الحبيب خالد سلك قال (( علوق شدة )) .. يا جماعة اشرحوا لينا العبارة

11:36 AM January, 24 2022

سودانيز اون لاين
علي عبدالوهاب عثمان-جدة
مكتبتى
رابط مختصر

الاحباب الكرام .. التحية

حبيبنا الجميل الامير الرائع بدرالدين يمتنع

آه يا وردي رحمك الله : من ضواحي الدنيا جيت على رحالي

المقصود شنو بعبارة (( علوق شدة ))
حسب تصريح حبيبنا خالد سلك :

Quote: إن تعيين الأسماء الوزارية الجديدة بالحكومة، يمثل تجلياً واضحاً لمحنة الانقلابيين الذين لم يستطيعوا إقامة حكومة بعد 3 أشهر. وأضاف خالد، في مقابلة مع قناة “الحرة”: “الانقلابيون لا يستطيعون إقامة حكومة حقيقية ذات شرعية، وما قاموا به نسميه في المثل السوداني –علوق شدة”.

قبل فترة القروبات قالوا خالد سلك شهادة عربية
لكن ما أظن شهادة يعرف عبارة زي ( علوق شدة )

سلام استاذ علي
علقوق الشدة زى دخان المرقة.

يعنى لناس الريف البستخدمو الحمار في الترحال او نقل الاشياء, الواحد يقوم في اليوم داك يأكل الحمار اكلة (عليقة) سمحة (برسيم) و يسقيهو بالعطرون لكن في الايام الاخرى يهمل الحمار.

عندنا مثل ما معناه لو بس تعتنى بحصانك يوم السباق فلن يفوز في السباق.

Quote: لكن ما أظن شهادة يعرف عبارة زي ( علوق شدة )

فعلا شهادة عربية, لانو استخدام المثل في هذا الموقف, استخدام اشتر.

السلام عليكم
وليكم التحايا أستاذَينا علي عبدالوهاب، ومحجوب عبدالله،
العنوان بــ "الحبيب" و "علوق الشدة" بين معقوفتَين ثم اختتام عنوان البوست
بـنداء السودان (!) دا: (يا جماعة)، خــلّاني أقول، أهو عمّك الأستاذ الرطّاني دا،
هايجيب تاني سِــيرة البحر! وأعني سيرة حزب الأمة قاعِد وِش! كأنو دِش هههه
فدخلتُ أشاهد وأقرأ فإذا بال محجوب، يجوب بــتشبيه "علوق الشدة" بــ " دُخان المَرقَة"!
فأدركتُ توّاً أن "حزب الأمة " زاوَلَ ليْ ساي ههه (والتفسير هنا يُمتَــنَع بالبناء للمجهول،
ولا معلوم.. مافي معلوم صديق).. كما زَاوَل لأخويّ الاثنين هذين هههه؛
فالوصفة آل. مِثال الشعبي (عَلوق الشّدّة) وصفة كثيراً ما تُستَعمل في تشبيه التلميذ
الذي لا يُذاكر طيلة العام، وما إن يأتي الامتحان، حتى يهلك نفسه في حشوِ دماغه
بموجزات الإسبوتينقات Spottings للمواد من أول العام الذي مضى! فلا يفعل
خيراً لنفسِه ولا للمدرسة ولا للأسرة، وقد يضحى برنامجه الدراسي كــ برنامج
حكومة حمدوك الأولى الاقتصادي! من كل بستانٍ زهرة، ومن كل بحرٍ مائج عَكْرَة؛
حَـذْوَكَ القُــذَّةِ بالقُــذَّة، حتى لو أدخل الشعب السوداني تلك الحُفرَة التي دخلتها
الشعوب الإقليمية والبعيييييدة، وما مرقتْ منّها لللّيل!
آل.مُهِم، جواب الأخ محجوب، صحيح بالنسبة لاستعمالات الحمار بظلم مُبيّت!
ولكنني هاهنا، أطالبه بتعريفنــا (حالتنا ولا شهادة عربية ولا شرقية ولا غربية
ولا هناييية ذاتو هههه ) بالمثل أو المقولة عند استخدام الخيل آل.عاديات ضبحا
و آل.موريات قدحا ..
ومع احترامي لرأي الأخ محجوب في قوله عن خالد، أشتر، لكنني لا أتفق معه!
مالم يكن قاصداً بأنه كــ "الأشتر النخعي، مالك" المحارب القوي في قيادة جيوش
الإمام علي بن أبي طالب، كرّم الله تعالى وجهه؛ فالأخ خالد، بحملِه لواء التنوير
وقبضِه على شُعلة الحماس الثوري الديسمبري، ليكاد يمثّل فراسة ونباهة الفارس
آل.عَلَوي آل.كوفي (من ناس الكوفة) أبي كعبٍ مالك بن عمروٍ الأشتــَــر؛ وهذا
الفارس الشاعر والمثقف العضوي "كمان" في زمنو، قد قال:
يُناشــِــدني حا ميم والرّمحُ شاجرٌ بيننا xxx فــَــ هـــَــلا تلى حا ميم قبل التــَّقــَــدُمِ ..؟

ياعلى وضيوفه
ختيت الخمسة فوق الواحد
أو كما كانت تقول حبوبتى عشة بت
ودفاطر

يا شيخ على عبدالوهاب وزواره الكرام فعلا المثل صحيح وخالد سلك لانه ود ريف وضع المثل فى مكانه الصحيح وهو قصده ان التكوين الوزارى الذى اتى به البرهان بس لتمرير الفترة الحرجة بالنسبة ليهم يعنى يمشيهم الفترة دى والمثل دا بنطبق على اى ظرف صعب تحاول تخطيه بالاستعانة فى حاجة معينة الحكاية ما شرط يكون راحلة تركب عليها ما يكون مخكم تقيل زى البرهان تحياتى ههههه

Quote: فعلا المثل صحيح وخالد سلك لانه ود ريف وضع المثل فى مكانه الصحيح وهو قصده ان التكوين الوزارى الذى اتى به البرهان بس لتمرير الفترة الحرجة بالنسبة ليهم يعنى يمشيهم الفترة دى والمثل دا بنطبق على اى ظرف صعب تحاول تخطيه بالاستعانة فى حاجة معينة الحكاية ما شرط يكون راحلة تركب عليها ما يكون مخكم تقيل زى البرهان تحياتى ههههه

الحبيب صديق تحياتي يا جميل شكرا حضورك
شرحك وضح لي الوضع الذي ينطبق عليه المثل
المثل كلام زول حكيم اختصر كتاب كامل في كلمتين

تحياتي الحبيب صديق

Quote: ختيت الخمسة فوق الواحد أو كما كانت تقول حبوبتى عشة بت ودفاطر

الأمير الجميل تحياتي
مع أربجي اسم نوبي 100%
لكن ما فهمت حاجة من مداخلتك
عملت الحصة رياضيات ( خمسة وواحد )
الحبوبة الله يرحمها كانت معلمة رياضيات ؟؟

مودتي الامير الجميل

الحبيب أبوجودة صاحب الحرف الجميل
الحبيب هنا المحبة للاخر مع حبي لحزب الامة كمان
زمان أهلنا يا امة يا اتحادي الله يرحمهم ويحسن اليهم
شرحك جميل ولغتك وتعبير رائع
شكرا لهذا الحضور

يا سلام الحكمة بالكلمتين فقط كان يختصروا مجلد كامل

مودتي الحبيب أبوجودة .. حروفك جميلة

حبيبنا محجوب تحياتي يا جميل
خطير يا محجوب يا سلام شرح رائع
يعني نوع من الانتهازية
طريقة شرحك يذكرني ايام التدريس
ووسائل الايضاح وتقريب الموضوع لفهم الطالب

جميل شكرا كثير

تحياتي المحجوب

على يا صديقى
وفي سودانيز التقيت
بك وكأننا التقينا في القولد
ياسيدى الخمسة فوق الواحد
دا مثل شعبى عندنا في الجزيرة
أي لمن تكون ممتنع أو ممنوع عن الكلام في
أمر ما تقول ختيت الخمسة
فوق الواحد يعنى ختيت خمسة
صوابعك امام فمك الواحد عشان
فمك لايتكلم
يعنى تتريس للفم

Quote: لخمسة فوق الواحد دا مثل شعبى عندنا في الجزيرة أي لمن تكون ممتنع أو ممنوع عن الكلام في أمر ما تقول ختيت الخمسة فوق الواحد يعنى ختيت خمسة صوابعك امام فمك الواحد عشان فمك لايتكلم يعنى تتريس للفم

الحبيب الامير .. تحياتي يا جميل
خمسة فوق الواحد ( شكرا على الشرح )
اجمل عبارة ( تتريس للفم ) مبدع أنت

شكرا اميرنا الجميل ( تتريس للفم ) رائع