Post: #1
Title: وكل زول يحضن شهيدو
Author: أبوذر بابكر
Date: 03-22-2022, 07:09 PM
Parent: #0
06:09 PM March, 22 2022 سودانيز اون لاين
أبوذر بابكر-
مكتبتى
رابط مختصر
ما أشبه الليلة بالبارحة
كما قالت العرب
او
ما أشبه زئير الأسد بصولتها
مثل ما قال حاحب بن زرارة التميمي
حين رد على كسرى عظيم الفرس، بعد أن انهى خطابه أمامه
قال له كسرى
ما أشبه حجر التلال بالوان صخرها
والان
ما أشبه حالنا بما كان وكنا عليه
أواخر شهر مارس وبدايات أبريل من العام الخامس والثمانين بعد التسعمائة والالف من ميلاد السيد المسيح
حين انتفضنا
قد كتب النظم ثورتئذ
ونعيده الان على مسامع الزائرين
ولا بد من الشمس وإن طال مسير العتمة
|
Post: #2
Title: Re: وكل زول يحضن شهيدو
Author: أبوذر بابكر
Date: 03-22-2022, 07:11 PM
كتبت فى ذات التاريخ والخرطوم حبلى بالثورة، ولم يتفتق الوعد بالخصب حينها
وتحية لروح الإنتفاضة الغالية
================================================
لما حزنِك يبقى إسمِك
لما إسمِك يبقى نحنا
ببقى دمنا طوق نجاتِك
خرطومنا يا زينا وسمحنا
جاكي فرح النيل يلمِك
مدا إيدو
بشرت فيك الشمس
شالت الغيمات وجاتِك
تحلف الأيام وحاتِك
يا وجيهك
يا نداوتك
مافي غيرك
ويا حلاتِك
كنا جنب عينيك نقيّل
يكتب العاشق نشيدو
كنا فى ريدك نحمّل
همنا الطامح وريدو
ولسه وش الخوف بتاوق
شفنا ليلك لما حزنه
وجانا مارق
وضي صباحك
دسا فرحو
عدا فات وعد المشارق
ولسه وش الخوف بتاوق
لو فِرِحنا
تزعل البسمة وتفارق
تتملي الكلمات مواجع
والنهار ينسانا عيدو
ولسه وش الخوف بتاوق
لو جرِحنا
البتقت شتلاته
فوق عود المشانق
جانا راجع
تاني نرجع لى عيونك
نبدا مشوارك نعيدو
ولسه وش الخوف بتاوق
لو جرِحنا
المنصلب فوق البيارق
جانا راجع
كل غنيه وكل نمه
كل مُنيه وكل كلمه
تبقى شارع
فى رباكي
محتشد بالريد ومارق
وكل زول يحضن شهيدو
لا حزن يغشانا تاني
ولا تباكي
نبقى ناسك
نيلك الرويان نقالدو
ونملا كاسك
الأسى الطافح نعاندو
ونلقى ناسك
وكل زول يحضن شهيدو
زول يسالمو
وزول يطايبو
وزول يريدو
ولسه نحلف بى حياتك
يا نداوتك
ويا حلاتك
31 مارس 85م
|
Post: #3
Title: Re: وكل زول يحضن شهيدو
Author: أبوذر بابكر
Date: 03-23-2022, 01:11 PM
كانت غنوة للخرطوم
مطربها النيل
وموسيقتها نسمات الشمال
والشيالين جروف المقرن
وزغاريدها هتاف البنيات وشبالاتهن
واصوات الوليدات
|
|