سِتْ النفور

04:59 PM February, 15 2022

سودانيز اون لاين
عبدالأله زمراوي-
مكتبتى
رابط مختصر

(لروح الشهيدة ست النفور ورفاقها الشهداء)

شِن قولنا
يا ست النفور
غير الحُروف الباكية
والكلمة والشعر الحزين…

أصلاً عِرف
هذا الشِعِر
انو الكلام ما بيوصِفِك…

إنتي العروسة بلا جدال؛
قمر التمام في الجيرتقة
بي بسمتِك أشعلتِ
في البلد الحزين
جذوة حماس وسطور نضال..

بي نورِك الساطع نهار
غطيتي أضواء الشموس
يا ست شموخنا وفخرنا…

أصل الشموس هي بارتِك
في خطوتِك؛
ومشيتوا في طول البلد
زغرود بُشارة
وبشرى للعرسان شبَال

يا ستنا وست البلد
وكتين رحلتِ بلا وداع؛
بكت البلد نزفت دموع
حدينا كلنا بي تياب
عزَّة الأصيلة المُلهِمة

أُخت الرجال..

أقسمنا لا بد
من نجيب تارِك وتارات البلد
من كِلابِ الإنقلاب؛
من سلالات الخيانة
ومن رصاصات الهَوان…

الخائن الكتال وخايب
ما هو باين في عيونو
رعشة الخوف والضياع…

الغارق يمين من يومو
في جُبٍ العقوق
كذب السواد
عرقان من
الخوف ومنبهم
كاتل الشهيد
حارق حشا الأُمات
وبياع التراب للأجنبي
بي هِمّة
بي رُخُص التراب..

يا ستنا
كم في البلد
زيِك شباب
قهروا الرصاص
والارتزاق ماشين
يمدوا الخطوة
في درب الشهادة
وفي محطاتِ النضال

رحم الله ست النفور ورفاقها الشُهداء الذين قدموا أرواحهم فداءً للحق
وأستحقوا بذلك ونالوا الشهادة و المجد والخلود.

ترحموا معنا على ارواح شهداء ثورتنا وثوراتنا..

والشعر من ارواح الشهداء مقتبس
والشاعر الثائر بين الناس سلطان

تحياتي يا عبد الإله

ولشهدائنا اعلى مراقي الخلود