زياره للسودان في الوقت الراهن ..طلب نصيحه

زياره للسودان في الوقت الراهن ..طلب نصيحه


02-08-2022, 05:22 PM


  » http://sudaneseonline.com/cgi-bin/sdb/2bb.cgi?seq=msg&board=510&msg=1644337378&rn=3


Post: #1
Title: زياره للسودان في الوقت الراهن ..طلب نصيحه
Author: Muhib
Date: 02-08-2022, 05:22 PM
Parent: #0

04:22 PM February, 08 2022

سودانيز اون لاين
Muhib-
مكتبتى
رابط مختصر



انا واسرتي الصغيره لدينا فكره لزياره السودان
. المدام من امريكا الشماليه ولديها
Security concerns about the current situation in Khartoum
ما هو الراي
هل الكباري مغلقه ؟
هل الوقت مناسب
افضل اماكن للزياره في العاصمه
ِالشكر مقدما


Post: #2
Title: Re: زياره للسودان في الوقت الراهن ..طلب نصيحه
Author: بسمات الشيخ
Date: 02-08-2022, 07:54 PM
Parent: #1

الاستاذ محب
ممكن تزور السودان في اي وقت ...والوطن يرحب بيك في اي وقت
وبخصوص المشاغل الامنية ..فالخرطوم بالطبع اقل خطورة من الناحية الامنية
والسرقات والنهب بقوة السلاح من اي مدينة امريكية ...
فقط عليك عند الخروج بعد المغرب ان لا تكون وحدك ولكن مع الاسرة او مع الاصحاب
ولا تقف لاي عسكري من الجنجويد في الاماكن البعيدة والخالية من المرور لانهم لصوص
وقتلة ....ولكن تاكد ان الخرطوم اقل خطورة من معظم مدن العالم..
اما المزارات السياحية فهي غير كثيرة داخل العاصمة ولكن ممكن تزور المتحف القومي وبرج الفاتح
وما تنسى شارع النيل في الامسيات...وللاسف ما في حديقة حيوانات ..لان الاخوان المسلمين، ناس
الانقاذ ، اللصوص باعوا الحديقة زي ما قرينا في صحفهم ....
ولكن اذا سافرت الاقاليم ..يكون احسن ..وامشي اهرامات مروي ...وامشي حديقة الدندر ...وامشي
بورتسودان ....في البحر الاحمر ...وسواكن ...وشارك في الغطس في البحر لترى عجائب البحر عن قرب..
اما اذا زرت عطبرة ،ام المدائن، ونهر عطبرة ، فستكون مبسوط لانك ستكون كواحد من سكانها من اول يوم
....
واذا مشيت وزارة السياحة مممن تجد المزيد من المعلومات
واقامة سعيدة ....

Post: #3
Title: Re: زياره للسودان في الوقت الراهن ..طلب نصيحه
Author: خضر الطيب
Date: 02-08-2022, 08:17 PM
Parent: #2

مرحب الاخ مُحب
طولتا ما رديت و بعدين معاك لمتين
اتمنى ليك اقامة طيبة في الوطن مع الاسرة الكريمة
ما حاقدر اقول ليك الرحلة دي حتكون كيف
بالتأكيد اتمناها تكون طيبة و مريحة
و اتمنى ليك اقامة طيبة بين الاهل و الاصدقاء
وذي ما قالت ليك بسمات حوم بالنهار في المحلات الكنت بتعرفا
بالليل خليكم جماعة و ما ليل متأخر لانو في طفابيع قتلة و مجرمين اسمهم الجنجويد
عموماً ابقى طيب انت و الأسرة

Post: #5
Title: Re: زياره للسودان في الوقت الراهن ..طلب نصيحه
Author: Muhib
Date: 02-10-2022, 04:15 AM

الاخ الجميل خضر

شكرا علي المعلومه القيمه
وما قصرت ..

Post: #4
Title: Re: زياره للسودان في الوقت الراهن ..طلب نصيحه
Author: Muhib
Date: 02-10-2022, 04:02 AM
Parent: #2

الاخت بسمات
الشكرا الجزيل علي هذه المعلومات القيمه
اتمني الامن والاستقرار للسودان


Post: #6
Title: Re: زياره للسودان في الوقت الراهن ..طلب نصيحه
Author: Osman Musa
Date: 02-10-2022, 06:36 AM
Parent: #4

حباب الأخ محب .
تعال والأسرة الكريمة في اي وقت.
الحبيبة الخرطوم جميلة فوق عين القناصين يا محب .
جد حتستمتع.
بعدين بناتنا الامريكيات شجاعات ويحبن التجارب.
واكيد المدام شجاعة.
تعال يازول .
بعدين اللحوم بعد مشاكل الصادر لمصر رخصت.
لامن دقت الدلجة.
يازول تعال اشبع لحمة جديدة .
لحمة ضان مأكل قش طبيعي .
حتتكيف لو جيت في دي الأيام.
رحلة سعيدة .
..
ملحوظة.
الامريكان اكتر مرض بيخافوا منو هو ال hepatitis
A وB و C
اعمل تطعيم الهبتايتيز كلو .
واديهم العيال وامهم تطعيم الملاريا.
البمبان هين .
بعدين بعد تاخد تطعيم الهبتايتز ممكن انت والمدام تضربوا زلابية
في اي ملف .
ولا يهمك تطعيم أمريكي .
والباعوضة لو كانت قدر ابوالدردوق برضو مع انجكشن الملاريا ولا حاجة.
على كل حال ضروري تورينا برنامج سفريتك.

Post: #7
Title: Re: زياره للسودان في الوقت الراهن ..طلب نصيحه
Author: Muhib
Date: 02-12-2022, 03:23 AM
Parent: #6

عثمان موسي
يا جميل شكرا علي الترحيب
وانت من اعمده السوامريكان في السودان او
في بلاد العم سام.
المدام شجاعه ولديها حزام اسود في رياضه الدفاع عن النفس
ولاعبه كره قدم سابقه في ال

division 1 soccer

ولا زالت تمارس اللعب في دوري محلي

..
بالنسبه للتطعيم نحن جاهزين
..
عندك فكره عن التاشيرات للسودان والقرين كارد السوداني




Post: #8
Title: Re: زياره للسودان في الوقت الراهن ..طلب نصيحه
Author: بسمات الشيخ
Date: 02-12-2022, 04:07 AM
Parent: #7

الاستاذ محب
بالنسبة للتاشيرات للسودان ..اذا جوازاتكم امريكية ما عندكم مشكلة ممكن تتحصلوا على
التاشيرة من القنصلية السودانية في واشنطن او في نيويورك ، عاصمة العالم، واذا انتو
في ولاية بعيدة في الغرب ممكن بالبريد ..ورسوم التاشيرة حوالي ٥١ دولار ...وبعد وصولكم
للسودان ممكن تستخرجوا بطاقة الخمسة سنوات وبعد كده ما ضروري تعملوا تاشيرات كل
سنة وتدخلوا السودان بهذه البطاقة التي تتجدد كل خمس سنوات...

Post: #9
Title: Re: زياره للسودان في الوقت الراهن ..طلب نصيحه
Author: Osman Musa
Date: 02-12-2022, 06:22 AM
Parent: #7


سلام
تعمل تاشيراتك من سفارة السودان في DC
بدوك التأشيرة في نفس اليوم .
التركية انسب خطوط.
بعد الوصول بي كم يوم ممكن تمشي الجوازات قسم الاجانب تعمل
كرت الإقامة 5 سنة .
وممكن تسوق في السودان بالرخصة الأمريكية عادي .
وتكون حامل معاك كرت الإقامة.
.

Post: #10
Title: Re: زياره للسودان في الوقت الراهن ..طلب نصيحه
Author: Muhib
Date: 02-13-2022, 04:22 AM
Parent: #9

شكرا عثمان وبسماتعلي التشجيع الجوزات امريكيه واتمني الاجرات تكون ساهله في السفاره والوثيقه الوحيده التي تثبت بان اصلي سوداني شهاده ميلاد سودانيه ولكن ليس لدي رقم وطني ..حاولت اتصل بالسفاره ولكن لا احد يرد ..الشكر مجددا

Post: #11
Title: Re: زياره للسودان في الوقت الراهن ..طلب نصيحه
Author: بسمات الشيخ
Date: 02-13-2022, 06:23 AM
Parent: #10

الاستاذ محب
ما تتصل بالسفارة في واشنطن لانهم ابدا ما بيردوا التلفونات ..
لكن اتصل بالقنصلية في نيويورك ،عاصمة العالم، وهم حيردوا بدون
شك، وهم ناس خدومين وبيخدموك وحيسهلوا امورك ...

Post: #12
Title: Re: زياره للسودان في الوقت الراهن ..طلب نصيحه
Author: Muhib
Date: 02-13-2022, 10:21 PM
Parent: #11

شكرا بسمات علي جهدك المقدر..
سوف اتصل يوم الاثنين
عسي ولعل..
والشكر المجدد..

Post: #13
Title: Re: زياره للسودان في الوقت الراهن ..طلب نصيحه
Author: Muhib
Date: 02-23-2022, 05:36 PM
Parent: #12

امس ترجلت للسفاره السودانيه في واشنطن
دخلت ورحبت بي موظفه الاستقبال وهي من اسيا
. طلبت مني كل الاوراق والاستمارات للتاشيره
ودفعت الرسوم لي وللمدام
..بعد ساعه ونصف استلمت الجوزات
..
شكرا بسمات وعثمان علي التشجيع ..

Post: #14
Title: Re: زياره للسودان في الوقت الراهن ..طلب نصيحه
Author: بسمات الشيخ
Date: 02-23-2022, 06:55 PM
Parent: #13

مبروك استاذ محب للحصول على التأشيرة بهذه السهولة ...
ومن المعروف ان السفارة السودانية في واشنطن سمعتها سيئة في مجال
تقديم الخدمات. .ولكن يبدو أن السفير الجديد غير وبدل في المعاملات التي
تقدم للمواطنين..
ولكن برضه نتساءل ما دام انت مشيت بنفسك للسفارة ليه يخلوك تنتظر في الاستقبال
لمدة ساعة ونصف ...مش نصف ساعة كفاية لعمل التأشيرة..
الا اذا كانت السفارة مزدحمة بطالبي التأشيرات..مع العلم ده ما شهر زحمة ...
..نحن بنحصل على التأشيرة في الجواز الأمريكي للسفر للسعودية في ربع ساعة على الإنترنت..
وبمجرد ان تنتهي من ملء الاورنيك وتدفع الرسوم يرسلوا ليك التأشيرة في البريد الالكتروني
خلال ربع ساعة ...
اظن نحن بعد ٥٠٠ سنة ضوئية حنحصل السعودية ..
وسفرية سعيدة ان شاء الله ..

Post: #15
Title: Re: زياره للسودان في الوقت الراهن ..طلب نصيحه
Author: Muhib
Date: 02-24-2022, 04:40 AM
Parent: #14

بسمات ناديني محب من غير القاب ..

في الحقيقه دخلت السفاره حوالي 11 صباحا
وطلبوا مني العوده الساعه 3 للاستلام..
..

رجعت المبني بعد ساعه ونصف والجوازات كانت جاهزه
..في الحقيقه انا ممتن جدا انهم اعطونا التاشيره في نفس اليوم

..
لاحظت ان عدد العاملين في السفاره قليل جدا
ولكن في احترام وسعي لخدمه كل من دخل المبني ..
..

Post: #16
Title: Re: زياره للسودان في الوقت الراهن ..طلب نصيحه
Author: بسمات الشيخ
Date: 02-24-2022, 05:07 AM
Parent: #15

خبر جيد يفرحنا ان السفارة السودانية بقت تعامل المواطنين معاملة حسنة
ويبدو ان الطاقم الجديد في السفارة من الموالين للثورة والثوار....
وعندي.حكاية سمعتها من زميلتي وصديقتي امتثال وهي قرات الحكاية في صحيفة
سعودية وتقول الحكاية ان الملك عبدالله ، عندما كان ملكا للمملكة العربية السعودية
دعا كل سفراء السعودية في الخارج الى اجتماع وقال لهم ان مهمتكم الرئيسية والاولى
هي خدمة المواطن السعودي في بلاد المهجر ،اي المواطنين السعوديين الذين يقيمون
في الدول التي انتم سفراء لديها ،ومن ثم ان مهمتكم الثانية هي تقوية العلاقات الاقتصادية
والثقافي والتجارية مع تلك الدول....

Post: #17
Title: Re: زياره للسودان في الوقت الراهن ..طلب نصيحه
Author: walid taha
Date: 02-24-2022, 07:14 AM
Parent: #1

صباح الخير أخ محب
أعتقد الجو معقول الأيام دى فى السودان
طبعا نظرا لأن قطاع السياحة فى السودان متخلف بعض الشئ أو خلينا نقول " ما منظم" فلن تجد دليل سياحي تسطيع من خلاله وضع برنامج محدد.
حسب تجربتى النيل هو المكان الأفضل لقضاء الأوقات بالتحديد العوامات حول برج الإتصالات و كبري المنشية مثل PARISTA وغيرها وهى من أكثر الأمكان التى سوف تجد فيها متعة . اللنشات الصغيرة تقوم برحلات نيلية (طواف) تقريبا نص ساعة بتكلفة فى حدود 60 ألف جنيه تسعك أنت والأسرة فيها خصوصية وحاجة ممتعة جدا ، وأنسب الأوقات قبل الغروب بساعة حاجة جميلة جدا ويمكن تكرارها بشكل يومي . وفى الفترة المسائية وفى نفس المكان فى عوامة مراسي الشوق تقيم حفلات غنائية بشكل يومي تستضيف مُختلف الفنانين وبرنامجها تقريبا معلن وتستطيع تحديد اليوم حسب من تفضل من فنانين حاجة مرتبة و الجلسة مناسبة جدا لك ولأسرتك أعقتد فى جلسة يسمونها VIP . فقط تأكد من وجود سيارتك فى مكان مناسب و أحرصو على تلفوناتكم لأنها من أكثر الأشياء هدفا للصوص غير كده كل شي عادي.
على مستوى خدمات المطاعم ، المطاعم الراقية تتمركز فى شارع المطار مثل مطعم (لازورد) وهو مطعم أعتقد تركي مميز مستوى النظافة و جودة الطعام . هنالك أيضا مطاعم السمك المنتشرة مثل حوش السمك جيدة وفيها جلسات أسرية بشكل فلكلوري لافت كما ان وجباتهم طازجة .
أميز مطاعم السمك مطعم (منتج السمك) أعتقد فى الرياض شارع المشتل غير ذلك هنالك المطاعم التقليدية . أفضل مطاعم البيتزا هو دوبنيربيزا و لها عدة فروع كويسين خالص رغم الغلاء !
على مستوى المولات طبعا المول الأوحد هو عفراء مول وعموما التسوق فيه مش بطال وفيه سوبر ماركت متوفر فيه كل شي و خصوصا المنتجات السودانية المعبأة بشكل راقي وهو عموما ممتاز جدا .كما أن كل شركات الإتصالات لديها مكاتب داخل المول وسهل جدا الحصول على شرائح الإتصال .
الباقى ممكن تتمو برج الفاتح و السلام روتانا حيث الكافيهات الراقية و الجلسات الخمس نجوم :) .
كسرة : إذا كان عندك نية فى موضوع أراضي أو بيوت أنصحك تخليها أخر يوم فى الإجازة حتى لا تعكر مزاجك و أسأل عثمان موسى :))

أتمنى لك و للأسرة إجازة سعيدة .

تحياتي ،،

Post: #18
Title: Re: زياره للسودان في الوقت الراهن ..طلب نصيحه
Author: بسمات الشيخ
Date: 02-24-2022, 09:22 AM
Parent: #17

ما شاء الله يا وليد طه خبرة في مواقع السياحة في العاصمة
وشكرا وضعت لينا برنامج شيق عند زيارتنا للخرطوم للمرة القادمة
وخاصة لنشات السياحة في النيل قبل الغروب فهي فكرة رائعة لم
نجربها من قبل ،وكثير من الاماكن التي اشرت اليها لم اسمع بها من قبل ...
بس اظن ان افضل مطعم للسمك هو مطعم صاج السمك في شارع ٤١
في العمارات...وما حتندم اذا مشيت هناك ....
والله يديك الصحة والعافية ،،،

Post: #19
Title: Re: زياره للسودان في الوقت الراهن ..طلب نصيحه
Author: walid taha
Date: 02-24-2022, 11:48 AM
Parent: #18

بسمات إزى الحال
نعم و اللاى اللنشات حاجة ما عادية ينطلق اللنش الى عرض النيل الازرق ويمر تحت كبري المنشية عامل curve حاجة ولا فى الأحلام معظم اللنشات فيها سماعات تصدح بالألحان و تزيد الجو روعة أنصح كل من يزور السودان إنو ما يفوت الnile cruise دى فى التوقيت ده بالذات .

حوش السمك بتاع 41 طبعا اول فرع ، وعندهم حاليا فرع جنب المعرض حاجة برحة جدا وتصميم أحدث ومساحة أكبر .

للأسف طبعا الخدمات السياحية -فى الكافيهات و الكافتيريهات على هذا الشريط - تعتبر متخلفة قياسا بتميز المكان ، يعنى الحتة دى لو خشا عليها مستثمر وطورها حتتحول الى شي مذهل موقع الخرطوم ده بالله فى مكان زيو !!!

غايتو حميدتي لو رجع لينا من روسيا بمستثمر تقيل فى قطاع السياحة يكون ما قصر و ممكن جدا- بعد تطوير السياحة على شريط النيل - نعمل لينا (ترس معاكس ) يضيق الخناق على تدفق السياح الهادر الى السودان :))

تحياتي ،،

Post: #20
Title: Re: زياره للسودان في الوقت الراهن ..طلب نصيحه
Author: Muhib
Date: 02-24-2022, 07:55 PM
Parent: #19

الاخ وليد
شكرا مجددا وحقيقي معلومات قيمه
وانا همي كله الونسه مع اصحاب من الماضي
حتي لو جلسنا مع اقرب ست شاي ..
في شاب سوداني مجتهد جدا في ال
انستقرام بيقوم بي
Review
لكل المطاعم والكافي في مناطق في الخرطوم وامدرمان
.. ها استخدم صفحته كدليل بالاضافه للمعلومات منك ومن بسمات..
..