عندما يكتب استاذ محمد المرتضى بمزاج .. مبالغة

10:18 AM January, 15 2022

سودانيز اون لاين
Osman Musa-
مكتبتى
رابط مختصر

يا مكتول كمد

- محمد المرتضى حامد –

ورد في الأنباء أن فريقا طبيا أمريكيا نجح في زرع قلب خنزير بصدر مريض أمريكي وأن المراقبة الطبية اللاحقة للعملية أظهرت أن القلب شغال (تَش) بما يُعد فتحا علميا، وتفريعا على هذا فكل من تعرض قلبه لخراب بسبب الحب المضروب مع ناس لا لا أو بسبب المكون العسكري أو مشاهدة المحللين الإستراتيجيين أو قفل الكباري والموانيء وقطع النت بجمهورية وجعستان، عليه أن يسعى ليهو خنازير في كونتينر على شكل حظيرة والضرورات تبيح الإسبيرات، فالقسمه ما معروفه ليا وليك كانت خافيه.

يقول العلماء أن الإنسان يشترك بالجينات مع الخنازير بنسبة ٨٤،١٪ ومع الموز بنسبة ٥٠٪ ، أيوا الموز، وأن هناك تشابها في الحمض النووي بين البشر والكلاب بنسبة ٨٤٪، وهذه حقائق علمية يمكن الإستيثاق منها لدى قوقل الشِفِت، وهي معلومات لا يعوزها برهان أو تعمق في الداروينية، ومعروف أيضا أن الشمبانزي من أقرب الكائنات جينيا للإنسان وهو الوحيد، مع الإنسان، الذي يميز نفسه (بيعرف روحو) وفقا لتجربة ال Mirror Self-Recognition Test التي يحتاجها بعض الساسة عندنا، ومن ثم يكون الشمبانزي أقرب الكائنات للبشر بمن فيهم الحِليوونه هارناز ساندو.
فا شنو، الناس أخير تقعد واطا..

ما يهمنا هنا القلب وما حوى، فقد أثبتت دراسات سابقة أن القلب ليس مجرد عضو لأكسجة وضخ الدم لكنه يحمل المشاعر والذكريات والآهات ومشاوير الحكاوي، وهو البشيل الريد وبشيل ودّو ويشيل نفحات عبير وردو، وسبق وقرأت أن للقلب ذاكرته الخاصة به المنفصلة عن المخ لذا خاطبه وردي محذرا أوعى يا قلبي تنسى، وهو غرفة العمليات لحالات العشق البكر، أيام (عيناك غابتا نخيل ساعة السَحَر) ومساءات الغزل الخرافي ووصف على شاكلة (شرفتان راح ينأى عنهما القمر) قبل أن يتطاير منهما الشرر، والرده مستحيلة.

ثبت بالتجارب أن من نُقِلت إليهم قلوبا من آخرين ظهرت عليهم اهتمامات كان يتمتع بها المتبرع فأصبحت تصرفات المتلقي تشبه، إلى حد بعيد، تصرفات سيد الشي ذاتا، يعني ممكن تكون زول مهذب حمدوكي الهوى بكرافته purple ومرات فوشي وتشبك السنابل وقوى الشعب العامل: سنعبر سننتصر، ثم يُنقل إليك قلب إنقلابي مزمن وبمجرد خروجك من اللسبتاليه تقول لمرافقيك: بباقي البنج دا ودّوني اللِزاعه عندي بيان.. يا وهبه روق .. فتسجن رئيس الحكومه وحرمه (لحمايتهما) من نسوان الوزراء ستات القليب الجافي العامل استمحان، الله يغيزن ناس ريا وسكينه، وتجي تقول للشعب يا طير.. هوي يا طير يا طاير: الزول دا قاعد معاي في بيتي ضارب الكمونيه وأمبارح مشيت زرته.. في بيتي .. عشان تكون عيونا سوا وإضنينا سوا والعين تشوف العين والليد تصافحو.

يا اخوانا في زول عندو لوحة (سرواليه) لسلفادور دالي ينزلا لينا هنا؟

موضوع القلب بتاع الخنازير دا ما راكب لي في راسي كلو كلو ومجهجهني لأسباب كتيره، منها إننا أصلنا ناس محبه، ومنها أن القرآن الكريم أشار للقلب في مواضع كثيرة بأنه مكمن الإيمان والعقل والحاجات الزينه والشينه برضو، وأسوأ الشينات هي القلوب الغُلُف، وهذه قصتها طويلة، فهي مغلقة قاسية لا تسمع النصح ولا يصلها قول وتقتل وتغتصب وتبيد مدنا بحالها كقلب نيرون روما وبينوشيه العميل وميلوسوفيتش السِقاله، وقد عرف التاريخ قديمه وحديثه نماذج منها أوردت أصحابها وأهليهم وأوطانهم المهالك، والقلوب تتراوح بين القليب الراسمو حِنه، بتاع الشواكيش والمرزبه.. يا وهبه لا.. خايفين عليك من البهدله، وقلوب توسوس لأصحابها بالكنكشه في السلطه بأي ثمن غير عابئة بأي نصح من الدواخل والخوارج فيأتي أصحابها تصرفات يحاروا هم أنفسهم في الخروج منها، ويسري عليهم من ثم قول حبوباتنا تسوي بإيدك يغلب جنجويدك، الواحد منهم يظل سادرا في غيه حتى يلحق غنم زهرا البتحك ضهرا في حيط إشلاق كوبر وشجر الخلا.

القلب في ذاكرتنا سمح، لذا أعجب أن يكون للإنسان قلب خنزير، فلحم الأخير محرَم أكله وفقا للديانات الثلاث، وينطبق ذلك على بقية الأعضاء كالكبد والكلى والكوارع لكن ربما أمر الإسبيرات يختلف.
صاحبن لي، زول ممسوووخ لامن بهناك، قال لي كوارع الخنزير دي مبالغه، زي الزبده، فيها فتّة بالدكوه تنسيك اعتصام الموز زاتو، أما لحمتو ففيها أقاشي crispy يخليك تدوبي، بالذات لو لِحقتو بالجن الكلكي داك البخلي المجلس يقول أحي، لكن حساب الله ما بنقدر عليهو، وزي ما بقولوا كل ممنوع مرغوب، وكما قال الشاعر:
مُنعتُ شيئا فأكثرت الولوع به ... أحب شئ إلى الإنسان ما مُنِعا.
صاحبي ممسوووخ، مُش؟
أين الموز يا عكرمه؟

من ثم، فإن الذي يسعى لنقل قلب خنزير ربما يستبق ذلك بفتوى شرعية حول مسائل كثيرة تتصل بهذا القرار الإنقلابي.
عموما القصه دي (ماكلا معاي جنبه) زي المبادرة القالوا مافي واعذروني على اللغة الخِربت، بقينا نقول الراستات والسانات والواقفين قنا، فالناس على دين إنقلابييهم، وعلى ذِكر خراب لغتنا، عزيزنا وأستاذنا الراحل مولانا عبدالله أبوعاقله أبوسن، له عليين، زمان قال لي مازحا، جيلكم دا بوّظ اللغه، شابكننا مِدَبرِس، باميه فاهمه، ليمون مجنون، أنجيرا بدمعة الشوق وخُدره مسؤوله ومِكَييس ولَكشرتو..إلخ، والعجب البنات الشوّهن أسماء بعض: يا (إ) حلااااام، يا عشَششه، تًاماااضُر، أما (زاهارا) دي حين تُنطق تحرق خميلة بحالها.. والحاله تأدبا لم نكن نورد أمامه كلمات ك (خالط) وأخواتها، فتأمل، كان لامن تلاقي صاحبك مع الإسكيز تداعبه في اليوم التالي غامزا: شااايفك أمبارح (كابِّي كتَاش)، هذا قبل ما الريده تمسخ وتنقلب واي فاي..
له الرحمه لم يشهد لغة (الجكسي) و (الترويكه) ونحن (مقصيين) وخطباء تجاهلوا قول سيدي (ص) (إنما بعثت لأتمم مكارم الأخلاق) فحشدوا البصاق والسباب في لغوهم، ولم يشهد (فريق) تَمبَاكة الدوحة أبوحداشر حتى كجنّا كلمة (فريق) وست الفريق الضامِر قواما ذاتا.

أها، متلقي قلب الخنزير دا ما أظنه يقول للمحبوبة: يا ست قلبي أو يغني ليها: أشيلك في القليب نوار جميل ناير وفات حدو، ومما لاشك فيه ستتغير أغنية حبيبي يا اللابس الشريط يال للقلوب لقاط لقيط لأنو دا، في نظر البعض، حيبقى كارديولوجي سلخانات ساي، وستتغير الأغاني الموجهة لوزير مالية بُمبانستان: يا العامل وزير ومرًكِّب مكنه خنزير، بالذات لو كان وزير واحد براهو لا شريك له ممكن يعمل إجتماع مجلس وزراء solo،
يا شعبن سوى البدع، بدع الزمان الهمذاني،
وبرضو ممكن تغني:
قلبي ليك بنادي إنت يا كومبارس وعامل سيادي ... يا ناس عصفوري شارد قصد عنادي..
مما جابوا سيرة الوثيقة وطفشن طفشا.

وسيندرج في باب التناقض أيضا أن الحبيب الذي كنا ننشده زمن كانت الزهور صاحيه:
تِبرِ وجمَّروهو والنار انطفتلو..
طالع في الهجيرة والشمس إختفتلو..
المن نور وجنتيهو القمرا تأدبتلو..
أشتاق لنظرتو و جوَووه خنزيري شَتلو..
ما جايه مش؟
أما لوسمعت Ray Charles يؤدي رائعته Unchain my heart فاعلم أنه يصيح من كونتينر مِخنزِر ولو فكّوهو ستتعب المرحومه ويتني هيوستن بقولها My heart will go on and on، و دي تبقى مساسكه يختلط فيها الغناء بالخنخنة.

-

(ياليت لي قلبك ، لأموت حين أموت)

هسه الواحد يرد يقول شنو يعني
شكيتك لي الله يا ود موسى كان بتدور تكتل ليك زول

الله كريم

والله مقال ممتاز من بيت الكلاوي وممكن تقراها مرتين وبمزاج فعلا....وتضحك من قلبك..

بس الاديب محمد المرتضى ما كان يستعمل كلمة " برهان" في جملة : وهي معلومات لا يعوزها
برهان...وكان احسن يستعمل كلمة دليل..لان كلمة " برهان" بقت تفقع مرارتنا لانها بتذكرنا بالقاتل
البرهان...

سلام أ.عثمان
لان درك يا مولانا.
روعة المقال تغسل كل ما يصيب الأنفس من كآبة ينشرها القتلة الإنقلابيون
و خبثاؤهم الإستراتيجيون.
-------------------------------------------
((((((((((((((((((إلى قناة الجزيرة))))))))))))))
لماذا لا تستضيفوا سودانيين محترمين مثل مولانا المرتضى و آخرين كثيرين؟

لله درك يا مولانا

بتنا نعمات
سلام
زولك اتقبض في قهوة الكتاب التاريخية.
شافوهو متخبي...
ومنهمك في برد القاهرة اللطيف .
قوليلو ياخ لو بتسوي متل دا . سافر كل 3 شهور .
وخت كباية السحلب الفاهم واتفنن .
الزول دا مفروض يلملم حاجاتو دي . ويمشي طوالي مطبعة الفجالة.
في القاهرة يطبع التحف دي كلها في كتاب .
ويكون اسم الكتاب ( تجارب تربال في المدن الحبيبة )
و يترجم والمترجمين عندنا .
ما هو اصلو يا يطبع الكتاب يا يتاجر في ابوالقدح.
واليومين دي تجارة ابوالقدح من السودان لمصر واقفة امبوبة.

العزيزة بسمات
انتوا بيتجيبوا الأسماء السمحة دي من وين؟
زولك ما بدور سيرة البرهان كلوكلو.
ولو قابلو في الرملة الفاصلة بين البريمي والسلطنة.
الا يركب ماكينة شوفرليت.

الأخ استاذ عمر ابوعاقلة
سلامات
عارف يا اخ عمر واحد من اخوانا في كندا .
يحكي لينا عن انو قابل اخونا محمد المرتضى في ملمة كندية .
قال الزول دا تشوف الهدوء . تحلف تقول الغنماية تأكل عشاو .
لكن خلف الأدب والهدوء دا عالم .
اهو كل ما يكتر وجعو من الحاصل في بلدو البحبها جد بقوم
يكبليكم من دا النوع القاتل .
ليك وليه التحية مربعة

سلامات يا عثمان..
تاني إلا نهذي بكاتم صوت..
هسه مع الحاصل دا مش قربت تقول : جيبوا لي قلبي الوِدِر؟
-

(شكلك لطيف يا بتنا ..
زي القطيف الإنتنى..
قالتلي عددت التنا، هِن سته غير التنتنه)..

استاذ محمد المرتضى نفس الزول الجاب خبر البطانية انها اترشت. جاب لينا خبر انو شافك متحكر وتكتب في القطعة التحفة دي . شافك في القهوة التاريخية بالقاهرة قبال اسبوعين في قهوة Groppi . منكب على الفلسكاب. حتي جاب العنوان 50 ش عبدالخالق ثروت . قصر النيل القاهرة . لو قروها أصحابنا الجوار القهوة ناس مكتبة مدبولي كان نشروها ليك وادوك مسحة شنب .
لكن انا عارفك ما جريت في حياتك لي زي دي الشغلات .
ادينا خبرك .

الحمد لله


كما استمتعنا بشباب ود حامد هانذا نستمتع بكهولته وعقبال الشيخوخة

ناسنا..
أستاذ عمر أبوعاقلة..
د. نعمات..
أستاذه بسمات..
مهندس محمد الشيخ صاحب الزمن السمح..
عثمان نسمات..
شكر طويل التيلة ورغم بعدي برسل سلامي..

..

تسلم يا عثمان موسى

وتسلم يا محمد المرتضى حامد

تبين أن الرجل،
الذي خضع لأول عملية في العالم لزراعة قلب خنزير في جسم إنسان،
كان قد أدين بطعن شخص عدة مرات، بحسب أقارب الضحية.

ففي عام 1988،
أدين ديفيد بينيت (57 عاما) بطعن إدوار شوميكر، بحسب ما ذكرته شقيقته لزلي شوميكر.

وقالت إن شقيقها رحل في عام 2007 بعدما عانى على مدار عقدين من مشاكل طبية.
تسبب فيها حادث الطعن.

وأضافت أن بينيت لم يكن يستحق أن يستفيد
من العملية الجراحية الفريدة،
لكن الفريق الذي أجرى العملية قال إن سجل المريض الجنائي
لا يمكن أن يعتمد أساسا لتقييم أحقيته في العلاج.
...
اخ محمد المرتضى
سلام
وكت جبتها سيرة صاحب زراعة قلب الخنزير .
هاك خبرية انو الزول أصبح لبانة في خشوم عنقالة امريكا.
وانو هو كاتل وما يستحق العملية .
ياخ حاسدنو في قلب خنزير ؟
هسع يا ود حامد زولك دا تاني يحب كيف.

د. ياسر.
السلام يا روح البدن،
أثيرت حول العملية مواضيع كثيرة تضمنت (التعديلات) الجينية
التي يعلمها أهلها ، كما أن هناك مسائل يختلط فيها الدين بالعلم في زراعة الأعضاء بشكل عام ،
والبعض ذهب بعيدا إلى مناقشة فلسفية تبرر نقل الأعضاء ومضوا حتى إلى وحدة الوجود
وهذه مسألة مستمرة منذ الزراعة الأولى التي قام بها كريستيان برنارد وكانت حدثا عالميا
، بالطبع هناك من يرى أن مخلوقات الله كلها لها أصل واحد وبالطبع هذه مسائل يختص بها
أهل العلم والمولى علمنا أنه خلق من الماء كل شئ حي ولعلك مررت بحديث موضوع نُسب
إليه (ص) يقول "أكرموا عمتكم النخلة، فإنها خلقت من فضلة طينة أبيكم آدم، وليس من
الشجر شجرة أكرم على الله من شجرة، ولدت تحتها مريم بنت عمران، فأطعموا نساءكم
الوالد الرطب، فإن لم يكن رطبًا، فتمر" ، ما عارف القصه دي مع مرضى السكر الحلوين كيف!!
عموما يقال إن فهمنا ل (الحياة) وشروطها ، وفقا للقوانين الأرضية، قد يختلف في أماكن أخرى
من الكون فنحن ما زلنا نجهل الكثير عن الحيوات الأخرى المؤسسة على عنصر الطاقة والجن
وهذا موضوع يطول. لكن في كل الأحوال جلب المصالح أولى على درء المفاسد والضرورات
تبيح المحظورات ومن ثم حياة الإنسان لها أولوية بس كمان القلب دا حاله خاصه وانا ما عارف
المتلقي دا لو رجع بيته ح يعرف زوجته أو الحبيبه الزمان ويغني (الليله لاقيتو) أم سيمر بها
كمن يمر بغريب.

مرحبا بالأخ محمد الشيخ

يا ربي كان قلب الكائن دا
ركبوهو لي ابو آمنة حامد، الزول الرهيف، مثلا

كان ممكن يقول

قلبي غافر ليك ذنوبك

ولا ما كان ببقى في طريقة يغفر بيها لي حبيبو النساهو داك

وجاي تعمل ايه معانا
بعد ما بدلتها

الرهيف قلبو بيعيش
في شكو اكتر من يقينو

تحية ومحبة للمرتضى
ول ابو عفان

Quote: الرهيف قلبو بيعيش في شكو اكتر من يقينو

يا أباذر..
بالطريقه دي ودَرتني أنا ذاتي..
لاحول ولاقوة إلا بالله..
ياخ انت دخلت منطقة لا تقل خطورة عن Area 51 في نيفادا ..
أبوآمنه العجيب..
قال ليهو قلبي غافر ليك ذنوبك سيبو بس تنشف جراحو..
عشان كدا يا مولاي الموضوع دا لايجب التعاطي معه بهذه البساطة..
القلب دا داخل في أي حاجه..أي شئ ..
أي محاوله لتغييره معناتا غيروا صاحبه كله فقد قيل المرء بأصغريه لسانه وجنانه والباقي دا
مجرد إكسسوارات.
هذه المضغة إن صلحت صلُح صاحبها وإن باظت فعليه السلام..
ياخ الشعراء يخاطبونه ككائن آخر وينتظرون منه جوابا كما فعل بازرعة وكما ورد في إفادة سيدنا عثمان حسين
يا قلبي لو كانت محبَتو بالتمن يكفيك هدرت عمر حرقت علي شبابي..
معقول دا بعد تغيير القلب والسوفتوير تاني يعيش ؟؟
معقول؟

ازيك يا مرتضى
كلنا ياخ ودرانين

ابو آمنة زول عجيب شديد
خت الحاجات كلها في قلبو عشان عارف انه الإدارة كلها هناك

شغل الجابري مع القلب كتير ومثير

يعني شوف بالله مع ابو قطاطي
الكلام كله عن وفي وبخصوص السيد القلب

بداهو من
انت يا قلبي الميتم

لغاية النهاية

والنهاية تكون سعيدة

عكس ما يشتهي قلب الجابري وابو قطاطي

ياخ الأغنية كلها في سيدنا العارف بكل شي القلب

ما اظن خنزيرنا المسكين دا يقدر يتصرف
ههههههه

ولا شنو

ماكفاهو العذاب الهو فيهو ليه تزيد آلامو اكتر
وليه عيونو العمرها ماخانتك تبكي و تسهر
وليه توشح فجرو بالأحزان بعد ماقلبو نور
اضحي جرح الفرقة في قلبو الحزين من حبو أكبر
********
يا ابوذر
ويا محمد المرتضى
خلاص اتلميتوا في صاحب اجمل قلب مفتفت.
غايتو تاني الا نفك فيكم بمبان حتين تشتتوا من جهات صاحب القلب البديع .

محمدالمرتضى حامد
انا بسميه "العيد"
بطعمه وفرحته وبهجته ولهفته...... الزمان
وغياب محمد المرتضى حتى ولو يومين .... يهل فينا
محمد عوض الكريم القرشي:
عدت يا عيدي بدون زهور
وين سمرنا وين البدور.. (غاب) عني”
“بي العيد يمر جواه سور
وهم في بهجة وهم في سرور.. (غاب)عني.
ويزيدالشوق لمحمدالمرتضى مع عبدالرحمن الريح وابراهيم عوض
يا عيد تعود يا عيد** بالخير علينا سعيد”
يا سلام عند اختلاط محمدالمرتضى خامد مع التجاني سعيد و... وردي
(وزي عيداً غشاني وفات وعاد عمّ البلد أعياد)
ختاما ودحامد .... الحلنقي ومحمد الامين:
العيد الجاب الناس لينا ما جابك
يعني نسيتنا خلاص
مع إنك انت الخليتنا
نغني الحب فكرة وإخلاص.

استاذ ود ياسين
سلام
دي الأيام زولك مكرن حابس الغجج .
ما بعيد من نيل القاهرة .
كل ما يكتحلوا كباية دوم سكري اهو بقوم يتعنكل في الفسلسكاب .
ويفرج في عيال الملك فاروق في ( المكشن بلا بصلة)
نوع الكتابة دي صعبة على اهلنا المصريين .
اذكر في مدرسة المشاغبين .
لما حصلت ديك الهترشة.
قام يونس شلبي سأل سعيد صالح . قالو دا انجليزي .
قام سعيد صالح قالو : دا انجليزي فيومي .
فأكيد لو اهلنا في ديك القهوة بصوا وتجسسوا على كتابتوا
حيقولوا دا انجليزي فيومي لغة الفيوم
زولك حروفو دايما بتتمهل مهلة شديدة عند المتابعين للنوع دا
من ضروب الأدب الجديد .
الأدب المكرب بتجارب الغربة والسفر والشفتنة
والصعلكة والطيبة والفهم .
..
مشكور على المرور الكريم

شكرا يا ود موسى
ما اجمل ان يكون معانا ناس في؟مكانتك ومكانة محمدالمرتضى
ياخ الواحد ما بلقى ...تعبير يناسب يعني هسي زي ود حامد دا تقول ليهو شنو؟! نشوف
في زول هناك
بسماتو ابدا ما بتروح
في عيونو الصباح .. زي الوشاح.. اتقاطر سماح
زي البرق شايل المطر.... في سمانا لاح

Quote: والموانيء

مولانا لاحظت زعلااان من قفلة الموانئ..الظاهر من(عملاء) الإمارات..
هسه تلقاهو مؤيد إغلاق طريق الشمال ..

My heart will go on
لم تغنيها المطربة الراحلة ويتني هيوستن..بل هي أشهر أغاني المطربة الكندية سيلين ديون.

......
( منو القال ليكم قلب الخنزير ما بيعرف العواطف والأحاسيس؟!..هذا فيما يختص بوحدة الوجود..وجينات الخنزير القريبة لينا ..وربما لذلك حرم علينا)..والله أعلم .

زماااان كتبت قصة قصيرة بعنوان( عملية نقل حب) ..نشرت في مجلة الدوحة القطرية.
تتعلق بنفس الموضوع..عمليات تغيير القلب وعلاقتها بالعواطف.

Quote: والموانيء

مولانا لاحظت زعلااان من قفلة الموانئ..الظاهر من(عملاء) الإمارات..
هسه تلقاهو مؤيد إغلاق طريق الشمال ..

My heart will go on
لم تغنيها المطربة الراحلة ويتني هيوستن..بل هي أشهر أغاني المطربة الكندية سيلين ديون.

......
( منو القال ليكم قلب الخنزير ما بيعرف العواطف والأحاسيس؟!..هذا فيما يختص بوحدة الوجود..وجينات الخنزير القريبة لينا ..وربما لذلك حرم علينا)..والله أعلم .

زماااان كتبت قصة قصيرة بعنوان( عملية نقل حب) ..نشرت في مجلة الدوحة القطرية.
تتعلق بنفس الموضوع..عمليات تغيير القلب وعلاقتها بالعواطف.

بتنا الجميلة أمنة مختار
سلام .
هاك كلام عمك دا يا أستاذة امون باقي هو زول جرب زراعة الفدادين الخصبة
في قلبو للزراعة .
...
زرعوك في قلبي

يا من كساني شجون

ورووك من دمي

يا اللأدن العرجون .
..
تصدقي يا امون انو الشغلة دي نجحت نجاح عجيب .
..
الف شكر على مرورك المريح

Quote: ويزيدالشوق لمحمدالمرتضى مع عبدالرحمن الريح وابراهيم عوض يا عيد تعود يا عيد** بالخير علينا سعيد”

أحمد ياسين..
كدا انتهيت من أي كلام أو أي إشارة ممكن أجيبا لأنه الإسمين الفوق ديل (قفلة) أي شيء..
يا روحي أنصفني..
يا أحمد ، كل الذين ورد ذكرهم على لسانك ناسي عديل، عبدالرحمن الريح وإبراهيم عوض عبدالمجيد
ديل أبناء حيَنا حي العرب الذي تفوق على أية بقعة جغرافية في الكون المنظور ، فهو إلى جانب
الضخمين ديل، ضم أسماء عصية على الحصر منها الجابري وحسن الجلال وميرغني المأمون
وأحمد حسن جمعه وسيد عبدالعزيز وعبيد عبدالرحمن ومكي سناده وابراهيم الرشيد وعبيد وسيف الدسوقي
وعبدالرحمن وودالحاوي وعبدالوهاب الجعفري، وهو منشأ الهلال والمريخ .
هي كلها 9 كيلومترات مربعه تبدأ من دكان البربري جنوبا وتنتهي شمالا في مدرستنا سابقا (محمد حسين)
ومن اللاسلكي القديم غربا وتقطع شارع الشنقيطي ثم تصل شارع كرري شرقا بعدما تحيي الكنيسة
الجميلة وناسا السمحين. مفاعل نووي ويورانيوم مخصب وعناصر مشعه وهي ال IAEA ذاتا، كتبوا فيها أشهر
الأشعار والخرائد وكل تلك الأسماء كنا نراها يوميا وتجمعهم صلات بالأهل من حيث الجيرة.
دا حي غريب يا ود ياسين، خميله بس، تمثلت فيه معظم الأعراق وناس الكَفَر والوتر واليسار واليمين
وما بينهما من متشابهات ومذيعين ومذيعات وصحفيين وبنات سمحات.
هو زاتو فول البربري وبيبسيهوتاني بيتكرر؟
دا حي مُركَز لو عملوا ليهو دليوشن بيعمل جمهوريه براها .
قت لي عدت يا عيدي بدون زهور بس؟
سجنوني داخل قصور شايفك جلَيتا!!

ود المرتضى
انت بتوصف في حي العرب وكأنك بتوصف في اتبرا...
خليتنا نحسد حي العرب عديل كده،،!!
وخليك مواصل تتحفنا بمثل هذه الدرر النادرة وحالتنا النفسية تتصلح
بعد عمايل القتلة البرهان وحميدتي فقعت مرارتنا ...
والله يديك الصحة والعافية

Quote: مولانا لاحظت زعلااان من قفلة الموانئ..الظاهر من(عملاء) الإمارات.. هسه تلقاهو مؤيد إغلاق طريق الشمال .. My heart will go on لم تغنيها المطربة الراحلة ويتني هيوستن..بل هي أشهر أغاني المطربة الكندية سيلين ديون. ...... ( منو القال ليكم قلب الخنزير ما بيعرف العواطف والأحاسيس؟!..هذا فيما يختص بوحدة الوجود..وجينات الخنزير القريبة لينا ..وربما لذلك حرم علينا)..والله أعلم . زماااان كتبت قصة قصيرة بعنوان( عملية نقل حب) ..نشرت في مجلة الدوحة القطرية. تتعلق بنفس الموضوع..عمليات تغيير القلب وعلاقتها بالعواطف

العزيزة الأستاذة آمنه ، سلامي..
ناس التايتنك ظهروا..
خلينا نبدأ بالمسلمَات أولها (الموانئ) وقفلها هي والطريق القومي تصرف يجرِّمه القانون لكن طالما البلد مافيها قانون نهائي فأحسن نخلي الموضوع دا ونخليهم يخمجوا ويعوسوا عواستم.
لكن بالله بيني وبينك كدا، في زول بيقفل الموانئ والمرافئ ويطفي المنارات والقبطان وبحارته والحبايب شهور بانتظار اللقيا يغنون من المياه الدولية جاييك يا آخر المواني؟

My Heart will go on دي كلامك فيها صحيح لاشك في ذلك ، لكن قصتها كالآتي : سيلين ديون صاحبة الأغنية لكن غنتها أيضا المرحومة ويتني هيوستن ( وأوردتها بإسمها في المقال الأصل باسم ويتني ريده ساي لوجه الله) ، وبعد ساعه تقريبا من إنزال كلامي في الفيسبوك قمت بتعديل الإسم لسيليون ديون لأنه عندي بنت اختي إسمها ساره شداد أرسلت لي محتجه بمقولة سيلين ست الشي زاتا، المهم على بال ما أعمل التعديل كان المقال مشى واتساب وما أدراك ما الواتساب والنسخه النزلها عثمان ودموسى هنا دا لم يرد فيها التعديل الذي قمت به في 15 يناير. والله يا آمنه غيرتها على مضض لأنو زوله بتغني زي ويتني دي ما لاقتني ، يعني بتنافس الحكّامه فاطنه بت الباتيل وأستر أويكي، أها ويتني دي، زي ما عارفه ، عندها My heart is calling و Take care of my heart وكانتا أولى بالذكر ، بالذات التانيه دي ، وزي ما قال صلاح مصطفى قلبي عندك وانت فيهو أو زي ما قال عثمان حسين خلي قلبك معاي شويه .

ممكن ترسلي لي قصة (عملية نقل حب) لأني شاهدت فيلما ، أيام صفانا، بعنوان Change of Mind وإذا لميتي في الفيلم لازم تشاهديه فهو يحكي عن قصة رجل أسود ركبوا ليهو مخ زول أبيض وبعد كدا تشوفي العنصريه البغيضه الماخمج وماذا كان إحساس زوجته المتزوجه زول بمخ زول أبيض وجسد اسود بمظنة أن هناك اختلافا بينهما حسب عنصرية ذلك الزمان الفارغة الممقوتة .. أوعى يفوتك بالذات (الشريف) الماشريف الفي الفيلم. بالطبع الفكرة في الفيلم كأساس لا تبتعد كثيرا عن نقل قلب محب يحتشد بأحاسيس لافندر إلى جسد كان شغال بقلب عبارة عن قمامه.

مولانا محمد المرتضى.

عذرا ياخ، حاسة زي خليتك تبرر نصك، أسوأ حاجة عند الكاتب هي تبرير النص..أو (تصيد أخطاء فيه مهما كنت غير مقصودة)😅
وهو نص بديع بلا شك لامي حاجات ونكهة أمدرمان كلها وحي العرب الذي عندي فيهو أجمل الصحاب والنسابة.

على ذكر الواتساب..نصك دا لاقاني هناك..
وعجبني أكتر فيهو استخدامك لمصطلحات الشباب الثورجية..الذين أزعم أنهم قد لقنوا جيلنا دروسا غالية.

....
أحيي فيك وفي أخونا العزيز مفترع البوست الروح الرحبة.

إييييه..ويتني هيوستن وما أدراك ما ويتني.
مضحكنني المصريين مااا بيشبعوا من فيلم (بودي قارد)..عالم رومانسية بصحيح هههه
....

القصة ضاعت مني.
كانت في دفتر (أيام الدفاتر)، شالتو بت جيراننا الله يسامحها وضيعته.
بفتش نسخة مجلة الدوحة في مكتبتي.
لكن القصة باختصار تدور حول زوجة كانت تخشى تغير مشاعر زوجها بعد العملية..
الأمر الذي لم يحدث.

تحيات مشبعة بعبير البحر المالح.

بتنا كنداكة الشرق أستاذة أمون
والإخوان أصحاب القلوب الطيبة
سلام
مستشفي صاحبنا في ميرلاند ما بعيد كلها ساعتين ونص
من NY وحوالي 40 دقيقة من فرجينيا .
حقو الزول يصلو يتحمد ليه سلامة الهارت سيرجري . العملية الكبيرة .
. والزول لسع في فترة الريهايبتيشن.
فترة تسليك العضلة . فترة تعليم الدققان. والخفقان. وفترة تعليم
حديث القلب للروح .
طبعا عمنا حيلاقي القلب الجديد فاضي عدمان الحبة .
لكن مع وجود ملائكة الرحمة الرحمة ممرضات ودكتورات ديك المستشفي
قلبو الفاضي الجديد حيترشح شغلات .
وطوالي حيدورليك في اغنية عمك .
...
جيت لقيت باب الغرام
فاتح ودخلت
ومن شراب الريد
يا مسكين نهلت
وابتديت تعشق يا قلبي وانشغلت
وكنت جاهل
والعشق ظنيتو ساهل .
...
هههههها حير الخنزير زاتو.
يا شباب بتخيل لي العشق ما بيفرز العضلة جابوها من خنزير او ابوالقدح.
بيدخل بيدخل .

يا بسمات ..
الشهداء الأطهار ذهبوا إلى دار القرار بعيدا عن دار البوار التي أغرت سلطتها القتلة والمأجورين والخونة الذين لم
يعوا قوله أن الآخرة خير وأبقى ولم يتدبروا أن الشهداء من الأنفس التي حرم الله
قتلها إلا بالحق،
الآخره مافيها بنادق وسلطة ودوشكا ولا فريق أو مشير ، هناك ح يعرفوا كويس ماهي لظى
وهي مستقرهم..
سكرة السلطه وغيبوبتها سيئة ..

Quote: انت بتوصف في حي العرب وكأنك بتوصف في اتبرا... خليتنا نحسد حي العرب عديل كده،،!!

عطبرة (أتبرا) لي فيها صحاب كثر وهي مدينة محورية في تاريخ السودان وحزنت أني لم أقض فيها
زمنا كافيا يمكنني من التفرس في ملامحها وتفحص تقاسيمها ، لكن حي العرب كأحد أحياء
أمدر العريقة حالة خاصة وهذا ليس من باب الإنحياز ولكنها الحقيقة العارية ففيه عماليق الشعر وقمم
الكَفَر والوتر ودهاقنة السياسة ورائدات الحركة النسوية وأهم من ذلك أن في أحضانه كافة الأعراق
والديانات وفيهو ناس الريده والقلوب العامرة ناس خذيني باليمين وانا راقد شمال ، تسامح يحيّر وإبداع
كوني والحمد لله هو حي خالٍ من الكولسترول الإجتماعي والإنقلابيين و(شُزاز اللافاغ) كما كان ينطقها المخلوع...

مكتول كمد .
يا أخ محمد المرتضى
انا مشيت أمريكا سنة 1995 بعد 7 سنة سواسيل تجارة شنطة وشغل متقطع
بين لندن وسويسرا وهولندا .
بعد ما ناس الإنقاذ بقوا يفتشوك في المطار ويقطعوا رقبتك في الدولارات وانت مارق ايام الشهيد مجدي
حلفنا ونحنا مجموعة نفرتق.
وكانت القبلة أمريكا.
اها بعد زيارتي ليها سنة ١٩٩٥
عجبتني.
جيت السودان لملمت حاجاتي ومشيت زول هجرة.
وفد غتسة مع اليهود .
الجماعة كان عندهم مصنع جينز في المكسيك
ومصنع في ديك الايام في المغرب .
وطبعا المغرب فيها احسن حجر جيري لغسيل الجينز .
انا مسكوني مستودع المكسيك.
لكن يا اخ محمد المرتضى الطبزة الاكعب من طبزة د. حمدوك
انو انا تركت العز مع الجماعة وعملت شغلي براي مشيت
نورث كارولاينا وفتحت محل كبير هناك وظليت اتعامل معاهم
وهم في مانهاتن .
بعد 8 شهور حصل الهجوم على المحل حقي .
وفي العراك اصابتني رصاصة في الراس.
كانت هواجة ندمت عليها بعد ما وعيت من البنج.
طبعا الخبر وصل للأهل والمعارف .
اها يا اخوي بعد زمن طويل من الحادث الكان سنة 2004 .
بعد زمن طويل جيت
السودان .

تاني يوم وصولي قابلني زميل دراسة .
قابلني في نص سوق اللساتك في الخرطوم تلاتة
الزول وقف مسافة يعاين لي .
وقام سألني يازول انت عثمان ؟
قال لي سمعنا انك كتلوك كمد في أمريكا.

الأديب محمد ود المرتضى
سوف نوجه لك الدعوة رسميا في الصيف القادم لزيارة ام المدائن
لتتعرف عن قرب على سكان اتبرا الطيبين وتكتب لنا عن انطباعات
بعد ذلك...وفي الصيف القادم سوف نكون في ام المدائن ......

بتنا بسمات
سلام
زولكم الليلة فكالو في السوشل ميديا زي ما بقول بكرى أبوبكر.
فكالو نص جديد .
حقيقة نص إبداع.

جيب لينا
الابداع هنا في المنبر ...
...
ناس الخبرة ممكن افادتنا عندي حرفين في ما بتتكتب في كيبورد الجوال
ممكن اعرف السبب ؟
اظنه تقليد fake

أصبر خليهو

- محمد المرتضى حامد –

برضي ماقادر أسيبك لما أنساك بشتهيك..
مع كل دفقاتى الحنينه وكل دمعة شوق سجينه..
تهاتي بيك روحى الحزينه وأشقى لما تهاتى بيك..

بالله يا المغتربين والمهاجرين وناس الدياسبورا والمقيمين في البلد الحزين، علموا أبناءكم معاني (بريدك) و (تهاتي) و (مشتهيك) حتى لو بلغتم (شحتفة) الروح ذاتا، فكلمات عينة craving و longing و miss you ما بتوضح الموقف في غرفة عمليات القلب..
تمام؟
برضو كلموهم أن مبدع اللوحة أعلاه، شاعر (غاية الآمال) والقائل (من لمسات حنانك خلاص تَمّينا دور)، كان ضابطا بقوات الشعب المسلحة برتبة لواء وأديبا يجيد لغتين ولاعب كرة وإمام مسجد واقتصادي ومثقف من طراز فريد، وقبل ذلك كان أول دفعته بالكلية الحربية (حامل السيف)، كانت تسمى الدفعة بإسمه، لكنها عرفت بدفعة نميري وفي حكاياتنا مايو.

ترقى حتى رتبة اللواء قبل أن تصبح الرتب سلعا تباع وتنمو في الخلا زي الموليتا وتوزع كالسندوتشات في كناتين الحركات ومواكب الفلول والموز في تماهٍ عجيب مع الزمن المريب.

قولوا لأبنائكم أن البوليس وسلاح المدرعات، كانت لهما فرق جاز تبهرج ليالي العاصمة، فيها العسكري عازف الساكس التِرِس عبدالله دينق الذي كان يُسكِر نيلها طربا على إيقاع التُم تُم وصولو (المانِسونا) و (حبيبي غاب في موضع الجمال بلاقي)،

في مس الحرير بلاقي
في صوت الخرير بلاقي
في ماء النَمير بلاقي
مع العندليب بلاقي

عوض أحمد خليفة، ربيع الدنيا، لم تحُل العسكرية الصارمة دون أن يكتب (خاطرك الغالي) ولم يتردد في أن تذيع أمدرمان (الآن يغنينا عثمان حسين من كلمات عوض أحمد خليفة "عُشرة الأيام")، وهو ذاتو عوض الذي كان يمكن أن يتغدى جيشه في فتّاشه ويتعشى في أي من عواصم الجوار إذا شاء،
شايف كيف!

قال في عُشرة الأيام (ما بِصَح تنساها، كأنه ما عشناها، كأنه ما ضمّانا أحلى غرام)..
قاتل الله الجحود..
كلام زي جنزبيل السكه حديد وبيبسي السبعينيات اليطلع بنخاشيشك ويرد الروح لناس ال bloatation والديسبيبسيا.
بالله شوف (ضمّانا) دي كيف!
حاجه كدا كخيمة دفيئة يعوي في خارجها زمهرير امشير.

نوستالجي؟
فيها شنو!
رومانسي؟
طيب مالو!

(عوض) العسكري الماخمج، أصلو ما جاب سيرة الدوشكا ولا الهاوتزر وهو فارسها اليجول في سوحها دفاعا عن الثغور وحماية للأرض والعرض وليس في أزقة الحواري هتكا للعروض وانتهاكا. والذي سمك السماء بلا عمد، لو كان ورفاقه بيننا لما تفرجوا على الحرائر يغتصبن وشبابنا يقتل وتداس رؤوسهم على الأسفلت بأحذية المجرمين أمام قيادتهم التي استجاروا بها فأغلقت بواباتها أمامهم، بل سُدت دونهم حتى مسارات الخروج كي لا ينجو منهم أحد، لكنه زمن الغدر والخزي.

إبراهيم عوض الذري إبن المفاعل النووي (حي العرب) شدا ب (كنت معاك سعيد)، غالبا مبسوط من جيش كانت تهابه أفريقيا (يحاذره حتفه كأنه حتفه) كما النمل وجيش سليمان، وقتها يسعد (عوض) أن يقال عنه أنه أحد قادة ذلك الجيش الخطير وأنه، في الوقت ذاته، أحد عماليق الرومانسية.
كان يطل من التلفاز وبجواره العظيم كابلي، نعم كابلي إيفرست، كابلي الهملايا، كابلي عصي الدمع إمبراطور (آسيا وإفريقيا) وصاحب تاج السر الحسن والملايو وباندونج الفتية واللواء حقوقي الحسين تفشى الخبر.
لا حول ولا قوة إلا بالله.
يا اخوانا نحن كِتِلنا جد..
كاميرات الأستوديو ذاتا كانت فرِحة جزلى تغازل بعضها بعضا وهمست إحداهن لأخرى: دا الزول الغنى لكينياتا وناصر وسوكارنو وجميله بوحيرد قبل أن ندخل زمن هيييي دي مالا! وكابلي ينقرش عوده قائلا بصوت كالكريستال المُسال (حأغني ليكم من كلام حبيبنا عوض " أغلى من عيني واحلى من ابتسامي")، عوض ما قال أنا اللواء المضرجة أكتاف بزته نجوما ومقصات ونياشين لكنه قال (مكتوب في جبيني غرامك وانت عارفو.. باين في كلامي وفي عيني شايفو) ويبتسم لكابلي مُناولا إياه العبير في رفق، شوفتوا شُغل بشرى وبشاره وتشافي وإنييستا؟

يا نسايم الليل زوريني
بالشذى والطيب عوديني
زاد الشوق لي يهون إمتى وصالو!!

مكتوب في الروشتة، تُسمع بالعود بصوت (أبو داؤود) أو حنجرة (عاصم) الموشاة مرة عند اللزوم، وطبعا البلد كله مأزوم في حالة لزوم.
طيب، الجاب سيرة نسائم الليل شنووو؟
صديقي الحبيب الأمدرماني يحيى بشرى حسن الشاذلي (أبو اليا) كان لامن يتكيف من زول يناديه (ياااا قومي)، أها، كانت الأسرة تتحلق أمام التلفاز وإبن كوستي (القومي) الفريق أول شرطة إبراهيم أحمد عبدالكريم، لامن الخلوق تهجع، يُسعد مساءات الوطن في برنامجه (نسايم الليل) بجميل الكلِم والأشعار المنعنعه والخرائد والحروف المعطرة وتلمع ويتلو علينا دفتر أحوال الصبابة. كان يؤنس الملايين ويوزع هرمون السعادة والحب ،أوكسيتوسين مجاني، من خلال ذلك البرنامج الذي كانت تنتظره الأسر بلهفة كإبنها العائد من الجبهة في زمن الجيوش السمحه الغنت ليها الفلاتية الله ليَا ليمون سقايتو عليا. إبراهيم ينصت لضيوفه ويتحرى في عيونهم بريق العاشقين مدوِّنا تقارير الفؤاد (التائه الأضلاع) لايف، لم ينقص ذلك من مهنيته في شئ، فقد كان شرطيا لايشق له غبار، رجل مباحث فذ لم يلجأ لأساليب العاجزين، يُعمِل عقله وإنسانيته والقانون لاغير، حتى ارتقى أعلى رتبة كمديرعام للشرطة السودانية. رجل بذاكرة ديجيتالية و (ويكيبديا) قائمة بذاتها ومرجعا في تاريخ الثقافة والأدب، خبير بالعمل الإنساني والجمعيات الخيرية مهموم بأهل السُكَّر الحلوين ممن أذرى بهم الجلكوز وخذلتهم ال Beta Cells.

كان في شرطتنا رجال كاللواء عمر علي حسن، يطول عمره، الذي يكفي أن تطالع له مقالا في الأدب والفنون والجغرافيا والأنثربولجي وكلاما يُدرَّس عن العقيدة الشرطية كجهاز مدني لا عسكري لتعرف أين كنا. هي الشرطه التي ترأسها محمود بخاري العَلَم، شرطة أبو آمنه حامد البِريد قلبو يعيش في شكّو أكتر من يقينو..

لازم تعرفوا عن الجنرال جعفر فضل المولى ومحمود أبوبكر، إيه يا مولاي إيهٍ، ومبارك المغربي والجنرال الطاهر إبراهيم الذي انحاز لثوار أكتوبر منشدا:

شعبك يا بلادي أقوى وأكبر مما كان العدو يتصور، وهو المتبتل اليشكو الحبيب في عرضحال:
لو بُعدي بيرضيهو وشقاي بهنيهو..
أصبر خليهو الأيام بتوريهو..

قوائم تطول من أولئك (النظاميين) الحقيقيين الذين أضافوا ألقا وهيبة وجمالا للرتب فزانوها وشرُفت بهم الأوسمة والنياشين، رومانسيون رغم صرامة الوظيفة، فالحديد الصلب يقطعه الماس الجميل الشفيف، لذا فازوا بحب العباد وتوهطوا في القلوب وكانوا زينة المجالس بمافي عقولهم وقلوبهم وليس بغيرها.

بالله مش غادرتنا المتعة وأصبنا جميعنا بالأنهيدونيا anhedonia؟ مش دخلنا زمن رحل فيه حتى طيف السعادة لولا شبابنا الثائر ورفاقهم الشهداء الذين أصبحوا بمثابة lifeline وأوكسجينا للبلد؟

رحم الله من رحلوا عن العبوس الغراره ممن سهروا على حمايتنا ورعايتنا، الذين آمنوا روعنا وطيبوا خواطرنا وصانوا حدودنا وأهلينا وأطربونا وثقفونا وألبسونا (دثار خزٍ ناعم الأسلاك منغوم الحفيف)، كان وجودهم بيننا مظلة أمان ووثيقة تأمين شاملة ضد المخاطر..
حليلم جبارين الكسور فرتاقين ام لبوس لويعة الفرسان..
أما الموز ف..
الأيام بتوريهو.
وماتنسوا التبرع لعلاج شباب الثورة وأسر الشهداء المحتاجين.

شكرا.
ابداع ما بعده ابداع.