اختطاف المهندسة أميرة عثمان حامد رئيسة مبادرة لا لقهر النساء

12:13 PM January, 23 2022

سودانيز اون لاين
wadalzain-
مكتبتى
رابط مختصر

في حوالى الساعة الحادية عشرة والنصف ليلا من يوم السبت 22 يناير 2022 داهمت قوة من جهاز الامن من حوالى 30 فرد منزل المهندسة اميرة عثمان والذى تسكن فيه مع اخواتها المحامية امانى والاستاذة امل ووالدتها وغيرهم بالرياض ودون ان يراعوا حرمة المنزل دخلوا غرف المنزل والحمامات وكانت جميع النساء في حالة وجودهن في داخل منزلهن وداخل حرمهن الا ان قوة البرهان وحميدتى ، لم يعرفوا لا دين ولا اخلاق ولا إنسانية واختطفوا المهندسة أميرة من داخل غرفتها على الرغم من انها معوقة نتيجة لحادث حدث لها له اكثر من سنتين ومع ذلك رفعوها في عربتهم المدججة بالأسلحة ، هكذا جاء الوحوش الادميين كأنهم ذاهبون الى معركة حربية ،
هم لا يعرفون المهندسة أميرة فهى لا ترهبها مثل هذه الغطرسة ، فهى قد وقفت في وجه قوات الجلاد عمر البشير وفى يده اعتى الترسانات ، والآن جاءت قوته الأمنية لتمارس نفس الدور القذر ، ستظل اميرة تحفر في الجدار ، جدار هذه القوة والغطرسة والعنجهية هي وزميلاتها واخواتها ، وقد سبقتها الى الاستشهاد ست النفور ، نعرفها أميرة فهى ذات نفس ابية وذات كرامة لن ترهبها لا السلاح ولا القوات الوحشية .

سوف نظل نطالب باطلاق سراحها ومحاكمة من انتهكوا الحرمات ولن يفلتوا من العقاب وان طال الزمن

# الحرية لاميرة عثمان
انثى ولا دستة رجال

⚫ انا اماني عثمان حامد المحاميه /داهمت منزلنا قوه من جهاز الامن الوطني منزلنا بالرياض مربع 17 منرل 34 حوالي الساعه. 30 11حوالي 30 فرد يحملون اسلحه كلاشنكوف وعصي وخراطيش قاموا ب اختطاف المهندسه/ اميره عثمان حامد /رئيسه مبادره لا لقهر النساء واخذها الي جهه غير معلومه.
صحونا علي اصوات خبط وطرق بشده علي الأبواب والغرف في البيت فوجئنا بخبط وطرق شديد علي الابواب الغرفه وعندما فتحت باب الصاله وجدت شخص ملثم الوجه قلت ليه انت منو قال هو محمد / عاوز اميره وقلت ليه نحنا لانعرفك ل واتفضل اخرج بره لحدي مااجيك. وقفلت الباب اذا بي افاجاء بدخولهم من غرفه امي والعيال وكانوا بيضربوا في الباب بشده وبيدفر في الباب امل قالت ليه انتو منو قالوا هم مكافحه المخدرات عاوزين اميره امل قالت ليه خليني البس توب وافتح ليكم دفروا الباب ودخلوا علينا حوالي عشره افراد داخل غرفه امي وداخل الهول وفتح الدولاب واخذ توب واعطاه لي امل قال ليها اعطيه لي اميره امل قالت ليه اميره معاقه مابتلبس توب وبيدقوا في غرفه اميره بشده وانا قلت ليهم اميره في الحمام قال لازم تفتح الباب قلت ليه معاقه دفر باب الغرفه واميره كانت في الحمام وقال خلوا الغرفه فاتحه انا وامل رفضنا ودخل معانا في عراك انه لازم يفتح باب الغرفه بالقوه واتصل لمزيد من القوه وفعلا دخلوا مزيد منهم ملثمين وبعضهم يرتدي كمامه وقال ليهم تعالوا باسلحتكم عشان ح يدخلوا يشيلوا اميره بالملايه وانحنا صرخنا فيهم بشده كيف تستعنلوا القوه في اخذها وهي معاقه. ولم يهتموا. بذلك فتحوا باب الغرفه وانيره كانت بتلبس في هدومها وقالت ليه افتح وشك عشان اعرفك انته منو العاوز تسوقني بالملايه قالت ليه ليه( انا داعره) وامي حصل ليها انهيار والاطفال يصرخون ويرتعبون من الخوف. وقال عاورين موبايل اميره اميره قالت ليه انه اتسرق ودخلوا وفتشو غرفه اميره وانا قلت ليهم انتم ليسوا رةال سودانيين وليس لكم اخوات وامهات حسبي الله ونعم الوكيل فيكم. وخرجنا الي الشارع مع اميره واني اصرت تمشي معاها وانا ايضا حاولت امشي معاها وقالوا لازم اجيب موبايلي معاي فرفضت وقال لازم امشي معاهم واخذ موبايلي معاي ولبست وفي اثنا لبسي انل قالت ليهم اماني بتلبس في الحمام دفر باب الحمام ووجدني ب البس في هدومي. ومشيت وجدت اميره ركبت في بوكس ومعها في البوكس قوه مسلحه ركبت البوكس التاني وبعد دقايق تم انزالي من البوكس. وقال انزلي نحنا نازلين معاك. بعد ذلك اخذوا اميره قوه من الامن 3 بكاسي بهم حوالي30 فرد من قوات الامن مدججين بالسلاح والعصي.
نحمل جهاز الامن المسؤليه الكامله في اختطاف الناشطه #أميره_عثمان.

الأستاذة أماني عثمان تروي لقناة الجزيرة كيف تم اعتقال شقيقتها المهندسة أميرة عثمان ليلة الأمس ٢٢ يناير ٢٠٢٢ بقوى مدججة بالسلاح قوامها أكثر من ٢٠ ملثم ولا زالت حتى اليوم رهن الاعتقال . #أطلقوا_سراح_أميرة # الردةمستحيلة