رثاء شهيد

08:26 PM January, 13 2022

سودانيز اون لاين
زهير ابو الزهراء-السودان
مكتبتى
رابط مختصر

https://top4top.io/

أحييي عليك ياولدي
سكبت عليك دموع الدم
وراك انت انفطر قلبي
شفت الويل غشاني الهم
ما ممكن تكون كتلوك
ياخ يا ريتني بتوهم
صغير وانت وشبابك غض
وبالجاي أكيد تحلم
وكيف تصبح علي واطة
وانده ليك وما تنضم
وما أسمع كلامك لي
حاضر يمة أيوة نعم
وكاتلك كيف ينوم بالليل
وليلو طويلو عذاب وندم
شال الفرحة من أمك
وهي الراجياك تتقدم
ودايرة تشوفك احسن زول
وشايلة جناك وتتبسم
شجاع انت فديت وطنك
دفعت الروح سخيت بالدم
مشيت لرب رحيم وودود
ونحن عليك نترحم
وفي الجنات مكانك فوووق
ووسط الشهداء تتكرم
وأملك بكرة يتحقق
وطن شامخ عزيز وأشم

نهى محمد الأمين
١٣ يناير ٢٠٢٢

دايما مبتسمين
ودايما انسانيين
ودايما واعيين
ودايما جميلين

رحمهم الله اجمعين
وعوضهم شبابهم جنة عرضها السماوات والارض
وربط علي قلب اهلهم ومحبيهم
واقتص من قاتليهم
الهم اميين يا رب العالمين