,,, جنّكم .... ز ساقنا بيها
جنّكم تشفطوا الشاي باللبن
جنّكم تضربوا الفتة بالزيت!
جنّكم تتونسوا بالدويات
إلي الوصول للحظة الربط برحاب البطلة الثالثة للنص بحضور اراد ان يكون غير معتادا
فهي بطلة طاغية الحضور فى القصة برغم انها لم تشارك الا بمشهدين
ابتدءأ من جنّكم تشتروا الفول فوق الجكاكة!
و هي اخر جنّات حسين
ثم جنّة اخري عاد بها الراوي لسدة البطولة
جنّهن يعرسن بدون يكلمننا!
بمعيار الكتابة الابداعية الواقعية فجك الفول يعتبر عمل ابداعي مكتمل العناصر

Quote: استاذنا الخواض .. معلم و منك نتعلم ..

العفو يا باشمهندس كلنا طلاب علم وليس "طالبان "....ههههه

السرد والحكي يغمر العالم .
تعرف الايام دي في القنوات التلفزيونية العربية بدأوا يتحدثون وخاصة في الجزيرة عن الرواية الاسرائيلية والرواية الفلسطينية حول تاريخ فلسطين الحالية.
يعني يترجمون الكلمة الانجليزية :
narrative

هنالك باحث اسرائيلي معروف نسيت اسمه تحدّث عن دور "النميمة" في تطور المجتمعات القديمة.
والنميمة هي عبارة عن قصص تحكى عن اناس غائبين.
وحجوة ام ضبيبينة قصة ههههه

تبقى القصة كلها في التصنيف اي النوع الذي ينتمي اليه السرد.

الخبر الصحفي هو قصة مكتملة الاركان في معظم الأحيان.
وهكذا "دواليبك" أو كما قال احدهم ههههه

لم أتصالح مع تصنيف نصوصي بأنها عبارة عن يوميات عادية كالتي يكتبها قباني وعبد المنعم.
هذا التصنيف يزعجني ويحبطني إحباط شديد،
إلى هذا الحد كانت كتاباتي بائسة؟!
شكراً لهذه البوستات
وفعلاً المؤمن مرآة أخيه
لو ام تنبهوني كنت سأستمر في إيذاء مشاعر القراء

أقوال "ماسورة" حول "الدياكة" و"العبط" و"المكاواة"

Quote: يعني هسّ في فكرك في أي زول قاعد يتصفح المنبر دا بياخد كلامي محمل جد؟! ما ممكن تكون تفتقد لحس الفكاهة لهذه الدرجة؟! نوع الفكاهة بتاعتي تستمد فكاهتها من أنها فكاهة تحاكي العبط وبتكون واضحة، زمان في شبابنا كنا بنقول ليها الدياكة

"سمّ" هههه:

Quote: هذه الكتابات بدأتها هنا وكنت أكتبها من باب المزاح والمكاواة،

يحزنني أن تشارك أميرة حسين قاتلي الابداع؛
الخواض أفندي، قباني، ش س أحمد، بكرى أبوبكر وهدى
أن تشاركهم حفل الشواء تشفياً في نصوصي وإنتقاماً من شخصي!!

فقد كنت أعتبرها قارئة نبيهة

كل آمالي الآن معقودة على رسالة الناقد الحقيقي الأستاذ الكبير؛
عبد المنعم عجب الفيا،
لو جاءت الرسالة تصنفني مع الأدباء والمبدعين، سوف آت بها هنا،
وإن أختفيت عن المنبر، فأعلموا انه قد قضي الأمر

Quote: وإن أختفيت عن المنبر، فأعلموا انه قد قضي الأمر

😂😂 ياخ ما سألتني أنا الزول العادي ده عرفت كيف وقولت ليك عجب الفيا قبل ما تقول ؟ 😂

يا بكري عباس ..
والت ديزني قبل ما يشتهر تم طرده من صحيفة كان بيعمل بها بحجة انه رسام فاشل ..
فااا ما تخلي كلام المرجفين في المنبر يحبطك حتى لو اداك عجب الفيا زيرو ..
بعدين عجب الفيا دا بيكون من نفس مدرسة الخواض ، المدرسة الممعنة في الكلاسيكية ..
وانت كزول حداثي مفروض ما تعترف بنقدهم لاعمالك للاختلاف الجذري بين المدرستين ..
.
.
.
برضو ملاحظ انه نقد بنات حواء قاعد يؤثر فيك سلبا ..
ياخ قول ليهم انا تكفيني شهادة دينا خالد وبس .. :)
..

.

.

عليك الله قول بسم الله انا بقرا ليك وبعجب بى كتاباتك ، من الاول قلت ليكم اكتبو جميعا ونحن بنقرا ابدا ما انتقدت اى نص ليك اما بالنسبة للعبارة الانا اقتبستها …… انا قريتا وعجبتني كتعبير ليس الا …….الابداع لا يقتل ولا يموت

يا اميره ما تنزعجي ..

زولك جلده تخين جدا .. و دي مجرد محاولة استدرار عواطف ليس الا ..

لا بفوت لا بقدر يلتزم بي قرار .. فانسي عليك الله ..

مرحلته الجايه مناداة زملاءه مساعدين اليايات ..

بالمناسبة انتي عارفه انه هو بالاساس مساعد باي ؟

بعدين المبدع ده .. بقعد يكورك طول اليوم انا مبدع انا كاتب انا ما بعرف شنو ..

ما تكتب كتابتك و خلي ابداعك يجيب الناس .. بدل واك واك واك اليوم كلو !!!

لا يا أميرة، أي ابتسامة تجاة الخواض أفندي تضعك موضع الأعداء عندي.
لا نقبل اللون الرمادي في هكذا مواقف.

شكراً الصديق المثقف جلال عيسى،
بالله، لو متواصل مع صديقنا ود المدير خليهو يزورنا هنا،
قول ليهو عدونا المشترك يشعر بسعادة

يا منتصر، يا عادي،
انت عرفت عجب الفيا عشان عجب دا قاعد يطقطق الخواض أفندي،
هسّ أنا ما كلمتو بكراهيتي للخواض أفندي، نظام دايرو يكون محايد مع نصوص يكرها خواض أفندي.

هلا بقسوم،
عندي إحساس انو عجب رجل محب ومتذوق للجمال،
الخواض أفندي متجمد ولا ينسى عداواته،
يا أخي، جدو شيخ الخواض، لو ما بريدك بديك البخرة فاضية

كلامك غير صحيح يا قسوم،
ليس كل نقد بنات حواء يؤثر فيني، لكن كانت لأميرة محبّة خاصة،
هناك الآن هدى من كدا ما عارف، لا أعيرها اهتماماً

ح أكلم دينا خالد تزورنا وتلقي مجرد التحيّة هنا

شنو يعنى قطعتو معاى …..غايتو كان كتبت بقرا ليك !

Quote: لا يا أميرة، أي ابتسامة تجاة الخواض أفندي تضعك موضع الأعداء عندي. لا نقبل اللون الرمادي في هكذا مواقف.

بالله يا ابو بكر زي شفع زمان .. جايب كفرك معاك يا يخلوك تجيب قون يا تشيل كفرك و تمشي ؟

Quote: الخواض أفندي متجمد ولا ينسى عداواته،

بالعكس يا مستنير ، لقد صالحتك مرتين ، لكنك لاتنسى أو قل حتى نكون دقيقين:
عقلك الباطن لا ينسى نزعة المكاواة والعبط والمزاح الجارح،
فتكرّ السبحة مرة أخرى.

انت مع شخص آخر ،
الوحيدان اللذان "تشرّفا" بهجائي الاسفيري .

ومع ذلك أشعر بسعادة أن ملاحظتي النقدية وجدت قبولاً ورواجاً وأثارت نقاشاً.
وأثبت قباني عملياً صحّتها.

قباني شنو البثبت حاجةيا أخ؟!
اسمو بكتبو غلط؟
عندي ليك مفاجأة مدمرة من كبير النقاد السودانيين حول ثلاثة من نصوصي،
لو عندك وصية أكتبها، لأنو ممكن تجيك هارد أتاك

Quote: عقلك الباطن لا ينسى نزعة المكاواة والعبط والمزاح الجارح، فتكرّ السبحة مرة أخرى.

جبت من الاخر يا خواض ..

ابوبكر عندي شعور انه على طبيعته خارج المنبر انسان .. و قد لمست منه ذلك في تعزيته لي في شقيقي ..

لكنه هنا رسم لي نفسه صوره لا تخلوا من ما ذكرت انت بالضبط .. و للاسف لابس الوش ده و ما قادر يقلعوا ..

هارت

Quote: لكنه هنا رسم لي نفسه صوره لا تخلوا من ما ذكرت انت بالضبط .. و للاسف لابس الوش ده و ما قادر يقلعوا ..

طبعا انا لم اصطنع تلك الاوصاف،
لكنه بنفسه كما اثبتنا عبر "اقتباسين" قال ذلك.

فهو يحب المكاواة والعبط والمزاح الجارح.

هو كما يُقال بالانجليزية:
Attention seeker

ولذلك لا "تفرز" جدّه من هزله،
فهو يبتذل كل شيئ في سبيل "لفت الانتباه" و"سرقة الأضواء" .

ولا يُحمد على مكروه سواه.

Quote: قباني شنو البثبت حاجةيا أخ؟! اسمو بكتبو غلط؟

خلي البلاده و عدم الاحساس ..

دايرين نعملك بني ادم لكنك مصر انك تكون عبيط ..

ده ردي على موضوع الاسم الكنت بعتبره شي شخصي لكن لي عباطتك اضطريت اشرح الامر :

Quote: بالنسبة لاسمي .. امي الله يرحمها ( اجمل امرأة في الوجود في نظري) بدت تعلمني الكتابه و انا عمري ما جاب 4 سنين .. و علمتني ليها كده ز.. و هي لم تكمل اولى كتاب .. ولم اتخلى عن كتابتها منذ ذلك الزمن بهذه الطريقه .. فهي وسيلة اتصال خاصه بيني و بينها .. و حتى حينما فارقتنا بجسدها .. اسمع اسمي على لسانها و اقرأ حروفه كما علمتني لها .. يحي .. فهو شأن خاص .. اتمنى ان لا تدخل فيه ..

الظاهر ما في اي انسانية ولا من يحزنون .. شكلك ياهو المتخلف المعاكس المحب للظهور جوه المنبر و براهو ..

جني جن الزول العبيط ..

Quote: طبعا انا لم اصطنع تلك الاوصاف، لكنه بنفسه كما اثبتنا عبر "اقتباسين" قال ذلك. فهو يحب المكاواة والعبط والمزاح الجارح. هو كما يُقال بالانجليزية: Attention seeker ولذلك لا "تفرز" جدّه من هزله، فهو يبتذل كل شيئ في سبيل "لفت الانتباه" و"سرقة الأضواء" . ولا يُحمد على مكروه سواه.

شكراً خواض ..

عبرت عني تماماً ..

كل ما يثار عن تصرفات الاستاذ ابا بكر لا يلغي
النفحة الادبية الابداعية فى كتاباتو السردية
يا ريت الناس تحاكم المنتج لا صاحب المنتج عشان نصل لى نقاش مفيد
...... ابو الحاجة ديك القالا الزول داك .....

كتل قلبك بالأستاذ المثقف جلال عيسى 😁

Quote: كتل قلبك بالأستاذ المثقف جلال عيسى 😁

هههها ده كلامك !!!
اقرار من زميل الطيب صالح و صاحب الاشادة الموثقة من الاستاذ محسن خالد
و شايف تباشير شهادة من الاستاذ عجب الفيا كمان
شايفو استفاد منّك في بوست مجاور و دى لا يلقاها الا الذين اقر لهم يالمعرفة
حطّك طلعت من المشمولين بالرعاية

تلأملوا (بعين الرضا) ما قاله الاستاذ المثقف جلالدونا

Quote: كل ما يثار عن تصرفات الاستاذ ابا بكر لا يلغي النفحة الادبية الابداعية فى كتاباتو السردية

Quote: كل ما يثار عن تصرفات الاستاذ ابا بكر لا يلغي النفحة الادبية الابداعية فى كتاباتو السردية

اهلا جلالدونا
خلينا في الاول نحدد اتجاهك ونفرز مويتك.
هنالك اتجاهان:
اتجاه ديكي مزاحي عبيط ، بحسب كلمات المستنير.
واتجاه جاد نقدي .

فهنالك الكثير من مساعدي الديّاكة.

Quote: مداخلة بكري أبوبكر عجيبة! قال لقباني مرحب بيك كاتب، كلنا تعلمنا الكتابة هنا. يا سيد بكري، موضوع البوست عن الكتابة الأدبية، انت وين تعلمتها؟ بعدين قباني لا يمتلك موهبة خيال حتى تقوم بتشجيعه يخوض في هذا الكار. أكرر موضوع البوست ليس حرية الكتابة، إنما الكتابة الأدبية الابداعية

حبيبنا بكور ود عباس
انت ذاتك سبت موضوع البوست و قبلت علي.....
يا حبيب ما في فرق في نظري بين الكتابة الادبية و السياسية فكلها كتابة ......
عندما تقرا لصنع الله ابراهيم او ابراهيم عيسي او علا الاسواني روائيا او سياسيا لا تجد فرق بين الكتابة السياسية او الادبية فكلها مراة للواقع المعاش.........

Quote: تلأملوا (بعين الرضا) ما قاله الاستاذ المثقف جلالدونا

هلا بالموسوعة الشاملة حيدر
ما تأمل بعين الرضا بس ... ضيف عليها الغوض فى اعماق السرد لاستشفاف معانيه و مراميه
المستنير لو ترك المكاواة الغليطة و السعي في طلب استحسان ما يكتب بيكون غلب هوى النفس
بذرة الابداع موجودة و دايرة الصبر على ألم المخاض و الرعاية
و مشكورين على شهادة المثقف المستحقة
و يا ريت تخلوها المثقف الفيلسوف و بيها الواحد يكون زميل سقراط
حولااااااا نفسي قام

Quote: حبيبنا بكور ود عباس انت ذاتك سبت موضوع البوست و قبلت علي..... يا حبيب ما في فرق في نظري بين الكتابة الادبية و السياسية فكلها كتابة ...... عندما تقرا لصنع الله ابراهيم او ابراهيم عيسي او علا الاسواني روائيا او سياسيا لا تجد فرق بين الكتابة السياسية او الادبية فكلها مراة للواقع المعاش.........

إبداع يا سيد الحوش
ليه دافن التجليات دي الزمن ده كله وحاصر نفسك في خانة الفة الفصل
-
دي من بركات المستنير - طلَع منك بكري المبدع
-
مثقف وفيلسوف وقاص كمان يا جلالدونا

Quote: ضيف عليها الغوض فى اعماق السرد لاستشفاف معانيه و مراميه

وفات عليك ان تقول انه يمكنه ايضا ان يغزو اقسام مابعد الكولونيالية في الجامعات الغربية،

وكذلك أقسام الأدب المقارن،

عدا عن أقسام الترجمة والشعب الخاصة بعلم اجتماع الأدب بكافة مقاربتها،

كما يمكنه أن يغزو اقسام الدراسات الدينية باعتباره من الشخصيات المضطهدة لنقده الديانات وخاصة الديانات السماوية.

Quote: إبداع يا سيد الحوش ليه دافن التجليات دي الزمن ده كله وحاصر نفسك في خانة الفة الفصل - دي من بركات المستنير - طلَع منك بكري المبدع - مثقف وفيلسوف وقاص كمان يا جلالدونا

ونضيف الى إبداع سيد الحوش و"تجليّاته" المشار إليها أعلاه،
"تجْلياّت " البعض للكورة، وهذا ما يمكن ان يندرج ضمن اهتمامات المستنير الرياضية التي ربطت "حداثة" بما بعد الحداثة،
بحبل غسيل جاره المكسيكي في المنطقة التي يقيم بها.
وهذا يزيد من السمت الموسوعي للمستنير ، مع إضافة اهتمامه بنقد الأديان وخاصة الأديان الإبراهيمية.
كما لديه اهتمام معمّق ودقيق بأبحاث الإسلام المبكر ,وخاصة باتريشيا كرون ومجموعة إنارة الألمانية التي ينتمي اليها الباحثان المشهوران:
كريستوفر لوكسنبرج ومحمد المسيِّح"

كما يضاف الى ذلك أن المستنير يصوم رمضان" رغم زندقته التي يشير اليها الكثير من المختصين في الخطاب السردي للمستنير،
وخاصة مدرسة "سن الفيل" النقدية التي ورثت إنجازات مدرسة فرانكفورت وبراغ الالسنية وجامعة ييل الامريكية.

وقد كتب المستنير بوستا اسطوريا دخل موسوعة جينيس من حيث عدد القراءات عن رمضان والصيف.

وستقوم مجموعة من افضل كتاب السيناريو المصريين بإعداد مسلسل تلفزيوني من وحي البوست المشار اليه سابقا،
وسيعرض في رمضان القادم.

وستقوم شركة روتانا بإنتاج المسلسل والإشراف على توزيعه.
وسيعرض في جميع القنوات التلفزيونية العربية.
ومن المقرر "دبلجته" الى الانجليزية والفرنسية والالمانية والصينية والاسبانية والايطالية والتركية والبرتغالية ،
وكل اللغات الحية والميتة أيضاً.

Quote: مثقف وفيلسوف وقاص كمان يا جلالدونا

صحيح ان المستنير مثقف وفيلسوف وقاص كمان.

لكن هذه الاوصاف المتواضعة لا تحيط بمساهمته الجبّارة.

فتلك الأوصاف تصلح لإلقاء الضوء على ما اصطلح عليه ناقدو المستنير بالبدايات:
أي مرحلة البواكير

وهي تماثل تماماً مساهمات كارل ماركس المبكّرة التي يطلق عليها مجازاً "ماركس الشاب".

ومن هنا يمكن أن نقول بكل تأكيد وثقة أن المستنير المثقف والفيلسوف والقاص كمان،
يجوز التعبير عنه ب:
المستنير الشاب.

وهذا بالضبط ما قام به محرّرو الأعمال الكاملة للمستنير.

وأجمع على ذلك "مجمع اللغة العربية"، رغم ان المستنير يكتب بالعامية السودانية.

وأجازت ذلك اللجنة المشرفة على ترشيحات جائزة نوبل للأدب.

Quote: رغم ان المستنير يكتب بالعامية السودانية

ياتو عامية دي يا خواض؟

هسي في سوداني بقول اكلت (بالمطعم) و لا بقول مشيت حفلة (بالقصيم) ؟

السوداني العامي بقول في المطعم و ليس بالمطعم و بقول في القصيم و ليس بالقصيم ..

زولك هويته لخبتوها ليهو الخلايجه..

صعب جدا وضع (نمذج معياري) للحكم او لنقد اي عمل
حقيقة ان بكري عباس له نسق متفرد وقدرة على استنباط وعي كبير ويتجاوز فيه الزمن والمكان
لتبقى قصصه راسخة على مر الازمان في الوعي الانساني.
باسلوب سلس جذاب بسيط ممتع ... بعيدا عن تقليد النمط الغربي

Quote: زولك هويته لخبتوها ليهو الخلايجه.

عموما هي عامية سودانية قد تكون كما اشرت "مخلوطة" واحيانا تساهم الميديا في ذلك الخليط.

المستنير وجد للأسف الشديد اهتماما يستحقه كتّاب آخرون في هذا المنبر مثل ابوجهينة وطه جعفر والبرنس ومصطفى مدثر على سبيل المثال لا الحصر.

فقط خلطه غوغائية "الدياكة" و"العبط " و"المزاح" جعل صوته أعلى ممن يستحق،
بالإضافة إلى سببين:
الرغبة في سرقة الاضواء ولفت الانتباه باي ثمن وبأي طريقة.
والاقتداء بسيرة البراميل الفارغة كثيرة الضجيج.

*التعديل للفت الانتباه الى ان مداخلاتي الأخيرة حول سيرة المستنير الادبية المتخيلة،
كما يراها الحصيف المتابع،
هي لمحاكاة "الدياكة" وإثبات لا جدواها وسهولتها وعبثيتها،
وضررها المتمثّل في إضاعة وقت القرّاء الجادين.

Quote: مثقف وفيلسوف وقاص كمان يا جلالدونا

هذا الوصف مقصود به جلالدونا نفسه وليس المستنير

ملخص سريع للبوست:

حنين مستميت في وجهة نظره - رمضان مبارك عليك يا حيدر.

خواض لسه شغال بالحته الفيها الحديدة.

قبة بالع ليمونه وهو يرد على ابوبكر :)

ظهور حصري لي بكري اب صلعة - رمضان مبارك يا حبة.

كسرة: بوست فاقد "ودالبشرى" و "مولانا "حافظ" :)

Quote: هذا الوصف مقصود به جلالدونا نفسه وليس المستنير

شكرا على التوضيح.
اللبس جاء من أن هذه الاوصاف -في قمة من قمم "الدياكة"-

تم إلصاقها للمستنير.

المافي شنو ههههه
انبهلت .....

من "العبط" و"الدياكة " المقتبسة ادناه جاء اللبس:

Quote: صاح كلامك يا يس، أنا مفكر وفيلسوف كبير. لأول مرّة يظهر في الفضاء الأدبي السوداني أديب وفي نفس الوقت فيلسوف ومفكر

الحقيقة يا خواض أفندي، ليس لي إجابة لأسئلتك النقدية؛
فأنا لا أصنع نصوصي، فهي تتنزل علي وليس لي فيها إلا طقطقات الكي بورد،
يداهمني النص وأنا أقود العربة فأتوقف عند جذع شجرة وأنزله أو يداهمني وأنا في البحر، فأخرج للرمل أحرك أصابعي فوق تلك الشاشة الصغيرة،
وقد داهمني أحد النصوص في بيت عزاء، فكنت أثناء الفاتحة اتمتم بأسماء أبطالي وهكذا،
النص في كتابته لا يأخذ مني أكثر من دقائق الانزال على لوحة المفاتيح

فشنو؟
ليس لي اجابة على تساؤلاتك التي تسميها نقدية،
ولا أستطيع أن أفعل مع نصي أي تغيير.

نمت حوالي دقيقة،
رأيت في منامي العميق صورة أنبياء معي عند مجمع الرهد بالأزرق عند مفازة أبحراز،
كنت أتوسطهم وكأني زعيم الجلسة؛
كان في الصور بدون ترتيب محمد مُحي الدين، درويش، سميرة، العليش، عبد السيد، أب شرا، شايب، عزيزة بت الصومالي، أمي وشاطوط
ظهر في الصور في مكاني فلاش
نزلت أول سورة باسم عشر لوحات للهدهد وهو يخرج من الرهد
كنت أملي على الشيخ العليش وهو يكتب،
والكاشف يغني ما أمليه من فوق مسرح مهجور وكان يغني وهو حافي القدمين

هو ما بتشوفو عيون
وما حاموا حولو ظنون
أنشد درويش:
يسأل العلماء عن معنى الحكاية والرحيل
شال خلفه الشيخ عبد السيد بنفس لحن الكاشف؛
من أسمائنا نأتي إلى أسمائنا
ردد الحضور مع صوت النوبة؛
يا عبد السيد
يا عبد السيد

ثم وصلنا الثانوي العالي بالسني الثانوية،
وكنا بنجي بالعجلات من بانت شاقين السوق الجديد للمدرسة وبالعكس،
لم يفارق برنامج التبش بالشطة والشاي الفرنساوي من محمد نور رحلة العودة من المدرسة طيلة الثلاث سنوات،
برنامج المدرسة كان فيهو حاجتين رائعتين؛
واحدة يا ها قلتها ليكم برنامج التبش والشاي الفرنساوي
والتانية كانت؛
كنا بنصل المدرسة ونبركن العجلات والمدرسة ما كان فيها سور،
ونمشي نقعد في كرين مهجور جنب ترعة الدرجة بنستنى
مرور الطالبة الجميلة جداً سكينة يوسف عبيد وهي سائقة دراجتها الحمراء
ماشة مدرستها بشرق الدرجة،
ما في زول كان بشاغلها،
لمان تجي مارة كلنا كنا بنسكت زي الصابة فينا مطرة، لحدي ما تعدي الميدان، ثم نبدأ في الحركة والونسة ، البحصل لينا لحظة مرورها بشبه حركات التجميد بواسطة السحرة في المسلسلات الأمريكية الخيالية.

تعجبت، لو لم يقتل جنود نميري الفتى طه يوسف عبيد بمدرسة السني في زمن مرور شقيقته سكينة بدراجتها الحمراء،
لما كان أنشد محمد محي الدين قصيدته العجيبة؛
عشر لوحات للمدينة وهي تخرج من النهر في تأبين طه،
أتخيل أن لسكينة ولد اسمه طه يجيد الرسم والنحت،
لمان أشوفو سوف أحرر شهادة براءة لنميري من دم طه بتوقيع الشيخ عبد السيد ومختومُ عليها؛
من أسمائنا نأتي إلى أسمائنا.

في حاجة الأيام دي تقلق منامي، أثارها إعجاب أميرة بتعبير المعيشة الطفيلية!
والحقيقة أميرة دي، أتخيلها سيدة تعدت الخمسين تحتفظ بجمالها وأناقة بيتها،
أتخيل أن لها كرسي وثير تجلس عليه حين تغزل وتقرأ لي حين تضع الصنارات لتناول القهوة،
حين تضغط بلسانها على سقف فمها للاستمتاع بطعم البن، فانها تقفل عينيها لخلط متعة نصي مع القهوة وغزلها،
إنها مقدمة طويلة تستحقها أميرة لكي أنفذ لما يثير قلقي.

هناك جملة سقطت في الكتابة
بعد جملة " سائقة دراجتها لمدرستها بشرق الدرجة"
الجملة هي؛
إني أسمع حفيف صوت شرائط شعرها مع الهواء،

Quote: إني أسمع حفيف صوت شرائط شعرها مع الهواء،

الصحيح
حفيف شرائط شعرها
فحفيف يعني صوت .. و تطلق على صوت اوراق الشجر ..

فلا يجوز قول اني اسمع (صوت صوت شرائط شعرها )

بعدين العجله هايبرد ولا شنو ؟

محتاج تاني لمقدمة؛
لو شفتوا فيلم عقل جميل في لقطة بتكون في رسالة مكتوبة في شاشة كبيرة ومطلوب منه تحليل مخابراتي،
مثلاً نتخيل الرسالة؛
سوف تجد عبد الحميد قد سبقك للسوق المركزي بحري، هو سوف يشتري الطماطم والعجوز والبصل والكاروت.
أنت بس جيب الدكوة والرغيف وزيت السمسم وما دايرين جبنة..

صاحب العقل الجميل ينظر للشاشة وتظهر في عقلة بعمليات حسابية علامات حمراء في بعض الكلمات أو أجزاء من الكلمات
ليقوم عقله باستخلاص الرسالة المخابراتية الموجهة للعميل

تتنزل عليّ نصوصي متفرقة مثل سور القرآن فهي لا تنزل وحدة واحدة لسبب سوف أقوله للمفسرين لاحقاً،
لذلك تراني أرفع نص قديم أو أفترع به بوست جديد،
ويظن السابلة أنني مجنون، لكنني قد أضيف له فاصلة منقوطة لتربط آخر

Quote: لذلك تراني أرفع نص قديم أو أفترع به بوست جديد،

خليك في "دياكتك" العامية هههه
أرفع "نصاً قديماً"
و
أفترع به "بوستاً جديداً".

كم غلطة املائية في جملة واحدة بسيطة وليست معقدة؟
أربع غلطات..

ابو جهينة والبرنس مظلومان لقلة "النغد " ههههه

اضاعة فرصة الانضمام الى "رابطة الجزيرة للآداب والفنون"،
أصابتك في مقتل لن تُبعث منه .

ما تخليك عوير
الكتابة دي لا تخضع للنحو كما تتخيله فيها رخوة وقف زي السكون
"تراني أرفع نص"
فيها وقفة خفيفة أثناء الونسة
إتّا بعوارتك النحوية دائرتي أكتبها؛
تراني أرفعُ نصاًً
هذا يجعلها رسمية جامدة مثل أشعارك البالية ولا تتماشى مع تون الونسة

عليك الله أمشي مني شويّة شوف ليك ناس محو أمية درسم عوارات كسر همزة إنّ وفتحها،
أنا الآن في محراب وحي
فلا تفسد عليّ خلوتي

Quote: لصحيح حفيف شرائط شعرها فحفيف يعني صوت .. و تطلق على صوت اوراق الشجر .. فلا يجوز قول اني اسمع (صوت صوت شرائط شعرها ) بعدين العجله هايبرد ولا شنو

زغت من دي مالك يا (حفيف)

Quote: زغت من دي مالك يا (حفيف)

اهلا باشمهندس

هذه ليست المرة الاولى التي " يزوغ " فيها المستنير،
فهذه المرة الدشليون ،
مما يكشف عمق جهله بما يكتب ،
رغم انه من مدينة ودمدني التي أنجبت "رابطة الجزيرة للآداب والفنون"،
و"محمد عبدالحي".

لا أظن ان المستنير قد قرأ "العودة الى سنار"،
وإلا كان سيعرف كيفية استخدام التناص.


لا تجدي مع "المستنير" النقاشات ولا تفيد.
لانه لا يقدم سوى المزيد من "الدياكة" و"العبط" الاسفيري.

وجمهوره "الغريق" يريده هكذا:
جاهلاً ودرويشاً وبهلولاً.

لا تصلح مع "المستنير" سوى طريقتان اثنتان فقط لا غير:
الصمت
أو
الهجاء.

أشكرك على هذا البوست الذي أضاء ملاحظاتي النقدية بنموذج عملي واضح بيّن.
وإلى اللقاء في بوست "تنويري" آخر.

لو في زول متابع للمقدمات،
أوعدو بمواصلة الموضوع في بوست آخر،
ح أقيف من التداخل وتصفح هذا البوست،
بعمل الفكرة في الفيسبوك وبرجع أنقلها في بوست هنا لاحقاً

Quote: أشكرك على هذا البوست الذي أضاء ملاحظاتي النقدية بنموذج عملي واضح بيّن. وإلى اللقاء في بوست "تنويري" آخر.

الى اللقاء يا شاعر .. :)

القصة الخامسة:

حفـــــر العتَـــش 1981

كنا طلبة في المعمار جامعة الخرطوم .. كنا نسكن الأربعة في غرفة واحده ..

وكانت تجمعنا ان جميعنا لدينا اخوة يعملون بالسعودية منذ سنوات .. عدا صديقنا (ن) كان لديه ابن خاله طبيب هناك و اصدقاء منهم مشترك ايضا معنا ..

قررنا في نهاية السنة الدراسية اننا نقضي اجازة الصيف مع اخوتنا كتغيير .. و كنوع من ضرب الراحات التي نسمع بها سمعا ..

طيب ..التأشيرة كيييف ؟؟؟

بسيطة . . كتبنا خطاب .. بأننا طلبة في المعمار .. وانو السنة الجاية مشروعنا سيكون عن ( العمارة الإسلامية ) .. ولم نجد (خيراً ) من

المملكة العربية السعودية للبحث و التنقيب .. وزيادة في الحرفنة .. خاطبنا السفير و ليس القنصل .. وقدمنا الخطاب من الباب الرئيسي للسفارة

في العمارات .. حيث استحالة اصلاً الوصول لباب القنصلية الجانبي ..

كانت تلك الكلمات كافية لأن يرقد سعادة السفير موية ...ويطلب منا الدخول .. وكنا قد ( تكرفتنا ) جميعا للظهور بمظهر الجد .. ( نيردز ) عديل كده ..

اخذنا التأشيرة ( في الحال ) .. وكانت تلك هي آخر مرة نتحدث فيها عن العمارة الاسلامية .. حيث لا عمارة هناك ولا اسلام ..

طرنا في رحلة بالسودانية .. وحطينا في مطار الرياض في قيلولة لا يعلم بها الا الله ..

قابلونا اخوتنا و الاصدقاء .. بوجوه ملؤها الراحة .. ونعومة من المكيفات و كأنها لم تري الشمس منذ شهور ..

استقر بنا المقام .. وبدانا التحرك .. وجاء يوم الخميس المشهود .. كان ابن خالة (ن) يعمل طبيبا في منطقة تدعي حفر العتش ..

ساعتين تقريبا بالسيارة في طريق متوحش جبلي لو رايناه في النور لما ذهبنا ..

وصلنا الي منطقة .. ظلام دامس الا من رحم ربي من بعض البيوت .. وكانت المنطقة جميعا لم تري نعمة الكهرباء بعد !!!

وبما ان صاحبنا طبيب .. فتكرم وزير خادم الحرمين بوضع مولد كهربائي لإنارة الاستراحة التي يسكن فيها . . ويعالج فيها المرضي ..

وكانت ليلة من اعجب الليالي ..

كان الشباب محمل باكياس النايلون التي تحتوي علي ( عصير التمر ) الصافي .. وهي كانت معنا طول الوقت في السيارات ولم نكن نعلم .. وهي تهمة كافية للذهاب الي ( كوبر ) السعودية ..

بعد السلام و الكلام .. قال الدكتور انو حيجي واحد بعد شوية وسيقوم باجراءات ( الضبح ) و السلخ و توضيب العشاء .. ومن كان جوعانا فليتصبّر ..

كان البيت عبارة عن غرفتين مجدوعتين في اطراف حوش كبير .. وبرنده .. و بير مبنية من الخرسانة بطريقة عشوائية ..

لكن سطح البير كان هو المكان الوحيد الخرساني فالبقية الباقية تراب .. ونحن منه و اليه ..

التفت الي صديقي ( ص ) .. وقال لي في هدوئه المعهود .. هو الضباح حيجيب معاهو الخروف ؟؟؟

فقلت .. لا .. الماشين يضبحوها ياها ( الغنماية ) المربوطة هناااك دي !!!

قال لي انت نصيح ؟ .. قلت ليهو يا زول مالك لحم الماعز ده صحي جدا .. وما فيهو دهون ..

قال لي انت أكلتو قبل كده .. ولا دي فلسفة شيوعيين ساكت ؟؟؟

قلت ليهو اول حاجة انا ما شيوعي .. تاني ياخي العلم موجود في الكتب ..

قال لي انا ما باكل ..وما داير احرج الناس ديل .. قوم شوف لي جبنه و لا صحن فول .. انت بتعرف الدكتور ده اكتر ..

قلت ليهو كدى اقعد اشرب ليك كاسين مع الشباب ديل .. و ما تلخبت.. الدكتور ده ما بيشرب و حيسمع كل كلمة ..

وانت مادامك جعان بس كتر من المزّه .. كلها جبنه و عجور وخلافه و خلاص ..

قال لي كويس .. بس بعدين اسمع .. انا ما بنوم في العجاجة دى .. شوف لي لو في سراير كفاية جوة واحده من الاوض ( وهي كلها اودة واحده و التانية عيادة ) .. قلت ليهو خير ..

وبدأ من يشرب يشرب .. و صديقي (ص) يكتح ذات اليمين و ذات اليسار .. وجاء الضباح .. وامسك بالغنماية و ذهب بها الي مكان قصي ..

و صديقي ( ص ) متابعا وكان وقتها بدأ مشعشعا .. وانفرجت اساريره قليلا ..

وقال ( وووب يا قبقب ) .. الغنماية قربت ليكم .. انا ما عندي معاكم شغلة ..

اخذت عملية الذبح و السلخ و التحضير بعض الوقت .. كان صديقي في عالم آخر .. وكان سيد القعده و الونسة ..

واتت اول مقدمات الغنماية .. ( المرارة ) .. مع صحن دكوة .. واذا بصديقي ( صفصف ) .. يشمر و يغمس .. و يلتهم !!!!

قلت ليهو يا ( حبيب ) .. ما احسن تخليك في الحاجات المحمرة بعدين .. قال لي يا حاج اضرب .. ويضحك ..

وانتهت الليلة .. ونااااام صديقي علي سطح البير .. ولم يتحرك حتي لغسيل اياديه من حلة لحم الغنماية المدنكله ..

استيقظت انا مبكرا جدا .. واخذت الدش الرهيب .. وما زال صاحبي يرقد فوق البير وكانت له نومه مميزه ..

يرقد علي كف يده اليمني ..وتمتد اليسري فوق راسه .. و هي دعوة صريحة لكلاب الحلة للحس ما تبقى من اثار الحله على اصابع صديقي (ص) ..

ايقظته .. وقام وقورا كعادته .. تحمم .. و اخرج الخلال .. ومشط الشعر .. وسأل من كباية شاي اللبن ..

وقال حنمشي الرياض الساعة كم ؟ .. قلت ليهو بس نفطر .. قال لي الفطور شنو .. قلت ليهو ملاح ام رقيقة .. و لحمة صاج ..

قال لي ملاح ام رقيقة ده منو الجابو معاهو .. قلت ليهو لأ .. ده معمول هنا .. ومعمول بي شوربة لحم و عضام الغنماية حقة امس ..

قال لي يا زول غنماية شنو انا ما معاكم ..؟؟؟؟؟؟

قلت ليهو يا صديقي .. كدي قول مييييييييع .. !!!

سلام و تحية و احترام استاذنا الخواض

Quote: اهلا جلالدونا خلينا في الاول نحدد اتجاهك ونفرز مويتك. هنالك اتجاهان: اتجاه ديكي مزاحي عبيط ، بحسب كلمات المستنير. واتجاه جاد نقدي . فهنالك الكثير من مساعدي الديّاكة.

لا هذي و لا تلك استاذي
مدخلي كان عن نوع الكتابة
و قلت انها كتابة ابداعية ادبية ظهرت بعد عصر نهضة الثورة الصناعية
و انتشار الادب المادي المرتبط بالعلم و نطريات رأس المال
كتابة ربطت الواقعية بالاسطورة بحثا عن عالم جمالي روحاني
و مشاركتي لايمكن توصفا بالناقدة و لا ترتقي بكاتبها لمراقي الادب و الاديب
و لا حتي ممكن توصلني لمقام مولانا حافظ تقدس علنه و سره
____
الله يستر
شكلو مويتي طلعت حلو مر

Quote: ما تخليك عوير الكتابة دي لا تخضع للنحو كما تتخيله فيها رخوة وقف زي السكون "تراني أرفع نص" فيها وقفة خفيفة أثناء الونسة إتّا بعوارتك النحوية دائرتي أكتبها؛ تراني أرفعُ نصاًً هذا يجعلها رسمية جامدة مثل أشعارك الباليةولا تتماشى مع تون الونسة

هههههههههههههههههههههههههه
تاخذ اوسكار
والله ما قايلك مبهج بالدرجة دي
امعط الماسورة .... ولا تاخذك فيه لومة لايم

Quote: تاخذ اوسكار والله ما قايلك مبهج بالدرجة دي امعط الماسورة .... ولا تاخذك فيه لومة لايم

"شبهيتو واتلاقيتو"

انت تعاني ايضاً من نفس أمراض المستنير النحوية.

من الواضح انك "رجفت" ،

حينما أشرنا إشارة عابرة إلى أن إدخال "نصوصك القصصية" إلى "المختبر النقدي"،
لن يكون في صالحك بالتأكيد.

تحياتي يا باشمهندس
كل من يتقن الكتابة هو كاتب. هذا هو التعريف الأوّلي، وتبقى مسألة إجادة تقنيات الكتابة والتطوير المستمر مسألة أخرى للنظر.

تقديري

بعدين يا الخواض
دياكة المستنير بتتحل بي شوية دوجنة
والحمد لله العلاج متوفر و ألكتروني كمان

اهلا بالعزيز جلالدونا

"حضرتي " غادرت النقاش في هذا البوست لأسباب،

ستجدها في مداخلة سابقة وأخيرة ل"حضرتي" هههه

لكن تقديرا لك عدت للتحية والمجاملة.

فاعذرني لعدم التعليق على مداخلتيك.

وسلام عليك في الاسفيريين.........

Quote: لماشين يضبحوها ياها ( الغنماية ) المربوطة هناااك دي !

سلام يا قبة مع ضيوفك



ماتم ذبحه لكم ليست غنماية وانما هو تيس
والتيس عند الخلايجة هو اشهى أنواع اللحوم بل ممكن يكون اغلى من الضان !

يا ود الشيخ
عارف والله انه تيس

لكن حكمت اشاغل صاحبي وقتها ..

الساعة الان الثامنة حزناَ بتوقيت الساحل الأمريكي الشرقي،
هذه مدينة فيلاديلفيا،
وهذا شارع تومسون،
المطر يهطل بغزارة،

وهذا هو الفرق بين المشاعر في السينما،
والمشاعر في صالة السينما"

Quote: الساعة الان الثامنة حزناَ بتوقيت الساحل الأمريكي الشرقي، هذه مدينة فيلاديلفيا، وهذا شارع تومسون، المطر يهطل بغزارة، وهذا هو الفرق بين المشاعر في السينما، والمشاعر في صالة السينما

هذا كولاج من قصيدتين يا مستنير.
لذلك كان عليك التنبيه الى ذلك،

والا فان ذاكرتك بدأت في التشظّي.

Quote: هذا كولاج من قصيدتين يا مستنير. لذلك كان عليك التنبيه الى ذلك، والا فان ذاكرتك بدأت في التشظّي.

عثمان الخواض .. سلامات ..

Quote: عثمان الخواض .. سلامات ..

جبت تاني سيرة البحر الانصاري؟؟؟
هههههه

لا ادري ما غرض المستنير من بسط كولاج من قصائدي وهو صاحب وجهين في ما يتعلق بشاعريتي.

فمرة يستشهد بصلاح الزين ووصفه لي بدرويش الشعر السوداني "المقصود محمود درويش ".
ومرة انا "معسم" ههههه

فالي اي الوجهين تنتمي مداخلته الاخيرة؟

Quote: لا ادري ما غرض المستنير من بسط كولاج من قصائدي وهو صاحب وجهين في ما يتعلق بشاعريتي. فمرة يستشهد بصلاح الزين ووصفه لي بدرويش الشعر السوداني "المقصود محمود درويش ". ومرة انا "معسم" ههههه فالي اي الوجهين تنتمي مداخلته الاخيرة؟

تنتمي الى افلاسه يا شاعر ..

لازم يمسك في طرف شخصية عشان يظهر ..

Quote: تنتمي الى افلاسه يا شاعر .. لازم يمسك في طرف شخصية عشان يظهر ..

حب الظهور ومحاولة سرقة الاضواء ولفت الانتباه،
يجعل صاحبه فاقدا للمصداقية.

بعض الناس يعتقدون أنهم أكبر من المساءلة ،

وليس عليهم مسؤلية تحّمل عواقب أفعالهم.

زمان مسعد حنفي اشترى من أبو صلاح قصيدة،
هسّ أنا داير اشتري منك يا خواض أفندي كم بيت كدا عشان أظهر
زي ما قال الشيخ السفيه السباب الشتام
الأبيات خطرت لي فكرة عجيبة عشان أطلعن من حفرة النسيان الأبدية،

سوى طريقتين اثنتين
...............................................

يا سلام يا قباني..ابروف...ود اللدر...حفر ودلوك...اللبخ...أبّو حبيب  !. يا الله يا الله ....
أسامة آدم ريحان (سكسك)  من ابروف ، برضو كان من أحرف الناس... بس يلمس الكورة  فيصنع الجمال  فنغني...سكسك و باكمبا و ابوعنجة.

سلام قبة
ماشاءالله قبتك عامرة .. قلنا نخش و نسلم .. عسى و لعل يصيبنا نفحات الشعر و الادب الرصين أو النقد البناء يكون لنا نبراسا نقتدى به .. مستمتعين .

Quote: هسّ أنا داير اشتري منك يا خواض أفندي كم بيت كدا عشان أظهر زي ما قال الشيخ السفيه السباب الشتام الأبيات خطرت لي فكرة عجيبة عشان أطلعن من حفرة النسيان الأبدية،

انا اقبل تلك المبادرة كعربون صلح للمرة الثالثة .

نصيحتي ليك انت زول مثقفين .
والذين يحاولون تصويرك كدرويش وبهلول ينتقصون من قدْرك وقدراتك وقدَرك.

Quote: يا سلام يا قباني..ابروف...ود اللدر...حفر ودلوك...اللبخ...أبّو حبيب !. يا الله يا الله .... أسامة آدم ريحان (سكسك) من ابروف ، برضو كان من أحرف الناس... بس يلمس الكورة فيصنع الجمال فنغني...سكسك و باكمبا و ابوعنجة.

ايام لها ايقاع يا خالد بشير ..🙂

غنم سيدي

كنا طلبه في جامعة الخرطوم وكان الشاب ده زميلنا

لم نكن نعرف له أي ميول سياسية

كان يتحاشي الكلام في أي مواضيع سياسية

الي أن شاهدته يوم في ليلة كان فيها محمد عثمان الميرغني يتحدث

وبعد نهاية الحفل رأيت صديقنا يهم بتقبيل أيادى مولانا !!!!

رايته بعدها و قلت له ياخي انت رجل متعلم و تحمل ارفع الشهادات

كيف تعمل كده !!!

قال لي إحنا في أسرتنا ده العرف و لو تاني اتكلمت معاي في المسالة دى انا بخسرك

لفت السنين و قابلته ... ولسه المسالة حارقاني

وداير أنكش الموضوع القديم

قلت ليهو سمعت النكتة دي

قالو واحد عنده حواشة ... يوم كسر عليهو قطيع كامل حق ( غنم )

وبدو يأكلوا وسيد الحواشة جا طاير يكورك وداير يطرد الغنم

اها الراعي المع الغنم ثبته ليك وقالبهو يازول انت عارف دي غنم منو؟
قال ليهو مين ما كان!!!!

الراعي قال ليهو يا زول ... دى غنم سيدي محمد عثمان

ترعي محل ما ترعي

سيد الحواشة سكت ووقف لغاية ما الغنم شبعت

وبدو يطلعو بره الحواشة و سيدها يعاين ليهم و يقول للغنم

( ما بدري يا خلفا ) عليكم الله قيلو معانا

ضحك صديقي وقال لي تعرف يا قباني

اكل العيش و الشفع نسوني الدنيا كلها مش سيدي بس


تخريمة:..

عقبال ما يشفي شخشوخ و جقود ..

"أكل العيش والشفع نسوني الدنيا"
عندي شعور إنو دي مكنة منك وما أظن الحوار دا حصل،
دي سرقتها من مداخلة عبد الرحيم في بوست آخر

Quote: "أكل العيش والشفع نسوني الدنيا" عندي شعور إنو دي مكنة منك وما أظن الحوار دا حصل، دي سرقتها من مداخلة عبد الرحيم في بوست آخر

طبعاً الحرامي في راسو ريشة .. و طبعا انت متعود على لطش و استلاف كلام غيرك ..

تصورت اني (سارق) زيك من كلام غيري ..

اها يا خفيف ..
لو كنت مركز بدل اللفحي .. انا في بداية البوست ده كتبت بالتحديد ما يلي:

Quote: انا ما حاكتب (قصص) جديده (قديمة) .. حاليا .. فقط ساعيد تدوير كتابات كنت قد كتبتها من قبل:

المهم .. يا سارق مجهود غيرك ..

انا كتبت الكلام ده ( بي ضبانتو) هنا في البورد ده يوم 17 فبراير 2013 الساعة 3:45 عصرا ..

اها تجري تفتش ؟ و لا اجيبو ليك هنا ؟؟

عدم المؤاخذه ..

هاك لي .. عشان ما تتعب تكوس ليو حبيبي ..