Post: #1
Title: السودان ده لازم يحكموا شخص يكون بصلي و بشرب ويسكي
Author: يحي قباني
Date: 04-13-2022, 04:57 PM
في موضوع لقمان و التسجيل العنصري ..
جاطت الدنيا و تباينت ردود اعضاء المنبر .. و كان من بينها شواذ ..
لا اقول الكل .. فمعظم الاعضاء هنا اسوياء ..
و لكن ..
منهم من تبنى نظرية المؤامره ..
و منهم من تبنى نظرية خالف تُعرف ..
و منهم من تبنى .. شوفوني يا ناس انا الاهم ..
و منهم من ظهرت عنصريته ..
و منهم من ظهرت عنصريته العكسية ..
كل الشخصيلت المضروبة دي لا تمثلني على الاطلاق .. فهي مشوهة ..
انا وصلت لقناعة ..
السودان ده لازم يحكموا شخص يكون بصلي و بشرب ويسكي و لو ما بشرب ما عنده مانع يقعد في القعدات .. و لو بسكر يكون بسكر و بصلي .. عشان يكون زول عادي زي اي سوداني زمان ..
|
Post: #2
Title: Re: تعّرف على شخصية أعضاء المنبر .. و اقرأ ما ك�
Author: يحي قباني
Date: 04-13-2022, 06:02 PM
Parent: #1
سالني احد الاصدقاء
يسكر و يصلي كيف ؟
فقلت له ان يعيش كما عاش الاولين بحكمة :
ده برا .. و ده برا ..
|
Post: #3
Title: Re: تعّرف على شخصية أعضاء المنبر .. و اقرأ ما ك�
Author: osama elkhawad
Date: 04-13-2022, 06:19 PM
Parent: #2
Quote: يسكر و يصلي كيف ؟
فقلت له ان يعيش كما عاش الاولين بحكمة :
ده برا .. و ده برا ..
|
اوسكار باشمهندس:
هه حكمة الأسلاف ...
|
Post: #4
Title: Re: تعّرف على شخصية أعضاء المنبر .. و اقرأ ما ك�
Author: يحي قباني
Date: 04-14-2022, 00:11 AM
Parent: #3
Quote: اوسكار باشمهندس:
هه حكمة الأسلاف ... |
مش كده يا خواض!
هي حكمة تاريخية ..
نهاتي عشرات السنين .. فصل الدين عن الدوله ..
ده برا و ده برا ..
على مر الناريخ.. افضل من مرو على الخدمة المدنية و الادارات كانو مدين الدنيا حقها و الاخره حقها ..
ياما قعدت مع ناس بعد كاس الشري الاول بتذكر انه ما صلى العشا بقوم يتوضا و يصلي و يرجع يكمل شرابو
لكن مما ظهرت السعودية و لخبطت عقول الناس .. ما شفنا خير .. و كان من السهل انه الكيزان يسيطروا ..
|
Post: #5
Title: السودان ده لازم يحكموا شخص يكون بصلي و بشرب ويسكي
Author: يحي قباني
Date: 04-14-2022, 09:26 PM
Parent: #4
غيرت العنوان .. لانه موضوع البوست هو مافي العنوان ..
و المناقشة هنا لموضوع ده برا و ده برا ..
وهو ما قام عليه وطننا الذي بناه الجاك ..
من يحكم السودان يجب ان يكون الشخص بسكر و بصلي .. او قابلا لمن يشرب و يجالسهم .. اما الصلاه .. فلو لم يكن مصليا منتظما .. يكون متاسمحا و ليس متشددا ..
ده سودان زمان .. حيث البارات تفتح بمجرد اعلان ان العيد غدا.. و في احيان كثيره .. تعرف ان العيد تم اعلانه عند سماع اصوات ابواب البارات الزنك و هي تفتح ..
اي خروج عن ذلك الاتزان .. يعتبر خلل و تطرف لا ينفع في حكم بلادنا ..
|
Post: #6
Title: Re: السودان ده لازم يحكموا شخص يكون بصلي و بشر
Author: Amira Hussien
Date: 04-14-2022, 09:30 PM
Parent: #1
ياهو ده السودان
|
Post: #7
Title: Re: السودان ده لازم يحكموا شخص يكون بصلي و بشر
Author: علي عبدالوهاب عثمان
Date: 04-14-2022, 11:54 PM
Parent: #6
حبيبنا قباني تحياتي يا جميل
البوست دسم ..
نحن ناس ضواحي الدنيا وخاصة في الامتداد النوبي لفترة تقريبا السبعينات كان هناك ما يمكن أن نطلق عليه ثقافة تناول المشروبات .. وكما تعلم فإن المناطق التي بها التمور والعنب يكون هناك انتاج الخمور من حيث الصناعة والتناول عبارة عن موروث وسلوك ربما يكون يومي عند البعض أو موسمي
أذكر ليالي القرية عندنا وخاصة في موسم الصيف جلسات البوقانا كنا نسمع انغام (الكلقيه) الدوبيت بالعربي .. التجمع يكون في منزل اطراف القرية وبالليل فقط
وكانت هذه الممارسات تتم تحت قيم وسلوك وقانون (العيب) فالشخص الذي يتناول العرقي أو الدكاي أو النبيذ ويخرج السياق يعني يعمل مشاكل أو تحرش بنساء أو تجاوز على الكبار كان يعتبر شخص ضعيف ومحرم عليه الشرب حتى كانت هناك عبارة ( عشان امثالكم ديل ربنا حرم الخمرة ) يعني من يستطيع أن يتحمل ولا يسبب مشاكل يحق له ان يشرب كما يشاء .. فقط يكون وقت الفراغ وبعد العمل في الساقية ثم بعد ذلك حسن السلوك
النبيذ او ( النبيت ) كان شراب شتوي يتم تجهيزه في معظم البيوت التربال كان يأخذ قرعة كل صباح لمقاومة البرد زي الفودكا عن الروس .. وفي منتصف السبيعنات ظهرت جماعات انصار السنة والدعوة .. اذكر في مسجدنا في القرية عندما تحدث احد الوعاظ عن الخمر سأله احد الاعمام رحمه الله .. وقال (يا شيخ اذا الواحد يشرب عرقي ما يشاكل الناس و لا يشاغل الحريم ويساعد الناس في الفزع وحفر المقابر) الشيخ اجابه برضو حرام وقال عمنا ( انت ما بتعرف حاجة نمشي نسأل الادريسي)
تحياتي الحبيب قباني
|
Post: #8
Title: Re: السودان ده لازم يحكموا شخص يكون بصلي و بشر
Author: adil amin
Date: 04-15-2022, 04:36 AM
Parent: #1
Quote: السودان ده لازم يحكموا شخص يكون بصلي و بشرب ويسكي و لو ما بشرب ما عنده مانع يقعد في القعدات ..
و لو بسكر يكون بسكر و بصلي .. عشان يكون زول عادي زي اي سوداني زمان .. |
قبة يا اسطورة.....ز
حلاتك والعصير شرباتك...يعني يحكمو زول من الخرتوم والسكر المسحوم مش كده
اها نكبر ليك اللفة قبل المؤتمر الدستوري
في الاقليم الشمالي
لازم يكون كمان ب(...) الحمير في جاهليتو الاولى
ويشرب بول لاسد(عرقي البركاوي الداشر)made in Sudan
وسكى بشربو الصيص بتاعين الخرطوم بس وايضا استلاب حضاري زي علم مايو
https://www.0zz0.com
السودان عايز رؤية يا قبة مش صنم جديد
|
Post: #9
Title: Re: السودان ده لازم يحكموا شخص يكون بصلي و بشر
Author: يحي قباني
Date: 04-15-2022, 06:48 AM
Parent: #8
بالضبط يا اميره ..
هو ده السودان ..
اي تركيبة غير كده .. نصيبها الفشل ..
|
Post: #10
Title: Re: السودان ده لازم يحكموا شخص يكون بصلي و بشر
Author: adil amin
Date: 04-15-2022, 08:10 AM
Parent: #9
Quote: بالضبط يا اميره ..
هو ده السودان ..
اي تركيبة غير كده .. نصيبها الفشل .. |
https://www.0zz0.com
حمدوك كان كده فشل ليه
اسال ناس المزرعة السعيدة جماعة صلاح احمد ابراهيم
نومة وسهرة وقهوة سكرة
والله السودان بوظو ديل عبر العصور وعبر الانقلابات
ماسونيين وزمن عبود
وشيوعيين وبعصيين وناصريين زمن نميري
وكيزان وسلفيين زمن البشير والتربي
لا خير في سكر اليسار ولا دين اليمين
وقررررط علي كده
لو قصد سكر الرجال الزي ديل يا الف مرحب بيه
https://www.0zz0.com
ديل السودانيين علي الفطرة من مؤتمر الخريجين
قال وسكي قال
سكرة يني يا قبة
البتمشي وتغني \
|
Post: #11
Title: Re: السودان ده لازم يحكموا شخص يكون بصلي و بشر
Author: يحي قباني
Date: 04-15-2022, 11:03 AM
Parent: #10
Quote:
حبيبنا قباني تحياتي يا جميل
البوست دسم ..
نحن ناس ضواحي الدنيا وخاصة في الامتداد النوبي لفترة تقريبا السبعينات كان هناك ما يمكن أن نطلق عليه ثقافة تناول المشروبات .. وكما تعلم فإن المناطق التي بها التمور والعنب يكون هناك انتاج الخمور من حيث الصناعة والتناول عبارة عن موروث وسلوك ربما يكون يومي عند البعض أو موسمي
أذكر ليالي القرية عندنا وخاصة في موسم الصيف جلسات البوقانا كنا نسمع انغام (الكلقيه) الدوبيت بالعربي .. التجمع يكون في منزل اطراف القرية وبالليل فقط
وكانت هذه الممارسات تتم تحت قيم وسلوك وقانون (العيب) فالشخص الذي يتناول العرقي أو الدكاي أو النبيذ ويخرج السياق يعني يعمل مشاكل أو تحرش بنساء أو تجاوز على الكبار كان يعتبر شخص ضعيف ومحرم عليه الشرب حتى كانت هناك عبارة ( عشان امثالكم ديل ربنا حرم الخمرة ) يعني من يستطيع أن يتحمل ولا يسبب مشاكل يحق له ان يشرب كما يشاء .. فقط يكون وقت الفراغ وبعد العمل في الساقية ثم بعد ذلك حسن السلوك
النبيذ او ( النبيت ) كان شراب شتوي يتم تجهيزه في معظم البيوت التربال كان يأخذ قرعة كل صباح لمقاومة البرد زي الفودكا عن الروس .. وفي منتصف السبيعنات ظهرت جماعات انصار السنة والدعوة .. اذكر في مسجدنا في القرية عندما تحدث احد الوعاظ عن الخمر سأله احد الاعمام رحمه الله .. وقال (يا شيخ اذا الواحد يشرب عرقي ما يشاكل الناس و لا يشاغل الحريم ويساعد الناس في الفزع وحفر المقابر) الشيخ اجابه برضو حرام وقال عمنا ( انت ما بتعرف حاجة نمشي نسأل الادريسي)
تحياتي الحبيب قباني |
عم علي يا زول يا حلو ..
انت فهمت مغزى البوست تماما ..
يبقى السؤال .. كيف نعود الى ذلك العالم الجميل المتزن و المتسامح !
كيف نتخلص من الامراض و التخلف و الاتجار باسم الدين ؟
لابد من وقفة ..
|
Post: #12
Title: Re: السودان ده لازم يحكموا شخص يكون بصلي و بشر
Author: يحي قباني
Date: 04-15-2022, 04:51 PM
Parent: #11
Quote: قبة يا اسطورة.....ز
حلاتك والعصير شرباتك...يعني يحكمو زول من الخرتوم والسكر المسحوم مش كده
اها نكبر ليك اللفة قبل المؤتمر الدستوري
في الاقليم الشمالي |
جقود يا طروره .. طبعا البوست ده للناس البفهموا ..
و المقصود هنا الشربه عموما او الاتزان و الاتساق و الموازنه بين الامور و عدم التطرف .. عموما فهمك على قدرك طبعا .. و انا عافي ليك .. بس عليك الله فكني من الصور و الانشاء الفارغة التي تعلم ..
|
Post: #17
Title: Re: السودان ده لازم يحكموا شخص يكون بصلي و بشر
Author: adil amin
Date: 04-16-2022, 03:24 AM
Parent: #12
Quote: جقود يا طروره .. طبعا البوست ده للناس البفهموا ..
و المقصود هنا الشربه عموما او الاتزان و الاتساق و الموازنه بين الامور و عدم التطرف .. عموما فهمك على قدرك طبعا .. و انا عافي ليك .. بس عليك الله فكني من الصور و الانشاء الفارغة التي تعلم . |
زعلت ولى شنو
ما بفكك من الصور
السودان ده خربو الكيزان والشيوعيين (النظام المجرم)
لا صلاة الكيزان نافعة الصلعة المقابلة الحر
ولا سكر الشيوعيين نافع ...سكة يني خصوصا شيوعيين الخرتوم البشربو وسكي
والصور ما بخليها طال ما بتهريك و تعجب اسامة الخواض
وشوف صلاة البترول 1998
https://www.0zz0.com
الامام في المقابر الان
والصف الاول في كوبر
والصف الثاني في تركيا وماليزيا وقطر
وعايدات النفط في بنوك هشك بشك في الامارات والحشرو عباس
فضائية جقود مش حتقدر تغمض عينيك
شعارها
اي كوز ندوسو دوس
اي شيوعي نخلي يعوعي
وبرضو نحن بنديك على قدر عقلك ووعيك الما فايت اللفة وصابرين
|
Post: #13
Title: Re: السودان ده لازم يحكموا شخص يكون بصلي و بشر
Author: أبوذر بابكر
Date: 04-15-2022, 05:02 PM
Parent: #1
ويكون بلعب الحريق
وبسف التمباك وبشتهي المريسة
ويمش العمرة والحج
مؤمن وما بكذب ولا بسرق ولا بغش
|
Post: #14
Title: Re: السودان ده لازم يحكموا شخص يكون بصلي و بشر
Author: أبوذر بابكر
Date: 04-15-2022, 05:04 PM
Parent: #1
ازيك يا باش
نسيت ما سلمت عليك
تعرف اخوك خرمان وعطشان
وباقي علي الاذان هسي ٤ دقائق في امدرمان
والروح قد بلغت الحلقوم
|
Post: #15
Title: Re: السودان ده لازم يحكموا شخص يكون بصلي و بشر
Author: يحي قباني
Date: 04-15-2022, 09:48 PM
Parent: #14
Quote: ويكون بلعب الحريق
وبسف التمباك وبشتهي المريسة
ويمش العمرة والحج
مؤمن وما بكذب ولا بسرق ولا بغش |
مطعّم و لا مجاني يا شاعر ؟ 🙂
و يكون في ميزانتو صيانة المساجد و اعادة توتو كورة ..
و اعادة مكتبة الاذاعة الى سيرتها الاولى ..
و تنظيم و ترخيص الدعاره لمن ينشدها . بدلا عن ما يحدث الان من اغتصاب و من انحراف ..
|
Post: #16
Title: Re: السودان ده لازم يحكموا شخص يكون بصلي و بشر
Author: أبوذر بابكر
Date: 04-15-2022, 10:19 PM
Parent: #1
دايرين يا يحي سواننا الكان قبل ١٩٨٣
وتحديدا قبل ١٩٧٧
دا هو النموذج البيرفكت المطلوب
كل التشوهات النفسية والاجتماعية والاخلاقية والسياسية الخ الخ
الحصلت في الإنسان السوداني، الحاكم والمحكوم
بدت بعد التواريخ دي
|
Post: #18
Title: Re: السودان ده لازم يحكموا شخص يكون بصلي و بشر
Author: يحي قباني
Date: 04-16-2022, 05:26 AM
Parent: #16
Quote: السودان ده خربو الكيزان والشيوعيين (النظام المجرم)
لا صلاة الكيزان نافعة الصلعة المقابلة الحر
ولا سكر الشيوعيين نافع ...سكة يني خصوصا شيوعيين الخرتوم البشربو وسكي |
السودان خربو الكيزان و معهم الختمية و الانصار .. كان طلعت كان نزلت ..
كم فرصة ضيعوها احزابك الطائفية ..
و هسي جاييت يختوا يدهم تااااني في يد القتله ..
عادل امين ياخ قوم لف ..
|
Post: #19
Title: Re: السودان ده لازم يحكموا شخص يكون بصلي و بشر
Author: adil amin
Date: 04-16-2022, 07:35 AM
Parent: #18
Quote: السودان خربو الكيزان و معهم الختمية و الانصار .. كان طلعت كان نزلت ..
كم فرصة ضيعوها احزابك الطائفية ..
|
انقلاب مايو 1969 صور وتقارير
ناس نومة وسهرة وقهوة سكرة
https://www.0zz0.com
اغتيال شخصية السيد الهادي المهدي بعد اغتياله فعليا بواسطة المخابرات المصرية وادوتها الرخيسة في السودان ناس عباس مدني
ختو زجاجات خمر في مقره في الجزيرة ايا ونحن بنعرف اولاد الانصار وخصوصا الجزيرة ابا ما بسفو حتى الصعوت
ابوعيسي صاحب العملية وعلي شمو قاااااعد كان ما عجبكم امشو افتحو فيه بلاغ تشهير واشانة سمعة
لاننا حنفتح ملف اغيتال السيد الهادي المهدي ونرد اعتباره زي لاهاي الشايفة دي
هذا لنوع من الجرائم المشينة لا يسقط بالتقادم واولياء الدم موجودين يا بعاعيت مايو
ركز معانا معانا بس هنا في سكر الشيوعيين وصلاة الكيزان بس
وانسي سياسات الختمية هسة وما تجيب سيرتهم لحدي ما يفشلو زيكم في قحت وما يوصلونا انتخابات
واجرام البرهان وحميدتي ليه 30 سنة في السودان
انتو مش التوم هجو ولع النور ولقاهم معاكم وحدس ما حدس
وحماد ولدي انت بي وين ؟؟؟سمعت النكتة دي ؟؟؟؟نخليها بعد رمضان
كسرة
اي شيوعي نخلي يعوعي
|
Post: #20
Title: Re: السودان ده لازم يحكموا شخص يكون بصلي و بشر
Author: يحي قباني
Date: 04-16-2022, 08:04 AM
Parent: #19
| Quote: وانسي سياسات الختمية هسة وما تجيب سيرتهم لحدي ما يفشلو زيكم في قحت وما يوصلونا انتخابات |
هههههههههههههههههههههههههخخخخخخخخخخخخخخخخخخخخخخخ
|
Post: #22
Title: Re: السودان ده لازم يحكموا شخص يكون بصلي و بشر
Author: adil amin
Date: 04-16-2022, 02:04 PM
Parent: #20
| Quote: هههههههههههههههههههههههههخخخخخخخخخخخخخخخخخخخخخخخ |
نرسل ليك البندول الاكستر
العالجنا بي معاوية المدير
ولي
نوديك شيخ العيير
السودان ده خربو
الناس البصلو ويغطو دقنهم
والبسكرو وما بغطو دقنهم
والحصة نظافة
|
Post: #21
Title: Re: السودان ده لازم يحكموا شخص يكون بصلي و بشر
Author: Kabar
Date: 04-16-2022, 09:24 AM
Parent: #1
ول ابا يحى قباني..حبابك يا صديقي
ورمضان مبارك ،
تحية لك وللصديقات والأصدقاء ، الحضور هنا ، والمتابعة..
وبعد ،
يقولون في الأثر الجميل (بعد العشا ، مافي اختشا..!!)
حكوتين ، فيما يتعلق بالموضوع هنا..
بعض اساتذتنا الجميلين ، ممن نلنا علوم فلسفة القانون علي ايديهم ، يذهب بان القانون ما بيقدر عليهو الإ زول/ة شرامي/ة..!!
والحكمة ، لمن تكون شرامي أو شرامية ، فهذا حقل يمنحك براح تتعامل مع كل فئات المجتمع ، سواءا فساد بتاع..
White collar
او ناس قريعتي راحت ساكت..!
كنا مرة يا يحى ، نناقش قضية قتل..
Homicide
محامي الإتهام (طبعا قبل عنطزة ما يسمى بالنيابة العامة في امسودان عليها السلام) قام قدم شاهد اتهام..والشاهد قدم شهادة مرتبة وواضحة للغاية..
قام محامي الدفاع ، اخد فرصة مناقشة الشاهد..
Cross-examination
وتووشك خش شمال ، وقال للمحكمة: يجب ألأ تعتد المحكمة بشهادة هذا الشاهد..!
المحكمة قالت ليهو: لماذا؟
سعادة محامي الدفاع قال: الشاهد سكورجي ، ومشهور بذلك..وبالتالي يجب ألأ تعتد المحكمة بشهادته (طبعا دي اسمها المصداقية أو اخلاق الشاهد العامة..!..الكلام ده زمان يا عمك لمن كان في تقاليد سودانية محترمة ومعتبرة)..
في المرحلة الأخيرة..
Re-examination
محامي الإتهام ركز فيما يخدم قضيته..
المحكمة ، رفضت دفع محامي الدفاع ، واخذت في الإعتبار شهادة الشاهد المطعون في شهادته بسبب انه سكرجي ساكت ، وقالت ان الشهادة متماسكة وتشكل بينة مقبولة وفق القانون..!
في هذه النقطة ، قال لنا استاذنا الفاضل (الله يطراهو بالخير أينما كان وكيفما كان) ، شرحا للمفارقة ، : من عادات المجتمع السوداني ، ان بعض الناس ممكن تسهر وتسكر في مساء الخميس من كل اسبوع ، وفي يوم الجمعة يغتسلون ويذهبون الى اداء صلاة الجمعه في الجوامع..!..فهل هذا يفقدهم المصداقية؟
Witness credibility
تحياتي
كبر
|
Post: #23
Title: Re: السودان ده لازم يحكموا شخص يكون بصلي و بشر
Author: يحي قباني
Date: 04-16-2022, 04:03 PM
Parent: #21
Quote: ول ابا يحى قباني..حبابك يا صديقي
ورمضان مبارك ،
تحية لك وللصديقات والأصدقاء ، الحضور هنا ، والمتابعة..
وبعد ،
يقولون في الأثر الجميل (بعد العشا ، مافي اختشا..!!)
حكوتين ، فيما يتعلق بالموضوع هنا..
بعض اساتذتنا الجميلين ، ممن نلنا علوم فلسفة القانون علي ايديهم ، يذهب بان القانون ما بيقدر عليهو الإ زول/ة شرامي/ة..!!
والحكمة ، لمن تكون شرامي أو شرامية ، فهذا حقل يمنحك براح تتعامل مع كل فئات المجتمع ، سواءا فساد بتاع..
White collar
او ناس قريعتي راحت ساكت..!
كنا مرة يا يحى ، نناقش قضية قتل..
Homicide
محامي الإتهام (طبعا قبل عنطزة ما يسمى بالنيابة العامة في امسودان عليها السلام) قام قدم شاهد اتهام..والشاهد قدم شهادة مرتبة وواضحة للغاية..
قام محامي الدفاع ، اخد فرصة مناقشة الشاهد..
Cross-examination
وتووشك خش شمال ، وقال للمحكمة: يجب ألأ تعتد المحكمة بشهادة هذا الشاهد..!
المحكمة قالت ليهو: لماذا؟
سعادة محامي الدفاع قال: الشاهد سكورجي ، ومشهور بذلك..وبالتالي يجب ألأ تعتد المحكمة بشهادته (طبعا دي اسمها المصداقية أو اخلاق الشاهد العامة..!..الكلام ده زمان يا عمك لمن كان في تقاليد سودانية محترمة ومعتبرة)..
في المرحلة الأخيرة..
Re-examination
محامي الإتهام ركز فيما يخدم قضيته..
المحكمة ، رفضت دفع محامي الدفاع ، واخذت في الإعتبار شهادة الشاهد المطعون في شهادته بسبب انه سكرجي ساكت ، وقالت ان الشهادة متماسكة وتشكل بينة مقبولة وفق القانون..!
في هذه النقطة ، قال لنا استاذنا الفاضل (الله يطراهو بالخير أينما كان وكيفما كان) ، شرحا للمفارقة ، : من عادات المجتمع السوداني ، ان بعض الناس ممكن تسهر وتسكر في مساء الخميس من كل اسبوع ، وفي يوم الجمعة يغتسلون ويذهبون الى اداء صلاة الجمعه في الجوامع..!..فهل هذا يفقدهم المصداقية؟
Witness credibility
تحياتي
كبر |
صديقي الجميل و الكاتب الانيق محمد النور كبر ..
بركه الشفناك طيب يا صديقي .. و زمن ياخي منقطع .. و مقصرين بالتبادي ..
ياهو ده السودان كما وصفته ..
تذكرت قصة كنت حكيتها هنا في المنبر عنوانها ميز الموظفين كتبت ما يلي:
ميز الموظفين
______________
زمان في السودان كل مصلحة حكومية عندها فرع في جميع مدن السودان ...وكل فرع بيتبعه بيت للموظفين او ميز كما كان يسمي ...
احد الاخوان الله يطراهو بالخير كان مفتش ضرائب في كوستي في السبعينات ... وكان عزابي ...فساكن هو وكل الشباب الموظفين في مصلحة الضرائب في الميز ...
المن الخرطوم ...المن مدني ...المن الفاشر ... المهم كلهم عايشين في ذلك الميز وبرامجهم معروفة ...
كشاتين ...والذى منه ...
المهم في نهاية فترة خدمة اخوي ... كان العرف انو المفتش الجديد يجي ...وتكون فترة تسليم و تسلم شهر علي الاقل ...
وبما انو المفتش الجديد عزابي قام نزل مع المجموعة في الميز ...وصل كوستي يوم الأربعاء بالليل ...والجماعة منتظرنه ...قاشين حوشهم
مفرشين سرايرهم ... وراشين الضفرة ... وراجين زولنا ... المهم وصل ..وكان رجل سكوت ...قالو ليهو داك دولابك ..وهداك سريرك ...
صاحبنا جاي تعبان رقد نام طوالي ...
صبحو الخميس ماشين علي المكتب ... قال هو تعبان من السفرية فحيرتاح الخميس و يبدأ العمل من يوم السبت ...
جماعتنا مقلقين داير يعرفو مويتو شنو ... وصلو البيت الساعة 2:30 صاحبنا راااقد في سريرو ...
المهم سوطك سوطك عملو الغدا صاحبنا ما مد يده بالمساعده ..لكن قعد اكل و فات سريره تاني رقد ...
اها بعد شراب الشاي قالو ليهو ...يا استاذ الليلة في كورة حارة جدا بين الوطن و الرابطة ...تمشي معانا ... ؟
قال لا شكرا والله انا ما عندى قضية مع الكورة دي ...
رجعوا من الكوره ... لقوهو رااقد في سريرو ... قال ليهو والله الليلة في فلم عالمي في السينما تمشي معانا ؟
قال لا شكرا ...والله انا ما عندي قضية مع السينما دي ...
رجعوا الشباب بعد السينما شدوا حلتهم ( ما الدنيا خميس ) ..ودفرو اخونا قالو ليهو ما تشوف لينا لو الراجل ده بيفضل العرقي ولا نجيب ليهو شرى ؟.
أخوي قام سألو قال ليهو كيف شرابك ؟
قال لا والله ... انا ما عندي اي قضية مع الخمرة دي ...
شدو تربيزتهم ... وقالو ليهو وست ولا حريق ؟
قال والله انا ماعندي قضية مع الكشاتين دي ..!!!
لما بقت الساعة 10 قالو ليهو ياخي في شابات ظريفات كده بجو يتونسوا معانا ... تحب نكلمهم يجيبوا ليك واحده زيادة ...
قال لا والله انا ما عندي قضية مع الأشياء دي ...
اها جماعتنا قالو بسسسس ...صاحبنا أظنو مولانا... لا كشتينه لا كاس لا سينما لا كورة ... بس ياهو مولّانا ...
قامو يوم الجمعة من بدري ...غسلو جلاليبهم وكوو عممهم ...
و مشو لي صاحبنا قال ليهو اجهز عشان نمشي صلاة الجمعة من بدري ونقعد في الصفوف الأمامية ...
صاحبنا في اتكايتو الفي سريرو قال ليهم ...لا والله انا ما عندي اي قضية مع الصلاة دي !!!
الجماعة اتلفتوا علي اخوي مخلوعين ...
يضحك اخونا قاليهم ...
انا نقلوني ...لكن الزول الجابو ليكم ده اظنه ( شيطان ما بني آدم ) ...حلو ( قضيتكم ) معاهو بي طريقتكم ...!!!!
______________________________________________________________________
الحياة كانت بسيطة و جميلة يا ناس ...
|
|