علاقات اضطرارية

04:07 PM March, 30 2022 سودانيز اون لاين
معاوية الزبير-إنجلترا
مكتبتى
رابط مختصر

خلال زياراتي الأخيرة إلى مدينتي كوستي في العشر سنوات الماضية أو أكثر، لاحظت باندهاش نشوء
علاقات صداقة غير متوقعة في أوساط من تبقى من أبناء جيلي (أقصد السبعينيات والثمانينيات)
السبب في استغرابي من نشوء هذه الصداقات أنه لم يكن هناك أي جامع بين أصحابها في ما مضى،
باختصار لم يكن بينهم أي اهتمامات مشتركة من أي نوع، ليس صداقات فحسب بل علاقات تصاهر
في أوساط أُسر بينها بون شاسع سواء جغرافيا (الأحياء السكنية) أو اجتماعيا أو اقتصاديا
أو حتى أحيانا في القيم والعادات أيضا

بيني ونفسي عزوت ذلك لنشوء واقع اجتماعي جديد في المدينة إثر اغتراب الشباب وهجرة عشرات المئات منهم
ومغادرة مئات العائلات إلى مدن أخرى وخصوصا العاصمة، وكان دافعهم إلى ذلك في الغالب اللحاق بأبنائهم وبناتهم
الذين التحقوا بالجامعات. بالمقابل حل مكان هؤلاء وافدون جدد أكثرهم من القرى المجاورة،
حيث امتهن الأثرياء منهم التجارة واندمج الآخرون في الأعمال التي توصف بالهامشية

مع ملاحظة أن سكان كوستي القدامى نسبيا (نهايات الخمسينيات ثم الستينيات فالسبعينيات) ومعظمهم من الشمالية،
أتت بهم ظروف العمل في السكة حديد والنقل النهري منتقلين من محطات أخرى، وبالطبع انتفى هذا السبب
بانهيار هاتين المؤسستين العريقتين، بينما انخرطت قِلة من هؤلاء في مصالح حكومية أخري

هذا التغيير في البنية الاجتماعية (أقصد علاقات الصداقة والتزاوج غير المتوقعة) سببه في اعتقادي أن السكان الأصليين
وكذلك القدامى نسبيا وجدوا أنفسهم أقلية بين أغلبية وفَدَت حديثًا فلم يجدوا بديلا عن إنشاء الصداقات غير المتوقعة
والمصاهرات غير المتكافئة متبعين قاعدة "اللي تعرفو أحسن من اللي ما تعرفوش"

ليس بالضرورة أن يكون التبرير الذي كتبته هنا صحيحا فأنا أكتب بدافع الحنين لأيام الصبا والشباب،
وهذه عاطفة مخادعة كما تعلمون وقد تكون بعيدة عن الحقيقة.

أووووووووووووووو حبيبنا ود الزبير ⚘⚘⚘⚘⚘⚘⚘
ياخ المنبر نور .....

والله أيام يا أبو حسين

Quote: علاقات اضطرارية/المصاهرات غير المتكافئة

دي المدنية الدايرنها ! 🤣🤣🤣🤣🤣🤣



#التعديل 👇

عُذرا معاوية فاتني نسلم عليك
وحمدا لله علي سلامتك لعلك بخير ومن تحب

اوووو صديقنا الجميل معاوية الزيير ..

الشوق محيطات يا رجل .. بركه الشفناك طيب ..

ما تغيب كده ياخي ..

او غيب و تعال .. 🙂

المنبر نور بطلتك
الموضوع يستحق النقاش
واظنه في اكثر من مدينة

زمن طويل يا عبد اللطيف، اشتقنالك والله.
نعم بلا شك الموضوع ينطبق على أغلب المدن إن لم يكن كلها.
وهذا من النتائج الحتمية لظواهر الاغتراب والهجرة والنزوح

حبيبنا قباني
دي أحوال الطيور المهاجرة
مصيرها تحن لأعشاشها الأصلية
إن شاء الله ما نطوِّل الغيبة تاني

مرحب يا حامد
فعلا ده حصل. عائلات ثرية صاهرت عائلات فقيرة
وهناك عائلات كانت تتزاوج داخل دائرتها الضيقة
لأسباب مختلفة، لكن مؤخرا اتسعت هذه الدائرة لأبعد حد

ازيك يا معاوية
ارحب بيك وارحب بى نفسى كمان بعد غيبة
ياهو كدة
الناس شنو غير ذكريات . ذكريات طفولة وصبا
اها منو البشاركك الاحساس دة غير زول عاشو معاك
والدايرو مابتلقاهو
ف بتاخد اي زول غيرو عاش معك تلك الحقبة
لامن تحكى ليهو بكون مش فاهمك لكن مابتصرف معاهو نقة كتيرة
ونسة عابرة
ونسة مقصودة
مواعيد مرتبة
وتحس بيهو بقا قريب منك
وبس

أهلين أبو سن ومرحب بعودتك أيضا
عشان كده أطلقت عليها علاقات اضطرارية
طبعا عندي أمثلة حية لعلاقات صداقة متينة
لقيتها في حلتنا حي النصر بين ناس بيناتهم تفاوت
تعليمي وثقافي وفكري وأي حاجة، فكنت مستغرب جدا
الناس ديل اللماهم مع بعض شنو؟
فعرفت إنو ثلاثة أرباع جيلنا غادروا الحي لأسباب مختلفة
فلم يجد المتبقي منهم بدًا من مصادقة الموجود هههه.
وهكذا في الزواج أيضا

كيف الحال يا معاوية
وعساك طيب وشديد

دي مش علاقات اضطرارية
دا تحول مجتمعي ومفاهيمي حتمي
لازم ولا بد يحصل في كل المجتمعات البتمر بظروف قاهرة وقسرية غصبا عنها
الشي دا يا معاوية بدأ يحصل تدريجيا بدون ما الناس تحس او تنتبه او توعى بيه من منتصف التسعينات
والأخطر منه انه كان شي مقصود وما مجرد صدفة
نظام الكيزان والانقاذ كان قاصد يعمل حاجة زي دي
سواء بالاقتصاد او بتمكين راس المال في يد التنظيم ومن ثم التحكم في إدارة كل مفاصل المجتمع

نظام الإنقاذ والكيزان غير خريطة المجتمع السوداني اليمكن ما اتغيرت من ايام دولة سنار
وقدر بالقوة، الاقتصاد تحديدا، يغير مفاهيم واعتقادات وقواعد حياة السودانيين كلهم بلا استثناء

ودا هو التحدي الأخطر المفروض الناس تنتبه ليه وتعالجه

الناس ما تنظر بس للجزء الظاهر من جبل الجليد

الموضوع اكبر من كدا كتير والله يا معاوية

يمكن انا شخصيا لاحظت وانتبهت للتغيرات دي من منتصف التسعينات زي ماقلت ليك
وفي اول زيارة للبلد بعد عشرة سنين

ولسه الجاي أسوأ

مراحب ياخ ونورت الفجة والله بي جيتك

سلام يا معاوية الزبير وسلامة العودة
ياخ المنبر فاقدك كتير والله ..
يازول خليك من الفيس وتعال هنا .

هناك تحولات عميقة فى المجتمع السوداني .

عودا حميدا اخ معاوية ..
.
.
ياخ خليها كوستي البعيدة دي وشوف المنبر في غيابك عادي تلقى عادل امين مصاحب قباني .. ههه
وقس على ذلك ..
قبل كم ساعة كنت بتكلم مع واحد وقلت ليه سكان المدن التانية كلهم جوا الخرطوم وحل بدل هناك ناس القرى وناس الخرطوم القدام معظمهم هاجروا إلى الخارج .. فااا الكل غير مقتنع بوضعه ..
لاحظت برضه وخلال فترة الاغتراب أن هم معظم ان لم يكن كل المغتربين المن خارج الخرطوم هو شراء بيت في الخرطوم ..
فعرفت انه مؤلف نشيد لا لا يا قروية كان محق في كلماته ..
.
..
.
للحديث بقية ..

إزيك يا قسم الفضيل لعلك بألف خير
قصة الاغتراب دي تستحق عشرات المؤلفات
لسبر أغوارها وسطوحها ودراسة تأثيراتها على السودان.
صديقنا الأديب عثمان سليمان حامد
بدأ في الفيسبوك مشروع كتابة مطولة عن المغتربين
إذا عندك حساب هناك ممكن تتابع البوست ح يعجبك جدا

سلام معاوية
سعيد بطلتك هنا بعد غياب

Quote: بيني ونفسي عزوت ذلك لنشوء واقع اجتماعي جديد في المدينة إثر اغتراب الشباب وهجرة عشرات المئات منهم ومغادرة مئات العائلات إلى مدن أخرى وخصوصا العاصمة، وكان دافعهم إلى ذلك في الغالب اللحاق بأبنائهم وبناتهم الذين التحقوا بالجامعات. بالمقابل حل مكان هؤلاء وافدون جدد أكثرهم من القرى المجاورة، حيث امتهن الأثرياء منهم التجارة واندمج الآخرون في الأعمال التي توصف بالهامشية

الاندماج الاجتماعي ده ، أيا كان طبيعته، (علماء الاجتماع بعتقدوا انه يقوي الروابط التي تربط الناس بمجموعاتهم الاجتماعية) عامل أساسي في الحياة الاجتماعية.
لذلك شبهوا المجتمع بـ "الكائن الحي" يلعب كل عضو فيه دور ضروري للحفاظ على الحياة ..
غايتو في سياق الظروف المعيشية الصعبة الراهنة إنسان بلدنا إلا يقلد الحيوانات في هجرتها للملاذات الآمنة بعد هربها من حريق الغابات (للبقاء على قيد الحياة).

أهلا بيك يا حنين
طبعا التحولات في المجتمعات مسألة حتمية
تفرضها دورات الزمان وتقلبات الأحوال
ياخي حتى وجود المغتربين في الخليج
كان عندو أثر كبير في تغيير أسلوب حياة الخليجيين
يعني المجتمع السوداني تغير في غيابنا الطويل عنو
وبدورنا غيَّرنا طبيعة الحياة في المجتمعات التي اغتربنا فيها
وهكذا تمضي الحياة حتى تتزلزل الأرض وتحدِّث أخبارها

اوووه حبيبنا علاء ياخ
والله منبر بكري مافي زيو
لكن ابتعدت عنو مضطرا إثر مضايقات (عنيدة)
أثرت على صحتي فهاجرت إلى الفيسبوك وأدمنتو.
الآن هاجت الذكرى وغلبني الحنين
ودعوات من أصدقاء عزيزين فعدتُ
وإن شاء الله أكمّل وأواصل

الفِجَّة منورة بوجودك يا أبوبكر
طبعا نظرتك أشمل ولمست الصورة الكلية
بينما اقتصرت نظرتي على حيِّزي الجغرافي/المجتمعي
اتفق معك في أن الكيزان انقلبوا على الديمقراطية الثالثة الهشة
و في خططهم إعادة صياغة الإنسان السوداني كسياسة معلنة
وقد نجحوا في ذلك بدرجة عالية جدا وخلقوا واقعا جديدا
لا يمكن إنكاره. وكانت وسيلتهم في ذلك التجويع والترهيب
و هما وسيلتان ناجعتان في فلسفة إعادة تشكيل المجتمعات.

الآن علينا العمل بقصدٍ أكيد على استعادة القيم النبيلة التي فقدناها

اتربينا كلنا في بيت فيهو ام واب واخوان واخوات
بعد كبرنا طشينا جزء وجزء قعد حبس العقاب والبحبس العقاب بضوق العذاب على قول المثل
حاليا الاسر الزي دى تكاد تكون نادرة جدا
الاب مهاجر او مغترب
المغترب مابجى زاتو برسل لاولادو في الاجازة يجوهو
الاولاد ابو القراية ودايرين الهجرة
وطاشين دون عمر الطششان
في تغيير شديد سارعو بيهو الكيزان
اصلا كان حنصل لي دة لكن عبر طريق طبيعى وطويل ومتناغم ومقبول
التسريع دة شوه العلاقات والترابط زاتو
وحاليا زادت وتيرة التسارع
حركة المجتمع محسوبة بقوانين صارمة اي تدخل فيها سيؤدى لتشويه

مداخلة ثمينة جدا يا أبو سن
التعقيب عليها صعب. ح أكتفي بيها كده.
تسلم كتير

في الحي السكني بتاعنا سابقا ، كنا نفتخر بان لا احد يعبر

الحي دون ان نكون عارفين عنه كل شئ : الاسرة ، الاخوان

الاهل ، حتي القادمون من مكان بعيد

لاننا اما ذهبنا معهم في مناسبة او حضروا هم الي الحي سابقا


،،،،، بعد سنوات قليلة - كانها غفلة من الزمن - اصبحنا لانعرف جارنا بالحيطة !!


ـــــــــــــ

في احد المرات يامعاوية سالوا محمد ابراهيم نقد : هل ستفوز مرة اخري

في دائرة الديوم ؟!

قال : لا ، لقد تغيرت التركيبة السكانية ....

هي حركة العمران التي يقصدها ابن خلدون ويعتبرها

الاساس لقراءة التاريخ والاحاديث النبوية وليس العنعنة

المؤسف يا لطيف إنو التغيرات دي جابت معاها جفاء.
هسع الزول اللقوهو ميت في الكلاكلة القبة
واكتشفوا إنو ميت ليهو سنة ونص ده خير مثال
على جنون الحياة التي نعيشها في السودان.
الله يرحمه

حمد لله علي السلامة يا معاوية

ياهو الواحد ياداب يلقو نفسو بيقرأ ليهو موضوع محفز للتفكير

الحقيقة موضوع التحولات المجتمعية البتمر بيها مجتمعاتنا محتاجة لدراسات
ووقفات عشان نفهم الحاصل شنو!

هناك عوامل عديدة ساهمت في التحول المجتمعي
منها مسببات النزوح
والاغتراب
والحروب
وتحول المنظومة المالية والاقتصادية من افراد وجماعات لاخري
والدولة الثيوقراطية التي تحولت الي دولة فاشية الي دولة لصوص الي دولة لوردات الحروب.
وغيرها من العوامل التي ادت الي هذا التغيير الكبير في احلام وطموحات وافق الناس نحو الحياة عموماً


سعيدين بعودتك ياخ

مرحب بروف سنوسي
الفقرة الأخيرة في مداخلتك صادمة ومؤلمة جدا
لكنها الحقيقة للأسف
لن نحتج على العوامل الطبيعية التي تؤدي إلى التغيرات المجتمعية
لكن مصيبتنا في التغيرات التي تحدث بأيدي الحكام المتأدلجين
والآن بأيدي لوردات الحرب كما ذكرت. والله المستعان

Quote: اتربينا كلنا في بيت فيهو ام واب واخوان واخواتبعد كبرنا طشينا جزء وجزء قعد حبس العقاب والبحبس العقاب بضوق العذاب على قول المثلحاليا الاسر الزي دى تكاد تكون نادرة جداالاب مهاجر او مغتربالمغترب مابجى زاتو برسل لاولادو في الاجازة يجوهوالاولاد ابو القراية ودايرين الهجرةوطاشين دون عمر الطششانفي تغيير شديد سارعو بيهو الكيزاناصلا كان حنصل لي دة لكن عبر طريق طبيعى وطويل ومتناغم ومقبولالتسريع دة شوه العلاقات والترابط زاتووحاليا زادت وتيرة التسارعحركة المجتمع محسوبة بقوانين صارمة اي تدخل فيها سيؤدى لتشويه

مع مداخلة ودالصرّة تؤلمني الظواهر السالبة في المجتمع مثل الجفاء الظاهر في المجتمع واللامبالاة وتلاشى الإحترام
والمؤلم حقا هذا النفج الكاذب الفجوج تجد شاب أهله محتاجين وينقّط بالملايين بصورة قبيحة وبائسة، ثم ايضا لاحظ إستغلالية في
مجتمع النساء بصورة مزعجة وغير طبيعيةأيضا عسكرة المجتمع وأصبح البني آدم يباع عند كبسنجية المليشيات
وكذا لاحظت ضمور شخصية الإداري الأهلي النابه وهمه التعايش وظهور نبت تجاري آخر
وكذا حتي المسيد أو الطرق الصوفية اصبحوا من عليها يهتتمون بالقشور والترف الكاذب
هذا مع النسبية وبدون تعميم ولكن النسبة كبيرة
أيضا حزين لأننا كمغتربين الناس نسونا وفاتنا عز الناس بالناس
واصبح المجتمع ينظر لنا كمطمورة أو مخلاية أو خزنة أو حتي صراف آلي
نسوا أننا من دم ولحم وأحاسيسالموضوع في جوانبه المشاعرية مخيف ومحزن و....الخ
تحياتي لك ولكل الإحوة جمعا

هلا ود المقدم
تعرف يا صديقي من أي زاوية نظرنا لظاهرة الانقلاب
ما ح نقدر ننكر تأثيرها في التغيرات السالبة التي حلت
بالمجتمع السوداني وذلك بسبب الفجوة التي حدثت
بين الأجيال لغياب الناقل أو الموصِّل بين جيل آبائنا
وجيل أبنائنا.
الناقل والموَّصل ده أقصد به المغتربين، وهذا لا يمس
جدارة من بقووا في الوطن قابضين على جمره الحارق
لكنهم قِلة وسط أغلبية ناشئة تأثَّرَ معظمها باستراتيجية
منظومة الكيزان السامة

إطلآلة ما أحلآها من مدينة الضباب، إزيّك يا معاوية
نعلك طيّب واللهل ؟...

الأخ معاوية الزبير

تحية طيبة لك وللأسرة الكريمة، ومرحبا بعودتك للمنبر

كذلك التحية للأخ عبد الحفيظ أبو سن

ومرحب بالظهور أيضا

الحمد لله على السلامة و المنبر منّور اخي معاوية

و الف مرحب أخي اب سن , حبابكم و حباب اليوم الجابكم.

يا سلااااااام

نورت المنبر بطلتك يا ودالزبير،

وعبرك نحيي الاستاذ ابوسن،

تحياتي معاوية ...وجميع زوار البوست

حقيقة لا ادري مدى (العلمية) في نسبة التغير الذي يحدث في المجتمعات الى (تعمد) نظام سياسي قصد ذلك....
ففي اعتقادي ان التحولات الاقتصادية التي تحدث (بقصد او بدون قصد ) تسهم كثيرا في ذلك الامر....

كوستي في الستينات ...ليست هي كوستي السبعينات ( خاصة بعد إنشاء : الكبري - مصنع كنانة - مصنع عسلاية)...
وكوستي السبعينات ...ليست هي كوستي الثمانينات ( خاصة بعد اندلاع حرب الجنوب الثانية ... و توقف الملاحة النهرية)

لا استطيع الحكم على كوستي ما بعد الثمانينات ..لانني غادرتها ( و السودان) مطلع التسعينات.

أذكر انني في عام 1986 و قبل انتخابات ابريل من ذلك العام ...ذهبت برفقة شقيقي عادل فضول و بعض اصدقائه منهم الاستاذ زكي منصور الى نادي الخريجين بكوستي
عند الباب كان هناك شخص يسمح بالدخول للاعضاء من ابناء كوستي ...او اي خريج جامعي
دخل الجميع ( وقد كنت متأخرا قليلا ) و عندما حاولت الدخول ...قلت ان اسمي زكريا فضل المولى .تم منعي ...بحجة انني لست من ابناء كوستي
وعندما لاحظ عادل و شلته ...انني غير موجود معهم ...جاء الى مدخل النادي و وجدني بالخارج...و عندما سألني عن السبب قلت له لقد تم منعي من الدخول لانني لست من ابناء كوستي
فما كان منه الا ان انفجر ضاحكا وقال لي ( قلت ليك ... لابد من اسم فضول ملتصقا باسمك )... كنت انا الوحيد في الاسرة الذي ينطق اسمي ب زكريا فضل المولى ...و ليس زكريا فضول كبقية اشقائي.
سمح لي بالدخول بعد ان اخبرهم عادل بانني شقيقه الاصغر

عندها ادركت بأنني المولود بكوستي ...و درست كل مراحلي الدراسية قبل الجامعية بها .....لم تعد كوستي التي كانت تعرفني و أعرفها

حبابك علي عبد الله
ليك وحشة شديدة والله
والمنبر منور بي ناسو

الله يسلمك يا ناصر أمين (الآخر)
طبعا أصبح عند اتنين من الأصدقاء بالاسم ده
بيد أن أحدهما مُعرَّف بالألف واللام

أهلين دكتور ياسر
سيرتك حاصرة والله بين حين وآخر
بالخير طبعا

هلا بِسَمِيِّي ود المدير
شاكرين حامدين في الغربة الثالثة
بعد عشرية الإمارات وعشرينية قطر
والله أعلم كم ستكون في إنجلترا
قبل أن يحين الأجل!

موقفك في نادي الخريجين مؤلم جدا يا زكريا ويطعن في القلب
ده حالتو سنة ٨٦ يعني لو في التسعينيات كان ح يكون أسوأ وأمرَّ.
بخصوص دور الأنظمة في التغيرات الاجتماعية يكون أكثر وضوحًا
في حال كون النظام مؤدلجًا (شيوعي أو إسلامي مثلا)
لكن ده لا ينفي دور التطور الطبيعي أو تعاقب السنين
في إحداث التغيرات المجتمعية

سلام معاوية و مرحب بعودتك.

Quote: علاقات اضطرارية

Quote: لاحظت باندهاش نشوء علاقات صداقة غير متوقعة في أوساط من تبقى من أبناء جيلي (أقصد السبعينيات والثمانينيات) السبب في استغرابي من نشوء هذه الصداقات أنه لم يكن هناك أي جامع بين أصحابها في ما مضى، باختصار لم يكن بينهم أي اهتمامات مشتركة من أي نوع، ليس صداقات فحسب بل علاقات تصاهر في أوساط أُسر بينها بون شاسع سواء جغرافيا (الأحياء السكنية) أو اجتماعيا أو اقتصاديا أو حتى أحيانا في القيم والعادات أيضا

Quote: فلم يجدوا بديلا عن إنشاء الصداقات غير المتوقعة والمصاهرات غير المتكافئة

حقيقة قريت العنوان و مضمون البوست الاول و ما قدرت اطلع بأى شئ من خلاله افهم غرض البوست او مراده.
حيث يقول (علاقات اضطرارية). هى من وجهة نظرك ام من وجهة نظر اصحابك جيل ال70 و ال80؟
في ظنى العلاقات الاجتماعية هى التى تزيل الحواجز التى ربما وضعت في عقل الطفل بدون ارادته و عندما يكبر يتيقن انها حواجز مصطنعة و تتغير نظرته للاخرين ايجابا او سلبا حسب التعامل معهم. فلن تكون اضطرارية بل واقعية.
عندما اعود الى قريتى في اجازات قصيرة من وقت لاخر, اجد ان اهتمامات جيلى قد تغيرخاصة اوليك الذين لم يغادرو القرية و حتى اسلوب الونسة الزمان داك تجد صعوبة فيها.
بالنسبة للزواج و المصاهرة ايضا الجيل الجديد الاتربو في حى واحد او مشو مدارس مع بعض, رغم ان اسرهم يمكن جاءو من مناطق مختلفة و لكنهم لا يرون اى فوارق او جيل ابائهم

أهلا بيك يا محجوب وشكرا على الترحيب
عشان أقرِّب ليك مضمون البوست ح أضرب ليك مثل بالخرطوم:
جغرافيًا، اندهشت لما لقيت شباب من الكلاكلة مصاحبين ناس من أمبدة
اجتماعيا، لقيت أثرياء من الرياض مصاهرين أُسر فقيرة من الثورة ١١٢
فكريا، لقيت شيوعيين متزوجين كوزات وبالعكس
وهكذا، فئات من البشر كانت بعيدة عن بعضها ومتناقضة في كل شيء
زالت الفوارق بينها وأصبحت متآلفة مع بعضها
وهذا أمر جيد بالتأكيد لكنه لم يكن معهودا عندنا في مدينتنا قبل أربعين سنة مثلا، فأنا وجدت تبرير لذلك بأسباب الهجرة والاغتراب التي أفرغت المدينة
من غالبية سكانها الأصليين فلجأ المتبقون منهم لإنشاء علاقات مع بعضهم البعض لأنهم على الأقل يتعارفون منذ زمن بعيد ويخشون الغرباء

كتبت مداخلة طويلة ومسحتها
لقيتها شترا

اهلا بالصديق معاوية

ومرحب بيك في بيتك القديم .

الموضوع جيد وجرئ من جهة ان الذين تحدثت عنهم في الغالب لن يستسيغوا ما قلت ،
ولن يفهموا منطلقاتك العلمية.
لذلك تغيب في محيطنا الثقافي مثلاً السيرة الذاتية الجريئة التي تفلت من الرقابة الذاتية.

منور معاويه
يمكن اذا رجعت كوستي قريب تغير انطباعك
الثلاثه سنوات الاخيره كانت قاسيه، ماتعرف
عملت شنو في الناس،

بالعكس يا دهب ازدادت الظاهرة انتشارا
أتابعها عبر مشاركاتي في عدد من قروبات المدينة

افتقدت كتاباتك يا صديقي لأنني لم أعد أرتاد المنبر منذ زمن طويل
وأنت لست من أصحاب الفيسبوك
والله الموضوع حمّال أوجه والحساسية في سودانيز عالية جدا ومتحفزة.
المهم، سأراجع كتاباتك هنا ناشدًا قليلا من المتعة القديمة
تسلم يا رب

انت غير الشتارة عندك شنو. كان تخليها

تسلم معاوية سيد البوست
وتحية خاصة مفعمة بالود لمن رحب بي
العبيد
ياسر الشريف
ناصر امين
على عبدالله
وعودة لصديقى المفوه العبيد
مع التأكيد على ماذكرته لكن داير اقول حاجة
ابدا والله ماشايفنكم خزن لكنها الحوجة الضاغطة
بحكى لي استاذنا شيخ الريح محمد الطيب وهو امام الجامع الكبير
قال لي في صلاة المغرب وفي السجود الاول . وقف زول قدامى وبدأ يحكى عن ظروفو وحوجتو ظانا نهاية الصلاة . وتحرج حين قمت للركعة الثالثة
اها شوف دة مثلا . هل ماعارف المغرب تلات ركعات ؟ لكن انسد عقله وتركيزه الا من حاجته
الحاجة الداير اضيفها انقطاع المرؤة . معقولة حرامى ولا نهاب ينهب في زول والناس تعاين ؟ ولا ينزل ليهو بت ويغتصبها والناس تعاين ؟
التغيرات المجتمعية وضع طبيعى فى تدافع الناس وسعيهم فى الحياة . يضيفوا لبعضهم البعض السلوك والافعال والتراث في انسياب طبيعى . والمثقافة ان شئنا ياها نظرية الضعيف بقع والسمين بقيف . ماكان مشابها للواقع وله شروط البقاء سيبقى وإلا اندثر نظرية دارون .
التدخل العنيف فى سيرورة المجتمع لها عقابها ستلد جنينا مشوها
انجبته الانقاذ ثم تمت الناقصة الحركات المسلحة الامية والغبية والبليدة
لم تكن البندقية يوميا بذرة لصنع الحياة كما قال محجوب شريف