Post: #1 Title: العلاقة النسبية بين الجمال وبنات الطِبْ - أُغنية شايقية... Author: أبو الحسين Date: 03-08-2022, 06:52 AM Parent: #0
05:52 AM March, 08 2022 سودانيز اون لاين أبو الحسين-المملكة السعودية ـ الخُبر مكتبتى رابط مختصر
محمد كرم الله.. يا الفريق أب دُوم سكُونك.. يحفظِك مولايْ يرعاكِي ويصُونك........
التحية لطبيبات بلادي..
Post: #2 Title: Re: العلاقة النسبية بين الجمال وبنات الطِبْ - Author: أبو الحسين Date: 03-08-2022, 06:56 AM Parent: #1
العلاقة النسبية بين الجمال وبنات الطِبْ جمال أحمد الحسن – الرياض 24 فبراير 2022م
هي متلازمة أزلية وقديمة جداً بين طالبات العلوم الطِبيَّة عموماً والجمال الربَّاني.. ربما وضع الله سبحانه وتعالى (وهُو اللطيف بعباده) هذا الحُسن والبهاء (والرِقَّة) في البنات ديل رأفةً بالمرضى وتحسيناً لنفسياتهم وهُم بين الرجاء والخُوف.. شُعراء زمان.. كان لهم ذوق راقي جداً في تحسُّس مكامِن الجمال.. * كَلِّمْنِي دي بِتْ مِنُو.. ووينْ بلُودها محَل يسكِنُو؟؟؟ * جاتْ أُم زِين أدَّوني البشارة.. الرسُول فِجُّولَا خلُّو الدَارَة دارَة... * يا خِلاَّيا فِجُّولِي اللَّشُوفَا.. مسَّخت عُوم البِتَرْطُن في جِرُوفها... والكثير الكثير من أنواع هذه المُنَاتَقَة لإصطياد مهابِط الجمال والسمَاحَة!!! شاعرنا صاحب هذه الأُغنية صابر عبد الله صابر إبن الجزيرة بروس (تنقسي).. رأى إحدى حِسَان منطقة أب دُوم.. وهذه المنطقة بالذات مشهورة بجمال بناتها (في العمُوم) وكل من درس بمروي الثانوية يعلم ذلك، حفظ الله عليهم هذه النعمة.. كتب هذه القصيدة العفوية ولا ندري هل كان هُو المريض أم كان (مُمَارضاً) لأحد أقاربه بالمُستشفى... المُهم صوَّر لنا المشهد وكأننا نراه بالعين الحِسِّيّة الآن.. وأثبت لنا نظريته المُستوْحاة من هذا المشهد بأنَّ (الجمال طِبْ وأن الطِبْ جمال)!!! قال في إحدى أبيات قصيدته الماتِعَة.. التي مطلعها: يا الفَرِيقْ أبْدُوم سِكُونِك.. يَحْفَظِكْ مَوْلَاكْ.. يرعاكِي ويصُونِك.. يااااااااا حلِيلِكْ... وقد لحَّنَها بطريقة رائعة إبن قريته إسحاق كرم الله.. وأدَّاها كما ربَّنا خلقها محمَّد كرم الله... إنْتِي لِبْسْ الطِبْ تقُول بيهُو اتْخَلَقْتِي.. والعَجَبْ يا السَمْحَة بالتُوبْ إن مَرَقْتِي.. رايْقَة.. بحْلِفْ ليك قَسَمْ لوْ لَيْ صدَّقْتِي.. واللهِ من الحُورْ بَنَات الجنَّة إنتِي.. ...... نقُول: أن قسَم هذا الشاعر لم يأتِ من فراغ.. (فقطِع شك) عمل مسح ميداني حينها، وقارن بين هذه الحسناء والقوارير اللائي من حولها.. فأقسم وحلف باليمين المُغَلَّظة بأنها حُورِيَّة من الجنة!!! حتى لا أفسد على القارئ الكريم مُتعة الإستمتاع بالأُغنية، وتحسُّس كلماتها الصادقة.. أترُكُكم تتابعونها روحياً بعيداً عن الحروف... ولتشاركونا وشاعرنا صابر آرائكم عن هذه النظرية بالإيجاب أو الضِدِّية... ... .. . #التحيةلجيشناالأبيض #التقديرلطبياتبلادي #المحبَّةلقُرَّاءصفحتي #جمالأحمدالحسن
Post: #3 Title: Re: العلاقة النسبية بين الجمال وبنات الطِبْ - Author: أبو الحسين Date: 03-08-2022, 06:57 AM Parent: #2
Post: #4 Title: Re: العلاقة النسبية بين الجمال وبنات الطِبْ - Author: علي عبدالوهاب عثمان Date: 03-08-2022, 08:04 AM Parent: #3
حبيبنا أبوحسين .. يا سلام يا جميل أهلي الشايقية فن وجمال وطبيعة ساحرة مبدعين بدون حدود في كل مجموعة تجد شاعر وفنان .. بلد مشبعة بالجمال أجمل أيام عمري قضيتها في نوري الغويبة ( الثانوية العامة ) معلم في الزمن الجميل لا تعرف سر هذا الابداع إلا عندما تعايشهم .. ما أكثر الفنانين والمبدعين .. القليل منهم ظهر في الاعلام ..
شكرا الحبيب أبوحسين رجعتنا للزمن الجميل
Post: #5 Title: Re: العلاقة النسبية بين الجمال وبنات الطِبْ - Author: علي عبدالوهاب عثمان Date: 03-08-2022, 08:13 AM Parent: #4
الحبيب أبوحسين تحياتي كنت هناك في منتصف السبيعنيات تقريبا 75 لاحظت أن الاكثر انتشاراً كان جبارة وكرم الله والأغرب وداليمني في ذلك الزمان لم يكن لديه شعبية واسعة حتى فراش المدرسة ( العطا ) عندما أسأله عند ود اليمني كان يردد في عبارة الة اليوم أنا ما متأكد من معناها : (( يا استاذ .. وداليمني مخروت خرت )) ولكن بعد فترة سيطر على الساحة
تحياتي الحبيب أبوحسين
Post: #7 Title: Re: العلاقة النسبية بين الجمال وبنات الطِبْ - Author: محمد بدرالدين Date: 03-08-2022, 09:05 AM Parent: #5
الشذى العطر و الروائح الطيبة تجذب . و حبيبنا على ذوّاق .. لمان اشوف اسمو ف اى بوست اجرى وراه ... عطّر الله ايامك اخونا ابا الحسن و جملك .. كنت بالسودان ف اجازة .. و ذهبت لقريبى و صديقى مجدى قرناص ف البنك الفرنسى و لقيتو ف اتصال .. و لمان شافنى كأنى طوق نجاة سمعتو يقول للطرف التانى اهو بدران صحبك جا و طوالى مـــد لى الجوال ..دة ابراهيم صحبك.( و د.ابراهيم قرناص دة شقيقه الاكبر) : اهلا يا دكتور اخبارك و امريكا و الامور يا بدران سمعت انك جاى تتزوج ..ياخى ما تعرس بت اختى فاطنة.. و رديت عليه بانها ما مناسبة معاى (ههههههههه و سبحان الله ف النهاية بقت زوجتى و ام الاولاد ...مدد يا شيخ ابراهيم مدد) ياخى ما عندكم ف السعودية بت سمحة و صغيرة و دكتوراة عشان اتزوجا ...رديت عليه : لو كنت لقيتها كنت اتزوجتها انا زاتى ... و قلت ليه اسال صلاح مندو صحبك فى جدة . و اتخارجت منو ... المهم قد تكون هناك علاقة ما بين الجمال و الدكترة حتى الدكاترة وضعهم غير (حليلنا نحن المحاسبين ... مافى زول بيدينا اعتبار ..حتى كلمة استاذ بستخسروه فينا.. . كيفك ياا مهندس يا باااشمهندس .. اهلا بالاستاذ بلنسبة للمحامى .. و الخ) ربما لهذه الالقاب و التشجعيات اثر بالغ .. يتحسنون و يتجملون .. او ربما لان تلك الالقاب وجدت صدى او قابلت هوى ف نفوسهم و شجعتهم على اظهار جمالياتهم و اخفاء عيوبهم او ما راوه ينقص من مهابة شخصياتهم او تقبح جمالياتهم و كذلك الدكتورة استقرت نفسيا و ارتاحت .. و المرتاح بيطلع الجميل و يخفى السلبى او القبيح و الكلام يطول م نستلم البوست كمان .... و ربنا يجمل ايام الجميع و يحليها ... من الحلو (اعذرونا نحن و شيخ على من غير الناطقين بها ...و اعذارنا عندكم ان شاءالله مقبولة ع قول وردى) و مودتى و تقديرى
Post: #10 Title: Re: العلاقة النسبية بين الجمال وبنات الطِبْ - Author: أبو الحسين Date: 03-08-2022, 11:58 AM Parent: #7
Quote: و الكلام يطول م نستلم البوست كمان .... و ربنا يجمل ايام الجميع و يحليها ... من الحلو (اعذرونا نحن و شيخ على من غير الناطقين بها ...و اعذارنا عندكم ان شاءالله مقبولة ع قول وردى) و مودتى و تقديرى
الله يكرم أُستاذنا علي الطلَّع لينا كل الجمال دا...
ياخِي البوست حقك من الآن.. تستلمو وتستلم ميتينُو ذاتُو على قول حسين خوجلي...
وعبرك التحية لأخوالي غير الناطقين بها.. أخوك أمُو محسية من نواحيكم بس مرخصة في الشايقية... ههههههه
يديك العافية...
Post: #8 Title: Re: العلاقة النسبية بين الجمال وبنات الطِبْ - Author: أبو الحسين Date: 03-08-2022, 09:51 AM Parent: #5
Quote: الحبيب أبوحسين تحياتي كنت هناك في منتصف السبيعنيات تقريبا 75 لاحظت أن الاكثر انتشاراً كان جبارة وكرم الله والأغرب وداليمني في ذلك الزمان لم يكن لديه شعبية واسعة حتى فراش المدرسة ( العطا ) عندما أسأله عند ود اليمني كان يردد في عبارة الة اليوم أنا ما متأكد من معناها : (( يا استاذ .. وداليمني مخروت خرت )) ولكن بعد فترة سيطر على الساحة
تحياتي الحبيب أبوحسين
صدقت يا أُستاذنا فعلاً وحسب علمي كانت الساحة بالشمالية في الوقت داك للنعام آدم وإسحاق كرم الله ومن بعدهم صديق أحمد ومحمد كرم الله...
أخُونا محمد جبارة بدأ ظهوره في عطبرة.. عشان كدي في البلد ما كان بالإنتشار الكبيييير داك.. زي ود كرم الله وصديق...
أما المرحوم عثمان اليمني فهُو فنان الخرطوم من غير منافس.. وقد إشتهر بأغاني الرميات وإيقاعُو شوية كدي زي تقيل تَقَلَة حركة المُدُن...
وعشان إستقرارُو كان في الخرطوم، عُرِف في الشمالية مؤخراً... يعني كأنَّهم مقسمين المناطق سبحان الله...
تحياتي..
Post: #6 Title: Re: العلاقة النسبية بين الجمال وبنات الطِبْ - Author: أبو الحسين Date: 03-08-2022, 09:04 AM Parent: #4
Quote: أجمل أيام عمري قضيتها في نوري الغويبة ( الثانوية العامة ) معلم في الزمن الجميل
Post: #9 Title: Re: العلاقة النسبية بين الجمال وبنات الطِبْ - Author: أبوذر بابكر Date: 03-08-2022, 11:10 AM Parent: #1
تحياتي يا ابا الحسين
وتحايا لكل مبدعي منحنى النيل العظام
اغنية يا الفريق اب دوم سكونك
من اغنيات المطرب اسحق كرم الله شقيق المبدع محمد كرم الله الكبير
ما قدرت اعرف الفنان البغني هنا في الفيديو بس اكيد هو مش محمد كرم الله
Post: #11 Title: Re: العلاقة النسبية بين الجمال وبنات الطِبْ - Author: Ahmed Yassin Date: 03-08-2022, 12:21 PM Parent: #9
اموت في القصر العيني... وتنقذني الطبيبة دا بعد ما مات وشبع موت صحتو الطبيبة نعكس الحركة شوية: الغنا كان للطبيب... يمة الزول مالو ما جا الزول دكتور مالو ماجا عيانة شيلوني للدكتور ودوني ... كان ما بتعالجوني بقميصو غطوني وتلك المجنونة: لاقيتو في العصرية لابس لى جلابية..انا ما بسيب الفيا الدكاترة والعملية ...لاقيتو في العنبر لابس قميص اخدر ... انا ما بسيب الدكتور لو طعنوني بى خنجر ابو الحسين وشركاه: عرجت بنا الى الطف منعرجات الشايقية وغناهم القال عنهم وردي ديل ناس فنانين وبعرفوا يغنوا طبعا و دي لو قال لاي فنان( ما بطال) دي تعتبر شهادة للفنان بأنه فنان ما ناقصه شىء. وحنجي للاغنية اللغاية هسي ما عارف الشاعر بقصد شنو البتقول (عينيك فيها علم الطب)
Post: #12 Title: Re: العلاقة النسبية بين الجمال وبنات الطِبْ - Author: أبو الحسين Date: 03-10-2022, 07:32 AM Parent: #9
Quote: ما قدرت اعرف الفنان البغني هنا في الفيديو بس اكيد هو مش محمد كرم الله
صديقي الجميل شاعر المطر (أبا ذر)...
تسلم كتير على المرور وعلى المعلومة...
صدقني أنا زيَّك وقفت في اللحظة دي كثيييييييراً.. وأخيراً إستعنت بمولانا عبد الرحمن الحسينابي.. حتى قُلت محمد كرم الله...
لكن برضُو نرجع ونراجع...
وخليك قريب...
Post: #13 Title: Re: العلاقة النسبية بين الجمال وبنات الطِبْ - Author: أبوذر بابكر Date: 03-10-2022, 10:37 AM
حبيبنا ابو الحسين
عوافي ياخ وكيف الحال
والله قطع شك الزول البغني هنا في الفيديو ما محمد كرم الله
والله انا لو شفت بس صورة محمد كرم بسمع صوته وانطرب يعني كان عاينت ليه ساي في صورة صوته بتسلل جواك ويسكنك ههههههه
فما بالك لما يغني
لكن اقول ليك احسن زول ممكن يفيدنا في اننا نعرف الفنان البغني دا
هو اخونا الشيخ سيد احمد
شكله من الفنانين الشباب ونحن آخر ناس بنسمع اغنياتهم جيل العبد الرحيمين، البركل وارقي ومعاهم ميرغني النجار حتى ناس النصري والسقيد ما بنسمع ليهم
الأساطين العباقرة هم ناس النعام واليمني وصديق ومحمد كرم الله وود جبارة وعبد الرحمن عجيب الخ العقد المضيئ
ان شاء الله الشيخ سيد احمد يشوف البوست دا
Post: #14 Title: Re: العلاقة النسبية بين الجمال وبنات الطِبْ - Author: علي عبدالوهاب عثمان Date: 03-10-2022, 10:50 AM Parent: #13
شاعرنا الجميل أباذر تحياتي استثني من بين هؤلاء ميرغني النجار يكفيه (ديل أهلي ) لحن جميل من عمق أهلنا الشايقية قبل سنوات سجل زيارة لمدينة جدة .. استضفناه في جمعية أبناء بنا جلسة خاصة بدون مكبرات صوت .. مبالغة ويغني بوجه مبتسم أتخيل مرات مكبرات الصوت والتسجيل ربما يشوه بعض الاصوات
تحياتي الحبيب أباذر
Post: #15 Title: Re: العلاقة النسبية بين الجمال وبنات الطِبْ - Author: Ahmed Yassin Date: 03-10-2022, 01:02 PM Parent: #14
صاحب الاغنية وملحنها ومؤديها هو الراحل اسحق كرم الله كردي ياسين هم مجموعة اخوة فنانين جدا واشهرهم الراحل محمدكرم الله فنان نميري الخاص وردي بعد ظهور محمد كرم الله صرح لجريدة الصحافة تحت عنوان او مانشيت عريض(بعد عشرين عاما يظهر صوت حقيقي واحد) محمد كرم الله اعتزل الغنا لمدة(٣٢) سنة اواغترب في السعودية..قال ان الغناء منعه من حفظ المصحف وذهب للاذاعة والتلفزيون وقال احرقوا وامسحوا اي اغنية حقتي وانا اتبرأ منها ووو طبعا رفضوا وقالوا الاعمال دي ملك للشعب ما حنحرق اي حاجة وحفظ القران كاملا .. وبعد داك رجع للغنا تاني. الغريبة اخوه اسحق برضو اعتزل الغناء من بدري جدا وتوفى بعد بعد عبدالرحمن بلاص باربعة ايام فقط يوم الثلاثاء ٩-٥-٢٠١٧ قبل رمضان باسبوعين عليهم جميعا الرحمة والمغفرة
Post: #16 Title: Re: العلاقة النسبية بين الجمال وبنات الطِبْ - Author: Ahmed Yassin Date: 03-10-2022, 11:31 PM Parent: #15
حتى الطيف رحل خلاني لماذا اشتهرت هذه الاغنية بهذه الصورة ...حتى اصبحت(رمية) لاغاني تانية وكانت في تلك الفترة يتم بثها خمس مرات خلال اليوم وبرضو لا تمل... والناس كانت تطالب الاذاعة بتكثيف لث هذه الاغنية بالاضافة الى صوت محمد كرم الله.....الاغنية دي اتغنت بدون ايقاع وكورس وطلعت من ابدع واجمل ما يكون.