πحأبول ليكم في الشارع.. شفتا گيف!!£

02:44 PM April, 08 2022 سودانيز اون لاين
دفع الله ود الأصيل-
مكتبتى
رابط مختصر

π حأبول ليكم في الشارع.. شفتا گيف!!£
[} رجاء و ليس أمرا ، من شفاتة التنزيلات ،
واحد يتكرم يكب لينا الفيديو دا هنا ، الفيهو
البنية لمياء گايسة«تشر»لينا في العراء الطلق،
ينوبكم ثواب وليشنف الله ٱذان السامعين!

https://youtu.be/b5bZF_aYvRchttps://youtu.be/b5bZF_aYvRc


نهار رمضان يا ود الأصيل.

انتظر حتى دخول الخيط اللسود.

الاخوان الكرام
الأخ ودالاصيل
والأخ اسماعيل
هي بالتليكم في شارع الله واكبر مع البياح عينك عينك.
البنية المشكوتة والطلقت حبلها من زريبة العادات والتقاليد السمحة.
قالت دي امنيتها انها تفكو في العلن.
اظنها قصدت السخرية من تحويل المحليات للدبليوسيهات لماسورة دخل للخزينة.
بعد أحجام المصدرين عن الصادر .
مكسب الWCهات اسرع حسب فهم الحكومة .

∆عااارفگ عصمان يا فردة حاتجي
تحرر البگا وتاني ترجعنا لسرد دراماات
« گرونة و حظر التبول » بس خليك
فاكر دايمن «ظبية البص لسريع».

∆ لكن يا عصمان لو معاي كويس ممكن نقول:
لله الحمد و المنة إنو جابو قوي وگان الشيء
« Just Passing Water »، ماذا و إلا لو بقت
الحكاية «Heavy Duty» لكان الهبيگة غرقت لي
شوشتا، و زاد الطين بلة على نطاق عاسمة اللولوات
و العفونيات التلاتة. علا لاكن ترا ربك لطف.
∆ لكن يبدو البنية من البحة العجيبة في حسها
الدافء و براءة الأطفال أحباب الله تشع من وجهها
المتدفق عفوية و أنوثة يبدو صدق نيتها و بساطة
أمنيتها إنها بحاجة ماصة للذهاب إلى «الكنيف»
إن شاء الله في قلب الساحة الخضراء.

[}
¶حي الله سمعة و الشوق والريد والله. بس لو
أم ريكا معليش يمكن لساتكم في سحور أمبارح!!
نحن دبيناها من قبيل و هدا لينا ماشين نتروح.

صاحبة المقولة دي قالتها بعفوية شديد رغم انها تعني ما تقول
كلامها ده يا حبيب موجع جدا لو نظرنا إليه من ناحية معاناة الإناث عموما في هذا الشأن
عدم توفر تواليتات عامة في العاصمة حاجة متعبة شديد
مرة ، جدة احد أصدقائي ذهبت لعزاء في مكان بعيد وبعد غادرت المكان شعرت (بزنقة ) شديدة
اضطرت تستأذن من ولد كان يقف امام منزل (في عمر احفادها) ان تستخدم التواليت حقهم ، فأذن لها ...
إسترخت قليلا في عنقريب في الحوش وطلبت من ان ينده لأمه لتسلم عليها وتشكرهم
الولد قال ليها ده بيت عزابة يا خالة (يسكن فيه عمه مع اخرين)
من الخلعة قالت " وا فضيحتي" ... بيت عزابة" ؟ أفتح لي الباب اللقوم جارية قبل يشوفتي زول
إلى هذا الحد يعانن نساء بلادنا حين يغادرن بيوتهن.
ممكن نقول كلام البنت دي إستغاثة عدييل للنظر في موضوع بناء تواليتات خاصة بالنساء

∆ حللت أهلا يا حبيب و نزلت ساحتنا سهلا
متفقون معگ تمامن و متفهمون لمعاناة بنات أمنا
حواء «سوداني الجوة ورداني بريدو» إنو العود
كان ما فوقو شق أصلو ما قال طق خاصة و أن
لستنتهن ملجمةبقمع من حديد عن البوح علنا
بمكنونات خواطرهن مثل ما فعلا هذه البنية.
يقول المولى عز و جل في شأنهن«أَوَمَن
يُنَشَّأُ فِي الْحِلْيَةِ وَهُوَ فِي الْخِصَامِ غَيْرُ مُبِينٍ »
[} يا حيدر إنا زول مؤدب أدبن جنا لكن اسمك لينا
₩نضحك معاگ شوية نفر البسمة£ بهذه الموناصبة:
........................
●جداً لينا من كواهلة بحر أبيض.. مسكوا وجع بطن لواية دايرة تودِّر ذمتو
خلتو يهضرب:(يا ناس المزاريق والسكاكين و الخناجر تحش في مصاريني حش).
الجماعة ختفوهو لحقوبو عيادة أجدع أخسَّاوي باطنية في منطفة الكوة..دخلوه
على الحكيم و شكالو الحسس..الدكتور قال ليهو:(أمش جيب لنا شوية فسحة
و تعال). مرق برة لقالو شباب عواطلية ناغمن: " ها جنيات هووووي وروني
محل المروق بي وين؟!ضحكو عليه و قالولو : يا حاج (المروق) ديل
في سوق العناقريب ، أمش سوق ستة. زولك گرف ريحة القهنبة
قام كورك فيهم صرف لهم بركاوي زيين و رجع مقبل على
جماعتو قاللهم: أرحكن آناس ،دي عافيتن اتقسَّت بلحيل
و جابت لها فنقسة؛ تحين قوموا النتكامل أهلنا،
و عاد تاني«تنقد الرهيفة، وأريتا ما تترتق»
😂😂😂

Quote: أرحكن آناس ،دي عافيتن اتقسَّت بلحيل و جابت لها فنقسة؛ تحين قوموا النتكامل أهلنا، و عاد تاني«تنقد الرهيفة، وأريتا ما تترتق»

ياخي جدنا ده الله يديهو العافية .. أضحكني جدا
في المداخلة قبل الفوق دي وضعت ايقونة حسبتها بتاعة الضحك
تفاجأت بأنه في واحدة خاصة غيرها
المعذرة على اللخبطة دي
-
الشباب العواطلية ديل ما بعيد يمشوا يجيبوا ليك سِكَِينة لو قلت ليهم عاوز اقطع جمار

[} يلا أخوي حيدر ، وكت وريتنا بياض
الثلج يشع بين شفتيك ، تعالو لگي لنضع
المشهد تحت مجهر النقد و التفگيكة.
[} فبالله شوف, في حين يحذر نبي أمتنا
و شفيعنا يوم الحشر العظيم من أن تخرج امرأة
من خدرها متعطرة ليجد القوم ريحها حتى تحرم
عليها ريح الجنة وهي توجد من مسافة گذا وگذا.
∆ و هذه اليافعة المسگينة لمياء لديها أمنية وحيدة
ترفع لها أكف الضراعة إلى الله :إنها« تشخ على رگبينها»
في قارعة الطريق, تمامن مثلما تفعلها حمارة وحش
حتى يشم الغاشي و الماشي«نگهة» بولها فتستبيل
وراءها أحمرة أهلية فوق بولتها تماما كوقع الحافر
على الحافر ثم تعوي گلاب و ذئاب بشرية.

[} بالعكس يا حيدر نحن الأسعد بدفء
أنفاسگم تعطرأجواءنا بعبق خلوف الصائمين
فلا أضحك الله لكم سنا ولا أشبع لكم بطنا
إلا بحلال دلال، و ماء سخاء رخاء زلال.

∆فلعمرك إن تلك الأنثى المشرئبة للفتونة
گشأن مثيلاتها صبايا مغرر بهن وهن ربما أولى
بالشفقة عليهن من الامتعاض من فعلهن. فلربما گانت
هذه فاقدة لحفرة بيت الخلاء في بيت أهلها , و لذلك
هرعت إلى الشارع لتبحث عن جحر فأر أو شق ضب
لكي تريق الماء و «تكطع الجمار» بي أقرب درابة.
∆ فبالتالي أليس حريا بنا أن نلتمس لها بدل العذر
سبعين عذرا ، حتى إذا لم نجد لها عذرا واحدا قلنا:
لعله لديها عذر وجيه و لكن لم يهدنا الله إليه؟!
∆صدر تحت توقيعنا بكامل قوانا العقليةِ
المعتبرة شرعا وغانونا08/04/2022
√ود ال ح ي ش ا ن ال ت ل ا ت ة
مؤمن محجور منزليا بجزيرة مالطا

ود البادية وشركاه
كلام البنية كان رد على سؤال من واحدة قالت ليها
"لو بقيتي ولد اول حاجة حتعمليها شنو؟
جاوبت بنفس عنوانك.... عشان ممكن تعملها (على الواقف)
وفي اقرب حيطة او فسحة

∆ رمضان گريم عليگ موسيقارنا الأجمل و فنانا
الأشمل فعلن يابو حميد نحن مزجنا بين الجد و اللعب
لا لغرض سوى لطرد خلوف خشومنا من طول السگات
و نحن ناذرون صوما ألا نكلم اليوم إنسيا و لا جنيا.
[} البنية جاء جوابها عفويا على عواهنه؛ لكن المسألة
كما تفضلتم أنت و أخونا حيدر ، بتعكس لينا بروفايل
جانبي مهم لجبل جليد من الگثير المثير المسكوت و
متغاضى عنه في مجتمع ذگوري بامتياز فهمو
مغلوط إن لم يكن أعور لقوامتنا على النساء.
¶شگرن جزيلا على إناختكم بعيركم هنا.

كتب إلينا هنقا الحاج منوها:

Quote: والله يادفع الله كلام البنت دي ضربه قويه لكل البلديات والحكومات المحليه، لاغفالها عن تأسيس مرافق عامه في كل الأسواق والمحلات التجاريه والمؤسسات الحكوميه لحوجتة الإنسان لهذا الفعل الطبيعي، وكلامها هذا نقد صريح وتعبير عن حوجتها وحوجة ائ انثي، وايضا نقد للمجتمع الذكوري الذي يفعل ما قالت يوميا كأنما الأمر طبيعي وهو يعلم أن فعله غير سليم ولكن لظروف خاصه به يفعلها علي الرغم من انه له صمامين للتحكم في التبول وللمرأه صمام واحد كما يقول علماء التشريح،،،،، افتكر المزيعه اذا سألتها ان كنت مسؤوله عن الحكومه المحليه ليوم واحد، ماذا ستفعلي في هذا اليوم من قرارات،؟ كانت ستكون اجابتها كالآتي ::: سآمر بتشييد حمامات عامه في أول ومنتصف ونهاية أئ شارع ولن أصدق رخصه لائ محل تجاري او شركه او مصنع إلا بعد توفر حمامات لعمالها وموظفيها وبمواصفات ممتازه،،،،، هذه المشكله يعاني منها كل من دخل السوق أو ذهب لعياده او مصلحه حكوميه، حتي المطارات تفتقر لهذه المرافق، وانا اعتبر ان ما قالته هذه الشابه مخجلا لكل مسؤول وليست لها، هنقا الحاج

[} گفيت و أوفيت محمد حسن الحاج
يا دفعة و يا فردة و سوف اهمبتها فورن
مداخلتك الشحمةانة دي لگي أرصع بها صدر
البوست اللي انا فارعول لذات الغرض و بهذا
العنوان على صفحات البورد الأوسع سيطا أطول
باعا سودانيزاون لاين. ثم ياخي تعال لينا بهناك
محلك قد والله في قروب حنتوب1980بتلقى
كل الگوامر الهكر و القرمبع مقرشين بهناك.

شوف كلام الدكتور الفاهم الإنسان دا

Quote: كتب //////// د احمد الطيب إبراهيم استشاري جراحة الكلي والمسالك البولية 8 أبريل 2022 (( اين حمامات النساء ))) تناولت الوسائط مقطع فيديو لفتاة سودانية في التك توك سالتها مذيعة سؤال مفاجئ جدا ... ماذا تفعلين اذا صرتي ولد لمدة 24 ساعة فقط ؟ __ ردت أنها سوف تتبول في الطريق لأنها بتعاني . __ كالعادة تداول الشعب السوداني المقطع وتلقاه بي طرق مختلفة.. __ واحد رسل لي الفديو وكاتب عليه ( بالله شوف التردي الأخلاقي وصل وين __ بنت بتقول دايرة تبقي ولد عشان تبول في الشارع ) مع أنه اصلا هي ما حتبقي ولد وما ح تبول في الشارع . __ التاني رسل لي الفديو وكاتب __ شوف القحاتة وصلونا وين ؟ قحت علاقتها شنو بالكلام ده هسا !!! الناس دي بتفكر بي شنو __ التالت رسل الفديو وكاتب (هههههههههههه. محن والله ) . __ اظرف واحد رسل لي صورة عمر البشير وكاتب عليها تلاتين سنة حكمتكم حصل سمعتوا بنت كلب قالت دايرة تبول . __ يا اخوانا المرأة كائن بشري وعنده وظائف فزيلوجية من ضمنها البول __ والمرأة دي هي امك واختك وزوجتك وبنتك و زميلتك فهل يوما تسألنا المخلوقات دي بتعمل شنو لما تكون مزنوقة ... وللا هل هي بتتزنق من اصلو وللا لا و هن بعانن بتنازلن عن شنو عشان يبدوا أنهن متماسكات وهن راكبات المواصلات أو قاعدات في مكان شغل حماماته طافحة او ما مناسب أو مافيه حمام من أصله. __ المخلوقات دي بشر ما عندهن ماكينة فلوكسواجن. ... يا اخي الفلوكسواجن ذاتو بقي عنده سايفون وللديتر . __ نسيتوا أنه قبل خمسة سنوات في استاذة ومربية عظيمة فقدت حياتها عشان اضطرت تدخل حمام أيل للسقوط و وقع بيها و توفت في المدرسة في حادث يعتبر وصمة عار في جبين وزارة التربية و التعليم في السودان وانا واثق أنه الحمام ده ما ممكن كان يقع بي استاذ راجل لانه لانه لو لقي الحمام تعبان ح يبول برة في الحائط والسلام .و لو شافوا تلميذ ح يجلدو خمسة سيطان بحجة أنه ولد قليل ادب يتحاوم حول الحمامات. __ البنوتة دي يا اخوانا خاطبت المجتمع الزكوري المهيمن علي المجتمع واللهو بياكل محل داير ياكل و يبول محل داير يبول ويعرس محل داير يعرس و يشيل شنتطو و يمشي من البيت بدون إذن وقت ما داير وممكن يعرس ويفوت يخلي المرأة وعيالها و ما يسأل منهم تاني ومافي زول بيقول ليه تلت التلاتة كم ....ده كله حاصل مننا كرجال وفي ناس بيكونوا عمله الحاجات دي كلها و اي واحد فينا بيكون عمل نمرة واحد و اتنين لا مرة ولا مرتين . __ يا اخوانا الزولة دي خاطبتكم بصورة مباشرة كمجتمع زكوري ولأننا ما بنستقبل الرسالة إلا تكون مباشرة و لو قالوها لينا باللفة ما بنفهمها وممكن نحورها من محتواها . __ هسا قليلة ادب البنت دي وللا انت البتعملها في الشارع و في حوض الوضوء و بتوقف البص السفري الفيهو خمسين نفر حريم علي اطفال و تعملها زي جرقاس تحت اللستك الخلفي وتجي طالع رافع شنبك كانك جاي من موقعة القدس . __ في أي دولة متحضرة أو متخلفة اي سوبر ماركت او مكتب او شركة أو طلمبة بنزين أو مطعم او كافي أو أي حاجة تستقبل جمهور مهما كان عدده لازم يكون فيه حمامات ... حمامات يا اخوانا وليس حمام واحد مطبول بي طبلة سوكرتا __ عليكم الله في الدنيا دي حصل شفتوا ليكم حمام مطبول بي طبلة غير في السودان . __ اي حتة عامة لازم يكون فيها حمامات ولازم تكون بي مواصفات صحية عالية و لازم يكون قسم منها للسيدات و قسم للرجال وفقا لعلامة المعروفة عالميا ولازم كمان حمام لزوي الاحتياجات الخاصة . __ لايمكن يتصدق ليك مكان عمل أو خدمة بتتقدم للجمهور ما لم تعمل الحاجة دي في أي دولة في الكورة الأرضية لكن نحن شكلنا عايشين تحت الكورة الأرضية وبعد كده قليلين ادب . __ ما ممكن تعمل ليك محل خدمي و بدل تعمل فيه حمامات محترمة تقوم تكتب في ضهر الحائط الخلفي ( ممنوع البول يا حمار ) عليكم الله الكلام دي صحيح وللا انا غلطان . __ في أي دولة مافي بص سفري ما يمكن يكون فيه حمام يخلوه يطلع من مدينة لي أخري ويشيل ركاب . __ أي محطة بيكون فيها حمامات تشوف فيها وشك وما عيب الحمامات دي ممكن تدخلها بي قروش لكن ما ممكن تعمل لينا حمامات بقروش و تخت ليك متحصل اوسخ من الحمام وجنبه خمسين ابريق اوسخ منه . وبما انكم ما بتفهموا الا لما يكلموكم مباشرة انا ح اديكم المعلومات دي وهي معلومات طبية مؤكده وبالدراسات اعتبروني داير اديكم الزيت : ___ في امريكا يعاني 25 مليون فرد من المثانة مفرطة الحساسية over active bladder ودي تعني أكثر من عشرة في المئة من السكان ...النسبة دي في السودان احتمال تكون أكبر من كده و دي حالة بتخليك ما تقدر تتحمل البول لفترة طويلة و حتي لو قدرت تتحكم فيه بيكون بي مشقة عالية جدا و الحالة دي أكثر حدوثا عند النساء من الرجال . __ الحقيقة العلمية التانية أنه 25% من النساء بعد عمر الخمسة وأربعين لا يتحكمن في البول بصورة جيدة الشئ الذي يحد من ممارستهن العديد من الأنشطة و الرياضات و نحن هنا بنزيد من معاناتهن بعدم توفير حمامات مناسبة . ___ والمرأة السودانية بتطلع من البيت الصباح و لحدي ما ترجع بتكون ما دخلت الحمام وهي مجبرة علي ذلك __ عارفنها بتعمل شنو ؟؟ ابسط حاجة بتمتنع عن الشراب لأطول فترة ممكنة و تدرب نفسها علي امساك البول لأطول فترة فيما يعرف بي ) urine stagnation)والسلوك والاخير ده معروف من الأسباب الأساسية التي تؤدي لالتهابات البول و الامساك وما يترتب عليه من أمراض القناة الهضمية السفلية من بواسير و شق و ناسور و احتباس البول أيضا من الأسباب الأساسية لتكوين الحصاوي ومن الأسباب الأساسية لكسل المثانة و احتباس البول العصبي فيما بعد و الفشل الكلوي ... عشان كده المخلوقات الفضائية دي كل اسبوعين تلاتة ماشات الصيدلية يشترن في المضدات الحيوية و دائما بدون فائدة . ___ معلومة تالتة اعرفوها كده صدقة لله يا مؤمنين أنه المرأة عندها صمام واحد ارادي للتحكم في البول في حين أنه الرجل عنده صمامين __ يعني لو في عذر طبي أو شرعي يسمح لي حد يتبول في الطريق العام هي الانثي وليس الرجل لكن يا اخوانا نحن والله نسوانا ديل مستورات ومقهورات. __ المعلومة الأخيرة دي تشريحية وعلمية وطبية وحتي في نساء ما عافتنها وأهميتها تاني أنه الانثي ما تعرضها لي خوف مفاجئ عشان كده لو كنت زول فاهم في زولة اتعرضت لي ضغط نفسي شديد مثل حادث حركة أو زي البرنامج السخيف بتاع رامز جلال ده ...زولة في موقف زي ده بتكشح فيها موية قبلما تنزلها من سياراتها يا سخيف . عشان كده رامز شايل قارورة الموية وبكشح في الضيوف. __ المضحك حقا أنه قبل شهر في شباب قاموا بي مبادرة لصيانة حمامات مطار الخرطوم __ يا اخي نحن مطارنا مافيه حمامات نضيفة ناهيك عن مدارسنا وملاعبنا و مستشفياتنا و مكاتبنا. __ والله انا لما اسمع زول بيقول ليك نحن احسن ناس في العالم بقرب ابكي . لانه ده زي فناننا البغني ( يا اخوانا الجمال في كل مكان لكن الجمال الاصلي في السودان ). اقسم بالله الشاعر والفنان الاتنين لمن غنوا الأغنية دي ما طلعوا متر من البلد دي . والبلد دي مافيها اصلي الا البنغو. __ يا ناس المحليات انا واثق انكم أنتوا في المحليات ما عندكم حمامات لكن ممكن تلزموا اي زول بقدم خدمة عامة لازم يكون عنده حمامات ولازم تكون نضيفة وبي كده بتكونوا ساعدتوا نص المجتمع يعيش بي صورة شبه عادية و اصلا النص الذكوري دي عايش بالصورة البتريحو. __ 8/4/2022 ودمتم سالمين __ __ يا ناس المحليات انا واثق انكم أنتوا في المحليات ما عندكم حمامات لكن ممكن تلزموا اي زول بقدم خدمة عامة لازم يكون عنده حمامات ولازم تكون نضيفة وبي كده بتكونوا ساعدتوا نص المجتمع يعيش بي صورة شبه عادية و اصلا النص الذكوري دي عايش بالصورة البتريحو. __ 8/4/2022 ودمتم سالمين __

Quote: الشباب العواطلية ديل ما بعيد يمشوا يجيبوا ليك سِكَِينة لو قلت ليهم عاوز اقطع جمار

+تسمح الي أقولليك يجازي محنك يا حيدر و يكلبش لي بنات أباليسك
تعرف نكتة الموقف ولارجال مواغف ، لامن تطلع من زولن زيك
رزين و في طبعو دايمن هدي ، بتكون ليهانكهة عجيبة، تامامن
متل ال "من الواسوووووق
من "الماروووق" أبت تطلع
من الشــــادوووف ابت تطلع
من الأبرووووول أبت تطلع
من الأقلاااااااام أبت تطلااع
من المدفع طلع خازوووووووق
خوازيـــــــــق البــــلد زاااادت
يفيض النيل .. نحيــض نحنــا
يظل حـــال البلد .. واااااقف
تقع محنـــــــــــــــــــــــــة..
+ تحين قولت لي: يجيبو سكينة عديل لكطع الرحط؟!
لكن عمك ظاطو داقس، يعني لو كان طلب سأل الجنيات من الاتحاد
الاشتراكي على أيام أبعاج أخوي ،أو من مقر"الحُمار الوطني" في
عُهرالإنغاظ ، كان وصفولو مكان "المخرجات" راسو عديل .
+ ولا كمان لو رجع للتمرجية وشحدا "قصرية" يقضي فيها
غردو جوة كانت تسوقو لقصرالشباب و الأطفال عشان يشاهد
هناك رائعةنجيب محفوظ في مسلسل" بين القصرين"
لنجمين / محمود مرسي وهدى سلطان.

Quote: : شوف كلام الدكتور الفاهم الإنسان دا

سف جدن أخوي نصُر(Nasr) للتركينة طوال هذه
المدة التي لم نقابل فيها ، نظرن لزحمام المتناقضات وزنقة
الفتيل الباقية عيلنا بين عسكر و حرامية ، أيوة نعم قمنا بثورة
كونية قلبنا نظام زواحف متوحشة ، ولكن لسة ما مرقنا من
الغنيمة سوىبالغياب ، غير إننا أودعنا خلف قضبان كوبر
ديك/ تا/ تور وتكرنا رؤوس الشياطين "حية تسعى".
+ نجي بقى لمداخلتك وكلام دكتنرنا الفهمان حول حمامات
كضرورة مُلِحَّةٍ وحاجةٍ ماسَّةٍ. فقد سبق لنا وافترعنا خيطاً رفيعاً
حول ظاهرة " محاالت أخو التومات البيطبق البوخات و يبنشر الكفَرات"
وقلنا طبعن، بما إنها مهنة ككل المهن الشريفة كمصدر رزق حلال و لا غبار
عليه,و برضو نظام بزينيس "مستربح "جدن فسمعنا قالو الراجلقاعد يوسع في
نطاق أعمالهمن مجرد زريبة حطبٍ قديمةِ و كائنة بمحلية أمبدة بين كرور واب
نيران و يتجه الٱن لفتح فروع له جيهة مناطق غندهار سوق الناقة و أسواق
ستة بالحاج يوسف و مايو و صابرين ، مع وجود طموح جاد لإدخال
بعض التقنيات الحديثة لحمامات البخار وتدليك الرجال!!
+ إذن ، و بما أن كل ذلك يُعتبر ترفاً يُشتَهى في ظل مقارنته
بألووية وجود حمامت للنساء، فإننا نناشد كاردنال الأعمال الوجيه /
أخو التومات هذا أن يضيف إلى سجلها التجاري ، نشاطاً هاماً و مُدِرَّاً
ل"سيلٍ" عَرِمٍ من الأرباح ، و براسمالٍ زهيدٍ لا يكاد يُذكر، إذ لا
يتعدى نصب أية ضروة في خور مايقوما، أو إن شاء الله حتى لو
بُتُّقة شَدَرٍ في هميريب العراء الطلق تقعد الواحدة متضارية بيها
متل المتضاري يي أم ريكا عريان ، و يلا ، تفضل شادها
وتدعَم لامن تقلعا تقوم بيها في يدينها. فا شايف كييف؟!

 « نتايات على ضكور، الحال من بعضه »
 فاگرين لامن كتبنا عن《 كورونا ..و حَظْرُ التَّبَوُّلِ 》
▪ و نعني به التبول في الكُوَش و على الحيط و في الطرقات.
والدافعنا لكدا الحكومة كان البايدة و لا كان انقلابي الدولة العميكة
طبعن فارضين رسوم باهظة تصل لشلنغ بالقديم لحمامات عمومية
على شعب مفلس و أصلن جنو يتهرب من الضرائب . فبدل ما ننفع
غفير الحمامات في الأسواق و المواقف و الرجال أصلن مواغف قلنا
أحسن الواحد يشتتو فوق ركبينو ساي يبول زي بولة البعير واقفا.
و أهلنا ناس ألبل في البطانة هنا عندنا مثل : ( الشُّقوق و لا المخلوق ) .
▪ لكن جانا هدا كرونا رضي الله عنه و أرضاه، و رجع (الأمواه) قسراً
إلى مجاريها في بيوت الحبس، مراعاة لإصحاح البيئة العامة.

على مستوى عاسمة اللولوات والعفونيات
التلاتة و القرى والحضر الماجورة
《..حظر التبول 》
● علا لاكين كان جينا للحق ؛ عشان برضو نكون
منصفين و دقيقين كمان ،ليس تهرباً من الرسوم وحدها ،
بقدر ما هروب حقيقتن من وضعية(المنافع) نفسها المبنية
على أساس إنها (قبانات) للجباية و حِتحَيْتجيوب المتبولين
في الأرض ، و هي خاوية الوفاض على عروشها .
● ياخي المرافق دي لا مؤاخذة، عليها جنس عفوينة،أكرم الله
السامعين الشامِّين منهم و الشامَّات الأحياء منهم و منهُنَّ والحيَّات
والأموات والميتات، تخلي حال الجوَّاها يشحد في الله: يحلني الحل بلة
بين الخيت و المسلة، لكن مو جايب خبر للواقفيت مستنيهنو برة ديلك
حالم ألعن و (أظرط) من حاله ، يضربون وجوههم و ادرابهم وهم
يدافعون الأخبثين:"رَبَّنَآ أَدخننَا فيهَا فَإِنْ عُدْنَا فَإِنَّا ظَٰلِمُونَ"

.