قعده،،،،، بدون برمجه،،،،

03:09 PM February, 03 2022

سودانيز اون لاين
علوبه-KSA - Sudan
مكتبتى
رابط مختصر

*بي📝 الحنين،،، ،،*
*د. علي الشيخ ،، ،،،*

*قعدة بدون برمجه،،، ،،،*
عدم موضوع،،، قررت امرق من الجو المشحون ده،،،، و اتونس بالواقع،،،،
مشيت لي حته كده اول مره ازورها،،،، فيها،،،،،،
ست الشاي،،،،🍵
البنشرجيه ،،،،،،🛠️
السماسره ،،،،،،💰
الشحادين ،،،،،،✋
غسالين العربات،،،،،🚗
ست المديده ،،،،،،،🥣
بتاعين الركشات،،،،،،🛻
و غيرهم خلف الكواليس،،،،
المسرح واقعي،،،، قدامه طرمبة بنزين،،،، ناس بتكب،،، و ناس بتشفط ،،،، وناس بتسارق حبه،،، حبه،،، قدر قروشها،،،
قررت و قلت اطلع لي شهادة بحث في هذا المسرح،،،، الواقعي،،،، دراما بدون بروفات،،،، و الممثلين كلهم أبطال ،،،،
طلبت لي قهوة☕،،،، سكر خفيف،،،، و بدون دواء،،،،
*ست الشاي* بحلقت فوقي مسااااااافه،،،، عرفتني انه انا طيفو طايف،،،، نظام يا ماري بي بيتنا،،،، جيت صدفه،،،، ام جيتنا،،،
المهم جريت لي كرسي🪑 و اتحكرت بي زاويه،،، منفرجه ،،،،، قلت اكشف المسرح،،،، و اراغب الحوار الحاصل،،،
ست الشاي،،،، ماقصرت،،،، فتشت لي احسن عده عندها،،، ما اصلوا العده الجديده بطلعوها يوم العيد،،، هو العيد الا يجي بعد رمضان،،،، شوفة الزول السمح هي ذاتها عند المكهربين و المتيمين عيد،،،،
شوف عيني،،،، كبايه القزاز،،،، ملانه مويه،،، ترقش من النضافه،،، تمروها ،،، و ختوها في الصينيه،،،، تقول لي القندول،،، ولا سانت جيمس،،،،،، و جاااات القهوة ☕ بوخها يلوي،،،، و البخور دور من بعيد،،،، يجيب الرايح و الزهجان،،،،،
و نظام انا سيد القعدة،،، تخنته صوتي،،، و اتنحنحته وقلت للقاعدين تشربوا شنو ياجماعه،،،، زول هببوا لي مافي،،،، اصلوا النظام في الحتات دي
*English Boket*
قلت اباصر قهوتي دي براحه عشان القعده تتطول،،، ما قاعد بي حقي،،،، شهادة بحث،،،، مافي زول عازمني،،، كل شئ ولا الحيازه،،،
*اديكم لمحه،،،،*
اتنين شباب،،،، دنقروا في *ست المديده*،،، و دار حوار خفي،،،،
بعد شويه،،،،،،، شالت ليها صحن فاضي،،،، و ردمته ليك مديده،،، تتراقص براها،،، تقول بتسمع في النعام آدم،،،،
و شتت ليك السكر،،، فوقها،،، زي النقطه في القونات،،،
و مدت ليهم الصحن🥣 ،،،، زي كأس العالم 🏆،،،،
شوف عيني 👁️،،،، واحد منهم حشر يده 🤌 في جيبه و جابه مارقه زي السناره و في آخرها كيس،،،، انا غايتوا،،، اندهشت ،،،،، وقعدته اعاين 👀،،، داير اعرف 🤔 بس،،، حايحصل شنو،،،، اتاريهو الكيس فيهو طحنيه،،، قوم يا الماسك الكيس كبه في المديد،،،، المديده الكابين فيها نص رطل سكر،،، و قعد يصوط و يلخبط فيها،،، ياها زاتها *قوات الدفاع المشترك،،،،*
و بي كل حنيه،،، و احد قال لي اتفضل يا خال،،،، شوف سماحة الناس ديل،،، و شوف بساطة الدنيا عندهم،،، اكيد وجبتهم واحده،،،، و متيقينين و شاكرين و حامدين،،،
و زغت بي بصري منهم،،،، و قلت ليهم صحه و عافيه،،،
*بتاعين الركشات* 🚛،،،، عالم تاني،،،، في لغة كده بتجمعهم،،، بتلاقوا بسلموا على بعض بي حنيه،،،، عاطفه و حنان يا ناس،،،
بي جنبه تانيه،،،، كحلت لي منظر،،،
الرزق ده ممكن تجتهد فيهو،،، في زول راصي ليهو كم *صبابه* لي ناس الركشات،،، ،بخلطوا فيها البنزين بالزيت،،، و الصبابات،،، للايجار،،،، وزي في قانون متفق عليه في السعر،،،، تسحب ليك صبابه و تناوله المعلوم،،،، و أهم حاجه تجيبها راجعه،،، اصلوا سيد الصبابات مركب ليهو عيون جراده،،، بتلف *٣٦٠* درجه،،، نظام انك انت تحت المراقبه،،، مع كل غمته بحمد ربه و بشكره،،، يقين عجيب،،،
ونسة *السماسره* ،،،، مجوبكه ،،، كان انت ما منهم،،، زي البتحضر ليك في فليم اجنبي بدون ترجمه،،،،
و مرنقين لي اي زول ماشي، جاي، عابر، منتظرين بس سؤال،،، اي شغل بتموهو،،،
في نسوان جابهم الدرب، بسالوا من بيت زول عنده عرس، نطه واحد منهم،،،، اي بعرفه،،، لكن زي الرحل من الحله دي،،،، واحد تاني قعد يضحك،،،، قال للنسوان،،، لفوا بي الشارع الجاي،،، بتلقوا جزار،،،، تاني بيت ياهو ده بيت العزومه،،،
ونسة السماسره ،،، فيها تحليل للواقع المعاشي و الاقتصادي للبلد،،،،
من ما يقولوا ليك،،، الحاله واقفه،،، اعرف انه الكاش مافي،،،، في *ركود*،،،، دي كلمه بتلخص الحال،،،، في عرض،،، لكن مافي بيع،،،،
بيقولوا ده احسن وكت للتجار انهم يشتروا،،، و كان جاتهم شغله،،، بركوا فيها زي الطير الراكي في العيش،،،، وكل واحد بجرك من حته،،، وكمية من النصائح،،،،
و مفاتيح شغلهم مرتبطه بالواقع،،،،،،،
السماسره كان قعدوا يتكلموا في حاجه بقنعوك،،، ممكن يشهوك الموت زاتوا،،،
عندهم تفاؤل و مقتنعين جدا،،،، انه البلد دي ممكن حالها ينصلح،،،، و نقول يارب،،،،
*غسالين العربات*،،، انضف ناس،،، بهتموا بي شغلهم،،، عدتهم تختلف حسب نوع العربيه،،،، الفور ويل درايف *4WD*، عدتها براها،،، و فوطتها بتختلف ،،،، و ابالغ ليكم مويتها و صابونها زاتو بختلف ،،،،، تقول لي مابنختلف،،، ياريت احزابنا ديل يفهموا السطر ده،،،،
عندهم نظره للعربيه و الزول الراكبها،،،،، فنهم في كلامهم،،، غسيل جوه و بره،،، و لا فوطه،،، شوف الدردقه دي كيف،،،،
اهم حاجه عندهم،،،، يطلع ال *MB-3* و يشغله،،،، انت تنطرب و هو يغني و العربيه تتراقص،،،، اي زول بعرف كيف يعيش،،،،
الناس الاتونست عنهم ديل،،،
ديل بسطاء السودانيين،،، جزء منهم،،،،
هم ديل السودانيين،،،،
ناس طيبين،،،
ناس كويسين،،،،
سمحين و نفوسهم سمحه،،،،
ناس همهم العيشه النضيفه،،،
لسه فينا الناس البتكره الحرام،،،، و السرقه،،،، و اكل حق الناس،،،،
نحن الواحد فينا كان كتل ليهو نمله 🐜 بقعد يرجف،،، والله،،،
الحاصل شنو هسه في البلد،،،،

في ناس ما بتشبه الناس ديل،،،، مازيهم ،،،، و لا منهم،،،
و لا جايبين خبرهم،،،، ولا عارفين كيف عايشين،،،،
مصيرهم،،،، يمشوا،،،، ويختونا ،،،، ويبقوا ماضي،،، ودرس،،،، وعظه لمن يتعظ،،،
نحن عشان الناس الطيبين،،،
بنقول،،،،

*بنحبك يا بلد،،،، و بندردق في ترابك،،، و بنموت عشانك،،،*

*د. علي الشيخ*
*الحنين*
*امدرمان*
*٢٠٢٢.٢.٢*